Gazeta Si – Një i dënuar ka ndërruar jetë këtë të martë në Institucionin e Ekzekutimit të Vendimeve Penale në Fier. Burime bëjnë me dije se viktima është 52-vjeçari Artur Doku, banues në Burrel, i cili vuante dënimin për vrasjen e një personi, krim i kryer në vitin 1997. Mësohet se Dokut i kishin mbetur për të vuajtur edhe 9 vite e 5 muaj burg.

Sipas informacioneve paraprake, 52-vjeçari kishte probleme me zemrën dhe dyshohet se ka ndërruar jetë për shkaqe natyrale. Pasi iu përkeqësua gjendja shëndetësore, ai u transportua drejt Spitalit Rajonal të Fierit, ku mjekët konstatuan vdekjen.

Më pas, trupi i pajetë u dërgua në morg për kryerjen e procedurave mjeko-ligjore, ndërsa autoritetet kanë nisur veprimet procedurale për dokumentimin e plotë të ngjarjes.

Nga të dhënat paraprake nuk ka dyshime për rrethana kriminale, ndërsa pritet që ekspertiza mjeko-ligjore të përcaktojë zyrtarisht shkakun e vdekjes.

The post Ndërron jetë në burgun e Fierit 52-vjeçari i dënuar për një vrasje të vitit 1997 appeared first on Gazeta Si.

Gazeta Si – Duke filluar nga 1 shtatori, Zinédine Zidane – një ish-futbollist brilant dhe trajner tejet i suksesshëm te Real Madridi – do të marrë drejtimin e Francës, një prej ekipeve kombëtare më të mira të futbollit në botë.

Lajmin e bëri të ditur presidenti i Federatës Franceze të Futbollit, Philippe Diallo, gjatë një konference për shtyp; Zidane do të zëvendësojë Didier Deschamps-in, i cili e kishte drejtuar ekipin që nga viti 2012 dhe e çoi atë deri në Kupën e Botës 2026, ku Franca hyri si favorite, por u eliminua në gjysmëfinale nga Spanja.

Prej javësh, Zidane konsiderohej si pasuesi pothuajse i sigurt i Deschamps-it. Të dy kanë qenë lojtarë të nivelit elitar: ata kanë luajtur së bashku te Juventusi dhe kanë fituar si bashkëlojtarë si Kupën e Botës 1998, ashtu edhe Kampionatin Evropian të vitit 2000. Deschamps e drejtoi Francën në 189 ndeshje, ndërsa Zidane nuk ka drejtuar asnjë ekip që nga viti 2021.

Zidane është 54 vjeç dhe deri më tani ka drejtuar vetëm dy ekipe: skuadrën rezervë të Real Madridit dhe ekipin e parë të Real Madridit – një nga klubet më të pasura dhe më të fuqishme në botë – ku kishte luajtur gjithashtu midis viteve 2001 dhe 2006.

Gjatë periudhës së tij, Zidane ka trajnuar yje si Cristiano Ronaldo, Karim Benzema, Luka Modrić dhe Gareth Bale – disa prej lojtarëve më të mirë të viteve të fundit.

Ai e fitoi Ligën e Kampionëve tri herë radhazi midis viteve 2015 dhe 2018; megjithatë, dy sezonet e tij të fundit si trajner i Real Madridit, nga viti 2019 deri në 2021, nuk ishin po aq të suksesshme.

The post Zinédine Zidane është trajneri i ri i kombëtares franceze të futbollit appeared first on Gazeta Si.

Nga Gazeta ‘Si’- Për sa kohë që EUR/USD do të tregtohet nën nivelin 1.1390, trendi do të mbetet në rënie, me objektiv 1.1240. Tregtimi mbi nivelin 1.1390 do të pasohej nga një tentativë për testimin e rezistencës në 1.1425.

Për sa kohë që GBP/USD do të tregtohet nën nivelin 1.3335, trendi do të mbetet negativ, me objektiv 1.3070. Tregtimi mbi nivelin 1.3335 do të pasohej nga një rritje e mëtejshme, me objektiv 1.3370.

Për sa kohë që USD/JPY do të tregtohet mbi nivelin 163.5, trendi do të mbetet pozitiv, me objektiv 165.2. Tregtimi nën nivelin 163.5 do të pasohej nga tentativa për testimin e suportit në 162.8.

Për sa kohë që indeksi Dow Jones do të tregtohet mbi nivelin 51.800, trendi në fillim të javës do të mbetet pozitiv. Tregtimi nën nivelin 51.800 do të thellonte më tej rënien drejt suportit në 51.400. Një reagim negativ ndaj këtij niveli do të pasohej nga rënie e mëtejshme drejt suportit në 50.500.

Për sa kohë që Crude Oil do të tregtohet nën nivelin 90.7, trendi do të mbetet negativ, me objektiv 85.8. Tregtimi mbi nivelin 90.7 hap rrugën për testimin e rezistencës në 92.0.

Për sa kohë që BTC/USD do të tregtohet mbi nivelin 64.250, trendi do të mbetet pozitiv, me objektiv 65.400. Tregtimi nën nivelin 64.250 do të pasohej nga tentativa për testimin e suportit në 62.000.

The post Parashikimi i ‘SI’ për bursat gjatë javës: Ulet nafta, rritet Bitcoin appeared first on Gazeta Si.

Gazeta Si – Tre persona janë proceduar oenalisht në gjendje të lirë në Kavajë, pasi dyshohet se kanë zpatuar hapësira publike në plazhin e Golemit.

Policia e Kavajës njofton se ka vijuar kontrollet në vijën bregdetare në kuadër të operacionit “Plazhi i lirë”, duke liruar hapësira publike në zonën e Golemit që ishin zënë në mënyrë të paligjshme.

Gjatë aksionit u hoqën dhe u sekuestruan 116 çadra dhe 232 shezlongë, të cilat ishin vendosur pa leje nga tre shtetas.

Për këtë rast, nisi procedimi penal në gjendje të lirë ndaj tre shtetasve, të identifikuar me inicialet A. B., 54 vjeç, D. K., 38 vjeç dhe F. D., 24 vjeç, të tre banues në Kavajë.

The post ‘Plazhi i lirë’ në Golem, 3 persona në hetim për zënien e hapësirave publike appeared first on Gazeta Si.

Gazeta Si – Zjarrfikësit spanjollë po vazhdojnë përpjekjet për të vënë nën kontroll zjarret shkatërruese që po përhapen në disa zona pranë Madridit.

Puna e tyre është thelbësore, veçanërisht duke pasur parasysh se erërat nga jugu – që pritet të mbërrijnë brenda pak orësh – mund ta përkeqësojnë më tej një situatë tashmë serioze.

Parashikohet që era të ndryshojë drejtim rreth mesditës së së martës, më 28 korrik. “Ajo do të fryjë nga jugu dhe çdo vatër zjarri e pakontrolluar mund ta ndërlikojë më tej situatën”, vuri në dukje gjatë natës Fran Martín Aguirre, delegati qeveritar për rajonin e Madridit.

Ashtu si dita e kaluar, edhe kjo ditë do të jetë “absolutisht vendimtare”, deklaroi në një konferencë për shtyp Ministri i Brendshëm, Fernando Grande-Marlaska, duke shprehur shpresën se zjarret mund të “vihen nën kontroll dhe të izolohen”, ndërsa përmendi gjithashtu “parashikime vërtet të pafavorshme” duke filluar nga e mërkura.

Ndërkohë, zjarri masiv që ka shkatërruar 42,000 hektarë në rajonin Gironde të Francës që nga 22 korriku duket se është stabilizuar, sipas prefekturës së departamentit.

“Gjatë natës u ndërhy në disa vatra zjarri, të cilat tashmë janë nën kontroll – në veri të Le Porge, në veri të Cap-Ferret dhe në zonën e dunave – falë ndërhyrjes së zjarrfikësve. Sipërfaqja e djegur mbetet e pandryshuar”, deklaroi burimi.

Të martën, shërbimi meteorologjik parashikoi rritje të temperaturave, të cilat do të arrijnë në 33–35°C në brendësi të vendit, të shoqëruara nga erëra juglindore dhe fllade oqeanike perëndimore përgjatë bregdetit – kushte që mund të shkaktojnë rinisjen e flakëve.

The post Zjarret djegin pyjet e Spanjës, autoritetet: Orë vendimtare! appeared first on Gazeta Si.

Gazeta Si – Një tërmet me magnitudë 7.1 u regjistrua në prefekturën Kumamoto të Japonisë, në jugperëndim të arkipelagut, në orën 16:27 me orën lokale (09:27 me orën e Shqipërisë).

Tërmeti goditi në një thellësi prej 10 kilometrash, sipas Agjencisë Meteorologjike të Japonisë, e cila lëshoi ​​një paralajmërim për cunami dhe e vlerësoi intensitetin e lëkundjes me shkallën 7 në shkallën sizmike japoneze – niveli më i lartë.

Menjëherë pas tërmetit nuk u raportuan dëme apo të lënduar. Agjencia Meteorologjike e Japonisë lëshoi ​​një paralajmërim për cunami për brigjet e deteve Ariake dhe Yatsushiro.

Qendra Amerikane e Paralajmërimit të Cunamit në Paqësor deklaroi se nuk kishte rrezik për cunami përtej vijës bregdetare lokale të Japonisë.

Në vitin 2016, Kumamoto u godit nga një tërmet shkatërrues që shkaktoi mbi 50 viktima dhe 1,800 të lënduar, si dhe shkatërroi dhjetëra mijëra shtëpi.

Nuk u konstatuan anomali të menjëhershme në centralet bërthamore aty pranë pas tërmetit me magnitudë 7.1 që goditi Japoninë jugperëndimore, deklaroi Autoriteti Rregullator Bërthamor i vendit.

Kompania lokale e energjisë, “Kyushu Electric Power”, konfirmoi se tre reaktorët bërthamorë që operojnë në rajon vazhduan të funksiononin normalisht.

Kryeministrja japoneze, Sanae Takaichi u bëri thirrje banorëve përmes një mesazhi në platformën X që të qëndronin larg bregdetit, ku pritet një cunami me valë deri në 1 metër lartësi. “Pas këtij tërmeti, – shkroi ajo, – është lëshuar një njoftim për cunami për Gjirin Ariake dhe Detin Yatsushiro, me parashikim për valë rreth 1 metër të larta. Ju lutemi, mos iu afroni bregdetit”.

Ndërkohë, ajo vuri në dukje se qeveria ka ngritur një grup pune për të mbledhur informacione, për të vlerësuar dëmet e mundshme dhe për t’u përgatitur për operacione shpëtimi nëse është e nevojshme.

“Jeta e njerëzve është prioriteti ynë kryesor”, deklaroi Takaichi, duke u bërë thirrje banorëve në zonat më të goditura që të qëndrojnë vigjilentë ndaj pasgoditjeve të mundshme të fuqishme.

“U kërkoj atyre që ndodhen në zonat më të goditura”, vazhdoi ajo, “të qëndrojnë vigjilentë për tërmete me magnitudë të ngjashme”.

The post Tërmeti 7.1 ballë godet Japoninë, paralajmërim për cunami appeared first on Gazeta Si.

Gazeta Si – Grupet kriminale shqiptare që merren me trafikun e drogës dhe pastrimin e parave, e kanë shtrirë aktivitetin e tyre kriminal edhe në vendet e Amerikës Latine.

Në një artikull të zgjeruare, media britanike BBC, ka publikuar një reportazh nga qyteti i Duranit në Ekuador, vendi i mbushur me drogë, ku bandat rivale kanë shkëmbime zjarri pothuajse çdo ditë.

Kapiteni i policisë, Jean Carlos Bustamante, u tha gazetarëve britanikë se brenda policisë ka të infiltruar të cilët janë pjesë e bandave.

Teksa hynin në një lagje të quajtur “Shqiponjat”, të gjithë banorët qëndronin mbyllur në shtëpi nga frika e bandave kriminale.

Sa i takon trafikut të drogës, lënda narkotike vjen nga vendet fqinje, Kolumbia dhe Peruja. Më pas sipas reportazhit të BBC, zyrtarët ekuadorianë thonë se grupet mafioze shqiptare dhe ato meksikane bashkëpunojnë për të kontrabanduar kokainën duke përfituar nga kontrollet e dobëta kufitare të Ekuadorit.

Si pasojë e konflikteve për drogën, Ekuadori është kthyer në një vend ku bandat kriminale përplasen me njëra-tjetrën për prishjen e pazareve.

Vitin e kaluar, në Ekuador pati 9.200 persona të vrarë pavarësisht ofensivës së ndërmarrë nga presidenti Noboa gjatë dy viteve të fundit.

Bosët kryesorë të krimit janë arrestuar, por bandat janë shpërndarë dhe kanë krijuar fraksione të reja të shumta që janë përhapur kudo në vend.

“Ne kemi shumë njerëz të këqij brenda njësisë sonë, brenda shtetit dhe brenda politikës. Ka shumë persona të korruptuar që janë në shërbim të bandave”, thotë ai për një reportazh nga BBC.

Në moshën 34-vjeçare, Bustamante është më i vjetri në ekipin e tij special, të cilin e ka përzgjedhur vetë. Ai lëviz me disiplinën e një ish-pjesëtari të forcave speciale dhe thotë se mund t’u besojë vetëm kolegëve që ka pranë.

Kur pyetet se çfarë ndodh me njerëzit që guxojnë të flasin kundër bandave, përgjigjja e tij është e shkurtër: “Ata i vrasin. Prandaj njerëzit nuk thonë asgjë”.

Nga rrugët e Ekuadorit te tregu i drogës në Evropë

Sipas presidentit të Ekuadorit, Daniel Noboa, rreth 70% e kokainës që mbërrin në Evropë dhe SHBA kalon përmes Ekuadorit.

Droga vjen kryesisht nga vendet fqinje Kolumbia dhe Peruja, dy prej prodhuesve më të mëdhenj të kokainës në botë. Më pas, bandat lokale ekuadoriane bashkëpunojnë me kartele meksikane dhe grupe të krimit të organizuar ndërkombëtar për ta transportuar drogën më tej.

Mes këtyre lidhjeve përmenden edhe grupe të mafias shqiptare, të cilat sipas autoriteteve dhe raportimeve ndërkombëtare kanë krijuar rrjete bashkëpunimi në trafikun e kokainës drejt Evropës.

“Bandat e fuqishme vendase, me lidhje me kartelet meksikane dhe grupet e mafies shqiptare, ndihmojnë në trafikimin e mëtejshëm të kokainës”, shkruan BBC.

Bandat kanë përfituar nga kufijtë e dobët, forcat e sigurisë me mungesa financiare dhe pozicioni strategjik i Ekuadorit me dalje në Oqeanin Paqësor.

Një vend që dikur konsiderohej një destinacion i qetë turistik është kthyer brenda më pak se një dekade në një nga zonat më të dhunshme të Amerikës Latine.

Vrasjet janë rritur në mënyrë drastike

Sipas të dhënave të Ministrisë së Brendshme të Ekuadorit, vitin e kaluar vendi regjistroi mbi 9 mijë vrasje, një nga normat më të larta të kriminalitetit në botë.

Presidenti Daniel Noboa ka nisur një fushatë të ashpër kundër bandave gjatë dy viteve të fundit, por kritikët thonë se kjo strategji ka sjellë më shumë pasoja.

Arrestimi i drejtuesve të mëdhenj të krimit ka shkaktuar copëzimin e bandave, por njëkohësisht ka krijuar grupe të reja më të vogla dhe më të dhunshme.

Shumë banorë besojnë se kjo luftë nuk mund të fitohet kurrë plotësisht.

Policia lufton edhe korrupsionin brenda sistemit

Në një tjetër operacion, Bustamante përdor një dron për të monitoruar një lagje. Ai dallon tre persona që sipas tij janë “mikro-trafikantë”, shitës të vegjël droge në fund të zinxhirit kriminal.

Policia i ndjek deri në një banesë dhe hyn me forcë. Brenda gjenden tre të dyshuar dhe paketime të vogla me drogën e quajtur “H”, një përzierje që krijon shumë varësi dhe që shitet në lagje për një dollar.

Por edhe kur policia arreston persona dhe sekuestron drogë, shpesh përballet me një problem tjetër: sistemin e drejtësisë.

Kolonel Santiago Gavilanes, zëvendëskomandant i policisë së Duránit, thotë: “Ne i burgosim anëtarët e bandave dhe ata i lirojnë. Disa prej tyre dalin dhe vrasin njerëz të tjerë”.

Sipas tij, bandat kanë para për të blerë ligje, gjyqtarë dhe politikanë. Një oficer policie, identiteti i të cilit nuk bëhet publik për sigurinë e tij, tregon se është kontaktuar dy herë nga bandat dhe i është ofruar një ryshfet aq i madh sa mund të dilte në pension.

“Dikush, ndoshta një koleg, u kishte treguar bandave saktësisht ku punoja dhe çfarë bëja. Kurrë nuk e di kush po të vëzhgon”, thotë ai.

Drejtuesi i bandës: Kam vrarë tetë persona

BBC arriti të takohej edhe me një drejtues bande, të identifikuar me emrin e ndryshuar Jonathan, për të mbrojtur identitetin e tij.

Ai pretendon se ka katër policë në listën e pagave të tij.

“Kur do të zhvillohet një operacion, ata më telefonojnë. Më thonë të fsheh gjërat dhe të largohem. Kur vijnë, nuk gjejnë asgjë”, deklaron ai.

Sipas tij, kjo skemë i kushton rreth 1.500 deri në 2.000 dollarë në muaj. Jonathan, 37 vjeç, thotë se hyri në botën e bandave kur ishte 18 vjeç për të ushqyer familjen.

Ndërkohë, organizatat për të drejtat e njeriut paralajmërojnë se fëmijët po rekrutohen në banda që në moshën 12-vjeçare dhe disa prej tyre bëhen vrasës me pagesë vetëm tre vite më vonë.

Përshtati: Gazeta “Si”

The post Brenda lagjeve të karteleve shqiptaro-meksikane në Ekuador, aleanca për trafikun e drogës drejt Europës appeared first on Gazeta Si.

Nga Gazeta ‘Si’- Kreu i Partisë “Mundësia”, Agron Shehaj, është përjashtuar me 60 ditë nga punimet e Kuvendit, me vendim të marrë nga Sekretariati i Etikës këtë të martë, 28 korrik.

Arsyeja e përjashtimit të tij, lidhet me marrjen e dokumentit me informacion të klasifikuar të marrëveshjes me SHBA-të.

Ngjarja ndodhi një ditë më parë (27 korrik), kur Shehaj u paraqit në sallë në Kuvend për tu njohur me detajet e marrëveshjes së huas me Shtetet e Bashkuara të Amerikës për financimin e mbrojtjes së jashtme.

Por ai nuk qëndroi gjatë në sallë dhe pasi siguroi një kopje të marrëveshjes në fjalë tentoi të largohej me vrap, ndërsa punonjësja e Kuvendit tentoi ta ndaloi.

Ky akt u cilësua si i paligjshëm nga kryetari i Grupit Parlamentar Socialist, Taulant Balla, i cili në një reagim në rrjetet sociale tha se Shehaj duhej arrestuar në kushtet e flagrancës pasi ka vjedhur një dokument të klasifikuar.

Madje i bindur se akti i Shehajt përbën shkelje penale, i kërkoi Kuvendit ta referojë rastin edhe ne SPAK me dyshimin se ai ka kryer 5 vepra penale që cënojnë sigurinë kombëtare, pasi dokumentin e marrë mund ta dorëzonte te aktorët e tjerë.

The post Mori dokumentin sekret, Agron Shehaj përjashtohet 60 ditë nga punimet e Kuvendit appeared first on Gazeta Si.

Gazeta Si – Pas raportimeve për disa përpjekje për të marrë aksesin në llogari të ndryshme të Whatsapp-it në Shqipëri, policia ka dalë me një njoftim për qytetarët duke u bërë thirrje që të mos klikojnë nëpër linqe mashtruese që kanë si qëllim t’u marrin llogaritë.

Në mesazhe, mashtruesit dërgojnë linke me pretendime të ndryshme ku kërkojnë që të votoni në një konkurs ose të konfirmoni një veprim, më pas u kërkohet të vendosin kodin 6-shifror të verifikimit të whatsapp.

Policia u bën thirrje qytetarëve që të mos klikojnë në linke të dyshimta edhe nëse u dërgohen nga të njohurit. Ndërsa për tentativat e mashtrimit, qytetarëve u bëhet thirrje që të paraqiten në polici për t’i denoncuar.

The post Kujdes llogarinë në WhatsApp! Policia, apel qytetarëve: Mos klikoni sms të dyshimta appeared first on Gazeta Si.

Nga Gazeta ‘Si’- Departamenti amerikan i Shtetit ka publikuar raportin e ri të sigurisë për Shqipërinë, ku vendi vlerësohet si një destinacion ku udhëtarët duhet të tregojnë kujdes të shtuar për shkak të kriminalitetit.

Raporti është hartuar nga OSAC (Overseas Security Advisory Council), organi këshillimor i sigurisë pranë Departamentit amerikan të Shtetit, i cili përgatit vlerësime periodike mbi situatën e sigurisë në vende të ndryshme të botës për qytetarët amerikanë dhe bizneset që operojnë jashtë Shteteve të Bashkuara.

Në raport thuhet se Tirana vazhdon të konsiderohet një zonë me nivel mesatar kërcënimi nga kriminaliteti, ndërsa Shqipëria mban indikatorin “C” në këshillën amerikane të udhëtimit, që sinjalizon praninë e krimit të organizuar dhe kufizime të autoriteteve vendase për t’iu përgjigjur disa krimeve të rënda.

Sipas dokumentit, kriminaliteti në Shqipëri u rrit me rreth 17 për qind nga viti 2024 në vitin 2025, kryesisht si pasojë e shtimit të veprave të lidhura me drogën, mashtrimin dhe armët. Nga ana tjetër, grabitjet u ulën me 21 për qind, ndërsa vrasjet dhe krimet e dhunshme shënuan vitin e pestë radhazi në rënie.

Raporti nënvizon se krimi i organizuar vijon të ketë ndikim të konsiderueshëm në Shqipëri, duke përmendur aktivitetet që lidhen me trafikun e drogës, zhvatjen, pastrimin e parave, prostitucionin dhe trafikimin e qenieve njerëzore.

Po ashtu, theksohet se një pjesë e armëve dhe eksplozivëve që qarkullojnë në Evropë kanë origjinë ose kalojnë tranzit përmes Shqipërisë.

Në kapitullin për terrorizmin, OSAC vlerëson Tiranën si një zonë me rrezik të mesëm, megjithëse thekson se Shqipëria nuk ka regjistruar asnjë sulm terrorist të suksesshëm gjatë dekadës së fundit.

Dokumenti përmend si shqetësim aktivitetet e Iranit kundër organizatës opozitare iraniane MEK, e vendosur në Shqipëri, si dhe sulmet kibernetike të atribuuara Teheranit.

Raporti ndalet edhe te zhvillimet politike. Ai vlerëson se zgjedhjet parlamentare të vitit 2025 ishin përgjithësisht të qeta, por kujton se misionet ndërkombëtare të vëzhgimit kërkuan reformë të thellë zgjedhore, duke ngritur shqetësime për përdorimin e burimeve shtetërore, transparencën e financimit të fushatave dhe mbulimin mediatik.

Dokumenti përmend gjithashtu protestat e opozitës pas zgjedhjeve të vitit 2025 dhe demonstratat e vitit 2026 kundër projektit turistik në ishullin e Sazanit, të cilat në disa raste u shoqëruan me incidente të dhunshme.

Për sa i përket zbatimit të ligjit, raporti vlerëson punën e Strukturës së Posaçme kundër Korrupsionit dhe Krimit të Organizuar (SPAK), por thekson se korrupsioni, mungesa e burimeve dhe koordinimi i pamjaftueshëm mes institucioneve vijojnë të pengojnë efektivitetin e autoriteteve ligjzbatuese.

Gjithashtu, investitorët e huaj vazhdojnë të identifikojnë korrupsionin, mungesën e transparencës dhe zbatimin e dobët të kontratave si disa nga problemet kryesore të klimës së biznesit në Shqipëri.

Në fund, raporti paralajmëron se Shqipëria mbetet objektiv i sulmeve kibernetike nga aktorë shtetërorë, përfshirë Iranin dhe Rusinë, ndërsa rikujton se gjatë vitit 2026 janë regjistruar sulme ndaj sistemeve dhe faqeve zyrtare shqiptare.

The post Raporti amerikan për sigurinë: Krimi i organizuar ndër kërcënimet kryesore në Shqipëri appeared first on Gazeta Si.

Nga Gazeta ‘Si’- Presidenti amerikan, Donald Trump do të mirëpresë homologun e tij ukrainas Volodymyr Zelenskyy dhe kryeministrin izraelit Benjamin Netanyahu në Shtëpinë e Bardhë të marten.

Një zyrtar i Shtëpisë së Bardhë tha për CNN se takimet do të jenë ndara që pritet të përqendrohen në konfliktet në Ukrainë dhe Lindjen e Mesme.

Sipas zyrtarit, Trump do të takohet me Netanyahun për të diskutuar luftën në Iran, përparimin në negociatat me Libanin dhe përpjekjet për të zgjeruar Marrëveshjet e Abrahamit.

Trump pranoi se ai dhe Netanyahu nuk janë plotësisht dakord për Iranin, por tha se të dy udhëheqësit mbeten të lidhur ngushtë.

“Kemi një ndryshim të vogël, por mjaft të afërt”, u tha Trump gazetarëve të hënën.

Gjatë takimit të Trump me Zelenskyyn, udhëheqësit do të diskutojnë procesin e vazhdueshëm të paqes midis Rusisë dhe Ukrainës.

“Tani është koha për t’i dhënë fund luftës”, shtoi zyrtari.

The post Trump pret të martën Zelenskyn dhe Netanyahun, do të zhvillojë takime të ndara  appeared first on Gazeta Si.

Nga Gazeta ‘Si’- Presidenti i Shteteve të Bashkuara, Donald Trump, deklaroi se po zhvillohen “negociata shumë miqësore” për konfliktin me Iranin, ndërsa për të tretën ditë radhazi nuk janë regjistruar sulme mes palëve.

Duke folur për gazetarët në bordin e avionit presidencial Air Force One, Trump u shpreh optimist se lufta mund të marrë fund së shpejti. “Mendoj se ka një mundësi të mirë që diçka të ndodhë,” tha ai, duke paralajmëruar se nëse bisedimet dështojnë, SHBA-ja do t’i rikthehet operacioneve ushtarake.

Nga ana tjetër, autoritetet iraniane kanë mohuar se po zhvillohen negociata të drejtpërdrejta me Uashingtonin.

Sipas Trump, ai vendosi të pezullojë sulmet amerikane të premten pasi vendet ndërmjetëse kërkuan t’u jepej një tjetër mundësi për dialog. Edhe Irani ka ndalur përkohësisht sulmet e tij.

Pezullimi i luftimeve vjen pas gati dy javësh bombardimesh të përditshme nga SHBA-ja dhe sulmesh hakmarrëse nga Irani, duke minuar armëpushimin e arritur në muajin qershor.

Ushtria amerikane ka deklaruar se objektivi i sulmeve ishte dobësimi i aftësisë së Iranit për të kërcënuar lundrimin tregtar në Ngushticën e Hormuzit, një nga rrugët më të rëndësishme në botë për transportin e naftës.

Shpresat për një ulje të tensioneve ndikuan edhe në tregjet ndërkombëtare, ku çmimi i naftës ra me më shumë se 9%, duke zbritur në 87.59 dollarë për fuçi.

Trump hodhi poshtë gjithashtu raportimet se rezervat amerikane të municioneve po shterojnë pas pesë muajsh luftimesh.

“Kemi shumë municione, më shumë sesa mund të përdorim ndonjëherë. Megjithatë, do të doja të kishim edhe më shumë,” deklaroi presidenti amerikan, duke theksuar se prodhimi i sistemeve raketore Patriot po rritet.

Edhe zëdhënësja e Shtëpisë së Bardhë, Anna Kelly, siguroi se ushtria amerikane ka rezerva të mjaftueshme armësh dhe municionesh për të përmbushur objektivat strategjike të administratës Trump, ndërsa shtoi se presidenti ka kërkuar rritjen e prodhimit të armëve të prodhuara në SHBA.

Konflikti nisi më 28 shkurt, kur SHBA-ja dhe Izraeli ndërmorën sulme ndaj objektivave iraniane. Teherani u kundërpërgjigj me raketa dhe dronë ndaj bazave ushtarake amerikane në vendet e Gjirit dhe objektivave në Izrael.

Në qershor, SHBA-ja dhe Irani nënshkruan një memorandum mirëkuptimi për ndërprerjen e operacioneve ushtarake, rihapjen e Ngushticës së Hormuzit dhe arritjen e një marrëveshjeje brenda 60 ditëve. Megjithatë, pas sulmeve iraniane ndaj cisternave në këtë korridor detar më 13 korrik, Uashingtoni rifilloi bombardimet dhe rivendosi bllokadën detare ndaj porteve iraniane.

Irani reagoi me sulme ndaj bazave ushtarake amerikane në Lindjen e Mesme, ku, sipas raportimeve, humbën jetën katër ushtarë amerikanë. Ndërkohë, Ministria iraniane e Shëndetësisë ka bërë të ditur se dhjetëra persona janë vrarë nga sulmet ajrore amerikane.

The post Trump: Po zhvillohen bisedime për t’i dhënë fund konfliktit me Iranin appeared first on Gazeta Si.

Gazeta Si – Pas më shumë se një viti seancash paraprake, Gjykata e Posaçme Kundër Korrupsionit dhe Krimit të Organizuar (GJKKO) ka vendosur të mos e kalojë për gjykim dosjen e njohur si “SASPAC”, duke ia rikthyer atë Prokurorisë së Posaçme (SPAK) për plotësim hetimesh.

Vendimi u mor këtë të hënë, ndërsa gjykata vlerësoi se hetimet nuk janë të plota dhe kërkoi kryerjen e veprimeve shtesë hetimore për të gjithë personat e marrë të pandehur në këtë procedim, përfshirë ish-ministrin e Shëndetësisë dhe ish-drejtorin e agjencisë SASPAC, Ilir Beqaj.

Sipas vendimit të GJKKO-së, prokurorja e çështjes, Elida Kaçkini, do të ketë afat deri më 30 tetor për të plotësuar hetimet e kërkuara nga gjykata.

Aktualisht, për këtë dosje në masën e sigurisë “arrest në burg” vijojnë të mbeten vetëm Ilir Beqaj dhe Ermal Kurtulaj.

Beqaj po gjykohet në Gjykatën e Posaçme për “vjedhje duke shpërdoruar detyrën” dhe “grup kriminal” në dosjen “Sterilizimi”. Paralelisht, ai është i pandehur në dosjen “SASPAC”, ku akuzohet për një sërë veprash penale, përfshirë “korrupsionin” dhe “pastrimin e parave”, çështje që ndodhet në fazën e shqyrtimit paraprak. 

The post ‘SASPAC’ / GJKKO i kthen SPAK-ut dosjen ndaj Ilir Beqajt për plotësim hetimesh appeared first on Gazeta Si.

Gazeta Si – Dubai po i shndërron banorët e tij në ambasadorë të turizmit për qytetin, në një përpjekje për të nxitur turizmin, i cili është prekur rëndë nga lufta në Iran.

Qeveria vendore ka nisur “Dubai Invite”, një program që ofron përfitime me vlerë mbi 3.000 dirhamë – e barabartë me rreth 700–720 euro – për ata që ftojnë miq ose familjarë, të cilët jetojnë jashtë vendit.

Si funksionojnë bonuset – Shpërblimi nuk është një shumë monetare, por përbëhet nga tri paketa për çdo rezident, të cilat ofrojnë përfitime të tilla si përvoja gastronomike dhe degustim verërash, qëndrime në hotele dhe hyrje në atraksionet e qytetit.

Promocioni vlen për qëndrimet midis 20 korrikut dhe 31 tetorit; çdo rezident mund të ftojë deri në pesë persona njëherësh, me një kufi maksimal prej tri ftesash në total.

Kush mund të marrë pjesë – Të drejtën për të marrë pjesë e kanë shtetasit dhe rezidentët e Emirateve të Bashkuara Arabe (EBA) të moshës 18 vjeç e lart, të cilët zotërojnë një kartë identiteti të vlefshme të Emirateve (Emirates ID).

Regjistrimi është i thjeshtë: pjesëmarrësit duhet të plotësojnë formularin në faqen zyrtare të “Visit Dubai” dhe të japin detaje rreth personit të ftuar, si emri, numri i pasaportës, kombësia, data e lindjes, lidhja me rezidentin dhe muaji i planifikuar i mbërritjes.

Të ftuarit nuk duhet të jenë rezidentë të EBA-s dhe duhet të zotërojnë një vizë turistike të vlefshme për Dubain, që mbulon periudhën midis 20 korrikut dhe 31 tetorit 2026.

Megjithatë, ekziston një kufizim: çdo vizitor mund të nominohet vetëm një herë. Nëse një vizitor është regjistruar tashmë nga një rezident tjetër, një nominim i dytë nuk do të sjellë dhënien e shpërblimit.

Programi po gëzon popullaritet të madh mes rezidentëve të Dubait; mediat vendase raportuan mbi 10,000 aplikime brenda 48 orëve të para.

Rënia e turizmit – Gazeta britanike “The Guardian”, e lidh nisjen e kësaj nisme me rënien e turizmit të shkaktuar nga konflikti në Azinë Perëndimore dhe nga sulmet me dronë e raketa iraniane ndaj qytetit të Emirateve.

Rekordi i vendosur në vitin 2025 – kur qyteti priti pothuajse 20 milionë turistë (një rritje prej 5% krahasuar me vitin 2024) – tashmë duket si një kujtim i largët.

Për shkak të tensioneve të vazhdueshme rajonale, shumë itinerare fluturimi janë devijuar dhe turistët i kanë shmangur rrugët apo ndalesat që përfshijnë Dubain.

Hotelet dhe bizneset kanë regjistruar një rënie të të ardhurave me 50%. Disa nga hotelet më të famshme të qytetit janë mbyllur, duke prekur fuqinë punëtore; kriza në këtë sektor ka detyruar një shkurtim të vendeve të punës me 15-20%.

Për të shmangur mbylljen dhe për të tërhequr klientë, disa hotele kanë vendosur të ofrojnë ulje prej 45% në tarifat standarde.

Transmetuesi britanik BBC, intervistoi Mamoun Hmiden, drejtorin operativ të platformës së rezervimeve “Wego”, i cili deklaroi se shkalla e zënies së hoteleve në Dubai ka rënë në 15–20 për qind të niveleve normale.

Sipas Hmiden-it, pasiguria lidhur me konfliktin ka bërë që shumë udhëtarë t’i shtyjnë ose t’i anulojnë qëndrimet e tyre në rajon, duke i detyruar hotelet e ndryshme të ulin çmimet për të tërhequr klientë.

Ndërkohë, hoteli “Burj Al Arab” ka përshpejtuar punimet e rinovimit të planifikuara më parë, duke njoftuar një mbyllje 18-mujore.

Përshtati: Gazeta “Si”

The post Turizmi në krizë, Dubai jep 700 euro për banorët që ftojnë miq dhe familjarë appeared first on Gazeta Si.

Pas një viti katastrofikisht të keq me dëborë, kërkesa nga fermerët dhe qytetet e ka zbrazur rezervuarin në 1% të kapacitetit, duke i lënë pelikanët pa shumë ushqim.

The post Një nga rezervuarët më të mëdhenj të Arizonës po zhduket appeared first on Gazeta Si.

Gazeta Si – Mes imazheve të shumta të zjarreve që kanë përfshirë rajonin e Gironde-s në Francën jugperëndimore që nga e mërkura, njëri prej tyre ka tërhequr vëmendje të veçantë për shkak të fuqisë së tij shprehëse dhe ndikimit të fortë vizual.

Fotoja shfaq një burrë dhe një grua të ulur nën një çadër plazhi në plazhin Moutchic, buzë liqenit Lacanau, ndërsa në sfond duken një shtëllungë gjigante tymi dhe një qiell në ngjyrë portokalli.

Imazhi është publikuar nga media të mëdha ndërkombëtare, përfshirë “The Guardian”, “The New York Times” dhe “The Wall Street Journal” (e cila e zgjodhi atë për faqen e parë të botimit të saj të shtypur të datës 25 korrik).

Fotoja u shkrep më 24 korrik nga Maximilien Lamy i agjencisë “Agence France-Presse” – i cili nuk është as fotograf profesionist, por punon si redaktor.

Ai e realizoi foton me iPhone-in e tij ndërsa ndodhej në plazh me të bijën. “Kur mbërritëm në Moutchic, u përballëm me një skenë apokaliptike. Vura re atë çift dhe paradoksin që mishëronin: dukeshin sikur po vështronin një botë që digjej”, i tha Lamy gazetës “Le Nuovel Obs”. “Ata ishin ulur në shezlongë, por po aq lehtësisht mund të kishin qenë në divanin e tyre para televizorit”.

Kur fotoja nisi të qarkullonte në rrjetet sociale, disa përdorues e kritikuan çiftin që dukej kaq i qetë përballë një skene kaq dramatike.

Megjithatë, Lamy u bëri thirrje njerëzve të mos i gjykonin: “Ata janë me pushime, nuk janë në ndonjë rrezik të menjëhershëm dhe – në çdo rast – nuk ka asgjë tjetër që mund të bëjnë. A do të kishim vepruar ne vërtet ndryshe?”.

Për disa, fotoja solli ndër mend kopertinën e famshme të albumit Crisis? What Crisis? – albumi i katërt në studio i grupit Supertramp – e cila shfaq një burrë të ulur në shezlong mes një peizazhi të shkretë industrial.

The post Çifti francez bën plazh përballë zjarreve dramatike! appeared first on Gazeta Si.

Nga Gazeta ‘Si’- Kryeministri Edi Rama shprehu solidaritet me Francën dhe Spanjën, të cilat prej ditësh luftojnë me pasojat katastrofike të zjarreve.

Ai u shpreh se Shqipëria është gati të japë kontributin e saj modest në kuadër të Bashkëpunimit Europian të Mbrojtjes Civile.

“Dua t’ju përcjell shprehje solidariteti të gjithë kolegëve tuaj në Francë dhe Spanjë.

Ne e kemi bërë edhe në të shkuarën falë jush, dhe jemi gati ta bëjmë përsëri nëse na kërkohet të japim ndihmën tonë modeste në kuadër të bashkëpunimit europian të mbrojtjes civile dhe të përgjigjemi në raste se na kërkohet, siç jemi përgjigjur vjet dhe parvjet edhe më parë kur fqinjët tanë kanë qenë në hall të madh dhe siç na janë përgjigjur dhe miqtë europianë, kur ne kemi qenë në të njëjtin hall, sepse zjarri nuk njeh kufij, por dhe solidariteti i njerëzve që luftojnë kundër zjarreve nuk njeh kufij”, tha Rama.

Gjatë fjalës së tij, Rama u shpreh se Shqipëria është përgatitur për të përballuar sfidën që sjellin zjarret.

Ai theksoi se deri në fund të vitit, flotës së helikopterëve do t’i shtohen edhe tre helikopterë të rinj dhe se procedura për marrjen e tyre, tashmë ka përfunduar.

“Ky sezon do jetë një provë për atë çfarë jemi përgatitur. Kemi sot në dispozicion kapacitete teknologjie më të mëdha që kemi pasur ndonjëherë, me 5 helikopterë, të gatshëm, të cilët në çdo moment nevoje mund të bëhen gjashtë, sepse helikopterët operacionale janë 9, por kanë edhe misionet e tjera, si misionet e shpëtimit, si misionet për shëndetin.

Ndërkohë që kemi mbyllur procedurën për tre avionë, të cilët do të vijnë në fund të vitit dhe do jenë pronë e shtetit shqiptar. Gjithçka ka përfunduar si procedurë’, theksoi Rama.

Kreu i qeverisë tha se ka propozuar që punonjësit e Ministrisë së Mbrojtjes, që angazhohen në punën për shuarjen e zjarreve të shpërblehen menjëherë me një pagë ekstra, ndërsa u bëri thirrje të gjithë bashkive të veprojnë njësoj, edhe me forcat e tyre zjarrfikëse.

The post Spanja dhe Franca nën pushtetin e flakëve, Rama: Do të ndihmojmë nëse na kërkohet appeared first on Gazeta Si.

Nga Gazeta ‘Si’- Zjarret masive pyjore në jugperëndim të Francës dhe Spanjën qendrore kanë detyruar evakuimin e më shumë se 270 mijë personave, ndërsa autoritetet po përballen me përhapjen e shpejtë të flakëve të favorizuara nga temperaturat e larta dhe erërat e forta.

Ushtria franceze është angazhuar në operacionet e emergjencës, ndërsa qeveria spanjolle ka shpallur gjendjen e emergjencës kombëtare.

Megjithëse fluturimet drejt Bordeaux dhe Madridit vijojnë normalisht, autoritetet u kanë bërë thirrje turistëve të ndjekin udhëzimet e emergjencës.

Ministrja franceze për partneritete ndërkombëtare, Éléonore Caroit, deklaroi se shumica e rajoneve të Francës mbeten të sigurta dhe u kërkoi vizitorëve të mos anulojnë udhëtimet, por të informohen vazhdimisht për situatën.

Dhjetëra turistë kanë rrëfyer për BBC momentet dramatike të evakuimit. Ata përshkruajnë alarmet që i zgjuan në mes të natës, kolonat e makinave që lëviznin pranë flakëve gjigante dhe qindra persona që prisnin në plazhe apo në qendra strehimi me valixhet në duar.

Një prej tyre është 21-vjeçari Zac Morrison nga Londra, i cili ndodhej me familjen në gadishullin Cap Ferret. Ai tha se mori disa mesazhe emergjence gjatë natës që urdhëronin evakuimin e menjëhershëm.

“Ushtria franceze shkonte derë më derë. Ishte diçka si në një film, na u desh të merrnim gjithçka. Njerëz të tjerë kanë fjetur në shkolla dhe depo dhe në plazhe ka pasur njerëz që presin vetëm lejen”, i tha ai BBC.

Sipas tij, familja u largua nga një zonë e rrezikuar vetëm për t’u përballur me një tjetër vatër zjarri, ndërsa shumë të evakuuar kaluan natën në plazhe, shkolla dhe depo të improvizuara si strehimore.

Edhe David Morton nga Gloucestershire përjetoi të njëjtën situatë. Ai tregoi se brenda pak minutash familja e tij u detyrua të largohej nga kampingu në Cap Ferret, ndërsa gjatë rrugës iu afruan flakëve.

“Në telefonat tanë kishte një mesazh që thoshte se duhej të evakuoheshim menjëherë dhe të ngisnim makinën në të vetmen rrugë që dilte nga gadishulli”, tha ai.

Në komunën Biscarrosse, Rebecca Papin tha se pa aeroplanë zjarrfikës dhe helikopterë që luftonin flakët gjatë natës, por nuk mori urdhër evakuimi. Të nesërmen në mëngjes zbuloi se qyteti ishte zbrazur pothuajse plotësisht, ndërsa rrugët ishin bllokuar nga zjarri dhe hiri binte nga qielli si borë.

Shumë familje kanë vendosur të ndryshojnë destinacionet e pushimeve. Mark Dorey nga Leeds u evakuua nga një kamping pranë Parentis-en-Born së bashku me familjen dhe kaloi natën në një palestër me qindra persona të tjerë përpara se të zhvendosej në rajonin Dordogne për të vazhduar pushimet në një zonë më të sigurt.

The post Zjarret në Francë dhe Spanjë prekin turistë të shumtë: Ishte si film! appeared first on Gazeta Si.

Gazeta Si – Rozalinda Plaka, 24-vjeçarja që u mor peng nga ish-i fejuari i saj, Refit Buzi, i cili i vrau prindërit dhe më pas u vetëvra, ka dhënë dëshminë e saj para policisë lidhur me ngjarjen në Roskovec të Fierit.

Ajo ka rrëfyer fejesën me Buzin, arsyet e ndarjes dhe më pas ngjarjen tragjike të ndodhur ditën e premte. Sipas saj, jeta e çrregullt që bënte 35 vjeçari e kishte çuar në marrjen e vendimit për t’u ndarë.

“Në vitin 2020 kemi shpallur fejesën dhe kemi krijuar hyrje-dalje familjare. Lidhja jonë ka vazhduar deri në vitin 2024, kohë në të cilën unë kam kërkuar të ndahem nga ai, por Refiti nuk ka pranuar. Arsyeja ka qenë sepse ai kishte një jetë të çrregullt, nuk ishte i përqendruar te lidhja jonë, kishte qenë jashtë shtetit në burg dhe të gjitha këto nuk më përshtateshin mua”, – rrëfeu e reja.

Ajo tregoi se prindërit e saj nuk kishin qenë dakord që në fillim për lidhjen e saj me Buzin. Sa i takon ngjarjes tragjike, Rozalinda tregoi se kishte qenë duke fjetur kur kishte dëgjuar të shtënën me armë gjahu dhe se në momentin që kishte dalë jashtë dhomës, kishte parë babain e saj të shtrirë në tokë.

“Kam qenë duke fjetur gjumë në dhomën time, kurse prindërit e mi kanë qenë në dhomën e tyre. Kam dëgjuar zhurmë të fortë që më është dukur si krismë arme dhe kam dalë në korridor të shikoj se çfarë kishte ndodhur. Kur dola kam parë shtetasin Refit Buzi në korridor, me një armë të gjatë si ato të gjahut në dorë, si dhe kam parë babain tim Kosta Plaka të shtrirë përmbys te hyrja e dhomës, i mbuluar me gjak”,- shpjegon 24-vjeçarja.

E reja tha se kishte tentuar t’i merrte armën, por më pas autori e kishte nxjerrë me forcë nga banesa për ta çuar më pas në vendin ku e mbajti peng për disa orë.

“Unë i kam kapur armën dhe po e mbaja, por Refiti bërtiste: ‘Do t’ju vras të gjithëve’. Më shtyu dhe më qëlloi me grusht, theu derën e dhomës sime dhe aty jam plagosur me copa xhami në trup. Më mori me forcë e më hipi te makina. Momenti kur më mori me forcë nga shtëpia deri kur kam hipur në makinë nuk më kujtohet, sepse kam qenë shumë e tronditur”.

Gjatë negociatave me policinë, Rozalinda ka treguar se Buzi ishte zbathur pasi këpucët ia kishte dhënë asaj.

Sipas saj, gjatë negociatave prokurori e ka pyetur: “Vetëdorëzohu, pse je zbathur?”, ndërsa ai është përgjigjur: “I hoqa, ia dhashë… Ia dhashë asaj t’i veshë, se e mora zbathur”.

Policia po vijon me hetimet për të zbardhur rrethanat e plota të ngjarjes së rëndë të ndodhur në Roskovec të Fierit, ku 35 vjeçari vrau nënën dhe babain e ish-të fejuarës e më pas i dha fund jetës.

Prindërit e autorit pretendojnë se djali i tyre i kishte dërguar para ish-të fejuarës nga Anglia dhe se pas ndarjes, 24-vjeçarja nuk kishte pranuar t’ia kthente.

The post Ish-i fejuari i vrau prindërit, 24-vjeçarja rrëfen orët e pengmarrjes nga banesa në makinë appeared first on Gazeta Si.

Nga Gazeta ‘Si’- Pas një pritjeje 12-vjeçare, Mali Olimp, shtëpia mitike e perëndive të Greqisë së lashtë, është përfshirë zyrtarisht në Listën e Trashëgimisë Botërore të UNESCO-s.

Mali më i lartë i Greqisë u shpall pjesë e listës si një pasuri e përzier kulturore dhe natyrore, duke u vlerësuar njëkohësisht për rëndësinë e tij historike, mitologjike dhe biodiversitetin e jashtëzakonshëm.

Vendimi u mor gjatë mbledhjes së Komitetit të Trashëgimisë Botërore të UNESCO-s në Busan, Koreja e Jugut.

Një simbol i mitologjisë greke

Në mitologjinë greke, Mali Olimp konsiderohet vendi ku banonte Zeusi, mbreti i 12 perëndive olimpike. Me një lartësi prej 2.918 metrash, ai është mali më i lartë i Greqisë dhe prej vitit 2014 ishte në listën paraprake të vendeve të propozuara për statusin e UNESCO-s.

Kreu i delegacionit grek në UNESCO, Georgios Koumoutsakos, e cilësoi vendimin si një hap të rëndësishëm për mbrojtjen e malit.

“Ky vendim riafirmon angazhimin tonë për të mbrojtur Malin Olimp për brezat e sotëm dhe të ardhshëm. Siç na kujton mitologjia greke, është gjithmonë më mirë të jesh në marrëdhënie të mira me perënditë,” deklaroi ai.

Edhe kryebashkiaku i rajonit, Evangelos Geroliolios, tha se statusi i ri sjell një përgjegjësi edhe më të madhe për ruajtjen e mjedisit dhe biodiversitetit të zonës.

Çfarë përfiton Mali Olimp?

Përfshirja në Listën e Trashëgimisë Botërore u jep vendeve të përzgjedhura mbështetje ndërkombëtare për ruajtjen dhe menaxhimin e tyre.

UNESCO ofron asistencë teknike, këshillim dhe, në raste të caktuara, mbështetje financiare për mbrojtjen e monumenteve dhe peizazheve me vlerë universale.

Në këtë listë bëjnë pjesë edhe monumente të njohura si Akropoli i Athinës, Muri i Madh i Kinës, Piramidat e Gizës dhe Taj Mahali.

Edhe plazhet e zbarkimit në Normandi u futën në listë

Krahas Malit Olimp, UNESCO përfshiu në listë edhe plazhet e zbarkimit të Aleatëve në Normandi, ku më 6 qershor 1944 u zhvillua operacioni “D-Day”, një nga momentet vendimtare të Luftës së Dytë Botërore.

Në listë u përfshinë pesë plazhet historike – Omaha, Utah, Sword, Gold dhe Juno – si edhe shkëmbi Pointe du Hoc, ku zbarkuan mbi 150 mijë ushtarë aleatë. Rreth 4 mijë ushtarë humbën jetën gjatë operacionit që hapi rrugën për çlirimin e Evropës nga pushtimi nazist.

UNESCO e cilësoi këtë zonë një “peizazh kulturor të jashtëzakonshëm”, i formuar jo vetëm nga ngjarjet e vitit 1944, por edhe nga kujtesa historike që ato mbartin.

Trashëgimia botërore vazhdon të zgjerohet

Në të njëjtën mbledhje u miratuan edhe kandidatura të tjera, përfshirë kryeqytetet e lashta japoneze Asuka dhe Fujiwara, si edhe peizazhin Boma-Badingilo në Sudanin e Jugut, i cili u bë vendi i parë i këtij shteti afrikan që hyn në Listën e Trashëgimisë Botërore.

Pas vendimit unanim për Malin Olimp, autoritetet greke e cilësuan njohjen si një sukses historik, veçanërisht pasi drafti fillestar i UNESCO-s kishte lënë të kuptohej se kandidatura mund të shtyhej për shqyrtim të mëtejshëm.

Në vend të kësaj, mali legjendar mori mbështetjen e plotë të komitetit dhe u bë zyrtarisht pjesë e trashëgimisë me vlerë universale./ The Guardian

The post Shtëpia e perëndive greke hyn në UNESCO: Mali Olimp merr statusin e Trashëgimisë Botërore appeared first on Gazeta Si.