TIRANË, 21 korrik, ATSH/ Përveç golit që i dha Spanjës titullin e kampiones së botës, Ferran Torres njihet edhe për angazhimin e tij në mbrojtje të kafshëve, veçanërisht të qenve endacakë.

Sulmuesi i Barcelonës është ambasador i organizatës Wild at Heart Foundation që prej vitit 2021, duke mbështetur fushatat për shpëtimin dhe adoptimin e qenve të braktisur. Organizata vlerëson se në botë ka rreth 600 milionë qen endacakë, ndaj synon të rrisë ndërgjegjësimin për këtë problem global.

Dashuria e Torres për qentë lidhet me fëmijërinë e tij. Pas humbjes së qenit të parë, Rex, ai bëri tatuazh emrin e tij, ndërsa motra e tij zgjodhi të bënte tatuazh portretin e qenit, si një kujtim të përhershëm.

Sot, futbollisti jeton me disa qen të adoptuar, mes tyre Minnie, Lluna dhe Milo, duke promovuar vazhdimisht adoptimin në vend të blerjes së kafshëve. Përmes platformës së tij publike, Ferran Torres vazhdon të përdorë famën jo vetëm për sukseset në futboll, por edhe për të mbështetur kauzën e mbrojtjes së kafshëve të braktisura.

The post Heroi i finales, Ferran Torres, edhe zë i mbrojtjes së kafshëve endacake appeared first on Agjencia Telegrafike Shqiptare.

TIRANË, 21 korrik/ATSH-Maela Marini/ Në kuadër të projektit “Smart City”, të gjithë inspektorët në vend do të pajisen me kamera trupore inteligjente brenda një periudhe prej 8 deri në 9 muajsh.

Lajmin e bëri të ditur sot nga Gjirokastra Inspektori i Përgjithshëm, Dashnor Sula, i cili tha se teknologjia e re do të shërbejë për rritjen e transparencës, gjurmueshmërisë së kontrolleve dhe parandalimin e korrupsionit në trupën e inspektimit.

“Kam fatin që sot nga Gjirokastra të lançoj për herë të parë një lajm me të vërtetë me vlerë për trupën e inspektimit në të gjithë Republikën e Shqipërisë”, u shpreh Sula, duke theksuar mbështetjen e kryeministrit Edi Rama për modernizimin e sistemit të inspektimit.

Sula bëri të ditur se kamerat trupore do të jenë të një niveli të lartë teknologjik, të integruara me inteligjencën artificiale, duke mundësuar identifikimin e problematikave që mund të shfaqen gjatë kontrolleve në terren.

Sipas tij, sistemi do të mundësojë gjithashtu transmetimin e informacionit në kohë reale drejt qendrës që do të ngrihet pranë Inspektoratit të Përgjithshëm, duke ndihmuar në evidentimin e rasteve të abuzimit nga inspektorët apo tentativave për korrupsion nga subjektet e inspektuara.

“Ky do të jetë një mekanizëm që do të bëjë të mundur rritjen e transparencës dhe parandalimin e korrupsionit në trupën e inspektorëve në të gjithë vendin”, tha Sula.

Ai nënvizoi se pajisja e inspektorëve me kamera inteligjente do të shoqërohet me një tjetër risi, atë të dixhitalizimit të plotë dhe modernizimit të sistemit të inspektimit.

Sipas Sulës, në sistemin e ri nuk do të jenë më inspektorët ata që do të përcaktojnë subjektet për t’u kontrolluar në terren, por vetë sistemi, i cili do të përzgjedhë subjektet bazuar në indikatorët e riskut.

“Do të jetë vetë sistemi ai që do të përzgjedhë, në bazë të indikatorëve të riskut, subjektet që kanë risk të lartë dhe ndaj të cilëve do të realizohet inspektimi”, deklaroi Inspektori i Përgjithshëm.

Sula tha se dixhitalizimi i sistemit të inspektimit dhe instalimi i kamerave trupore inteligjente për të gjithë inspektorët pritet të përfundojnë brenda 8 deri në 9 muajsh, me synimin për të krijuar një trup inspektimi modern, transparent dhe të monitorueshëm në kohë reale në të gjithë territorin e vendit.

Kjo teknologji do të mundësojë monitorimin dhe ndërveprimin në kohë reale, duke garantuar një sistem inspektimi më transparent, kontrolle më të gjurmueshme dhe inspektorë më të përgjegjshëm.

/a.f/

The post Sula: Inspektorët do të pajisen me kamera trupore inteligjente appeared first on Agjencia Telegrafike Shqiptare.

UASHINGTON, 21 korrik /ATSH/-  Presidenti amerikan, Donald Trump deklaroi sot se Shtetet e Bashkuara të Amerikës nuk janë të interesuara për zhvillimin e bisedimeve me Iranin në këtë fazë, duke thënë se Teherani duhet të tregojë gatishmëri për një dialog “kuptimplotë”, sipas AP.

“Ata duan me dëshpërim të takohen. Por derisa të jenë gati për një takim serioz, ne nuk kemi interes të takohemi”, tha Trump para gazetarëve në Zyrën Ovale të Shtëpisë së Bardhë.

Sipas tij, zyrtarët iranianë kanë shprehur përmes kanaleve diplomatike, dëshirën për të zhvilluar bisedime për t’i dhënë fund konfliktit, pasi Irani po përballet me goditje të rënda.

Deklarata e Trump vjen në një kohë kur marrëveshja e përkohshme mes SHBA-së dhe Iranit për ndalimin e luftimeve është drejt dështimit, ndërsa dy vendet kanë vijuar shkëmbimin e sulmeve për 10 ditë radhazi.

Gjatë përshkallëzimit të fundit, Irani sulmoi një anije-cisternë në Ngushticën e Hormuzit, duke detyruar ekuipazhin të braktiste anijen, ndërsa ushtria amerikane kreu sulme ajrore ndaj objektivave në Iran.

Ndërkohë, ministri i Brendshëm iranian, Eskandar Momeni, është takuar me ndërmjetësues në Pakistan, në përpjekje për të shpëtuar marrëveshjen e përkohshme mes Uashingtonit dhe Teheranit.

Megjithatë, ende nuk është e qartë nëse mund të arrihet një pakt i ri për ndalimin e luftimeve.

Në të njëjtën ditë, Trump priti në Shtëpinë e Bardhë presidentin e Libanit, Joseph Aoun, në një takim që zhvillohet në një kohë kur Libani dhe Izraeli po zhvillojnë bisedime të drejtpërdrejta me ndërmjetësimin e SHBA-së, me synim uljen e tensioneve pas disa muajsh përleshjesh mes Izraelit dhe Hezbollahut, grupit të mbështetur nga Irani.

Konflikti ka sjellë edhe viktima amerikane. Ushtria amerikane njoftoi se një ushtar amerikan, rreshteri Michael Emmanuel Swinton, 30 vjeç, nga Karolina e Veriut, humbi jetën gjatë çmontimit të një droni në Irak.

Një ditë më parë u konfirmua vdekja e dy ushtarëve të tjerë amerikanë në Jordani, gjatë mbrojtjes ndaj sulmeve iraniane me raketa balistike dhe dronë.

Sipas të dhënave të ushtrisë amerikane, 17 ushtarë amerikanë kanë humbur jetën që nga fillimi i luftës.

Trump paralajmëroi se çdo sulm i ri iranian ndaj forcave amerikane do të pasohet nga kundërpërgjigje e shumëfishtë.

Ndërkohë, Senati amerikan pritet të shqyrtojë kërkesën e administratës Trump për një paketë shtesë financimi prej 87,6 miliardë dollarësh, kryesisht për të mbuluar kostot e luftës.

Në seancë pritet të dëshmojnë sekretari i Mbrojtjes, Pete Hegseth dhe kreu i Shtabit të Përbashkët të Ushtrisë, gjenerali John Caine.

Përplasja mes SHBA-së dhe Iranit vijon të mbetet e hapur, ndërsa përpjekjet diplomatike për një marrëveshje të re, ende nuk kanë sjellë rezultat konkret. //a.i/

The post UASHINGTON – Trump: SHBA-ja nuk ka interes për negociata me Iranin për momentin appeared first on Agjencia Telegrafike Shqiptare.

TIRANË, 21 korrik/ATSH/ Në Kombinat ka nisur puna për ndërtimin e 223 apartamenteve të reja, të cilat do t’u shpërndahen familjeve përfituese në kuadër të programit të rindërtimit.

Zëvendëskryeministrja Albana Koçiu ishte sot në rrugën “Shaban Bardhoshi”, ku po zhvillohen punimet pas dakordësimit për prishjen e një godine, në truallin e së cilës do të ndërtohen apartamentet e reja.

“Kemi nisur punën për ndërtimin e apartamenteve që do t’u shpërndahen banorëve, ndaj të cilëve kemi detyrimin të garantojmë një banesë pas dëmtimeve që pësuan shtëpitë e tyre. Kjo ka qenë një kërkesë e hershme, por procesi është vonuar për shkak të procedurave të gjata gjyqësore dhe sigurimeve të njëpasnjëshme të padive. Bëhet fjalë për dy prona me dy pretendues të ndryshëm në këtë zonë, çka e ka bërë të pamundur nisjen më herët të punimeve. Lajmi i mirë është se sot jemi në kushtet për të prishur këtë godinë dhe, me lirimin e sheshit, i hapet rruga ndërtimit të shpejtë”, deklaroi Koçiu.

Sipas saj, deri më tani janë shpërndarë 664 apartamente dhe familjet përfituese kanë hyrë në banesat e tyre.

“Në këtë zonë, pas lirimit të sheshit, do të ndërtohen tre pallate me gjithsej 223 apartamente. Ndërkohë, në godinën përballë do të shpërndahen edhe 75 apartamente të tjera, me short gjatë muajit shtator. Gjithashtu, kanë nisur procedurat për dy godina të tjera ‘me çelësa në dorë’, të cilat do të ofrojnë edhe 100 apartamente të tjera”, shtoi ajo.

Paralelisht me ndërtimin e banesave, Bashkia e Tiranës do të ndërhyjë për rehabilitimin e infrastrukturës përreth, me synimin që zona e dedikuar për procesin e rindërtimit të zhvillohet si një kompleks modern banimi, në përputhje me standardet e kërkuara.

1 nga 2

/m.m/a.f/

The post Rindërtimi, Koçiu: Nis puna për ndërtimin e 223 apartamenteve të reja në Kombinat appeared first on Agjencia Telegrafike Shqiptare.

BUDAPEST, 21 korrik /ATSH/- Prokuroria dhe hetuesit e autoritetit tatimor në Hungari kanë bastisur sot zyrat ku ndodhen serverët e të dhënave të përdorura nga partia “Fidesz” e ish-kryeministrit Viktor Orban, në kuadër të një hetimi për dyshime për përvetësim fondesh dhe vepra të tjera penale, sipas AP.

Zëdhënësja e prokurorisë së qarkut Bács-Kiskun, Marianna Bodó, tha se operacioni lidhet me një hetim mbi dyshimin për keqpërdorimin e fondeve të dhëna, përmes Fondit Kombëtar të Kulturës të Hungarisë gjatë kohës kur qeveria drejtohej nga Orban.

Sipas autoriteteve, gjashtë zyrtarë aktualë dhe ish-zyrtarë janë akuzuar për keqpërdorimin e rreth 17 miliardë forintëve hungarezë (rreth 53,5 milionë dollarë). Ata i kanë mohuar akuzat.

Hetuesit dyshojnë se fondet janë shpërndarë në mënyrë jo transparente për artistë dhe figura të lidhura me partinë “Fidesz”.

Disa prej përfituesve thuhet se kanë marrë pjesë edhe në fushata elektorale në mbështetje të kësaj force politike.

Autoriteti Kombëtar i Tatimeve dhe Doganave ka asistuar në operacionin e kontrollit, ndërsa prokuroria nuk dha detaje të tjera, duke thënë se informacioni i mëtejshëm mund të dëmtojë hetimin.

Partia “Fidesz” e ka dënuar bastisjen, duke akuzuar qeverinë e re të kryeministrit pro-evropian, Péter Magyar dhe partinë e tij “Tisza” se po përdorin sistemin e drejtësisë për ta shkatërruar politikisht.

Në një reagim në rrjetet sociale, partia “Fidesz” tha se hetuesit kanë vepruar “pa njoftim paraprak” dhe se synimi ishte marrja e kontrollit mbi sistemin e komunikimit dhe bazat e të dhënave të partisë.

Sipas saj, një veprim i tillë nuk kishte ndodhur në Hungari që prej përfundimit të komunizmit në vitin 1990.

Viktor Orban dhe “Fidesz” qeverisën Hungarinë për 16 vite, deri në humbjen e thellë në zgjedhjet e prillit.

Gjatë periudhës së tyre në pushtet, ata janë përballur vazhdimisht, me akuza për korrupsion, dobësim të institucioneve demokratike dhe ndërhyrje në sistemin e drejtësisë.

Pas marrjes së pushtetit në maj, kryeministri Péter Magyar ka nisur një seri ndryshimesh institucionale, duke larguar disa zyrtarë të emëruar gjatë qeverisjes së Orban.

Ai e ka përshkruar sistemin e mëparshëm si një “strukturë mafioze”, ndërsa kundërshtarët e tij e akuzojnë për hakmarrje politike.

Përplasja mes qeverisë së re dhe kampit të Orban pritet të vazhdojë, ndërsa hetimi për fondet publike dhe rolin e figurave të lidhura me partinë “Fidesz” mbetet në zhvillim. //a.i/

The post HUNGARI – Bastiset selia e të dhënave të partisë së Orban, nis hetimi për përvetësim fondesh appeared first on Agjencia Telegrafike Shqiptare.

TIRANË, 21 korrik/ATSH-Maela Marini/ Kryeministri Edi Rama deklaroi sot se Paketa e Maleve synon të vërë në lëvizje ekonominë e trashëgimtarëve të pronave në territore ku toka nuk është ndarë sipas ligjit 7501.

Në një bashkëbisedim me banorët e Thethit mbi Paketën e Maleve, Rama u shpreh se “Thethi ka qenë një nga arsyet e Paketës së Maleve dhe është një nga pasqyrat më shembullore të potencialit e aftësive për të bërë sukses dhe e problematikave që duhen adresuar”.

Kryeministri theksoi se për Paketën e Maleve ka një keqkuptim shumë të madh, ndaj po bëhet edhe ky bashkëbisedim në një truall ku trashëgimtarët nuk kishin asnjë shans të bënin zhvillim për shkak të pamundësisë ligjore.

Rama theksoi se të gjithë ata që kanë një pronë të trashëguar dhe që janë jashtë perimetrit të legjislacionit ekzistues të ligjit 7501 duhet të dëgjojnë dhe të kuptojnë deri në fund se për çfarë bëhet fjalë dhe të mos bien pre e gjithë marrëzive dhe gjithë ligësive që thuhen lidhur me këtë proces.

Duke iu referuar komenteve që i vijnë për Paketën e Maleve, Rama u shpreh se pretendimet për dhënien e tokës te oligarkët apo sjelljen e njerëzve me lekë nga qyteti për të pushtuar malet janë një imagjinatë që e dominon opinionin negativ lidhur me Paketën e Maleve.

“Paketa e Maleve është ekzaktësisht e kundërta e të gjitha këtyre që thuhen. Paketa e Maleve nuk është as për uzurpues, as për biznesmenë që nuk kanë lidhje dhe nuk kanë marrëveshje me ju. As për oligarkë, as për asgjë tjetër, përveçse për të vënë në lëvizje ekonominë e trashëgimtarëve të pronave në territore ku toka nuk është ndarë sipas ligjit 7501”, theksoi Rama.

Kryeministri theksoi se në këto territore nuk e kanë pranuar ligjin 7501 dhe e kanë ndarë tokën mes tyre me kufijtë e vjetër.

“Përgjithësisht, jo gjithmonë, por përgjithësisht nuk kanë konflikte me njëri-tjetrin. Por dhe për të adresuar aspektin tjetër që ka të bëjë me territore ku nuk ka asnjë mundësi të jetë zhvillimi përveç turizmit. Kjo është Paketa e Maleve”, tha Rama.

/a.f/

The post Rama: Paketa e Maleve nuk është për oligarkët, por për trashëgimtarët e pronave appeared first on Agjencia Telegrafike Shqiptare.

TIRANË, 21 korrik/ATSH/ Shqipëria është bërë sërish pjesë e “Best Tourism Villages 2026”, iniciativë e Organizatës Botërore të Turizmit që vlerëson fshatrat ku trashëgimia kulturore, natyra dhe zhvillimi i qëndrueshëm ecin krah për krah.

Lajmin e bëri të ditur sot ministri i Turizmit, Kulturës dhe Sportit, Blendi Gonxhja, i cili vlerësoi se kjo nismë promovon modele të turizmit rural që ruajnë identitetin lokal, fuqizojnë komunitetet dhe mbështesin ekonominë vendase.

Sipas ministrit Gonxhja, “Shqipëria vijon të dëshmojë se fshatrat e saj janë një thesar i identitetit kombëtar”.

“Me trashëgiminë e saj të pasur kulturore materiale dhe jomateriale, peizazhet e mrekullueshme natyrore, traditat e gjalla dhe mikpritjen autentike, Shqipëria vijon të dëshmojë se fshatrat e saj janë një thesar i identitetit kombëtar dhe një nga asetet më të çmuara të zhvillimit të turizmit të qëndrueshëm, duke prezantuar denjësisht vlerat shqiptare në një nga iniciativat më të rëndësishme ndërkombëtare të sektorit”, tha Gonxhja.

/m.m/a.f/

The post Shqipëria, pjesë e nismës së OBT-së “Best Tourism Villages 2026” appeared first on Agjencia Telegrafike Shqiptare.

TIRANË, 21 korrik/ATSH-Maela Marini/ Kryeministri Edi Rama deklaroi sot se zhvillimi i pakontrolluar e dëmton turizmin në Theth.

Në një bashkëbisedim me banorët e Thethit mbi Paketën e Maleve, Rama u shpreh se nëse në Theth nuk do të ishte ndërhyrë me shpejtësi për prishjen e sturkturave pa leje, numri i tursitëve do të binte me shpejtësi.

“Nëse ne nuk do kishim ndërhyrë dhe nëse nuk do kishim shëruar me shpejtësi atë plagën mu në zemër të Thethit që i mori fytyrën Thethit, do të binte numri i atyre që do interesoheshin për Thethin. Turistët vijnë te fusha dhe rrinë aty me orë sepse është magjike. Pra duhet që ju të jeni veç në sipërmarrje dhe të jeni bashkë në produkt. Produkti juaj është Thethi”, tha Rama.

Rama solli në vëmendje reagimin e banorëve të Korsikës për të mos lejuar ndërtime.

“Korsikanët e dinë shumë mirë. Ata shesin Korsikën, nuk shesin thjesht hotelin e vet. Po të jetë Korsika rrëmujë, nuk vjen njeri te hoteli”, tha Rama.

Ndërkohë duke iu drejtuar banorëve të Thethit, Rama tha se ata kanë mundësinë që të zhvillojnë turizmin e luksit.

“Zvicrën e vogël ju e keni këtu vetëm në duart tuaja. Mundësinë që këtu të shkohet në një turizëm luksi”, tha Rama.

/a.f/

The post Rama: Thethi, potencial për turizmin e luksit, zhvillimi i pakontrolluar e dëmton appeared first on Agjencia Telegrafike Shqiptare.

LONDËR, 21 korrik /ATSH/- Pas disa ditësh përplasjeje me Shtetet e Bashkuara të Amerikës për kontrollin e Ngushticës së Hormuzit, një nga rrugët më të rëndësishme të transportit të naftës në botë, udhëheqja iraniane përballet me një dilemë të madhe, shkruan BBC.

Teherani ka disa mundësi, por asnjëra nuk i garanton një rezultat të favorshëm.

Opsioni i parë: Arritja e një marrëveshjeje me SHBA-në. Irani mund të pranojë kërkesat amerikane për garantimin e lëvizjes së lirë të anijeve tregtare në Hormuz, të kufizojë rezervat e uraniumit të pasuruar dhe të lejojë kontrolle më të rrepta ndërkombëtare mbi programin bërthamor.

Në këmbim, Teherani do të kërkonte lehtësimin e sanksioneve, ndalimin e presionit ushtarak amerikan dhe garanci kundër sulmeve të reja.

Kjo do të ishte zgjidhja më pak e kushtueshme për ekonominë iraniane, por politikisht do të ishte shumë e vështirë.

Në Iran, veçanërisht mes rrymave konservatore, një marrëveshje e tillë mund të shihej si dorëzim përballë presionit amerikan.

Opsioni i dytë: Përshkallëzim i luftës.
Teherani mund të zgjedhë rritjen e sulmeve ndaj bazave amerikane në rajon, anijeve tregtare dhe infrastrukturës energjetike në vendet e Gjirit Persik.

Qëllimi do të ishte rritja e kostove ekonomike për SHBA-në dhe aleatët e saj, përmes rritjes së çmimeve të energjisë dhe destabilizimit të tregjeve globale.

Por, kjo rrugë mbart rrezikun më të madh, pasi një sulm me viktima të shumta ose dëmtime serioze ndaj vendeve të Gjirit, mund të sjellë një përfshirje më të gjerë të shteteve të tjera dhe një konflikt rajonal.

Opsioni i tretë: Ruajtja e tensioneve aktuale.
Irani mund të vazhdojë të ushtrojë presion mbi trafikun detar dhe tregjet e energjisë, por pa kaluar në një luftë të plotë me SHBA-në.

Kjo qasje lidhet me strategjinë tradicionale të Teheranit, të rezistojë dhe të presë që kundërshtari të lodhet nga konflikti.

Për udhëheqjen iraniane, edhe mbijetesa përballë një fuqie më të madhe mund të paraqitet si një fitore.

Megjithatë, kjo strategji ka edhe rreziqe. Sanksionet, dëmet nga lufta dhe kriza ekonomike po rrisin presionin brenda vendit.

Për më tepër, nëse Hormuzi mbetet i pasigurt për një kohë të gjatë, vendet e tjera mund të kërkojnë rrugë alternative për transportin e energjisë, duke ulur ndikimin strategjik të Iranit.

Përplasjet brenda udhëheqjes iraniane

Një tjetër problem është mungesa e qartësisë se kush ka kontrollin përfundimtar mbi vendimet strategjike të Iranit.

Presidenti Masoud Pezeshkian dhe diplomatët e tij, mund të favorizojnë një marrëveshje për të ulur presionin ekonomik dhe për të rikthyer stabilitetin.

Ndërsa forcat konservatore, institucionet e fuqishme jo të zgjedhura dhe Garda Revolucionare mund të kundërshtojnë çdo lëshim, duke e parë atë si një dobësim të regjimit.

Garda Revolucionare ka një rol kyç në programin raketor të Iranit, aleancat rajonale dhe strategjinë për Ngushticën e Hormuzit.

Megjithatë, ende nuk është e qartë se sa ndikim kanë komandantët ushtarakë në vendimet për përshkallëzim apo negociata.

Populli iranian përballet me pasojat

Ndërsa udhëheqësit iranianë flasin për “rezistencë”, shumë qytetarë po përballen me vështirësi të mëdha ekonomike.

Disa raportojnë rritje të çmimeve, ndërprerje të energjisë dhe ujit, humbje vendesh pune dhe pasiguri për të ardhmen.

Për shumë iranianë, vazhdimi i konfliktit sjell frikë për shkatërrimin e mëtejshëm të ekonomisë dhe infrastrukturës.

Përballja mes Iranit dhe SHBA-së mund të vazhdojë për shumë muaj, përmes sulmeve, ndërmjetësimeve dhe armëpushimeve të përkohshme.

Pyetja kryesore mbetet nëse Teherani mund ta përdorë Ngushticën e Hormuzit si mjet presioni, pa shkaktuar një luftë të gjerë ose pa humbur gradualisht rëndësinë e saj strategjike. //a.i/

The post ANALIZË – Pse Irani po rrezikon kaq shumë për Ngushticën strategjike të Hormuzit? appeared first on Agjencia Telegrafike Shqiptare.

ANKARA, 21 korrik /ATSH -AA/ – Ora atomike me rubidium e zhvilluar nga Turqia është lëshuar në hapësirë me misionin Transporter-17 të SpaceX, tha ministri i Industrisë dhe Teknologjisë, Mehmet Fatih Kacir.

Kacir tha në platformën amerikane të mediave sociale X se gjithashtu është marrë me sukses sinjali i parë nga anija kozmike që mbante Standardin Atomik të Frekuencës me Rubidium (RAFS).

“Ora Atomike me Rubidium, e cila është kritike për sistemin rajonal të pozicionimit dhe sinkronizimit, i përfshirë në objektivat strategjike të Programit tonë Kombëtar të Hapësirës, u lëshua me sukses në hapësirë si pjesë e misionit Transporter-17 të SpaceX”, tha ai.

Orët atomike matin kohën me një saktësi jashtëzakonisht të lartë duke përdorur frekuencën e qëndrueshme të rezonancës që prodhohet kur atomet kalojnë midis niveleve të energjisë. Një atom rubidiumi lëkundet 6.834.682.610 herë në sekondë midis dy niveleve të tilla.

Ora u zhvillua nën udhëheqjen e Agjencisë Hapësinore të Turqisë, me Institutin Kombëtar të Metrologjisë të Këshillit të Kërkimeve Shkencore dhe Teknologjike të Turqisë (TÜBİTAK) si kontraktor kryesor. Në projekt kontribuuan gjithashtu Instituti i Kërkimeve të Teknologjive Hapësinore TUBİTAK dhe ITUNOVA.

Kjo teknologji do të testohet në një CubeSat në kushte hapësinore, duke ofruar të dhëna për sistemet e ardhshme satelitore, infrastrukturën e komunikimit, aplikacionet e navigimit dhe misionet shkencore.

Kacir tha se projekti shënon një hap të rëndësishëm në forcimin e kapaciteteve vendore të Turqisë në teknologjitë e kohëmatjes dhe frekuencës me bazë në hapësirë.

Pas përfundimit të procesit të validimit në orbitë, Turqia do t’u bashkohet vendeve që zotërojnë teknologjinë e orëve atomike të testuara në hapësirë, tha ai.

“Deri tani, kjo teknologji kritike është siguruar nga jashtë”, tha Kacir, duke shtuar se prodhimi vendor do të ulë varësinë nga jashtë, duke ofruar avantazhe në kosto dhe furnizim për prodhuesit e satelitëve.  /os/

The post ANKARA – Turqia lëshon në hapësirë orën e parë atomike appeared first on Agjencia Telegrafike Shqiptare.

TIRANË, 21 korrik /ATSH/ – Drejtuesja e Agjencisë së Zhvillimit të Territorit, Adelajda Roka, e pranishme në takimin e Kryeministrit Edi Rama me banorët e Thethit, ku u diskutua mbi Paketën e Maleve, deklaroi se asistenca e Agjencisë që ajo drejton do të jetë e pranishme që nga momenti i parë i aplikimit deri në finalizimin e marrëveshjes mes pronarëve dhe Ministrisë së Ekonomisë.

Roka u bëri apel aplikuesve të Paketës së Maleve që t’u qëndrojnë besnikë projekteve të paraqitura në aplikim, pasi ligji nuk lejon ndryshime të projektit gjatë zbatimit dhe çdo devijim do të konsiderohet shkelje ligjore.

“Duam të vijojmë me një lehtësi shumë të madhe për të gjithë ata që aplikojnë për Paketën e Maleve. Pranë Agjencisë së Zhvillimit të Territorit, e cila funksionon si sekretariat me qëllim koordinimin e të gjithë procedurës dhe lehtësimin sa më shumë të saj, qoftë edhe për nënshkrimin e marrëveshjes me ministrin dhe më pas certifikimin, kemi ngritur një strukturë të dedikuar për ju.

Qëllimi është që të merrni lejet përkatëse brenda një afati kohor proceduralisht në favorin tuaj. Kemi përcaktuar një afat për secilin aplikant që plotëson dokumentacionin, i cili do të jetë i asistuar nga ne. Kemi pasur kërkesa dhe takime me grupe zhvilluesish nga Vau i Dejës dhe zona të tjera, ku kemi dëgjuar problematikat tuaja, jo vetëm për hartimin e projektit, i cili duhet të jetë cilësor, por edhe për procesin vijues të pajisjes me leje”, tha Roka.

Ajo theksoi se aplikuesit duhet të tregojnë kujdes gjatë hartimit të projekteve, pasi ato duhet të përputhen me zbatimin përfundimtar.

“Shumë prej jush që keni aplikuar, ndoshta të orientuar gabimisht nga arkitektët lokalë, ju kërkojmë që të na lejoni t’ju ndihmojmë. Ligji ju lejon të aplikoni drejtpërdrejt për lejen e ndërtimit. Asistenca jonë do të jetë në të gjitha hallkat e tjera.

Do të asistoheni nga Agjencia për marrjen e të gjitha autorizimeve dhe për t’u pajisur me leje. Projekti në AZHT duhet të jetë i njëjtë me atë që do të aplikohet dhe realizohet, pasi kemi pasur raste të ndryshimeve që për ju mund të duken të vogla, por që ligji nuk i lejon.

Kemi arkitektë dhe një pjesë të stafit të Agjencisë që do t’ju asistojnë deri në momentin kur do të nënshkruani marrëveshjen me Ministrinë e Ekonomisë”, përfundoi Roka.

The post Paketa e Maleve, Roka: Aplikuesit do të asistohen nga fillimi i procedurave deri në finalizimin e marrëveshjeve appeared first on Agjencia Telegrafike Shqiptare.

TIRANË, 21 korrik/ATSH-Maela Marini/ Kryeministri Edi Rama sqaroi sot nga Thethi procedurën se si do të funksionojë Paketa e Maleve për aplikantët në këtë program.

Në një bahskëbisedim me banorë të Thethit, Rama solli si shembull projektin e tre vëllezërve të cilët përmes Paketës së Maleve do të ndërtojnë në tokën e të parëve të tyre në Theth.

“Kjo pronë sot është shtet. Pra, janë pronarë që nuk e posedojnë pronën e tyre në kuptimin e ligjit. Kadastra nuk ka në këtë territor asgjë tjetër përveçse pronë shtet. Është shumë e rëndësishme të kuptohet kjo dhe kjo shpjegon pse ne kemi vendosur atë 1 euron”, tha Rama.

Sipas tij, “në momentin kur merret leja, ata do të marrin dhe pronën me 1 euro në perimetrin e përcaktuar”.

“Në momentin kur ndërtimi do të mbarojë, ata do të marrin hipotekën dhe prona do të bëhet e tyrja. Ky është procesi dhe kjo shpjegon pse nuk qëndron historia me fantazma, me biznesmenë, me oligarkë, me alienë që do të vijnë nëpër male, të marrin tokat e njerëzve që i kanë trashëguar”, u shpreh Rama.

Kushdo që pretendon të kundërtën, sipas Ramës është krejtësisht i painformuar.

“Nuk ka Zot që vjen dhe i merr tokën Marianit këtu nga qyteti se e sjell këtu qeveria. Kjo është fantazi e sëmurë siç është e sëmurë edhe gjithë fantazia tjetër që ata që quhen oligarkë paskan vajtur dhe paskan pushtuar toka. Nuk kanë pushtuar ata asnjë tokë. Kanë bërë marrëveshje me pronarët ekzistues, komplet tjetër histori”, shtoi Rama.

/a.f/

The post Rama për Paketën e Maleve: Prona përfitohet me 1 euro kur merret leja për zhvillim appeared first on Agjencia Telegrafike Shqiptare.

PRISHTINË, 21 korrik/ATSH/ Shtetet e Bashkuara të Amerikës po presin hapa konkretë nga Kosova për të çpezulluar dhe nisur sërish, më pastaj, dialogun strategjik me njëra-tjetrën.

Sipas përfaqësisë së SHBA-së në Prishtinë, gjithçka do të varet nga krijimi i kushteve të përshtatshme dhe nga funksionalizimi i plotë i institucioneve në vend, ndërsa që potencohet, po ashtu, edhe përmbushja e zotimeve të Kosovës ndaj komunitetit serb.

Në një përgjigje për KosovaPress, një zëdhënës i Ambasadës së SHBA-së në Prishtinë thotë se ekziston potencial i madh për zgjerimin e bashkëpunimit dypalësh në fusha si energjia, siguria kibernetike, mbrojtja, infrastruktura dhe teknologjia.

Megjithatë, ai rikujton se dialogu strategjik SHBA–Kosovë u pezullua në mënyrë të pacaktuar në shtator të vitit 2025 për shkak të shqetësimeve lidhur me veprimet e qeverisë në detyrë.

“Ne presim që të zhvillojmë një dialog strategjik me Kosovën kur të krijohen kushtet e duhura. Ekziston një mundësi e madhe për zgjerimin e marrëdhënieve tona dypalëshe në shumë fusha që do të përfitonin nga kuadri i një dialogu strategjik, nga energjia dhe siguria kibernetike te bashkëpunimi në mbrojtje, zhvillimi i infrastrukturës dhe sektori i teknologjisë. Një bashkëpunim i tillë i thelluar kërkon që të gjitha institucionet qeverisëse të jenë plotësisht të konstituuara dhe funksionale”, thuhet në përgjigjen e Ambasadës së SHBA-së në Prishtinë. ” Shtetet e Bashkuara pezulluan në mënyrë të pacaktuar dialogun strategjik SHBA–Kosovë në shtator të vitit 2025, për shkak të shqetësimeve lidhur me veprimet që kishte ndërmarrë qeveria në detyrë. Për të rifilluar planifikimin për një dialog strategjik, duam të shohim hapa konkretë nga qeveria në detyrë për të çuar përpara qëllimin tonë të përbashkët për forcimin e paqes dhe stabilitetit si bazë për prosperitet të ndërsjellë ekonomik, përfshirë përmbushjen nga Kosova të zotimeve të saj në raport me serbët e Kosovës”.

KosovaPress ka dërguar pyetje te qeveria në detyrë, në lidhje me atë se çfarë hapa konkretë ka bërë Kosova për të kthyer diskutimet për dialogun strategjik me SHBA-në. Përgjigje nuk mori, që nga e hëna.

/Kosovapress/

The post Nga pezullimi te kthimi, ja çfarë kërkon SHBA nga Kosova për dialogun strategjik appeared first on Agjencia Telegrafike Shqiptare.

TIRANË, 21 korrik /ATSH/ Presidenti i Komitetit Olimpik Kombëtar Shqiptar (KOKSH), Fidel Ylli, priti në një takim në zyrën e tij Koordinatorin e Programit të Agjencisë Turke për Bashkëpunim dhe Koordinim (TİKA) në Tiranë, Murat Ölçenoğlu, ku u diskutuan mundësitë e bashkëpunimit në projekte që mbështesin zhvillimin e sportit dhe infrastrukturës sportive në Shqipëri.

Sipas njoftimit të KOKSH-it, takimi kishte si qëllim njohjen reciproke dhe shqyrtimin e mundësive për realizimin e projekteve të përbashkëta në shërbim të sportit shqiptar.

Gjatë bisedës, Ylli prezantoi arritjet e viteve të fundit, projektet strategjike dhe vizionin për zhvillimin e sportit në vend.

Një vëmendje e veçantë iu kushtua projektit “Tirana Olympic City”, i cilësuar si projekti më ambicioz për krijimin e një qendre moderne sportive me standarde ndërkombëtare, që synon të transformojë infrastrukturën sportive në Shqipëri dhe të krijojë kushte më të mira për sportistët dhe brezat e rinj.

Në njoftim theksohet se TİKA, e cila vepron në më shumë se 170 vende, është një nga agjencitë kryesore të bashkëpunimit për zhvillim të Turqisë, me përvojë në zbatimin e projekteve në fusha si arsimi, kultura, shëndetësia, infrastruktura dhe sporti.

Presidenti i KOKSH-it, Fidel Ylli, e vlerësoi takimin si një hap të rëndësishëm drejt nismave konkrete të bashkëpunimit në të ardhmen në mbështetje të zhvillimit të sportit shqiptar.

/gj.m/j.p/

The post Ylli pret koordinatorin e TİKA-s në Tiranë, diskutohet bashkëpunimi për zhvillimin e sportit dhe infrastrukturës sportive appeared first on Agjencia Telegrafike Shqiptare.

TEL AVIV, 21 korrik /ATSH-DPA/ – Ministri izraelit i Financave, Bezalel Smotrich, deklaroi sot se Izraeli nuk ka interes të përfshihet në konfliktet e tanishme mes Shteteve të Bashkuara të Amerikës dhe Iranit.

“Situata aktuale është e favorshme për ne dhe nuk kemi interes të përfshihemi në të”, tha ministri i krahut të djathtë në një konferencë, sipas disa mediave izraelite.

Smotrich u shpreh se objektivi kryesor i Izraelit mbetet dobësimi i udhëheqjes iraniane dhe se mënyra më e mirë për ta arritur këtë është përmes masave ekonomike.

Konflikti mes SHBA-së dhe Iranit është përshkallëzuar sërish ditët e fundit, me SHBA-në që ka ndërmarrë sulme të përsëritura ajrore ndaj Republikës Islamike, ndërsa Teherani është kundërpërgjigjur duke sulmuar vende të rajonit ku ndodhen baza ushtarake amerikane.

Sipas tekstit, SHBA-ja dhe Izraeli e nisën luftën kundër Iranit së bashku në fund të shkurtit, duke vrarë liderin suprem, Ajatollah Ali Khamenei.

Më pas, Teherani bllokoi Ngushticën e Hormuzit, duke shkaktuar rritje të inflacionit në mbarë botën.

Një armëpushim u arrit fillimisht në fillim të prillit dhe në qershor Uashingtoni dhe Teherani nënshkruan një memorandum mirëkuptimi.

Megjithatë, rifillimi i luftimeve tregon se një zgjidhje afatgjatë e konfliktit mbetet ende e largët./  /Ad.Ab./ a.jor.

The post TEL AVIV – Smotrich: Izraeli nuk ka interes të përfshihet në konfliktin SHBA-Iran appeared first on Agjencia Telegrafike Shqiptare.

TIRANË, 21 korrik /ATSH/ Autoriteti Kombëtar i Veterinarisë dhe Mbrojtjes së Bimëve (AKVMB) ka intensifikuar kontrollet dhe monitorimin në terren pas shpalljes së gjendjes së jashtëzakonshme veterinare në Republikën e Serbisë, për shkak të përhapjes së Murtajës Afrikane të Derrave (MAD).

Ministria e Bujqësisë dhe Zhvillimit Rural ka urdhëruar ndalimin e importit të derrave të gjallë, produkteve dhe nënprodukteve me origjinë nga derri nga zonat e prekura në territorin e Republikës së Shqipërisë, si masë parandaluese për mbrojtjen e shëndetit të kafshëve.

Në kuadër të zbatimit të këtyre masave, Drejtori i Përgjithshëm i AKVMB-së, Rolandi Meçaj, zhvilloi një takim pune me strukturat e Shërbimit Veterinar Rajonal në Shkodër, ku u vlerësua situata epidemiologjike dhe u diskutuan masat për parandalimin e përhapjes së sëmundjes.

Gjatë takimit u kërkua intensifikimi i monitorimit aktiv në të gjitha fermat e mbarështimit të derrave, si dhe raportimi i përditshëm pranë AKVMB-së mbi kontrollet e kryera dhe gjendjen shëndetësore të fermave.

Në vijim të vizitës, Meçaj inspektoi Pikën e Kalimit Kufitar “Hani i Hotit”, ku u zhvillua një takim me strukturat përgjegjëse të kontrollit kufitar. Në fokus ishte forcimi i bashkëpunimit ndërinstitucional mes Shërbimit Veterinar dhe inspektorëve të Autoritetit Kombëtar të Ushqimit, për kryerjen e kontrolleve të plota fizike dhe dokumentare të çdo ngarkese me kafshë të gjalla.

Sipas AKVMB-së, kontrollet do të vijojnë për të garantuar zbatimin me rigorozitet të ndalimit të hyrjes së derrave dhe produkteve me origjinë nga vendet e prekura nga sëmundja.

Drejtori i Përgjithshëm i AKVMB-së kërkoi gjithashtu monitorimin e mjeteve të transportit të kafshëve në akset kryesore rrugore dhe verifikimin e pajisjes së tyre me Certifikatën e Lëvizjes së Kafshëve.

Vëmendje e veçantë do t’i kushtohet zonave kufitare me Malin e Zi dhe Kosovën, të cilat konsiderohen me rëndësi të veçantë për parandalimin e përhapjes së sëmundjes.

Gjithashtu, AKVMB theksoi rëndësinë e bashkëpunimit mes veterinerëve zyrtarë dhe shoqatave të gjuetarëve për evidentimin dhe raportimin e menjëhershëm të çdo derri të egër të ngordhur apo me shenja klinike të dyshimta, pasi derrat e egër konsiderohen një nga rezervuarët kryesorë të virusit të Murtajës Afrikane të Derrave.

/e.xh/j.p/

The post Masa parandaluese ndaj Murtajës Afrikane të Derrave, forcohen kontrollet në kufi appeared first on Agjencia Telegrafike Shqiptare.

The post Forcohet leku, valutat humbasin terren appeared first on Agjencia Telegrafike Shqiptare.

TIRANË, 21 korrik /ATSH/ Kreu i Prokurorisë së Posaçme kundër Korrupsionit dhe Krimit të Organizuar, Klodian Braho mori pjesë sot në tryezën e konsultimit të Komisionit për Çështjet Ligjore dhe Administratën Publike, në kuadër të procesit të Kontrollit Post-Legjislativ (PLS).

Braho paraqiti të dhëna mbi zbatimin e ligjit antimafia, rezultatet e arritura, vështirësitë praktike të hasura gjatë hetimeve pasurore, si dhe propozime konkrete për përmirësimin e kuadrit ligjor dhe institucional.

Kreu i SPAK, u shpreh se nga ballafaqimi i kontributit të institucionit me draftraportin rezulton se 12 çështjet e ngritura nga Prokuroria e Posaçme janë reflektuar në dokument.

Sipas Brahos, ky është një rezultat pozitiv i procesit të konsultimit dhe tregon se përvoja e institucioneve që zbatojnë ligjin është marrë në konsideratë gjatë hartimit të raportit.

Braho bëri të ditur se propozimet dhe gjetjet e SPAK janë përqendruar në tre drejtime kryesore, duke nisur nga qartësimi i kuadrit ligjor, përfshirë çështje që lidhen me fushën e zbatimit të ligjit dhe rregullimin e veprimit të tij në kohë.

Një tjetër drejtim, sipas Brahos, lidhet me forcimin e garancive procedurale, veçanërisht për të drejtat e palëve të treta, të cilat sipas dispozitave ligjore mund t’u konfiskohet pasuria pa pasur dijeni dhe pa qenë të pranishme në seancë.

Braho theksoi se SPAK ka adresuar edhe pengesat praktike të hetimit pasuror, ku një prej problematikave është heqja e pagesave për marrjen e dokumentacionit.

“Kjo nuk ka të bëjë thjesht me një pagesë, por me mënyrën se si është konceptuar marrja e informacionit nga prokuroria, e cila është trajtuar përmes një vendimi të Këshillit të Ministrave sikur të ishte një aplikim për kryerjen e ndryshimeve në statusin e pasurisë”, tha ai.

Braho vlerësoi se raporti ka integruar në mënyrë të gjerë kontributin e Prokurorisë së Posaçme, duke marrë në konsideratë çështjet e ngritura dhe, në disa raste, duke i zhvilluar më tej ato.

“Sfida mbetet që këto përcaktime të raportit të kthehen në dispozita ligjore të qarta dhe të zbatueshme. SPAK është i gatshëm që në vijim të këtij procesi të kontribuojë në konsultimin e drafteve të tjera ligjore që ne mendojmë se duhet të ndryshohen në këtë ligj”, deklaroi Braho.

/e.i/j.p/

The post SPAK paraqet propozime për përmirësimin e zbatimit të ligjit antimafia appeared first on Agjencia Telegrafike Shqiptare.

TIRANË, 21 korrik /ATSH/ Fondi i garancisë sovrane është rritur nga 3 në 5 miliardë lekë, me synim rritjen e aksesit në financim për sektorin e bujqësisë dhe sektorët e tjerë të ekonomisë.

Ministri i Financave, Petrit Malaj, tha sot në komisionin për Ekonominë, Punësimin dhe Financat se rritja e këtij instrumenti financiar do t’u mundësojë bizneseve të përfitojnë kredi me interesa më të favorshme, ndërsa shteti do të garantojë deri në 70% të vlerës së kredisë.

“Përmes Aktit Normativ për disa shtesa dhe ndryshime në ligjin “Për Buxhetin e vitit 2026”  rritëm fondin e garancisë sovrane nga 3 në 5 miliardë lekë. Kjo është bërë për të rritur mbështetjen për sektorin e bujqësisë, por edhe për të gjithë sektorët e ekonomisë, në mënyrë që të përfitojnë kredi me interesa më të buta dhe t’u garantohet kredia në masën 70%”, u shpreh Malaj.

Sipas ministrit, rreth 82% e ndërmarrjeve që punësojnë fuqinë punëtore në vend kanë nevojë për financim dhe kjo mbështetje synon të rrisë konkurrueshmërinë e tyre në raport me tregun europian.

“Është një mbështetje sot dhe një investim për të nesërmen, për përballjen me tregun europian”, tha Malaj.

Ai theksoi se viti 2026 do të sjellë një paketë të zgjeruar mbështetjeje për fermerët, përmes disa instrumenteve financiare.

“Në vitin 2026 kemi mbështetje si asnjëherë më parë për fermerët: garancia nga 3 në 5 miliardë lekë, mbështetje me grante prej 2 miliardë lekësh, skema e subvencioneve prej 3,2 miliardë lekësh dhe për herë të parë kemi skemën e kompensimit të TVSH-së. Të gjitha bashkë janë mbi 100 milionë euro në dispozicion të bujqësisë”, deklaroi ministri.

Malaj bëri të ditur gjithashtu se po vlerësohet mundësia e krijimit të një skeme kompensimi për fermerët e prekur nga fatkeqësitë natyrore.

“Po vlerësohet skema e kompensimit ndaj fatkeqësive natyrore. Po punohet dhe synimi është t’u vijmë në ndihmë atyre që përballen me këto situata”, përfundoi ministri i Financave.

/e.xh/j.p/

The post Malaj: Garancia sovrane rritet në 5 miliardë lekë, mbi 100 milionë euro për bujqësinë appeared first on Agjencia Telegrafike Shqiptare.

BRUKSEL, 21 korrik /ATSH-DPA/ – Bashkimi Evropian ka vendosur të ndërpresë financimin për Bienalen e Venecias pasi Rusia është përfshirë në edicionin e këtij viti, njoftoi sot një zëdhënës i Komisionit Evropian.

Sipas tij, pas një vlerësimi ligjor dhe rekomandimit të Komisionit Evropian, Agjencia Ekzekutive Evropiane për Arsimin dhe Kulturën (EACEA) vendosi të ndërpresë grantin prej 2,0 milionë eurosh (rreth 2,3 milionë dollarë) të akorduar për fondacionin ”La Biennale di Venezia”.

Zëdhënësi theksoi se projektet kulturore të financuara me fondet e taksapaguesve evropianë duhet të mbrojnë vlerat demokratike, të nxisin dialogun e hapur, diversitetin dhe lirinë e shprehjes.

Sipas tij, këto janë vlera që “nuk respektohen në Rusinë e sotme”.

Rusia merr pjesë në Bienalen e Venecias për herë të parë që nga nisja e pushtimit të plotë të Ukrainës në fillim të vitit 2022.

Granti i Bashkimit Evropian ishte destinuar për mbështetjen e producentëve të filmit dhe projekteve që lidhen me teknologjitë immersive (zhytëse)./  /Ad.Ab./  a.jor.

The post BRUKSEL – BE ndalon financimin e Bienales së Venecias për shkak të pjesëmarrjes së Rusisë appeared first on Agjencia Telegrafike Shqiptare.