Forcat e armatosura britanike kanë zhvilluar një stërvitje të NATO-s në Estoni, ku kanë simuluar goditje me dronë me rreze të gjatë veprimi drejt objektivave në zonën e Shën Petersburgut, qyteti ku ka lindur presidenti rus Vladimir Putin. Sipas The Sun, ushtria britanike po intensifikon përgatitjet për skenarë të mundshëm përballjeje me Rusinë, duke testuar gjatë manovrave dronët e rinj raketorë Nyan. Këta dronë kanë një rreze veprimi prej afro 250 kilometrash dhe janë projektuar për të goditur objektiva strategjikë si depo karburanti, depo municionesh dhe qendra komanduese ushtarake. Stërvitja u zhvillua në bazën ushtarake të Tapës në Estoni, rreth 250 kilometra në vijë ajrore nga Shën Petersburgu. Në këtë rajon ndodhen edhe baza detare strategjike ruse e Kronstadtit dhe baza ajrore ushtarake e Levashovos. “Gjatë stërvitjes testuam nëse droni mund të fluturonte nga këtu deri në Shën Petersburg. Gjithçka varet nga mbrojtja ajrore dhe lufta elektronike e kundërshtarit, që do të përcaktonin mënyrën e manovrimit”, tha një ushtarak britanik, i cituar nga The Sun. Sipas raportimit, dronët Nyan do të zëvendësojnë një kompani tankesh Challenger 2, e cila ka qenë e dislokuar në Estoni gjatë dhjetë viteve të fundit, duke reflektuar ndryshimin e strategjisë ushtarake drejt përdorimit më të gjerë të sistemeve pa pilot. #voxnews #media #news @voxnews.al
Deputeti Erion Braçe ka reaguar pas incidentit të gjuajtjes me vezë të deputetëve nga protestuesit para nisjes së seancës së sotme plenare. Në një video mesazh në rrjetet sociale, Braçe e cilëson të papranueshëm dhe jashtë çdo të drejte themelore, sulmin fizik ndaj deputetëve. Sipas tij, askush nuk ka të drejtë të sulmojë fizikisht një tjetër, duke theksuar se veprime të tilla nuk mund të justifikohen në emër të lirive dhe të drejtave të njeriut. Ai kritikoi edhe kryetaren e Komisionit të Kuvendit për Liritë dhe të Drejtat e Njeriut, për justifikimin sipas tij për të legjitimuar akte të tilla, duke nënvizuar se në një shtet demokratik reagimi ndaj kujtdo që gabon bëhet përmes votës dhe drejtësisë, jo përmes dhunës. Sipas Braçes, sulmet fizike janë karakteristikë e sistemeve ku ekstremizmi i dhunshëm zëvendëson institucionet demokratike, ndërsa Shqipëria ka zgjedhur rrugën evropiane, ku dhuna konsiderohet krim dhe jo mjet politik. #voxnews #media #news #erionbrace
Dy persona humbën jetën, mes të cilëve një shqiptar, dhe një u plagos në një aksident të rëndë ditën e djeshme, në zonën Pastorano në Itali. Në aksident u përfshinë një “Fiat Stilo” dhe një automjet komercial “Piaggio Porter”. Viktimat janë një italian 69-vjeçar dhe një shtetas shqiptar 42-vjeçar. Tragjedia ndodhi rreth orës 13:50 të së dielës, më 19 korrik. Pas përplasjes, të dy automjetet mbetën të palëvizshme në qendër të rrugës. Sipas një rindërtimi fillestar, Piaggio Porter hyri në rrugën shtetërore Appia nga një rrugë dytësore dhe u godit nga Fiat Stilo, i cili po udhëtonte me shpejtësi të lartë. Një nga personat që ndodhej në Porter u nxor, ndërsa dy persona të tjerë mbetën të bllokuar brenda automjeteve. Pavarësisht përpjekjeve, nuk mund të bëhej asgjë për dy shoferët Një person tjetër, gjithashtu shtetas shqiptar, që ishte pasagjer, u plagos rëndë dhe u dërgua në spitalin e Casertës. ANSA raporton se jeta e tij nuk është në rrezik. #voxnews #media #news @voxnews.al
Ministri i Punëve të Brendshme, Besfort Lamallari, ka bërë një apel publik për respektimin rigoroz të rregullave të qarkullimit rrugor, duke paralajmëruar masa të rrepta ndëshkimore për të gjithë ata drejtues mjetesh që bëhen shkak për bllokimin e trafikut. Përmes një reagimi në rrjetet sociale, kreu i dikasterit të Brendshëm theksoi se sjelljet që pengojnë lëvizjen e lirë të qytetarëve nuk do të tolerohen më. Sipas ministrit Lamallari, është e papranueshme që për shkak të veprimeve të papërgjegjshme të disa individëve të vuajnë drejtuesit e tjerë të mjeteve të cilët zgjedhin të respektojnë normat qytetare dhe kodin rrugor. Ai nënvizoi se rregullat janë të barabarta dhe duhet të zbatohen nga të gjithë pa asnjë përjashtim apo dallim. Zgjerimi i teknologjisë së monitorimit në akset kombëtare Për të garantuar zbatimin e ligjit në terren, Policia e Shtetit po shfrytëzon mjete të avancuara të monitorimit nga ajri. Ministri bëri të ditur se krahas dronëve që janë tashmë në funksion, strukturave policore do t’u shtohet së shpejti edhe një rrjet i ri monitorimi teknologjik. Bëhet fjalë për kamerat inteligjente të sistemit Smart City, të cilat është planifikuar të vendosen përgjatë akseve kryesore kombëtare dhe rrugëve strategjike të vendit. “Dronëve të Policisë së Shtetit do t’u shtohen së shpejti edhe kamerat inteligjente të sistemit Smart City, të cilat do të vendosen në akset kombëtare”, thekson Lamallari. Ky investim synon të rrisë sigurinë rrugore dhe të mundësojë identifikimin e menjëhershëm të shkelësve, duke ua kaluar të dhënat patrullave më të afërta të policisë në terren për vendosjen e gjobave përkatëse. Autoritetet shprehen se ky mekanizëm i ri do të shërbejë si një mjet efikas për të parandaluar vonesat artificiale në trafik dhe për të kultivuar një sjellje më të përgjegjshme nga ana e përdoruesve të rrugës. #voxnews #media #news
Policia arrestoi një shtetas italian banues në zonën e Napolit, kundër të cilit ishte në pritje një kërkesë arresti me qëllim ekstradimi nga autoritetet gjyqësore shqiptare. Operacioni u krye nga oficerë të Zyrës së Komisionerit të Sigurisë Publike të Fondit, si pjesë e kontrolleve të individëve të pranishëm në mjediset e akomodimit. Prania e 34-vjeçarit u zbulua nëpërmjet një alarmi të lidhur me kontrollet e klientëve të hotelit. Raporti arriti në Sallën e Operacioneve dhe shkaktoi ndërhyrjen e policisë. Oficerët arritën menjëherë në hotelin e treguar dhe konfirmuan praninë aktuale të personit të kërkuar. I kërkuari u shoqërua më pas në zyrat e Stacionit të Policisë për kontrollet e zakonshme. Në stacionet e policisë u kryen verifikime mbi dokumentacionin e pranishëm në bazën e të dhënave të Interpolit. Hetimet e mëtejshme konfirmuan vlefshmërinë e masës kufizuese të lëshuar nga autoritetet gjyqësore shqiptare dhe Interpol Tirana dhe pritet ekstradimi i tij. Sipas autoriteteve gjyqësore shqiptare, 34-vjeçari akuzohet për shmangie të taksave në vlerë prej afërsisht 150,000 eurosh në lidhje me aktivitetet e tij të biznesit në Shqipëri. Ai drejtonte një fabrikë këpucësh. Për këto fakte, ndaj tij ishte lëshuar një masë paraprake për t’u ekzekutuar në Shqipëri, si pjesë e një procesi penal që është ende në pritje, informon media italiane. Pas arrestimit të tij, ai u dërgua në burgun Latina. Tani mbetet në dispozicion të Gjykatës së Apelit kompetente për procedurat e ekstradimit. Gjykata do të duhet ta vërë në fuqi urdhrin brenda 96 orëve dhe të vendosë për kërkesën për ekstradim të bërë nga autoritetet shqiptare. #voxnews #media #news
Një zjarr ka rënë pasditen e sotme përgjatë autostradës Fier-Vlorë, ku flakët kanë përfshirë rreth 2 kilometra të anës së rrugës, duke krijuar rrezik serioz për qarkullimin e makinave. Tymi i dendur dhe përhapja e shpejtë e flakëve po e bëjnë kalimin gjithnjë e më të vështirë dhe të rrezikshëm për drejtuesit e mjeteve. Në drejtim të zonës janë nisur disa zjarrfikëse për të vënë situatën nën kontroll dhe për të parandaluar përhapjen e mëtejshme të zjarrit. #voxnews #media #news @voxnews.al
Përveç gjyqit për llogari të të cilit po mbahet në qeli, kryebashkiaku i Tiranës, Erion Veliaj, do të ketë një përballje të re me SPAK në Gjykatën e Posaçme. Kjo gjykatë do të shqyrtojë kërkesën e Veliajt për të nisur një hetim penal për “falsifikim dokumentesh” të bërë ndaj Nesti Angonit, personazhit anonim mbi një dokument të të cilit SPAK nisi hetim ndaj kryebashkiakut. Në thelbin e shqyrtimit është ankimi i Erion Veliajt kundër një vendimi të Prokurorisë së Tiranës për “mosfillim procedimi penal”. Prokuroria vendosi të mos niste hetim mbi kallëzimin e bërë nga Veliaj në Prokurorinë e kryeqytetit në prill 2026, ku kërkonte identifikimin e personit real që fshihet pas “Nesti Angonit”, me pretendimin se prej tij ishte falsifikuar një dokument. Po ashtu, Veliaj kërkonte të verifikohej se si ishte depozituar në SPAK apo administruar kallëzimi i Angonit. Nga ana e saj, Prokuroria e Tiranës ka verifikuar se Nesti Angoni nuk figuron në regjistrin e Gjendjes Civile. Përveç kësaj, ka arsyetuar se nuk ka tagër, kompetencë të kontrollojë hetimet e kryera nga SPAK dhe vërtetësinë e akteve të administruar prej saj në dosjen “Veliaj”. Ky vendim është ankimuar nga Veliaj në Gjykatën e Tiranës, e cila më 15 korrik ka vendosur shpalljen e moskompetencës, dërgimin e çështjes për gjykim në Gjykatën e Posaçme. Aktualisht, dosja ndodhet në duart e gjyqtarit Erjon Çela, që në ditët në vijim të caktojë datën e parë të shqyrtimit të saj. #voxnews #media #news @voxnews.al
Më 11 shtator 2025, pushimet e Davidit, një 18 vjeçar nga Praga, morën një rrjedhë të papritur në gjirin e Sarandës, ndërsa ai po bënte xhiro në det me një “Jet Ski”. Gjatë kthimit me shpejtësi të ulët drejt bregut, ku do të merrte të ëmën si pasagjere, ai u godit fuqishëm nga një mjet tjetër lundrues i drejtuar nga turistë nga Franca, duke përfunduar pa ndjenja në ujë. E ëma që po filmonte nga skela u shokua, ndërsa pa të birin të pluskonte në ujë, i mbajtur në sipërfaqe vetëm nga jeleku i shpëtimit. “Djali im ra në ujë, duke mbetur i palëvizshëm dhe pa ndjenja,” tha ajo në një intervistë për BIRN. David dhe nëna e tij kërkuan të ishin anonimë, ndërsa i vunë në dispozicion BIRN dosjen e plotë të rastit të tyre, përfshi videon që tregonte përplasjen. Gjatë rrugës për në spital, operatori që drejtonte biznesin e jetskive iu lut familjes të mos e përmendnin që dëmtimi kishte ndodhur nga një mjet ujor, duke pranuar se punonte pa një licencë. Thuajse një vit më vonë, hetimet e kërkuara me këmbëngulje nga familja çeke nuk kanë dhënë asnjë rezultat, pasi fajtorët nuk u identifikuan. Aksidente të ngjashme vijojnë të trondisin pushimet e shqiptarëve dhe të huajve në brigjet e vendit nga Shkodra në Sarandë. Të dhënat zyrtare të Drejtorisë së Përgjithshme të Policisë së Shtetit tregojnë se ka një rritje të theksuar të aksidenteve me mjete motorike ujore, pavarësisht masave administrative dhe ashpërsimit të ndëshkimeve. Nga vetëm dy incidente të rënda me pesë të lënduar në vitin 2023, bilanci është rënduar në 13 aksidente gjatë vitit 2025, duke lënë pas 17 të plagosur dhe tre viktima, përfshirë turistë të huaj. Erdit Gega, drejtues i Federatës Shqiptare të Vrojtuesve të Plazhit dhe Shpëtimit në Ujë, thotë se edhe pse nuk renditen te shkaktarët kryesorë të vdekjeve në det, motorët e ujit mbeten një nga rreziqet shqetësuese për ata që i drejtojnë dhe për notarët e tjerë. “Normalisht që janë të rrezikshëm,” tha Gega, ndërsa shtoi se pavarësisht vëmendjes së shtuar të policisë dhe sinjalizimeve nga vrojtuesit e plazhit, mjaft prej drejtuesve të këtyre mjeteve vijojnë të sillen me “arrogancë”. “ Shifrat e rrezikut në det Incidentet me mjete lundruese mbeten një shqetësim i vazhdueshëm në plazhet e Shqipërisë edhe gjatë këtij sezoni. Në qershor të vitit 2026, një 22-vjeçar humbi jetën në Gjirin e Ksamilit pasi u përplas me Jet Ski me skafin e Policisë Kufitare. Një vit më parë, në qershor 2025, një 34-vjeçar britanik humbi jetën dhe partnerja e tij u lëndua pasi ranë nga motori i ujit në afërsi të Shkëmbit të Kavajës në Durrës; ata nuk dinin not dhe mjeti u ishte dhënë pa asnjë verifikim të njohurive apo licencës për drejtimin e tij. Të dhënat e siguruara përmes një kërkese për të drejtë informimi nga Policia e Shtetit tregojnë se gjatë viteve 2023-2025 u konstatuan 37 subjekte dhe individë që operonin motorë dhe varka uji tërësisht jashtë ligjit, pa licencë apo dokumentacion. Në tre vite, numri i mjeteve të bllokuara nga policia u rrit nga 224 në vitin 2023 në 305 në vitin e kaluar për shkak të mungesës së dokumenteve nga operatorët apo për shkak se këta të fundit apo personat që i morën me qira shkelën rregullat e sigurisë. Në total, policia thotë se ka bllokuar në tre vite 794 mjete lundruese, prej të cilave 65% u ndëshkuan për shkelje të drejtpërdrejta të sigurisë, të tilla si mbingarkesa me pasagjerë apo dhënia e mjeteve personave të papërgatitur dhe pa mjete shpëtimi. Ndërhyrjet masive të policisë dhe gjobat e rënda që variojnë nga minimumi 50 mijë lekë nuk duket se e kanë dekurajuar operimin e këtyre mjeteve në shkelje të rregullave të sigurisë. Vetëm në muajin qershor 2026, Drejtoria Vendore për Kufirin dhe Migracionin në Vlorë bëri me dije se bllokoi 66 mjete lundruese për shkelje të rregullave të sigurisë detare. Megjithatë përfaqësuesit e monitorimit të plazheve theksojnë se mjetet lundruese mbeten një rrezik real për shkak të papërgjegjshmërisë, edhe pse nuk renditen në listën e shkaktarëve kryesorë të mbytjeve në ujë. #voxnews #media #news
Një tjetër procedurë prokurimi publik e zhvilluar nga Fondi Shqiptar i Zhvillimit (FSHZH), nën drejtimin e Dritan Agollit, ngre dyshime të forta për praktika klienteliste dhe kufizim të konkurrencës Bëhet fjalë për tenderin me objekt: "Ndërhyrje për përmirësimin e aksesit, konektivitetit & mobilitetit rajonal dhe lokal: Sistemim Asfaltim i rrugës Hyrja e qytetit Koplik dhe rrugës Dalja e qytetit Koplik për Bajzë, Njesia Administrative Koplik & Sistemim asfaltim Bypass Shëngjin". Kronika e Një Garsë të Paracaktuar me 19 Konkurrentë në Letër, dhe fitues Metalinë e "4 A-M" presanomen e Baç Ulajt. Megjithëse në garë u përfshinë plot 19 operatorë ekonomikë dhe bashkime operatorësh, skenari ka përfunduar me shpalljen fitues të operatorit "4 A-M" sh.p.k. Ajo që përbën një Red Flag të qartë sipas filtrave analitikë të pajtueshmërisë, është fakti se fituesi nuk është operatori me ofertën më të ulët, ndërkohë që procedura është shoqëruar me një valë skualifikimesh masive të pjesës tjetër të konkurrentëve. Filtri i Përjashtimeve dhe Kriteret e Dyshimta Në njoftimin e fituesit, autoriteti kontraktues ka listuar një sërë skualifikimesh të operatorëve konkurrues, duke përdorur si argument mosplotësimin e një kriteri teknik në tender. Sipas pikës 2.3.1 të DST-së, operatorët detyroheshin të provonin: a) Punë të ngjashme për një objekt të vetëm në vlerë jo më të vogël se 50% e vlerës së përllogaritur të kontratës gjatë pesë viteve të fundit; ose b) Vlerë totale të punëve të kryera gjatë pesë viteve të fundit jo më të vogël se dyfishi i vlerës limit. Këto kritere të rrepta shpesh shërbejnë si mekanizma filtri për të ngushtuar rrethin e konkurrentëve, duke lënë rrugë të lirë për fituesit e paraprakisht preferuar, ndërkohë që institucioni i drejtuar nga Dritan Agolli vijon të mbyllë sytë përpara ofertave të tjera në treg.
Një zjarr ka rënë pasditen e sotme në zonën e Ujit të Ftohtë, mbi tunelin e Vlorës, duke përfshirë një sipërfaqe me shkurre dhe bimësi të ulët. Sipas një mesazhi të mbërritur në redaksi, flakët kanë qenë aktive prej më shumë se një ore, ndërsa pushuesit shprehen të shqetësuar për përhapjen e tyre. Temperaturat e larta dhe era kanë favorizuar avancimin e zjarrit, i cili në disa momente i është afruar zonës së banuar, duke krijuar rrezik për banesat pranë. Në vendngjarje kanë mbërritur forcat e Policisë dhe shërbimet zjarrfikëse, të cilat po punojnë për izolimin e vatrës dhe shuarjen e plotë të flakëve. Ndërkohë, qytetarët kërkojnë reagim të shpejtë nga strukturat përgjegjëse, duke shprehur shqetësimin për situatën në një zonë të frekuentuar nga pushuesit gjatë sezonit veror.
Në një kohë kur shumë fëmijë e kalojnë verën mes lojërave dhe pushimeve, Arbri ka zgjedhur një rrugë tjetër. Çdo ditë, në plazhin e Qerretit, në Kavajë, ai shihet pranë babait të tij, duke punuar me përkushtim për të ndihmuar familjen. Teksa i ati shpërndan misrat e pjekur nëpër çadrat e pushuesve, Arbri kujdeset që zjarri të mos fiket. Me qymyr në duar dhe me një seriozitet që rrallë e sheh te një fëmijë i moshës së tij, ai mban të ndezur skarën, në mënyrë që puna të vazhdojë pa ndërprerje. Pamjet e tij nuk ngjallin keqardhje, por respekt. Respekt për një fëmijë që po mëson që herët vlerën e punës, përgjegjësisë dhe sakrificës. Sepse puna nuk është turp, përkundrazi, është dinjitet. Qytetari që na dërgoi këtë histori tregon se Arbri i kujtoi fëmijërinë e tij dhe sakrificat që edhe ai kishte bërë dikur. "Puna është nder. M'u dhimbs sepse më kujtoi veten dhe e njoh atë sakrificë që po bën në këtë moshë," shkruan ai. Në një shoqëri ku shpesh promovohen shembuj të gabuar, historia e Arbrit na kujton se heronjtë e vërtetë nuk janë gjithmonë në ekranet e televizorit. Ndonjëherë ata janë pranë nesh, në një plazh, me duart e nxira nga qymyri dhe me buzëqeshjen e një fëmije që ndihmon babanë e tij me krenari. I urojmë Arbrit dhe familjes së tij mbarësi, punë të begatë dhe një të ardhme sa më të ndritur. ❤️
Euro ka pësuar një zhvlerësim të ndjeshëm ndaj lekut gjatë viteve të fundit. Nga mesatarja prej rreth 140 lekësh në vitin 2015, euro ka rënë vazhdimisht, duke zbritur nën kufirin e 100 lekëve gjatë vitit 2025 (mesatarja vjetore 97.8 lekë), ndërsa për pesë muajt e parë të vitit 2026 këmbehet mesatarisht me 95.6 lekë. Në kundërshtim me perceptimin e zakonshëm se turizmi është shkaktari kryesor, të dhënat dhe analizat e tregut tregojnë se dy faktorë kryesorë diktojnë këtë rënie... 1. Bumi i ndërtimit dhe paratë në qarkullim! Rekordet e lejeve gjatë periudhës 2021–2024, arriti nivele rekord me sipërfaqe prej 2.1 deri në 2.7 milionë metra katrorë në vit, lidhje e cila sipas grafikëve përkon drejtpërdrejt me zhvlerësimin e euros. 2. Treguesit për 2026 Të ardhurat nga taksa e infrastrukturës sugjerojnë se vetëm në 5 muajt e parë të vitit 2026 janë dhënë rreth 2 milionë metra katrorë leje të reja ndërtimi. Rritja e ndërtimeve rezidenciale është mbështetur shpesh te financimet nga palët e treta dhe detyrimet ndaj furnitorëve e klientëve (pa kaluar domosdoshmërisht përmes kredive klasike bankare), duke lehtësuar qarkullimin e volumeve të mëdha të likuiditetit në treg. Faktorët ekonomikë tradicionalë (të ashtuquajturat fondamente) tregojnë një përmirësim të deficitit të llogarisë korente në vitet e fundit, sidomos falë të ardhurave rekord nga turizmi dhe remitancat e emigrantëve. Gjatë vitit 2025 bilanci neto i udhëtimeve arriti në 2.7 miliardë euro dhe remitancat në 1.1 miliardë euro. Këto hyrje masive valute kanë rritur ndjeshëm ofertën e euros në tregun vendas, duke sjellë uljen e mëtejshme të kursit të këmbimit.
Një qytetar i është drejtuar redaksisë tonë duke shprehur shqetësimin e tij për gërryerjen e një pjese mali në zonën e Krujës. Qytetari i cili ndodhet me pushime në këtë zonë, nga ballkoni i hotelit ka vënë re mjete të rënda, si fadroma, eskavatorë, edhe kamionë e punëtorë që po kryejnë punime në shpatin e malit. "Jam me pushime në Krujë. Nga ballkoni i hotelit pashë se një pjesë e malit po gërryhet. Nuk e di çfarë punimesh po kryhen, por më bëri shumë përshtypje. Kur afrova kamerën për të bërë foto, pashë fadroma, eskavatorë, kamionë dhe punëtorë që po punonin në mal", shkruan qytetari në mesazhin e tij. Në këtë fazë, nuk dihet natyra e punimeve dhe nëse ato po kryhen mbi bazën e lejeve përkatëse. Qytetari u bën thirrje autoriteteve kompetente që të sqarojnë nëse bëhet fjalë për një projekt të miratuar apo për një aktivitet tjetër në zonë.
Në vitin 2013, deputeti socialist Eduard Shalsi deklaronte publikisht një frazë që sot tingëllon ironike: "Nuk do vjedhim në mënyrë kaq flagrante siç kanë bërë këta". Mbi një dekadë më vonë, investigimet mbi pasurinë e tij dhe bashkëshortes së tij, Eranda Shalsi, ngrenë pikëpyetje serioze mbi mënyrën se a mund të justifikohen të ardhurat e tyre zyrtare me rritjen marramendëse të pasurisë. Nga një profil modest në portofol të pasur pronash Kur hyri në politikë, Shalsi nuk zotëronte pasuri të konsiderueshme. Megjithatë, deklarimet e tij ndër vite tregojnë një portofol të zgjeruar pronash në Tiranë, që përfshin: -6 apartamente me sipërfaqe të ndryshme (176 m2, 124 m2, 123 m2, 119 m2, 71 m2 dhe 51 m2). -2 garazhe me sipërfaqe 43 m2 dhe 18 m2. Kërcimi i papritur i të ardhurave pas vitit 2021 Analizat financiare të mëparshme nga rrjetet investigativë, përfshirë BIRN, tregonin se deri në vitin 2021 çifti Shalsi nuk dispononte të ardhura që mund të justifikonin një pasuri prej qindra mijëra eurosh. Ndryshimi financiar ndodh pas vitit 2022, falë biznesit të bashkëshortes, e cila ushtron aktivitet si arkitekte dhe audituese energjie: Viti 2020 - 2021: Të ardhura minimale ose mungesë fitimesh të deklaruara nga aktiviteti. Viti 2022 - 2024: Rritje e menjëhershme, ku biznesi deklaron mbi 100 mijë euro fitim vjetor, duke arritur kulmin në vitin 2023 me rreth 150 mijë euro fitim dhe 20 mijë euro pagë. Në këtë periudhë u blenë pasuri të paluajtshme me vlerë qindra mijëra euro, përfshirë një apartament dhe garazh prej 300 mijë eurosh. Viti 2025: Deklarohen rreth 27 mijë euro fitim, ndërkohë që shtohen sërish blerje pronash me vlerë rreth 200 mijë euro. Dyshimet për konflikt interesi dhe ndikim politik Këto ecuri financiare kanë ngritur dyshime të forta në opinionin publik mbi lidhjen e mundshme midis aktiviteti privat të familjes dhe funksionit publik të Eduard Shalsit. Kritikët dhe raportimet investigativë e lidhin emrin e tij me nisma ligjore dhe lehtësime fiskale në Kuvend, duke ngritur pyetjen nëse rritja e të ardhurave të bashkëshortes është produkt i pozicionit të tij institucional.
Një grup vajzash nga Kosova janë përballur me një incident gjatë pushimeve të tyre në bregdetin shqiptar. Teksa lëviznin me makinë në plazhin e Dhërmiut, automjeti i tyre ka ngecur në rërë pa mundur të lëvizin as para as mbrapa. Në ndihmë të tyre ka ardhur një djalë shqiptar nga Shkupi, i cili me automjetin e tij tip fuoristradë ka arritur t’i nxjerrë nga situata e vështirë dhe t’i rikthejë në rrugë. Pushiesit kanë përgëzuar shqiptarin për gatishmërinë dhe ndihmën e dhënë në këtë moment të vështirë me të cilin u përballën vajzat e reja.
Banorët e Kombinatit kanë ngritur shqetësimin për një problem që vijon prej rreth një jave. Telat e energjisë elektrike janë të varur në rrugë, duke krijuar vështirësi dhe rrezik për kalimtarët dhe automjetet. Sipas një denoncimi të mbërritur nga një qytetar, situata është bërë e vështirë për përditshmërinë e banorëve. “Ka një javë ky problem. Nuk kalojmë dot as në këmbë, jo më me makinë. Telat e korrentit janë varur në rrugë dhe duhet të zbresim nga makina për t’i larguar që të kalojmë. Ka edhe fëmijë që lëvizin në këtë rrugë”, shprehet qytetari. Banorët kërkojnë ndërhyrje të shpejtë për zgjidhjen e situatës dhe eliminimin e rrezikut për kalimtarët.
Me rritjen e temperaturave duket se është rritur edhe pakujdesia e disa drejtuesve të mjeteve në rrugët e vendit. Një tjetër rast i sjelljes së rrezikshme në timon është denoncuar në Rrugën e Arbrit, ku dy drejtues automjetesh Range Rover janë filmuar duke kryer një seri parakalimesh të njëpasnjëshme, duke vënë në rrezik jo vetëm veten, por edhe drejtuesit e tjerë që lëviznin në këtë aks. Në pamjet e siguruara, dy automjetet shfaqen duke dalë nga kolona dhe duke kryer parakalime zinxhir, edhe pse në segmentin ku kanë ndodhur manovrat vijat e rrugës ishin të pandërprera, çka e ndalon kategorikisht kalimin në korsinë e kundërt. Një manovër e tillë, sidomos në një aks me kthesa dhe me qarkullim të lartë si Rruga e Arbrit, mund të kthehet në një tragjedi në vetëm pak sekonda. Një frenim i papritur, një mjet që vjen përballë apo një gabim i vogël mund të kishte pasoja fatale. Pavarësisht thirrjeve të vazhdueshme për respektimin e rregullave të qarkullimit, duket se për disa shoferë shpejtësia dhe nxitimi vlejnë më shumë se siguria në rrugë. Në fund, duket se disa drejtues mjetesh nuk i trembin as radarët, as kontrollet dhe as dronët e policisë, duke vazhduar të rrezikojnë jetën e tyre dhe të të tjerëve me manovra të rrezikshme.
Një qytetare ka ngritur shqetësimin e saj lidhur me një gjobë prej 3.000 lekësh për parkim, të vendosur në zonën ku ajo deklaron se ka parkuar prej vitesh automjetin e saj pa hasur më parë probleme. Ajo ka treguar se jeton në rrugën "Qamil Guranjaku" dhe parkon automjetin pranë zonës së Rezidencës 3, ku thotë se nuk ka pasur tabelë që ndalon parkimin. Ajo shprehet se ka përdorur të njëjtin vend parkimi vazhdimisht dhe se ka mbetur e surprizuar kur ka gjetur gjobën në xhamin e makinës. “Kam parkuar gjithmonë në atë zonë dhe nuk ka pasur asnjë njoftim që ndalonte parkimin. Nëse Bashkia ka vendosur rregulla të reja për këtë hapësirë, të paktën duhet të vendoset sinjalistika përkatëse që banorët të informohen”, shprehet qytetarja. Ajo i kërkon institucionit përgjegjës që të marrë në konsideratë situatën dhe të vendosë tabela informuese për ndalimin e parkimit, nëse ky është vendimi i ri për zonën. Sipas saj, qytetarët nuk duhet të përballen me masa ndëshkuese pa pasur më parë njoftim të qartë për ndryshimin e rregullave të parkimit.
Login
