TIRANË, 7 qershor/ATSH-Maela Marini/ Natyra e paprekur, mikpritja e ngrohtë dhe kulinaria e pasur e kanë shndërruar Përmetin në një destinacion në zhvillim të turizmit të qëndrueshëm në jug të Shqipërisë.

Turistët e huaj vlerësojnë veçanërisht përvojën autentike që ofron ky qytet i vogël, larg turizmit masiv. Dhe për të shijuar Përmetin duhet të përqafosh ritmin e ngadaltë të qytetit, mes natyrës, luleve dhe njerëzve mikpritës.

Kjo është pikërisht ajo që vlerësojnë turistët e huaj që vizitojnë “qytetin e trëndafilave”, të cilët kanë mundësinë po ashtu të shijojnë përvojën e veçantë në natyrën e luginës së Vjosës.

ATSH bisedoi me disa prej tyre, të cilët vlerësuan veçanërisht standardin e shërbimit, pastërtinë dhe atmosferën familjare.

Mes turistëve të huaj të tërheq vëmendjen një grup i madh nga Lituania, që i takuam pranë “Gurit të qytetit”.

Gintaras Bendzius, nga Lituania por që jeton në Britaninë e Madhe, tregon se e ka vizituar Shqipërinë për herë të parë 5 vite më parë.

Tërheqja ishte aq e madhe sa ai vendosi të kthehej në ambasador të turizmit shqiptar, duke bërë guidën e grupeve turistike nga Lituania apo Britania e Madhe.

Bashkë me një grup prej 14 turistësh lituanezë e takuam në një nga atraksionet e Përmetit, siç është shkëmbi masiv në hyrje të qytetit ku valëvitet një flamur i madh kuqezi.
Faqja e tij në Instagram gintaras_bendzius është kartëvizita më e bukur e Shqipërisë turistike, këtë herë e prezantuar nga një shtetas i huaj që erdhi fillimisht si turist dhe vendosi të rikthehej për t’i treguar Shqipërinë të tjerëve.

“Ne do të qëndrojmë 8 ditë në Shqipëri, një vend fantastik. Natyra shqiptare, malet, gjithçka kemi vizituar ka qenë mbresëlënëse”, u shprehën turistët nga Lituania.

Ndërsa Bendzius tregon se tashmë ndodhet në Shqipëri për ta ndarë eksperiencën me miqtë e tij.

Në qytet takuam edhe një familje polake, që ishin rikthyer për herë të dytë duke zgjedhur Përmetin si pjesë të udhëtimit të tyre për të eksploruar më tej vendin.

“Jemi nga Polonia, Varshava. Kjo është hera e dytë që unë vij në Shqipëri. U riktheva sepse më pëlqen shumë këtu do të jemi tri ditë në Përmet, më pas do të vizitojmë Ksamilin”, u shpreh ai.

Një grup turistësh francezë, që sapo kishin mbërritur në hotelin në qendër të qytetit shprehen entuziastë për udhëtimin e tyre në Shqipëri, ndërsa mezi presin të zbulojnë Përmetin.

“Shqipëria është një vend shumë i bukur nga ajo që kemi parë deri tani. Tirana na pëlqeu shumë, një qytet i bukur dhe i gjallë. Edhe në Sarandë, kemi ngrënë shumë mirë. Është e mrekullueshme, jemi shumë të lumtur që po shijojmë diellin. Nuk kemi folur ende shumë me njerëzit përreth, por kudo na kanë pritur me buzëqeshje. Me vazhdimin e udhëtimit do të zbulojmë edhe më shumë, por deri tani jemi shumë të lumtur”, tha një turiste franceze.

Kulinaria dhe gatimet tradicionale mbeten “pika e fortë” e turizmit në Përmet.

Një çift nga Holanda vlerësoi veçanërisht ushqimin, ndërsa ndanë eksperiencën e udhëtimit të tyre në Shqipëri.

“Ne vijmë nga Holanda dhe po vizitojmë Shqipërinë për herë të parë. Kemi ardhur këtu ditën e premte, dy ditë më parë, qëndruam në Tiranë dhe tani po shkojmë drejt jugut të Shqipërisë. Na pëlqen vërtetë shumë. Njerëzit janë shumë mikpritës, natyrë shumë e bukur dhe mot shumë i mirë. Ushqimi shumë i mirë po ashtu. Na pëlqen vërtetë shumë ushqimi”, thanë ata.

Te “Guri i qytetit”, Monumenti i Kulturës simbol i Përmetit, që gjendet rreth 250 metra mbi nivelin e detit, takuam edhe një të ri nga Polonia i cili në gjashtë muajt e fundit kishte vizituar rreth 20 shtete, ndërkohë që vlerëson Shqipërinë si një ndër vendet më të bukura.

“Vij nga Polonia. Kjo është hera ime e parë që vizitoj Shqipërinë. Do të jem këtu gjashtë ditë. Erdha nga Kosova, kam vizituar Tiranën, Durrësin dhe tani po shkoj drejt pjesës lindore të Shqipërisë për të vizituar zonat malore. Në gjashtë muajt e fundit kam vizituar rreth 20 shtete dhe për mua Shqipëria është një ndër vendet më të bukura. Dua të sjell këtu gjithashtu edhe familjen time këtë vit për t’i treguar gjithçka”, tha ai për ATSH-në.

Me bukuritë natyrore, kulturën mikpritëse dhe kulinarinë autentike, Përmeti nuk është thjesht një qytet për t’u vizituar, por për shumicën prej turistëve të huaj që takuam mbetet një përvojë për t’u jetuar.

1 nga 33

/j.p/r.e/

The post Turistët e huaj shijojnë ritmin relaksues të Përmetit: Kudo na kanë pritur me buzëqeshje appeared first on Agjencia Telegrafike Shqiptare.

TIRANË, 6 qershor/ATSH/ Kryeministri Edi Rama u shpreh sot se në një kohë kur për Zvërnecin nuk ka asnjë projekt, një protestë lokale me disa mijëra njerëz u shndërrua në një spektakël ndërkombëtar.

Në një reagim në rrjetet sociale drejtuar CNN International dhe medieve të tjera, Rama komentoi pjesëmarrjen në protestat e organizuara kundër investimit në Zvërnec.

Kryeministri u shpreh se protesta e sotme ka mbledhur rreth 2 mijë pjesëmarrës dhe kjo është pjesëmarrja më e ulët deri tani. Por edhe në kulmin e saj, Rama tha se pjesëmarrja nuk ka kaluar kurrë 8 mijë njerëz.

“Si mund të bëhet një vend i vogël lajm global për arsye kaq të shkëputura nga realiteti në terren? Si mund të kthehen supozimet në fakte, narrativat në vendime përfundimtare dhe spekulimet në të vërteta të pranuara, përpara se të ishin përcaktuar madje edhe faktet bazë?”, iu drejtua Rama medieve ndërkombëtare.

Më poshtë reagimi i plotë i kryeministrit Rama:

Drejtuar CNN International dhe të gjitha mediave të panumërta, të mëdha e të vogla, si edhe të gjithë atyre që prodhojnë dhe shpërndajnë me qëllime të mira në Facebook, X, Instagram, TikTok dhe çdo platformë tjetër që sot formëson bisedën globale, do të doja shumë të përcillja këtë mesazh:

Ndërsa flasim, protesta e sotme ka mbledhur rreth 2,000 pjesëmarrës. Kjo është pjesëmarrja më e ulët deri tani, por edhe në kulmin e saj, pjesëmarrja nuk ka kaluar kurrë 8,000 njerëz.

Atëherë, si ka mundësi që ajo që një pjesë e madhe e botës ka parë gjatë ditëve të fundit është dukur kaq e madhe, kaq dramatike, kaq dërrmuese?

Në një moment, kur histeria digjitale e prodhuar gjatë këtyre ditëve të ketë kaluar dhe klima emocionale të jetë qetësuar, bota demokratike duhet të shohë më nga afër se si hendeku mes realitetit dhe mënyrës se si ai u paraqit u bë kaq i madh.

Jo thjesht si çështje e këtij rasti të veçantë, por si simptomë e diçkaje shumë më të madhe.

Si mund të bëhet një vend i vogël lajm global për arsye kaq të shkëputura nga realiteti në terren?

Si mund të shndërrohet një protestë lokale me disa mijëra njerëz në një spektakël ndërkombëtar?

Si mund të kthehen supozimet në fakte, narrativat në vendime përfundimtare dhe spekulimet në të vërteta të pranuara, përpara se të ishin përcaktuar madje edhe faktet bazë?

Dhe ndoshta më e rëndësishmja: çfarë tregon kjo për ekosistemin tonë të informacionit, kur perceptimi mund të udhëtojë nëpër botë më shpejt se vetë realiteti?

Sepse realiteti është se ende nuk ka asnjë projekt.

Nuk ka ende asnjë leje ndërtimi.

Nuk ka ende asnjë ndërtim.

Nuk ka madje as një projekt përfundimtar.

Ka vetëm një vizion dhe një plan: Ta transformojmë Shqipërinë në destinacionin më tërheqës të turizmit elitar në këtë pjesë të botës, duke krijuar një zhvillim mjedisor me bilanc pozitiv, i cili, sipas vizionit aktual, do të sillte përfundimisht rreth 25% më shumë pemë dhe hapësira të gjelbra se sa ekzistojnë sot, krahas përmirësimeve të matshme në disa tregues të biodiversitetit.

Ambicia nuk është thjesht të ndërtohet.

Ambicia është të tregohet se zhvillimi dhe përmirësimi mjedisor mund të ecin krah për krah.

Pikërisht për këtë arsye, disa nga ekspertët më të mirë në botë në ekologji, biodiversitet, arkitekturë peizazhi, inxhinieri mjedisore dhe turizëm të qëndrueshëm po punojnë mbi këto koncepte dhe parametra.

Nëse ata do të kenë sukses apo jo, kjo është çështje e vlerësimit të ardhshëm, e shkencës, e shqyrtimit publik dhe e debatit transparent.

Por ta paraqesësh si katastrofë mjedisore diçka që ende nuk ekziston, që ende nuk është projektuar, që ende nuk është lejuar dhe objektivi i deklaruar i së cilës është pikërisht prodhimi i rezultateve pozitive mjedisore, nuk është kontribut serioz në diskutimin publik.

Megjithatë, nga ky realitet i thjeshtë lindi një uragan histerie digjitale, tituj apokaliptikë, zemërim i fabrikuar dhe përfundime gjithëpërfshirëse të paraqitura si fakte të vërtetuara.

Gjatë kësaj rruge u shfaqën edhe video dhe imazhe të manipuluara me inteligjencë artificiale, pretendime të fabrikuara, amplifikim i koordinuar, rrjete anonime dhe sjellje online që mbartin shumë nga karakteristikat e luftës hibride të informacionit, e cila po ndikon gjithnjë e më shumë debatin publik në shoqëritë demokratike.

Edhe më e habitshme është se platformat sociale regjistruan një shpërthim aktiviteti rreth kësaj teme, me angazhimin në gjuhën shqipe që u rrit disa herë brenda vetëm pak ditësh. Një pjesë e konsiderueshme e kësaj rritjeje të papritur duket se nuk është nxitur nga një zgjerim organik i pjesëmarrjes publike, por nga përhapja e shpejtë e profileve të krijuara rishtazi, llogarive anonime dhe faqeve me pak ose aspak histori të identifikueshme, duke ngritur pyetje legjitime mbi amplifikimin artificial dhe prodhimin e një vrulli digjital të fabrikuar.

Por ndoshta detaji më domethënës është edhe më i thjeshti.

Një numër i konsiderueshëm raportimesh nuk arrijnë as të dallojnë mes një ishulli dhe një prone private në territorin kontinental.

Vetë protesta lidhet me këtë të fundit.

Jo me të parën.

Në fakt, aktualisht nuk ekziston ndonjë debat i madh publik në Shqipëri lidhur me vetë ishullin.

Megjithatë, artikuj, postime dhe komente të panumërta i bashkojnë të dyja në një narrativë të vetme, duke krijuar konfuzion aty ku duhet të kishte saktësi dhe emocion aty ku duhet të mbizotëronin faktet.

Mospajtimi është legjitim.

Kritika është legjitime”.

/m.m/r.e/

The post Rama – medieve ndërkombëtare: Protesta për Zvërnecin s’i kaloi kurrë 8 mijë njerëz, si mund të shndërrohej në spektakël ndërkombëtar appeared first on Agjencia Telegrafike Shqiptare.

TIRANË, 6 qershor/ATSH-Maela Marini/ Zëvendëskryeministrja Albania Koçiu pa sot nga afër projektin që po zbatohet në qendrën historike të Pogradecit, një investim prej mbi 380 milionë lekësh i Fondit Shqiptar të Zhvillimit, i cili i jep qytetit një dimension të ri turistik.

E shoqëruar nga kryebashkiaku i Pogradecit, Ilir Xhakolli, zv.kryeministrja Koçiu vlerësoi projektin, i cili sipas saj, synon të kthejë historinë, arkitekturën dhe kulturën në një motor të zhvillimit ekonomik.

“Përmes restaurimit të banesave karakteristike dhe rijetëzimit të hapësirave publike, ky projekt nxit turizmin gjithëvjetor, rrit vlerën e pronës, fuqizon biznesin lokal dhe e pozicionon Pogradecin si një nga destinacionet më premtuese të turizmit kulturor dhe natyror të Shqipërisë Europiane”, tha Koçiu.

Zv.kryeministrja theksoi se turizmi nuk zhvillohet vetëm në muajt e verës, por punojmë çdo ditë e më shumë për të zhvilluar atraksione turistike e kulturore në të dymbëdhjetë muajt e vitit.

“Këtu së bashku me Fondin Shqiptar të Zhvillimit kemi bërë një ndërhyrje tërësore jo vetëm në infrastrukturë, por dhe në konservimin e godinave që janë zemra e qytetit. Kemi edhe shtëpitë karakteristike të Lasgush Poradecit dhe Mitrush Kuteli”, tha Koçiu.

Koçiu theksoi se “një nga objektivat që i kemi vënë vetes është edhe rritja e ditëqëndrimeve të turistëve apo vizitorëve”.

“Duke shtuar atraksionet kulturore, shtëpitë muzeale apo edhe patjetër destinacionet turistike, bëjmë të mundur që të kemi më shumë ditëqëndrimi të turistëve dhe të vizitorëve, më shumë zhvillim të ekonomisë lokale dhe patjetër më pas edhe një Shqipëri më atraktive për të gjithë”, theksoi ajo.

Në bashkëbisedim me banorët, Koçiu i siguroi ata se me këtë investim vlera e pronës së tyre do të rritet.

Ndërsa kryetari i bashkisë Pogradec vlerësoi se ky është investimi më i mirë që është bërë në qytet.

“Me këtë projekt i japim një hov tjetër zhvillimit të turizmit në Pogradec. Sivjet ne do jemi kampionë në turizëm sepse të gjitha këto investime patjetër që do të përkthehen në zhvillim ekonomik”, shtoi ai.

Xhakolli theksoi se për të nxitur aktivitetin në zonë, bashkia ka marrë vendim që vitet e para do të jenë pa tarifa vendore.

Kreu i FShZh-së, Dritan Agolli theksoi se kjo është një zonë model që së bashku me pjesën e ofertës turistike të natyrës dhe të liqenit bëhet komplementare duke kontribuar me shtrirjen e sezonit turistik dhe përtej muajve të verës.

“Ne jemi në përfundim e sipër dhe një sërë dyqane e biznese kanë filluar të rinovojnë, të rikonceptojnë, të mendojnë ndryshe dhe nivelin e shërbimit dhe standardit që ofrojnë. Pra, çdo çliron investime të tjera private dhe ajo që është e rëndësishme është rritja e vlerës së pronës jo vetëm në zonën këtu, por dhe përreth”, tha ai.

/r.e/

The post Koçiu në Pogradec: Restaurimi i banesave karakteristike nxit turizmin gjithëvjetor appeared first on Agjencia Telegrafike Shqiptare.

TIRANË, 6 qershor/ATSH-Maela Marini/ Sekretari i përgjithshëm i Partisë Socialiste, Blendi Klosi deklaroi sot se PS ka një kontratë me shqiptarët dhe do të vazhdojë të ecë përpara.

Në një aktivitet të organizuar në 35-vjetorin e Partisë Socialiste, në Gjirokastër, Klosi theksoi se në gurët e themelit të PS-së qëndron besnikëria, ideali, shqiptaria dhe kërkesa për të bërë më të mirën për këtë vend.

“Në 35 vite histori ne i kemi shërbyer Shqipërisë. Në 35-vjetorin tonë ne vijmë me shumë detyra të realizuara. Jemi kaq pranë integrimit në BE, realizimit të një ëndrre të madhe të themeluesve tanë”, tha ai.

Sipas Klosit, “nën drejtimin e Edi Ramës, PS është shndërruar në një mekanizëm të fortë politik fitues”.

“Vijmë si një organizatë e cila i ka sjellë plot 83 mandate në parlament. 53% e votës së shqiptarëve na kanë votuar ne, programin tonë. Kanë votuar Gjirokastrën europiane, kanë votuar këto investime që e bëjnë Gjirokastrën të mbushur plotë me turistë nga e gjithë bota”, shtoi ai.

Por, sipas tij, PS nuk ka marrë 100% të votave të shqiptarëve. “Ne kemi marrë 53% të gjithë elektoratit që na ka votuar. Kemi marrë 62% të votës së emigrantëve. S’i kemi marrë të gjithë votat. Pra kemi dhe njerëz që na kundërshtojnë dhe kjo është shumë gjë e mirë. Kemi dhe njerëz që kërkojnë që ne të përmirësohemi dhe kjo është shumë e mirë, por ama ne kemi një kontratë me shqiptarët dhe do të vazhdojmë të ecim përpara”, tha Klosi.

Klosi theksoi se se PS është e vendosur ta çojë Shqipërinë përpara, ta anëtarësojë në BE dhe të krijojë mirëqennie për qytetarët shqiptarë.

Ndërsa drejtuesja politike e PS-së në qarkun Gjirokastër, Mirela Kumbaro vlerësoi se banorët e qarkut të Gjirokastrës në të shtatë bashkitë me shumicë mbi 76% i besojnë PS-së.

“Kjo forcë politike ka ditur të bëjë debate publike dhe do të vazhdojë t’i bëjë dhe sot që flasim edhe me protestat, dhe me diskutimet dhe me kundërshtimet, sepse Shqipëria është një vend i lirë, është një vend demokratik dhe projektet e zhvillimit kalojnë pikërisht përmes debatit”, tha Kumbaro.

Sipas saj, “çdo iniciativë që është marrë në Gjirokastër praktikisht gjeneron ekonomi dhe i bën të rinjtë të kthehen”.

“Ne kemi shumë arsye të fitojmë edhe shumë arsye të festojmë, sepse premtimin që bëmë në fushatën një vit më parë të angazhimit tonë në integrimin europian, po e bëjmë realitet nga java në javë, nga muaji në muaj”, tha ajo.

/r.e/

The post Klosi në Gjirokastër: PS ka kontratë me shqiptarët dhe do të vazhdojë të ecë përpara appeared first on Agjencia Telegrafike Shqiptare.

TIRANË, 6 qershor /ATSH/ Përfaqësues të shoqërisë civile dhe qytetarë po zhvillojnë sot, për të shtatën ditë me radhë, protestën kundër investimit në Zvërnec të Vlorës.

Fillimisht qytetarët u grumbulluan në sheshin “Skënderbej” për të vijuar më pas marshimin përgjatë bulevardit “Dëshmorët e Kombit” drejt Kryeministrisë.

Me flamuj në duar dhe pankarta të ndryshme, “Kur rinia çohet, qeveria rrëzohet”, “Rama në burg, Berisha në burg“, Është koha për dorëheqje”, “Shqipëria nuk është në shitje” etj, protestuesit kërkojnë anulimin e projekteve të dyshimta, mbrojtjen e pasurive kombëtare dhe dorëheqjen e kryeministrit Edi Rama.

Në foltoren e vendosur para godinës së kryeministrisë qytetarët dhe aktivistë mbajtën fjalë duke shprehur revoltën e tyre kundër investimit, por edhe duke përcjell mesazhe të ndryshme.

“Jemi për Shqipërinë dhe jo për partitë politike”, u shpreh njëri prej protestuesve që mori fjalën.

Pjesëmarrësit kanë theksuar se nuk pranojnë parti politike në këtë protestë të cilën e cilësojnë si një revolucion.

“Ne duam që Shqipëria të zhvillohet, nuk jemi kundër investimeve. Por nuk duam që Shqipëria të shitet, duam transparencë”, tha një tjetër qytetare.

Protestuesve iu adresua edhe një qytetar i ardhur nga Prishtina, i cili u kërkoi të mos tërhiqen se do të fitojnë. “Kosova është me ju, Kosova është me nënën Shqipëri”, tha i riu.

Një tjetër protestuese u bëri thirrje intelektualëve që t’i bashkohet protestës së të rinjve dhe të mos i lënë vetëm si në vitin 2018. Ajo tha se të rinjtë i kanë dhënë shpresë Shqipërisë.

Protestuesve iu bashkua edhe një mësues historie i cili u shpreh se koha e ankesave nëpër salla mësuesish duhet të marrë fund dhe se sheshi është vendi ku shkruhet historia sot.

Gjatë protestës, u tentua ndezja e disa flakadanëve, por pati reagime të menjëhershme ku u bë thirrje që t’i fikin. “Fikini flakadanët, suksesi i protestës është familja. Ju lutëm fikni flakadanët”, u apelua nga aktivistët e protestës.

Gjithashtu, gjatë protestës u shfaq edhe një mesazh përmes flamurit kuqezi “Çamëria është gjallë” shoqëruar edhe me këngë e valle nga protestuesit.

Ndërsa prindërit të cilët kishin fëmijë të vegjël me vete në protestë, u kanë krijuar një kënd përgjatë Bulevardit “Dëshmorët e Kombit” për të pikturuar.

Një nga aktivistët e protestës u shpreh se: “nuk jemi këtu për karrigen e askujt. Jemi për Shqipërinë. Jepini zë figurave dhe intelektualëve. Të tregojmë se ne jemi më me kulturë se ata që kanë 35 vite që shajnë në parlament dhe na tregojnë ne kulturën. Ju lutem, t’i tregojmë kulturën atyre njerëzve, të largojmë partiakët dhe aktivistët”.

Protesta janë mbajtur sot edhe në Shkodër, Elbasan, Fier, Korçë dhe në Zvërnec ku qytetarët u mblodhën për të kërkuar anulimin e projektit.

Kërkesat kryesore të protestës së zhvilluar në kryeqytet edhe në ditën e shtatë të saj ishin: dorëheqja e kryeministrit; shfuqizim i statusit dhe kuadrit ligjor për investitorët strategjikë; shfuqizimi i Paketës së Maleve; anulimi i ndryshimeve në ligjin për Zonat e Mbrojtura si dhe anulimi i ndryshimeve në ligjin për Trashëgiminë Kulturore.

Pas fjalimeve dhe mesazheve të përcjella në podium nga të rinj dhe të reja kryesisht, nga ku dhe u paralajmërua se do të mblidhen sërish nesër në orën 18:00, protesta para godinës së Kryeministrisë përfundoi rreth orës 22:00 të mbrëmjes. Por disa pjesëmarrës vijuan marshimin nëpër rrugët kryesore të kryeqytetit duke përsëritur të njëjtat kërkesa.

Dita e 7-të e protestës; Fotoreporterë: Florian Abazaj e Andrin Hoxha

1 nga 49

/m.m/r.e/ /a.g/

The post Tiranë, qytetarët në ditën e shtatë të protestës kundër investimit në Zvërnec appeared first on Agjencia Telegrafike Shqiptare.

TIRANË, 6 qershor/ATSH/ Kryetari i Partisë Demokratike Sali Berisha zhvilloi sot një takim me 71 të rinjtë dhe të rejat e zgjedhur në Këshillin Kombëtar të PD-së, në kuadër të nismës “Ri(ni)përtëritje”.

I pranishëm në këtë takim ishte edhe Antonio López-Istúriz White, europarlamentar, anëtar i PPE-së dhe ish-sekretar i përgjithshëm i Partive Popullore Europiane.

Në fjalën e tij Lopez-Isturiz theksoi se “të gjithë janë pro Shqipërisë në BE, por ngrenë dyshimin, a mund të kemi Ramën në Këshillat Europiane”.

Nga ana e tij, Berisha vlerësoi se Antonio López-Istúriz ka mbështetur Partinë Demokratike të Shqipërisë dhe ka ndjekur zhvillimin e kësaj partie dhe të këtij vendi në ditët më të vështira, duke qenë një mbrojtës i palëkundur i kauzave të demokratëve.

Duke iu referuar nismës “Ri(ni)përtëritje”, Berisha shprehu bindjen se të rinjtë janë ata që do të kontribuojnë në ripërtëritjen e PD-së.

“Ju do të jeni boshti kryesor i arritjes së objektivave tanë. Kjo është audienca e shpresës për partinë dhe për vendin. Kuvendi që zhvilluam ishte një Kuvend ripërtëritje. Vizioni juaj është vizioni më i mirë për partinë. Ne qëndruam për modernizimin e partisë dhe askush nuk mund të kontribuonte më shumë se ju në modernizimin e partisë”, tha Berisha.

Berisha theksoi se të rinjtë mund të bëhen boshti kryesor i arritjes së të gjitha objektivave të PD-së.

Nga ana tjetër kreu i PD-së u shpreh se duhet kuptuar se “sa të rrezikshëm janë kundërshtarët, sepse ata janë armiq të lirisë së shqiptarëve”.

“Dhe ne duhet të luftojmë. Dhe do të luftojmë, do të luftojmë dhe do të fitojmë.
Por ju keni një rol shumë të rëndësishëm për t’u bërë flamuri i suksesit dhe fitores së Partisë Demokratike. Jam plotësisht i bindur se ju do ta bëni këtë”, tha ai, duke iu drejtuar të rinjve.

1 nga 3

/m.m/r.e/

The post Berisha: Të rinjtë, boshti kryesor i arritjes së objektivave të PD-së appeared first on Agjencia Telegrafike Shqiptare.

TIRANË, 6 qershor/ATSH/ Drejtuesi politik i Partisë Socialiste për Qarkun e Tiranës, Taulant Balla, mori pjesë në festën e 35-vjetorit të Partisë Socialiste në Kavajë, ku uroi anëtarët dhe mbështetësit e kësaj force politike për përvjetorin e themelimit.

Në fjalën e tij, Balla e cilësoi PS-në si familjen më të madhe politike në Shqipëri dhe në trojet shqiptare, ndërsa theksoi se objektivi i socialistëve duhet të jetë rikthimi i drejtimit të Bashkisë së Kavajës në zgjedhjet vendore të mandatit 2027-2031.

“Është e domosdoshme që Bashkinë e Kavajës, në mandatin 2027-2031 për pushtetin vendor, ta rikthejmë me Edi Ramën dhe me Partinë Socialiste”, u shpreh ai.

Gjatë fjalës së tij, Balla ngriti edhe kritika ndaj drejtimit aktual të bashkisë, duke deklaruar se, pavarësisht një buxheti prej 26 milionë eurosh dhe investimeve prej 11 milionë eurosh, disa projekte infrastrukturore vijojnë të mbeten të papërfunduara prej vitesh.

Ai akuzoi gjithashtu disa drejtues lokalë për situatën në qytet, duke përdorur tone të ashpra politike ndaj kundërshtarëve të tij.

“Është një treshe e famshme: Fisniku, Dëshira edhe një Halil, këta të tre po ia marrin frymën Kavajës”, tha Balla.

1 nga 2

/m.m/r.e/

The post 35-vjetori PS, Balla nga Kavaja: Bashkia duhet t’i rikthehet PS-së në zgjedhjet vendore të vitit 2027 appeared first on Agjencia Telegrafike Shqiptare.

TIRANË, 6 qershor/ATSH/ Festivali Ndërkombëtar i Filmit “Dea Open Air” shpalli fituesit e edicionit të 13-të, në një ceremoni gala të zhvilluar në Amfiteatrin e Universitetit të Arteve.

Singular (Unik) – Alberto Gastesi (Spanjë / Finlandë, 2025) u vlerësua si Filmi më i Mirë, mes tre prodhimeve kinematografike të nominuara Gülizar – Turqi, 2025 dhe Jet Lag in Summer (Verë pa Orë) – Kinë / Hong Kong / SHBA, 2025.

Nën moton “Qiell i hapur. Mendje të hapura!”, festivali mblodhi këtë vit 40 filma nga 25 vende të botës dhe rreth 30 kineastë të ftuar nga 12 prej tyre, duke konfirmuar edhe një herë rolin e tij si një nga ngjarjet më të rëndësishme të kinemasë artistike në Shqipëri dhe rajon.

Ky event bëri bashkë trupin diplomatik të akredituar në vendin tonë, kineastë, artistë, gazetarë, studiues dhe studentë, të cilët jo vetëm besojnë në fuqinë e kinemasë, por mundësojnë dialog, reflektim dhe mirëkuptim.

“Dea me këmbëngulje nuk ndjek trende – por investohet te konsolidimi i profilit të vet, si festival i përmbajtjes’’, u shpreh gjatë prezantimit të festivalit drejtoresha artistike Mirela Oktrova, duke theksuar rëndësinë dhe çelësin e suksesit në ecurinë e 13 viteve rrugëtim.

’’Edhe këtë vit, të pranishëm fizikisht apo përmes veprave të tyre, kineastët pjesëmarrës ndanë me publikun histori, përvoja dhe këndvështrime, duke ridëshmuar se kinemaja mbetet një nga mjetet më të fuqishme për të eksploruar botën dhe për të kuptuar vetveten’’, u shpreh Oktrova.

Për drejtorin dhe ideatorin e Festivalit “Dea Open Air”, Edmond Topi, kinemaja na kujton edhe një herë se të kuptosh tjetrin është hapi i parë drejt ndërtimit të një bote më humane.

’’Në një kohë kur shoqëritë tona përballen me polarizim, pasiguri dhe paragjykime, kinemaja na kujtoi edhe një herë se të kuptosh tjetrin është hapi i parë drejt ndërtimit të një bote më humane”, tha ai.

Në fjalën përshëndetëse të këtij eventi të rëndësishëm që ndodhi në kryeqytet nga 1-5 qershor, vlerësim për qëndrueshmërinë prej më shumë se një dekade festival dha edhe Jonid Jorgji, kryetar i Qendrës Kombëtare të Kinematografisë.

“Përgëzoj organizatorët për organizimin, për qëndrueshmërinë prej 13 vitesh të këtij festivali, pavarësisht sfidave. Më vjen mirë, që në gjithë këto zhvillime që ka sot Tirana gjej një kinema të mbushur plot. Është e bukur që krahas morisë së këtyre eventeve organizohet një festival filmi dhe ndërmjetësohet kinema”, shtoi ai.

Konkurrimi kryesor i festivalit përfshiu 7 filma me metrazh të gjatë, përmes bashkëprodhimeve ndërkombëtare, që përfaqësuan Turqinë, Poloninë, Holandën, Kirgistanin, Italinë, Spanjën, Finlandën, Kinën, Hong Kongun dhe Shtetet e Bashkuara të Amerikës.

Aktorja më e mirë që rrëmbeu trofeun e Festivalit DEA ishte Bekir Behrem – Gülizar (Turqi, 2025).

DEA për Aktoren më të Mirë shkoi për edhe për një tjetër emër, artisten italiane Elisabetta Pellini në Filmin me metrazh të gjatë La Terza Volta (Hera e Tretë) (Itali, 2025).

DEA për Kinematografinë më të Mirë shkoi për Mateusz Skalski – Debate (Debati) (Gjermani / Holandë / Poloni, 2025).

Fitues për Skenarin më të Mirë: Álex Merino & Alberto Gastesi – Singular (Unik) (Spanjë / Finlandë, 2025).

Fitues për Regjinë më të Mirë: Wojciech Nowak – House of the Chosen (Të Përzgjedhurit) (Poloni, 2024).

Në konkurrimin e Filmit Studentor morën pjesë 18 filma nga 17 vende të botës.

DEA për Filmin më të Mirë Studentor shkoi për filmin nga Irani “Pasta Alfredo” – Leila Noee (Iran, 2025)

Përmendje të veçanta të Jurisë
• Termokiss Has No Borders – Korab Jashari & Tea Krasniqi (Kosovë, 2025)
• Breast and Bombs (Gjoks dhe Bomba) – Ogerta Spahiu (Shqipëri, 2025)

Programi i Filmit të Shkurtër përfshiu 15 filma nga 10 vende të botës, ndërsa fitues u shpall When the Tiger Roars (Kur Ulërin Tigri) – LAM Can-zhao (Kinë, 2025).

Çmimi i Medias për Filmin e Shkurtër u dha për Felix & Fernand – Oscar Buenafuente & Thierry Buenafuente (Francë, 2025).

Juria e Medias vlerësoi me çmim filmin me Metrazh të Gjatë Kurak (Mozaik) – Erke Dzhumakmatova (Kirgistan, 2025).

Gjatë pesë ditëve të festivalit, publiku pati mundësinë të ndiqte filma që trajtonin tema si identiteti, kujtesa, drejtësia sociale, liria, dashuria, humbja dhe shpresa, duke sjellë në ekran histori nga kultura dhe realitete të ndryshme njerëzore.

Ndaj ÇMIMI I PUBLIKUT TË TIRANËS dorëzoi kupën DEA për Gülizar – Belkıs Bayrak (Turqi, 2025).

Një vend të rëndësishëm në program zuri edhe Akademia DEA, e cila përmes Takimit Rajonal të Shkollave të Filmit vazhdoi të nxisë bashkëpunimin mes institucioneve të edukimit filmik në rajon.

Në kuadër të saj u prezantua projekti krijues “Tirana – Dashuria Ime”, realizuar nga studentët e Fakultetit të Arteve të Universitetit të Prishtinës, si dhe filmi “Liqeni”, i xhiruar gjatë ditëve të festivalit në Tiranë.

Gjatë ceremonisë, Dea Open Air i akordoi Fakultetit të Arteve të Universitetit të Prishtinës një Certifikatë Falënderimi për partneritetin dhe bashkëpunimin e vazhdueshëm ndër vite.

DEA e Mirënjohjes iu akordua regjisorit Esat Musliu, në shenjë respekti dhe mirënjohjeje për kontributin e tij shumëvjeçar në kinematografinë shqiptare.

DEA Homazh iu kushtua operatorit të njohur të filmit Ilia Terpini, një prej autorëve të imazheve më të rëndësishme në historinë e kinemasë shqiptare.

Me përmbylljen e edicionit të trembëdhjetë, Dea Open Air rikonfirmoi misionin për të promovuar kinemanë cilësore, dialogun kulturor dhe shkëmbimin ndërkombëtar artistik, duke i dhënë takim publikut, kineastëve dhe partnerëve të tij në edicionin e vitit 2027.

1 nga 8

/m.m/r.e/

The post Festivali “Dea Open Air” shpall fituesit e edicionit të 13-të appeared first on Agjencia Telegrafike Shqiptare.

TIRANË, 6 qershor/ATSH/ Pavarësisht zgjerimit të rrjetit të korsive të biçikletave në Tiranë, përdoruesit e tyre vijojnë të përballen me një problem të përsëritur, qarkullimin e motoçikletave në hapësirat e dedikuara për çiklistët.

Kjo praktikë ul ndjeshëm nivelin e sigurisë dhe dekurajon përdorimin e biçikletës si mjet transporti në kryeqytet.

Në një vëzhgim sot të ATSH-së në disa prej akseve kryesore të kryeqytetit vihet re se korsitë e biçikletave përdoren shpesh nga motoçikletat për të shmangur trafikun, duke rrezikuar përdoruesit e biçikletave.

Lëvizjet me shpejtësi të lartë dhe parakalimet në distanca të afërta konsiderohen ndër rreziqet kryesore për përdoruesit e biçikletave, veçanërisht në akset me trafik të ngarkuar.

Sipas Kodit Rrugor, korsitë e biçikletave janë të rezervuara për lëvizjen e biçikletave dhe mjeteve të ngjashme, ndërsa përdorimi i tyre nga motoçikletat përbën shkelje.

/m.m/r.e/

The post Vëzhgim/ Motoçikletat në korsitë e biçikletave, sfidë për sigurinë e çiklistëve në Tiranë appeared first on Agjencia Telegrafike Shqiptare.

TIRANË, 6 qershor/ATSH/ Kryetari i grupit parlamentar të Partisë Socialiste, Taulant Balla reagoi sot lidhur me protestën e organizuar në Zvërnec.

Balla publikoi pamje nga pjesëmarrësit në protestë, ndërsa tërheq vëmendjen për makina me targa serbe që i janë bashkuar protestës.

“Ja dhe ata qe e ‘duan’ më shumë sesa ne Shqipërinë, i sollën protestuesit në Zvërnec. Po këto makinat me targa serbe dhe serbët pse duhet të jenë në protestë për Zvërnecin?!”, pyet Balla.

Shoqëria civile, aktivistë dhe qytetarë u mblodhën sot në zonën e Porto Novos dhe plazhit të Dalanit në Vlorë për të protestuar kundër një projekti investimi në Zvërnec.

Me pankartat “Larg duart nga Narta” dhe flamuj kuqezi, qytetarët marshuan përgjatë bregut të detit duke kërkuar mbrojtjen e natyrës. Sipas tyre, kjo zonë ka rëndësi të veçantë si për komunitetin lokal, ashtu edhe për qytetin e Vlorës në tërësi.

/m.m/r.e/

The post Balla: Përse duhet të jenë serbët në protestë për Zvërnecin?! appeared first on Agjencia Telegrafike Shqiptare.

TIRANË, 6 qershor/ATSH/ Kryeministri Edi Rama publikoi sot në rrjete sociale pamje të një ishulli në Katar që është një ndër destinacionet më të vizituara turistike të Lindjes së Mesme, i cili administrohet nga brandi prestigjioz “Anantara”.

Rama informoi se zhvilluesit e këtij projekti janë blerësit e tokës private dhe bashkinvestitorët e projektit të Zvërnecit.

“E dini kush e ka zhvilluar? Dy vëllezërit Alkhayatt, pikërisht bashkëpronarët e konglomeratit Powerholding, blerësit e tokës private dhe bashkinvestitorët e projektit të Zvërnecit”, tha Rama.

Duke folur për protestat dhe reagimet ndaj investimit në Zvërnec, Rama u shpreh se  “budallallëku që e ka lënë këtë vend mbrapa bote 100 vite, nuk ka për ta marrë dot peng Shqipërinë Europiane dhe Turistike”.

“Tani kujt ia ha mendja se një kompani si Power Holding, vjen në Shqipëri të shkatërrojë reputacionin e vet me budallallëqet që thuhen për projektin, nuk kemi ç’i bëjmë. Po budallallëku që e ka lënë këtë vend mbrapa bote 100 vite, nuk ka për ta marrë dot peng Shqipërinë Europiane dhe Turistike”, tha Rama.

Kryeministri informoi se “Power International Holding” është një konglomerat nga Katari me më shumë se 400 kompani, të organizuara në gjashtë sektorë kryesorë të ekonomisë, me një portofol të vlerësuar afërsisht 40 miliardë dollarë. Ka më shumë se 65 mijë të punësuar dhe operon në 25 vende të botës.

1 nga 5

/m.m/r.e/

The post Rama: Zhvilluesit e një prej destinacioneve turistike në Katar, bashkinvestitorë në Zvërnec appeared first on Agjencia Telegrafike Shqiptare.

TIRANË, 5 qershor/ATSH-Maela Marini/ Kryeministri Edi Rama siguroi sot se nuk ka asnjë gjë për t’u shqetësuar lidhur me investimin në Zvërnec pasi aktualisht nuk ka një projekt konkret, ndërsa e cilësoi situatën e krijuar për këtë çështje si një luftë hibride.

Në një prononcim për mediet ndërkombëtare gjatë mbërritjes në Samitin BE–Ballkani Perëndimor në Tivat, Mal të Zi, Rama iu përgjigj interesimit të gazetarëve lidhur me protestat që po zhvillohen kundër investimit në Zvërnec.

Rama theksoi se nuk ka kërkesa për të diskutuar, sepse nuk ka ende një projekt të miratuar.

“Kështu, së pari duhet të kemi projektin dhe pastaj ta shohim projektin, e më pas ta diskutojmë projektin. Por nuk diskutojmë dot diçka që nuk ekziston, por që po paraqitet në të gjithë medien sociale në një luftë hibride kundër Shqipërisë, me narrativa të rreme. Sikur ky nuk është projekt, po diçka e gatuar midis meje dhe Netanjahut përmes Jared Kushner, për të sjellë palestinezët në Zvërnec”, tha Rama.

Sipas kryeministrit, media perëndimore duhet të jetë shumë më e kujdesshme sepse faktet kanë rëndësi dhe duhet të kenë rëndësi gjithmonë.

Ai theksoi se nuk ka një projekt dhe nuk ka arsye për t’u shqetësuar për aq sa ka të bëjë me projektin.

“Kjo edhe sepse arkitektët më të mirë në botë, inxhinierët më të mirë, arkitektët më të mirë të peizazhit janë angazhuar dhe synimi nuk është që të bëjmë dëm në natyrë, por të bëjmë diçka unike që do të jetë e jashtëzakonshme për shqiptarët, por do të jetë edhe një dhuratë nga shqiptarët për të gjithë Europën”, tha Rama.

I pyetur se çfarë po bën qeveria që të sigurojë ambientalistët për projektin, Rama theksoi se “së pari kjo nuk ka të bëjë vetëm me ambientalistët, por ka të bëjë pikë së pari me një luftë hibride”.

“Armiq të vendit të cilët i njohim. Të gjithë ata që e dinë historinë tonë i njohin ata, iranianët, të cilët janë angazhuar në sulme kibernetike kundër nesh qysh prej një kohe të gjatë dhe që na kanë bërë kaq shumë dëme sa na kanë detyruar që t’i nxirrnim nga vendi. Ata janë pjesë e kësaj për të nxitur narrativën se projekti nuk është ajo që thuhet, por është një marrëveshje midis meje dhe Netanjahut, gatuar nga Jared Kushner për të sjellë palestinezët nga Gaza në Shqipëri”, tha Rama.

Sipas tij, kjo është një prej narrativave dhe ka tërhequr shumë vëmendje.

“Keni parë shumë video të rreme me qindra mijëra njerëz që bërtasin ‘Izrael shko në shtëpi’. Është e gjitha e rreme sepse nuk ka asgjë të tillë në Shqipërinë reale dhe është turp për ata që i bëjnë të gjitha këto gjëra. Nga ana tjetër ka njerëz mirëfilli të shqetësuar e me qëllime të mira dhe ju kam thënë e ju them nuk keni asgjë për t’u shqetësuar sepse projekti nuk është gati. Nuk e kemi projektin”, shtoi ai.

Nga ana tjetër, Rama tha se “kemi qenë të parët që kemi vendosur standardet për projektin që do të duhet ta presim”.

“Nuk ka asgjë për t’u shqetësuar në qoftë se nuk sheh që numri i llogarive apo i shqiptarëve në mjedisin digjital është rritur që në ditën e parë të këtyre sulmeve. Është një sulm hibrid”, shtoi Rama. /j.p/

The post Rama: Nuk ka projekt dhe arsye për t’u shqetësuar për investimin në Zvërnec, nxitja e narrativave nga lufta hibride appeared first on Agjencia Telegrafike Shqiptare.

TIRANË, 5 qershor/ATSH-Maela Marini/ Kryeministri Edi Rama deklaroi sot se Europa duhet ruajë procesin e integrimit të bazuar në meritë dhe të shkojë në drejtim të integrimit gradual të vendeve të Ballkanit Perëndimor.

Në një prononcim për mediet ndërkombëtare gjatë mbërritjes në samitin BE–Ballkani Perëndimor në Tivat, Mal të Zi, Rama iu përgjigj pyetjes së gazetarëve nëse mbështet integrimin gradual në BE.

“Kam kohë që e them këtë, më në fund po dëgjohet, por nuk mjafton. Tani besoj që Europa mbi të gjitha për vetveten duhet të jetë më e guximshme, duhet të ruajë procesin bazuar në meritë, duhet të shkojë në drejtimin e integrimit gradual, por duhet të gjejë këllqet për një moment të ri të llojit Helmut Kohl”, tha Rama.

Kryeministri solli në vëmendje politikën që ndoqi Kancelari gjerman kur ra muri i Berlinit.

“Kur muri ra, ky njeri i madh nuk ju tha gjermano-lindorëve, tani keni 35 kapituj për t’i përfunduar përpara se sa të bëhemi bashkë. Jo, ai tha: ‘ne jemi bashkë dhe pastaj do t’ju ndihmojmë që ju të përmbushni detyrat’. Pra, në qoftë se BE-ja kërkon t’i përçojë botës një mesazh shumë të fortë e t’i japë vetes energji të mëdha, duhet të thotë që kështu siç jemi sot rreth tryezës, duhet të jemi gjithmonë rreth kësaj tryeze, por gjithsecili me statusin e vet derisa të bëheni anëtarë me të drejta të plota”, tha Rama.

Kryeministri theksoi se “ajo që duhet të bëjmë nga ana jonë është t’u japim ca kurajo që të shtyjnë më fort përpara dhe iu takon atyre pastaj”.

Ndërkohë Rama u ndal edhe te propozimi franko-gjerman.

“Kjo ishte për të nisur diskutimin, jo për të përfunduar diskutimin. Diskutimi tashmë ka nisur të zhvillohet me një dokument të ri, me dokumentin franko-gjerman. Kështu që me shpresë, dy miqtë e mi të mëdhenj dhe udhëheqës fort të respektuar të Francës pranë dhe Gjermanisë do të gjejnë më shumë staminë që të jenë më tepër si Kohli dhe Miterani”, shtoi ai.

Sipas kryeministrit Rama, “BE-ja tashmë duhet të gjejë këllqe që të krijojë një moment ‘Helmut Kohl'”.

“Pra, të gjithë ne rreth një tryeze si sot gjithmonë, por gjithsecilit i duhet që të bëjë punën e vet, të përmbushë detyrat e veta për të marrë më shumë nga tryeza. Nuk ju thua fëmijëve shko rri te komshiu derisa të jesh gati të vish e të hash me ne. Sepse pastaj një nga fëmijët njeh një gangster rus aty në lage. Tjetrit fillojnë t’i pëlqejnë kukullat kineze e kështu me radhë. Jo, i mban fëmijët të gjithë bashkë”, shtoi Rama. /j.p/

1 nga 2

The post Rama nga Tivati: Integrim gradual në BE për vendet e Ballkanit Perëndimor, kërkohet moment i llojit Helmut Kohl appeared first on Agjencia Telegrafike Shqiptare.

TIRANË, 4 qershor/ATSH/ Kryeministri Edi Rama ndodhet në Mal të Zi ku do të marrë pjesë në Samitin BE–Ballkani Perëndimor, i cili do të zhvillojë punimet nesër në Tivat.

Samiti ka mbledhur liderët e Bashkimit Europian dhe të vendeve të Ballkanit Perëndimor, duke riafirmuar partneritetin strategjik dhe angazhimin e përbashkët për ecurinë e procesit të integrimit europian të rajonit.

Kryeministri Rama ndau mbrëmjen e sotme foto të liderëve pjesëmarrës në këtë takim, gjatë pritjes së organizuar me këtë rast.

Samiti zhvillohet gjashtë muaj pas samitit të fundit të mbajtur në Bruksel dhe takimi do të kryesohet nga presidenti i Këshillit Europian, Antonio Costa. Në të merrë pjesë gjithashtu presidentja e Komisionit Europian, Ursula von der Leyen.

Nën temën “Prosperiteti i Përbashkët dhe Stabiliteti i BE-së dhe Ballkanit Perëndimor”, liderët do të diskutojnë mbi ecurinë e procesit të zgjerimit të Bashkimit Europian, integrimin gradual të vendeve të rajonit në tregun dhe politikat e BE-së, si dhe zbatimin e Planit të Rritjes për Ballkanin Perëndimor.

Programi i samitit nis me ceremoninë zyrtare të mirëseardhjes të organizuar nga presidenti i Malit të Zi, Jakov Milatović. Më pas do të zhvillohet seanca plenare e samitit, ku liderët do të shkëmbejnë pikëpamje mbi prioritetet e përbashkëta europiane dhe rajonale.

Samiti do të shërbejë gjithashtu si një platformë për shkëmbimin e pikëpamjeve mbi sfidat e përbashkëta me të cilat përballet rajoni dhe Europa, si dhe për forcimin e bashkëpunimit në funksion të sigurisë, stabilitetit dhe zhvillimit të qëndrueshëm.

Takimi në Tivat zhvillohet në kuadër të zbatimit të Agjendës Strategjike të Këshillit Europian 2024–2029 dhe konfirmon rëndësinë që Bashkimi Europian i kushton perspektivës europiane të Ballkanit Perëndimor.

1 nga 2

/m.m/a.f/r.e/

The post Samiti BE–Ballkani Perëndimor, Rama në ceremoninë e pritjes në Tivat appeared first on Agjencia Telegrafike Shqiptare.

TIRANË, 4 qershor/ATSH/ I nominuari i presidentit të SHBA-së Donald Trump për ambasador në Shqipëri, Eric Wendt ka marrë mbështetjen e Komitetit për Marrëdhënie me Jashtë në Senatin amerikan.

Nominimi për Shqipërinë kaloi me votim 19 pro dhe 3 kundër.

Mbledhja, ku u shqyrtuan emërimet për ambasadorë, u drejtua nga Jim Risch. Mes nominimeve u miratuan edhe ambasadorët e propozuar për Tanzaninë, Australinë, Norvegjinë, Korenë. /Top Channel/

The post Kandidati për ambasador i SHBA-së në Shqipëri, Eric Wendt merr aprovimin e Komitetit për Marrëdhënie me Jashtë në Senat appeared first on Agjencia Telegrafike Shqiptare.

TIRANË, 4 qershor/ATSH-Maela Marini/ Ministri i Drejtësisë Toni Gogu deklaroi sot se protesta është e drejtë kushtetuese, ndërsa shtoi se në një shtet ku sundon ligji konfliktin dhe mosmarrëveshjen e zgjidh institucioni, nuk e zgjidh forca.

I ftuar në Top Channel, Gogu u shpreh se për ngjarjen e Zvërnecit ka fajtorë që po ballafaqohen me ligjin.

“Pra nëse jemi duke përshkruar fenomenin e 29 apo 30 majit, pra atë atë skenë të turpshme të cilën unë besoj që sot ka fajtorë. Sot janë duke u ballafaquar me ligjin ata që kanë shkelur ligjin”, tha ai.

Sipas tij, “protesta është e drejtë kushtetuese dhe të bën të ndihesh mirë”.

“Njerëzit kur ushtrojnë të drejtat e tyre kushtetuese vërtetë kanë ngazëllim, kanë gëzim. Prandaj janë ato të drejta atje që njeriu të ketë edhe kënaqësinë dhe protesta është një nga ato të drejta. E them këtë gjë sepse e kam përjetuar atë gëzim dhe ngazëllim kur e drejta e protestës nuk ishte kushtetuese dhe jam duke folur për dhjetorin e vitit ’90”, shtoi Gogu.

Gogu theksoi se sfidë, si në rastin e Zvërnecit dhe në rastin e Rjollit, është si do të mund të zgjidhim këtë mosmarrëveshje.

“Besoj është sfida e një demokracie funksionale, sepse kjo është një demokraci funksionale ku shoqëria dhe shteti bëjnë së bashku tango duke shtyrë njëri-tjetrin atje për të mbajtur balancën, atje ku liria e njërit cenohet apo ku rregulli i tjetrit cenohet. Thënë këtë, sfida jonë është si do të mundim të zgjidhim këtë mosmarrëveshje. Këta njerëz nuk besojnë tek institucionet dhe kanë dalë aty”, theksoi ai.

Por Gogu theksoi se në një shtet ku sundon ligji konfliktin dhe mosmarrëveshjen e zgjidh institucioni, nuk e zgjidh forca.

“Ky është testi i të gjithë shtetit tonë pas një reforme të madhe që kemi bërë dhe besoj kjo do të bëjë dhe atë rifitimin e besimit nga qytetarët. Kjo ka qenë dhe thirrja e kryeministrit për ata që e kanë votuar, sepse një qeveri votohet te kutia e votimit. Atje është testi që kalon në një demokraci, dhe sapo e kemi kaluar atë gjë”, shtoi ai.

Sipas Gogut, institucioni i protestës është institucion më vete dhe ndaj në çdo demokraci funksionale nga protesta duhet të shkosh ose te kutia e votimit, ose duhet të shkosh përpara, ose te referendumi, ose te Gjykata Kushtetuese.

“Pra testi që do kalojmë të gjithë bashkë është se si një demokraci funksionale të zgjidhi përmes institucioneve, përmes ligjit ku të sundojë ligji dhe jo forca, të drejtën për të vendosur.”

Gogu theksoi se aktualisht ka një ligj për shoqëritë e sigurisë. “Është e turpshme, e kanë shkelur dhe për këtë arsye mbajnë përgjegjësi. U është hequr licensa, ndiqen penalisht, nuk do ushtrojnë më aktivitet. Kjo është pyetja dhe ky është testi për shtetin ligjor. Nga ana tjetër, në momentin që e drejta e qytetarit shkelet, shteti do të më shpërblejë dhe shteti është aty në radhë të parë, të vendosë rregullin dhe në radhë të dytë, është të risjellë ligjin në qendër”, shtoi Gogu.

/a.f/r.e/

The post Gogu për protestat për Zvërnecin: Mosmarrëveshjen e zgjidh institucioni, nuk e zgjidh forca appeared first on Agjencia Telegrafike Shqiptare.

TIRANË, 4 qershor/ATSH-Maela Marini/ Kryeministri Edi Rama, i cili ndodhet në Mal të Zi për të marrë pjesë në Samitin BE–Ballkani Perëndimor, u ndal sot në Porto Montenegro, një investim i konsideruar si motori i parë i transformimit ekonomik të vendit fqinj.

Rama kujtoi se ky investim ishte parashikuar të ndodhte në Durrës, ndërkohë që investitori kanadez u detyrua ta largonte projektin nga Shqipëria.

“Live nga perla që e sollën këtu dikush që e përzunë nga Shqipëria. O çuna goca na e kaluan njëherë këta vëllezërit e vegjël topin për shalësh, për fajin e honxhobonxhove tanë që e lanë topin ta marrë deti. Po tani s’bëhet llaf më, ta harrojnë të gjithë ata që thonë s’duan apo s’na duan, se na kalon prapë huq topi i historisë së Shqipërisë së Re Europiane”, tha Rama, duke iu drejtuar atyre që protestojnë për investimin në Zvërnec.

Ndërsa shoqërohej nga menaxheri i këtij resorti turistik, Rama theksoi se nuk është fare e qëllimshme, por është krejtësisht e rastësishme që ndodhet në Porto Montenegro për të cilin ka folur disa herë këto ditë.

Kryeministri theksoi se vjen për herë të parë në Porto Montenegro, pasi di mirë historinë se si u ndërtua.

“U ndërtua nga dikush, një burrë i vjetër pasionant nga Kanadaja, i cili trokiti më parë në Shqipëri dhe donte të bënte një port turistik me këtë ambicie në Durrës. E keqtrajtuan dhe e detyruan të largohet duke mos i hapur fare dyert”, tha Rama.

Në Mal të Zi, sipas tij “u hapën dyert e qeverisë, por jo gjithçka shkoi që në fillim ashtu siç duket sot”.

“Ja ku jam sot këtu, sepse këtu Mali i Zi organizon me krenari Samitin BE-Ballkani Perëndimor. Jam këtu me menaxherin e këtij resorti me nam, që nxori Malin e Zi për herë të parë nga mjegulla e zezë”, tha Rama.

/r.e/a.f/

The post Rama në Porto Montenegro: Do të ndërtohej në Durrës, por investitori kanadez u detyrua të largohej appeared first on Agjencia Telegrafike Shqiptare.

TIRANË, 4 qershor/ATSH/ Kryeministri Edi Rama siguroi sot se investimi në Zvërnec do të sjellë harmoni me zhvillimin e natyrës, kjo falë edhe arkitektit të përzgjedhur nga investitorët për arkitekturën e peizazhit në këtë projekt.

Rama ndau prezantimin e projekteve që ka realizuar studio Turanscape.com nga arkitekti i peizazhit Dong Yugan, në Festivalin Bread&Heart në Tiranë, ndërkohë që bëri të ditur se ai është arkitekti i përzgjedhur nga investitorët për projektin në Zvërnec.

“Ja njeriu që investitorët e Zvërnecit kanë kontraktuar për arkitekturën e peizazhit. Njihuni me artistin e madh të natyrës, arkitektin e peizazhit Dong Yugan, nxënësin pasues të legjendarit Kungjan Yu dhe udhëheqësin e konsulencës mbi peizazhin e mbrojtur në projektin e Zvërnecit”, tha Rama.

Kryeministri bëri të ditur se Yugan prezantoi sot përpara një audience me plot arkitektë ndërkombëtarë në Festivalin Bread&Heart në Tiranë, vizionin dhe shumë gjetje të studios prestigjioze ndërkombëtare Turanscape, duke i mbresuar të gjithë me prezantimin e tij.

“Nëse do të shihni më shumë nga krijimtaria e studios Turanscape.com do ta krijoni vetë ndjesinë e sigurisë së brendshme, se falë edhe këtij talenti në skuadrën e yjeve që kanë formuar investitorët e projektit të Zvërnecit, ato 4 miliardë euro që forca të caktuara po bëjnë çmos t’ia heqin nga duart Shqipërisë, nuk mundet kurrësesi të sjellin pasoja negative për natyrën, përkundrazi, do të sjellin një nivel të harmonisë me zhvillimin e natyrës që do të jetë një krenari për Shqipërinë dhe një dhuratë e Shqipërisë për vetë Europën”, shtoi Rama.

Nga ana e tij, arkitekti Yugan prezantoi vizionin e studios Turanscape si dhe mënyrën se si trajtohet natyra dhe përballohen ndryshimet e klimës në projektet e tyre.

“Ne investojmë kaq shumë para për të zbutur ndryshimin e klimës çdo vit. Megjithatë zgjidhjet që ofron natyra janë me më pak kosto. Këtu infrastruktura konvencionale”, tha ai, duke prezantuar konceptin e qyteteve “sfungjerë”, që përfshijnë vendosjen e taracave dhe krijimin e ishujve, apo gjithashtu edhe pjesën e copëzimeve të terrenit.

Ai prezantoi projekte konkrete që po zbatohen në qytete të Kinës për të parandaluar dëmet nga përmbytjet.

“Nuk nuk ka nevojë të luftosh me ujin. Duhet përqafuar. Niveli i detit po rritet. Na është dashur në fakt që të transformojmë pjesën e tokës dhe ta shndërronim nga beton në tokë që gjallonte, që frymonte. Mendoj që profesioni ynë është arti i mbijetesës që ndryshon shoqëritë, që ndryshon klimën dhe ne mund të luajmë një rol kyç”, tha ai gjatë prezantimit në Festivalin Bread&Heart në Tiranë.

/m.m/a.f/r.e/

The post Rama: Investimi në Zvërnec në harmoni me natyrën, po drejtohet nga arkitekti i peizazhit Dong Yugan appeared first on Agjencia Telegrafike Shqiptare.

TIRANË, 4 qershor/ATSH/ Kryetari i grupit parlamentar të Partisë Demokratike, Gazment Bardhi mbështeti sot protestën e organizuar kundër investimit në Zvërnec, ndërsa theksoi se “protestohet kundër korrupsionit dhe arrogancës qeveritare”.

Nga foltorja e Kuvendit, Bardhi theksoi se ende nuk është bërë e ditur lista e pronarëve përfitues fundorë.

“Disa ditë më parë i kam kërkuar Kryeministrit të tregojë emrat e pronarëve të vërtetë të projektit të Zvërnecit. Përmend investitorët miliarderë, por dokumentet e shtetit shqiptar tregojnë se ata nuk janë të vetmit. Ne ende nuk e dimë kujt Edi Rama po i jep të drejtën të zhvillojë një nga zonat më të bukura të Shqipërisë. Nuk e dimë, sepse Edi Rama ka pranuar një marrëveshje që i fsheh pronarët e vërtetë pas një strukture të regjistruar në një parajsë fiskale në Holandë”, tha Bardhi.

Bardhi theksoi se nuk ka qenë kurrë kundër zhvillimit, por mbështet çdo zhvillim që ruan identitetin e zonës, nuk zhvat pronën e të tjerëve apo pronën e shtetit dhe nuk fsheh përfituesit e tij.

“Jam pro zhvillimit që nuk vjen nga para të pista, siç është bërë kaq e zakonshme në Shqipërinë e Edi Ramës. Unë e kuptoj që çështja e Zvërnecit ka shumë sensibilitete.
Tërheq vëmendje të madhe edhe ndërkombëtare. Por ajo që nuk kuptoj dot është pse Kryeministri i vendit, në një çështje kaq të nxehtë dhe kaq të ndjeshme, fsheh se kush janë pronarët përfitues fundorë”, shtoi ai.

Ndërkohë duke folur për protestën, Bardhi theksoi se protestuesit janë kundër arrogancës së pushtetit.

“Jam përpjekur modestisht të lexoj protestën e këtyre ditëve. Ajo që kam mundur të kuptoj është se pelikani kaçurrel, flamingot, zogjtë shtegtarë, flora dhe fauna e pasur e Zvërnecit nuk janë arsyeja kryesore pse një pjesë e mirë e protestuesve janë sot kundër projektit.
Ata janë kundër arrogancës së pushtetit. Janë kundër dhunës shtetërore dhe uzurpimit të gjithçkaje vetëm sepse kështu ka urdhëruar Edi Rama. Janë kundër korrupsionit qeveritar.
Janë kundër kësaj qeverie. Janë kundër diktaturës së parave të pista”, shtoi ai.

Sipas Bardhit, Shqipëria nuk është në sulm nga armiqtë e jashtëm, pro prej 13 vitesh është nën sulmin e keqqeverisjes, korrupsionit dhe abuzimit me pushtetin.

/m.m/r.e/

The post Bardhi për investimin në Zvërnec: Po fshihen emrat e pronarëve të vërtetë të projektit appeared first on Agjencia Telegrafike Shqiptare.

TIRANË, 4 qershor/ATSH/ Kryeministri Edi Rama priti sot në një takim në Kryeministri, presidentin e Lituanisë, Gitanas Nausėda.

Takimi pati në fokus forcimin e marrëdhënieve mes dy shteteve, si dhe mbështetjen e Lituanisë për procesin e anëtarësimit të Shqipërisë në BE.

Po ashtu biseda u fokusua te zgjerimi i BE-së me vendet e Ballkanit Perëndimor gjatë Presidencës së Lituanisë në Këshillin e Bashkimit Evropian në gjashtëmujorin e parë të vitit 2027.

/m.m/a.f/r.e/

The post Rama pret presidentin Nausėda: Lituania mbështet anëtarësimin e Shqipërisë në BE appeared first on Agjencia Telegrafike Shqiptare.