Kryeministri i Libanit, Nawaf Salam, mbrojti sot negociatat e qeverisë së tij me Izraelin, duke i cilësuar ato si “rruga më e shpejtë dhe më pak e kushtueshme” për vendin, pasi bisedimet çuan në një nismë të re armëpushimi që u refuzua menjëherë nga Hezbollah.
Negociatat libanezo-izraelite rezultuan gjatë natës në një marrëveshje të mbështetur nga Shtetet e Bashkuara, e cila synon t’i japë fund përplasjeve mes Izraelit dhe Hezbollahut, grupit të mbështetur nga Irani, si dhe të hapë rrugën për çarmatimin e tij.
Në një deklaratë të publikuar nga zyra e tij, Salam tha se negociatat përfaqësojnë alternativën më të mirë për popullin libanez.
“Ne mund të kishim qëndruar duarkryq përballë një realiteti dhe një lufte që nuk e zgjodhëm, por kjo nuk ishte asnjëherë një mundësi”, tha ai, duke i përshkruar bisedimet si të vështira dhe qëndrimin izraelit si “të ashpër”.
Sipas marrëveshjes së shpallur të mërnë Washington, militantët e Hezbollahut do të çarmatoseshin.
Salam theksoi se parimi i monopolit të shtetit mbi armët ishte vendosur tashmë pas përfundimit të luftës civile në fillim të viteve 1990 dhe se Libani nuk duhet të humbasë një tjetër mundësi për ta zbatuar atë.
Si hap të ardhshëm, ai njoftoi vendosjen graduale të ushtrisë libaneze në jug të vendit, duke paralajmëruar se çdo vonesë do të ishte në dëm të rajonit dhe banorëve të tij.
Megjithatë, Hezbollah e hodhi poshtë marrëveshjen. Sekretari i Përgjithshëm i grupit, Naim Qassem, i cilësoi negociatat e drejtpërdrejta si një “farsë” dhe një “poshtërim”. Ai deklaroi se grupi nuk do të pranojë asnjë marrëveshje që ka në qendër çarmatimin e tij.
Hezbollah këmbëngul se çdo marrëveshje duhet të përqendrohet në një armëpushim të plotë dhe në tërheqjen e plotë të forcave izraelite nga territori libanez./mxh
Kohët e fundit janë shtuar zërat për një transferim të mundshëm të Denzel Dumfries në radhët e Real Madrid. Për këtë temë, ka folur vetë mbrojtësi i Interit, në një intervistë të dhënë së fundmi.
“Real Madrid? Jo, le t’i mbajmë gjërat të qeta. Ishte një bisedë e këndshme”, tha mbrojtësi holandez.
“Klauzola? Nuk mund të them asgjë për këtë. Koha ime te Interi më mbush me krenari. Tani do të shkoj në Kupën e Botës me Holandën për të dhënë gjithçka. Jam i përqendruar vetëm në këtë. Do të shohim se çfarë do të ndodhë me pjesën tjetër më vonë.”/mxh
Numri i milionerëve në mbarë botën u rrit me gati 2 milionë vitin e kaluar për të arritur një rekord prej 25.3 milionë njerëz në vitin 2025, sipas një studimi të ri. Gjermania pa popullsinë e saj të individëve me pasuri të lartë neto ose njerëzve me asete likuide prej 1 milion dollarësh ose më shumë të rritej me 11.1% në rreth 1.78 milion njerëz vitin e kaluar.
Pasuria e tyre e kombinuar u rrit me 12.7% në pak mbi 7.1 trilion dollarë, e ndihmuar pjesërisht nga lehtësimi i inflacionit. Kjo e vendosi Gjermaninë në vendin e tretë në listën e vendeve me më shumë milionerë, shkruan DW.
Popullsia e individëve me pasuri të lartë neto në Evropë u rrit gjithashtu me 6.5% në vitin 2025, pas një rënieje në vitin 2024. Këto fitime iu atribuan stabilizimit të tregjeve të aksioneve dhe lehtësimit të inflacionit.
Ndërkohë, Shtetet e Bashkuara të Amerikës shtuan numrin më të madh të milionerëve, të përcaktuar si njerëz me një vlerë neto prej të paktën 1 milion dollarësh, sipas studimit.
SHBA-të shtuan 736,000 milionerë vitin e kaluar, më shumë se çdo vend tjetër në botë – me numrin e milionerëve që arrin në 8.7 milionë. Bumi në gjenerimin e pasurisë u udhëhoq kryesisht nga pritjet dhe entuziazmi mbi inteligjencën artificiale që bëri që aksionet e teknologjisë të rriteshin ndjeshëm.
Ekonomitë aziatike regjistruan rritjen më të lartë në nivel rajonal. Japonia shtoi 436,000 milionerë dhe Kina shtoi 154,000 milionerë./mxh
Agjencia Ndërkombëtare për Energjinë Atomike, (IAEA), ka kërkuar akses të menjëhershëm në dhjetra objekte bërthamore në Iran.
Drejtori i përgjithshëm i IAEA-s, Rafael Grossi, thekson në raportin ende të papublikuar se Teherani u ka lejuar inspektorëve të agjencisë qasje vetëm në një impiant bërthamor gjatë muajve të fundit.
Grossi deklaroi se është “thelbësore” që organizata të kryejë pa vonesë aktivitetet e verifikimit në Iran, megjithëse pranoi se sulmet amerikano-izraelite ndaj objekteve bërthamore iraniane kanë krijuar një situatë të paprecedentë.
Irani ka kufizuar në masë të madhe bashkëpunimin me inspektorët e IAEA-s që nga fillimi i sulmeve të SHBA-së dhe Izraelit më 28 shkurt. Megjithatë, pak ditë para mbledhjes së Bordit të Guvernatorëve të IAEA-s, e planifikuar për javën e ardhshme, autoritetet iraniane lejuan këtë javë një inspektim në centralin bërthamor të Bushehrit.
Sipas raportit, Irani zotëron gjithsej 22 objekte bërthamore, shumica e të cilave janë goditur gjatë konfliktit. Në qershor 2025, SHBA-ja dhe Izraeli ndërmorën sulme të mëdha ndaj tre prej qendrave kryesore bërthamore iraniane.
Para këtyre sulmeve, sipas IAEA-s, Irani dispononte rreth 440 kilogramë uranium të pasuruar në nivelin 60%. Ekspertët vlerësojnë se kjo sasi, nëse do të pasurohej më tej, mund të mjaftonte për prodhimin e disa armëve bërthamore. Teherani vazhdon të mohojë se synon të zhvillojë bombë atomike.
Aktualisht mbetet e paqartë se ku ndodhen dhe në çfarë gjendjeje janë rezervat e këtij materiali bërthamor.
Grossi paralajmëroi se humbja e vazhdimësisë së njohurive të IAEA-s mbi materialet bërthamore të deklaruara më parë në objektet e prekura duhet të zgjidhet me urgjencën më të madhe.
Ndërkohë, negociatat mes SHBA-së dhe Iranit për një marrëveshje kuadër që do t’i jepte fund konfliktit kanë mbetur të bllokuara prej muajsh. Ndër çështjet kryesore të pazgjidhura janë kontrolli mbi Ngushticën e Hormuzit dhe programi bërthamor iranian./mxh
Regjisori i njohur amerikan, Quentin Tarantino, ka kritikuar ashpër industrinë e filmit në Hollywood pas pandemisë, duke e cilësuar atë si një “fabrikë sallami pa shije” dhe duke pranuar se sot preferon më shumë të lexojë libra sesa të shohë filma.
Në një artikull të botuar për revistën e kinemasë Sight and Sound, autori i filmave kult si “Pulp Fiction” dhe “Kill Bill” shprehet se e ka gjithnjë e më të vështirë të gjejë filma të rinj që ta magjepsin.
“Më duket pothuajse e pamundur që të dalë një film i ri pa e analizuar deri në imtësi dhe pa i vënë re menjëherë dobësitë”, shkruan Tarantino.
Megjithatë, ai veçoi disa përjashtime, duke vlerësuar filmin “The Rip” të regjisorit Joe Carnahan, me protagonistë Matt Damon dhe Ben Affleck. Ai lavdëroi gjithashtu versionin e ri të “West Side Story” nga Steven Spielberg dhe dy kapitujt e parë të sagës “Horizon: An American Saga” të realizuar nga Kevin Costner.
Sipas Tarantinos, shumë pak filma të viteve të fundit kanë arritur ta “rrëmbejnë” dhe ta çojnë në atë “tokë magjike të kënaqësisë” që dikur e bënte të dashuronte kinemanë mbi çdo formë tjetër arti.
“Ditët e sotme do të preferoja të lexoja një libër”, u shpreh ai.
Regjisori shtoi se, edhe pse i konsideron vitet 1980 si një periudhë jo veçanërisht të fortë për kinemanë, ai i falte dobësitë e filmave të asaj kohe sepse e donte përvojën e të shkuarit në kinema. Sot, sipas tij, vetë koncepti i filmit shpesh i ngjall më shumë përbuzje sesa entuziazëm./mxh
Konflikti me Shtetet e Bashkuara të Amerikës dhe bllokada e Ngushticës së Hormuzit nga Amerika, po thellon dëmin ekonomik për Iranin dhe bëhet fjalë për rënien e eksporteve të naftës, një prej hallkave më të forta ekonomike për vendin.
Nga rreth 2 milionë fuçi eksporti në ditë përpara vendosjes së bllokadës amerikane, shitja e naftës në tregun ndërkombëtar ka rënë në 300 fuçi. Si pasojë rezervat janë rritur. Nga rreth 147 milionë fuçi naftë bruto që aktualisht ndodhen të bllokuara në det, rreth 67 milionë fuçi mbeten të bllokuara në Gjirin Persik dhe në Gjirin e Omanit, përpara vijës së bllokadës.
Ndërkohë, sasitë që ndodhen tashmë përtej bllokadës kanë ardhur duke u zvogëluar vazhdimisht, pasi ngarkesat vazhdojnë të shkarkohen në Kinë, nga 127 milionë fuçi në momentin e vendosjes së bllokadës, në 80 milionë fuçi aktualisht.
Kompania e specializuar në lëndët e para energjetike Kelper, thotë se “Nëse bllokada vazhdon edhe për dy muaj të tjerë, Irani nuk do të ketë më naftë për t’i shitur Kinës”. Kjo situatë nuk favorizon as SHBA-të, për shkak të uljes së rezervave të naftës, ndërkohë që dhe presioni i aleatëve rajonalë, mund të çojë në “zbutje” të bllokadës.
Por ka edhe një surprizë pozitive për Evropën. Çmimet e naftës janë rritur (+50% që nga fundi i shkurtit, kur nisi konflikti), por problemet e frikësuara të furnizimit, veçanërisht për karburantin e avionëve, për të cilin Evropa varej rreth 50% nga Lindja e Mesme nuk janë materializuar.
Kontinenti i Vjetër ka kompensuar pjesën më të madhe të mungesës së karburantit për avionë nga Lindja e Mesme, e barabartë me rreth 400 mijë fuçi në ditë, falë rritjes së eksporteve amerikane (+140 mijë fuçi në ditë), furnizimeve nga kompania nigeriane Dangote (+40 mijë fuçi në ditë) dhe rritjes së prodhimit të rafinerive (+210 mijë fuçi në ditë).
“Skenari më i mundshëm”, vlerëson Kpler, “është një marrëveshje e kufizuar, në të cilën Irani mbështet rihapjen graduale të Ngushticës së Hormuzit në këmbim të heqjes së bllokadës detare amerikane dhe të disa lehtësimeve ekonomike të synuara, më shumë sesa një marrëveshje e gjerë bërthamore ose heqje të plotë të sanksioneve./mxh
Kryetari i Grupit Parlamentar të Partisë Socialiste dhe Drejtuesi Politik i PS për Diasporën, Taulant Balla kërkoi nga Greqia përmbylljen e marrëveshjes për njohjen e ndërsjellë të kontributeve shoqërore, duke theksuar se qindra mijëra shqiptarë që kanë punuar për dekada në vendin fqinj meritojnë të përfitojnë pensionet e tyre.
Nga foltorja e Kuvendit, Balla tha se Shqipëria ka arritur tashmë marrëveshje të tilla me dhjetë vende të Bashkimit Europian, ndërsa negociatat me Greqinë duhet të përfundojnë sa më shpejt.
“Po kemi të paktën një milion shqiptarë që kanë punuar në Greqi për 35 vjet. Mezi pres që Parlamenti grek dhe Parlamenti i Shqipërisë të votojnë marrëveshjen për njohjen e dyfishtë të kontributeve shoqërore. Greqia ua ka borxh qindra mijëra qytetarëve shqiptarë që kanë punuar atje për vite me radhë”, deklaroi Balla.
Ai reagoi edhe ndaj deklaratave të Ministrisë së Jashtme greke për të ngjarjet në Nartë. Balla theksoi se vendi ynë respekton plotësisht kriteret europiane, por kundërshtoi pretendimet që Narta të konsiderohet territor i minoritetit grek.
“Narta është tokë shqiptare, autoktone”, u shpreh ai, duke shtuar se në zonë kanë bashkëjetuar shqiptarë dhe pjesëtarë të pakicës greke, por kjo nuk ndryshon karakterin shqiptar të krahinës.
Një pjesë e rëndësishme e fjalës së Ballës iu kushtua edhe debatit për investimin në Zvërnec. Ai mbrojti projektin strategjik dhe deklaroi se investitorët nga Katari kanë investuar deri tani 225 milionë dollarë, ndërsa shteti shqiptar ka detyrimin ligjor të garantojë investimin.
Sipas Ballës, SPAK duhet të hetojë çdo dyshim mbi dokumentacionin e pronave, por kjo nuk cenon të drejtat e investitorëve që kanë investuar në Shqipëri. Ai akuzoi gjithashtu kundërshtarët e projektit se po përpiqen të dëmtojnë imazhin e vendit në kulmin e sezonit turistik përmes shpërndarjes së pamjeve dhe informacioneve që krijojnë perceptimin e një situate të tensionuar në vend.
Gjatë debatit në Kuvend, Balla sulmoi edhe kreun e Partisë Demokratike, Sali Berisha, për qëndrimet e tij lidhur me protestat për Zvërnecin. Sipas tij, Berisha ka ndryshuar qëndrim brenda pak ditësh, lidhur me investimin.
“E paimagjinueshme se si mund ta dredhë burri në një moshë kaq të përparuar. Brenda 72 orëve të mbajë këtë ndryshim qëndrimi”, tha Balla, duke shtuar se nuk kishte pasur asnjë dyshim se Berisha do të ndryshonte pozicion.
Balla dënoi gjithashtu çdo përpjekje për të zhvendosur protestat pranë selive të partive politike, duke argumentuar se veprime të tilla mund të krijojnë përplasje të panevojshme mes militantëve dhe të largojnë vëmendjen nga kauzat qytetare./Mxh
Reagimi i modeles së njohur Gigi Hadid për martesën e këngëtares Dua Lipa është kthyer në një nga temat më të diskutuara në rrjetet sociale. Pas publikimit të fotove nga ceremonia e martesës së saj me aktorin Callum Turner, Gigi Hadid la një koment urimi që menjëherë tërhoqi vëmendjen e fansave.
“Sa e mrekullueshme! Urime”, shkroi ajo në postimin e këngëtares, një reagim i thjeshtë që megjithatë u bë viral brenda pak orësh. Komenti u shpërnda gjerësisht dhe u shoqërua me dhjetëra mijëra reagime nga ndjekësit në rrjete sociale.
Shumë përdorues rikujtuan lidhjen e dikurshme të Dua Lipës me vëllain e Gigi Hadid, Anwar Hadid, duke e lidhur urimin me të kaluarën e tyre familjare. Kjo bëri që Gigi të etiketohej shpesh si “dikur kunata” e mundshme e këngëtares në komentet virale.
Në diskutim u përfshinë edhe referenca të tjera për jetën sentimentale të personazheve të njohur, përfshirë edhe marrëdhënien e Gigi Hadid me këngëtarin Zayn Malik, duke e kthyer lajmin në një temë të gjerë në rrjetet sociale.
Sipas mediave britanike, ceremonia e martesës së Dua Lipës dhe Callum Turner u zhvillua në mënyrë intime në Londër, vetëm me familjarë dhe miq të afërt, ndërsa më pas çifti pritet të organizojë një festë më të madhe në Sicili./mxh
Problemet me drejtësinë vazhdojnë për Sean “Diddy” Combs. Reperi dhe producenti amerikan, i cili aktualisht ndodhet në burg duke vuajtur një dënim federal, është vënë sërish në qendër të vëmendjes pas pretendimeve të reja për sulm seksual.
Sipas mediave amerikane, Zyra e Prokurorit të Qarkut të Los Angeles po shqyrton një denoncim të paraqitur nga publicisti i njohur Jonathan Hay. Ky i fundit pretendon se ka qenë viktimë e sjelljeve abuzive nga Combs gjatë viteve 2020 dhe 2021.
Raportohet se ngjarjet e përmendura në kallëzim dyshohet të kenë ndodhur në Los Angeles, çka ka bërë që dosja t’u kalojë autoriteteve kaliforniane për hetime të mëtejshme. Aktualisht, prokurorët po analizojnë materialet dhe provat e mbledhura, ndërsa ende nuk është vendosur nëse do të ngrihen akuza zyrtare.
Sipas pretendimeve të Hay, incidentet kanë ndodhur në periudhën kur ai ishte i përfshirë në projekte muzikore të lidhura me familjen e reperit legjendar The Notorious B.I.G. Ai akuzon Combs për sjellje të papërshtatshme dhe veprime seksuale të kryera pa pëlqimin e tij.
Hay e ka cilësuar vazhdimin e procedurave si një hap të rëndësishëm drejt zbardhjes së çështjes dhe kërkimit të përgjegjësisë ligjore.
Ndërkohë, Sean Combs i ka hedhur poshtë kategorikisht akuzat, duke mohuar çdo pretendim të ngritur kundër tij. Ai vazhdon të përballet edhe me një sërë padish civile të lidhura me akuza të ngjashme.
Më herët, një gjykatë federale e shpalli fajtor për akuza që lidhen me transportimin e personave për qëllime prostitucioni, ndërsa u shpall i pafajshëm për disa nga akuzat më të rënda. Aktualisht, ai po vuan dënimin në një institucion federal në New Jersey, ndërsa ekipi i tij ligjor po ndjek rrugët e apelimit./mxh
Stefon Diggs ka komentuar për herë të parë raportin e tij me Cardi B pas pamjeve që u bënë virale muaj më parë dhe ngritën dyshime për tensione mes tyre.
I pyetur nga mediat amerikane për statusin aktual të marrëdhënies me reperen, sportisti u shpreh se mes tyre ekziston ende respekt dhe mirëkuptim, pavarësisht spekulimeve të shumta.
“Është nëna e fëmijës tim dhe kam shumë dashuri për të,” deklaroi Diggs, duke shmangur dhënien e një përgjigjeje të qartë nëse ata janë rikthyer apo jo si çift.
Sa i përket videos që qarkulloi në rrjet, ku Cardi B dukej e irrituar gjatë një bisede me të, Diggs nuk e konsideroi situatën si një konflikt serioz. Ai tha se nuk e sheh atë moment si një debat të vërtetë dhe theksoi se gjatë gjithë kohës kishte ruajtur qetësinë.
Sipas tij, raporti mes tyre vazhdon të jetë pozitiv dhe komunikimi nuk është ndërprerë.
Çifti kishte njoftuar ndarjen në fillim të vitit, vetëm disa muaj pas ardhjes në jetë të djalit të tyre. Megjithatë, në maj ata u panë sërish bashkë në publik, duke shkaktuar zëra për një ribashkim të mundshëm.
Pak ditë më vonë, fotografitë e tyre jashtë një lokali dhe një qendre sportive, ku dukej se po diskutonin me tone të forta, ndezën sërish spekulimet për krizë në marrëdhënie.
Cardi B reagoi më vonë me humor ndaj lajmeve, duke ironizuar situatën dhe vëmendjen e madhe mediatike që mori ai moment.
Reperja dhe Stefon Diggs nisën romancën e tyre në vitin 2025 dhe e bënë publike lidhjen përmes rrjeteve sociale pak muaj më vonë. Aktualisht, asnjëri prej tyre nuk ka konfirmuar nëse janë sërish bashkë si çift./mxh
Kryeministrja e Japonisë, Sanae Takaichi paralajmëroi sot se niveli rekord i ulët i lindshmërisë në vend pasqyron një “situatë jashtëzakonisht të rëndë”, ndërsa Japonia po përballet me një rënie të thellë demografike.
Duke folur në seancën e Komisionit të Buxhetit në Dhomën e Përfaqësuesve, Takaichi e përshkroi rënien e popullsisë si “një emergjencë e heshtur dhe një çështje jetike”, sipas gazetës “The Mainichi”.
“Kam vetëm shtatë muaj në detyrë dhe ende nuk kam arritur të ndryshoj në mënyrë drastike trendin”, tha ajo.
Takaichi tha se qeveria e saj synon të rrisë të ardhurat neto të të rinjve për ta bërë më të lehtë për ata që duan të martohen dhe të kenë fëmijë si dhe të zgjerojë mbështetjen për prindërit që përballen me vështirësitë e rritjes së fëmijëve.
Japonia regjistroi 671.236 lindje në vitin 2025, shifra më e ulët vjetore që nga fillimi i regjistrimeve në vitin 1899. Norma totale e lindshmërisë në vend, numri mesatar i fëmijëve që pritet të ketë një grua gjatë jetës ka rënë në nivelin rekord prej 1,14, sipas të dhënave qeveritare.
Popullsia e Japonisë ishte pak mbi 123 milionë në vitin 2025, një rënie prej 3.1 milionë krahasuar me pesë vite më parë, sipas të dhënave të cituara nga Nippon.com./mxh
Vetëm një javë para fillimit të Kupës së Botës, FIFA ka marrë një vendim befasues për t’u ndaluar tifozëve të sjellin shishe uji të ripërdorshme në stadiume. Arsyeja e dhënë është protokollet e sigurisë, por ky veprim ka ngjallur kritika dhe shqetësime për shëndetin e spektatorëve duke pasur parasysh temperaturat e larta të parashikuara.
Vendimi është një përmbysje e plotë, siç deklaroi më parë kodi zyrtar i sjelljes për mbajtësit e biletave: “Për të shmangur dyshimet, shishet plastike bosh, transparente dhe të ripërdorshme, deri në një kapacitet prej (1 litër), mund të futen në stadium”.
Megjithatë, një përditësim i rregullave më 2 qershor, i raportuar për herë të parë nga The Athletic, e hoqi këtë opsion. FIFA tha në një deklaratë se vendimi u mor për të zvogëluar rrezikun e lëndimeve të shkaktuara nga objektet e hedhura.
“FIFA është e përkushtuar për të mbrojtur shëndetin dhe sigurinë e të gjithë lojtarëve, gjyqtarëve, tifozëve, vullnetarëve dhe stafit. FIFA ka marrë vendimin për të ndaluar shishet për të parandaluar rreziqet dhe lëndimet e lojtarëve dhe spektatorëve. Shishet nga jashtë janë tashmë të ndaluara në disa nga këto vende për arsye sigurie, dhe FIFA po e zbaton këtë konsideratë në të gjitha stadiumet e turneut”, thuhet në deklaratë.
Një goditje për xhepin dhe shëndetin e tifozëve
Ky veprim ka ngritur shqetësime midis tifozëve në lidhje me përballimin e vapës, me temperaturat që pritet të arrijnë midis 26 dhe 28 gradë celsius në disa vende. FIFA ka premtuar masa për të lehtësuar vapën, të tilla si stacione për pirjen e ujit, tifozë dhe tenda ftohëse, dhe se uji do të shitet me çmime të rregullta në stadiume.
Megjithatë, The Athletic kujtoi se në Kupën e Botës për Klube të vitit të kaluar në Shtetet e Bashkuara, uji në shishe kushtonte midis katër dhe gjashtë dollarëve amerikanë. Ndryshimi i politikës vjen mes ankesave se tifozët po goditen nga çmimet “shantazhuese” të biletave dhe transportit.
Ekspertët mbi goditjen nga nxehtësia e kanë kritikuar ashpër ndryshimin e rregullave të FIFA-s, dhe shkencëtarët paralajmëruan në maj se masat e mbrojtjes nga nxehtësia për turneun ishin “të pamjaftueshme”, shkruan The Guardian.
Akademikët nga World Weather Attribution (WWA) kanë shprehur shqetësim në lidhje me ndikimin e nxehtësisë ekstreme në mirëqenien e lojtarëve dhe tifozëve, me tifozët që konsiderohen veçanërisht të prekshëm.
WWA parashikon që nëntë nga 104 ndeshjet do të luhen mbi 26 gradë, temperaturën e bulbit të lagësht (ËBGT), një indeks që mat stresin e nxehtësisë në trup. Pesë ndeshje pritet të kalojnë 28 gradë, pragun mbi të cilin sindikata e lojtarëve FIFPRO rekomandon shtyrjen.
Ollie Jay, profesor i nxehtësisë dhe shëndetit në Universitetin e Sidneit, thotë se është më i shqetësuar për spektatorët sesa për lojtarët.
Dr. Theodore Keeping i Imperial College London theksoi rëndësinë e aksesit në ujë. “Ofrimi i aksesit të drejtë dhe të barabartë në hidratim është një linjë e parë themelore e mbrojtjes kundër rreziqeve ekstreme të nxehtësisë që ndryshimet klimatike sjellin në këtë Kupë Bote”, tha ai.
Andrew Simms i Institutit të Motit të Ri ishte edhe më i ashpër: “A është FIFA një parashikues i klimës për lojën që supozohet të mbrojë? Tani, ta bësh më të vështirë për tifozët të qëndrojnë të sigurt në një garë të cenueshme ndaj ngrohjes globale duket si një heqje dorë e pamatur e detyrës së kujdesit të FIFA-s”.
Kupa e Botës me 48 ekipe, e organizuar nga Shtetet e Bashkuara, Kanadaja dhe Meksika, do të zhvillohet nga 11 qershori deri më 19 korrik. /ET
Efektivi i policisë Enea Mekolli do të prehet në varrezat e fshatit të tij të lindjes, në Blacë.
Familja e efektivit ka kërkuar që i ndjeri të mos varroset në varrezat e dëshmorëve siç e parashikon statusi për dëshmorët e Atdheut por në fshatin e tij.
Kërkesa e familjes vjen për shkak se kanë patur dhe një djalë tjetër që ka qenë efektiv dhe që ka humbur jetën si pasojë e një sëmundjeje.
Familja ka kërkuar që të dy djemtë të prehen pranë njeri tjetrit. Varrimi i Enea Mekollit do të bëhet në orën 14:00 të ditës së premte, ndërsa homazhet do të mbahen në orën 12:00 në Pogradec./Mxh
Presidenti rus Vladimir Putin deklaroi se një marrëveshje paqeje mes Rusisë dhe Ukrainës mund të arrihet në një kohë të shkurtër, nëse të dyja palët tregojnë gatishmëri për kompromis.
Gjatë një takimi me përfaqësues të mediave ndërkombëtare, Putin tha se Moska është e gatshme të negociojë dhe të bëjë lëshime, por sipas tij edhe Ukraina duhet të ndjekë të njëjtën rrugë.
“Jemi të gatshëm të arrijmë një marrëveshje paqeje me Ukrainën. Rusia është e gatshme për kompromis dhe edhe Ukraina duhet të bëjë të njëjtën gjë. Nëse kjo ndodh, konflikti mund të përfundojë shpejt”, deklaroi presidenti rus.
Putin pretendoi se forcat ruse vijojnë avancimin në territorin ukrainas dhe se Moska ka forcuar kontrollin në disa rajone të pushtuara.
Sipas tij, Rusia kontrollon plotësisht rajonin e Luhanskut, mbi 85% të rajonit të Donetskut dhe rreth 80% të rajonit të Zaporizhias. Ai shtoi gjithashtu se gjatë muajve të fundit ushtria ruse ka marrë nën kontroll mijëra kilometra katrorë territor në Ukrainë.
Presidenti rus argumentoi se ushtria ukrainase po përballet me mungesë të konsiderueshme personeli, ndërsa theksoi se Rusia vazhdon të forcojë kapacitetet e saj ushtarake dhe mbrojtëse.
Putin pranoi se dronët ukrainas vazhdojnë të kryejnë sulme brenda territorit rus, por u shpreh i bindur se Moska disponon burimet e nevojshme për të arritur objektivat e saj në luftë.
Deklaratat e kreut të Kremlinit vijnë në një kohë kur lufta në Ukrainë vazhdon prej më shumë se katër vitesh, ndërsa përpjekjet ndërkombëtare për një zgjidhje diplomatike mbeten ende pa rezultat konkret./mxh
Kombëtarja e vajzave zhvilloi pasditen e kësaj të enjteje stërvitjen e fundit dhe zyrtare në prag të ndeshjes së nesërme ndaj Çekisë, e vlefshme për kualifikueset e Botërorit “Brazil 2027”.
Nën drejtimin e trajnerit Armir Grima dhe stafit teknik, skuadra kuqezi zbriti në fushë në stadiumin ku do të zhvillohet ndeshja, duke mbyllur përgatitjet për sfidën e rëndësishme që do të luhet nesër.
Departamenti i Komunikimit në FSHF bën me dije se mbrojtësja Armera Tukaj zhvilloi një program të veçuar stërvitor për shkak të një shqetësimi muskulor. Pjesa tjetër e skuadrës është në dispozicion të stafit teknik dhe gati për takimin ndaj përfaqësueses çeke.
Ndeshja Çeki – Shqipëri do të luhet nesër në stadiumin “FK Viktoria Zizkov”, duke nisur nga ora 17:30./mxh
Frika nga ndikimi i drejtpërdrejtë i fuqive të huaja që duan të dëmtojnë Evropën është thelbësore – për shembull nga të ashtuquajturit “kill switches”.
Ky term anglisht i referohet mekanizmave të kontrolluar nga jashtë që mund të ndërpresin funksionimin e rrjeteve elektrike, administratave dhe funksioneve të ndryshme digjitale.
BE-ja dëshiron të çlirohet nga këto rreziqe, sidomos ato që vijnë nga SHBA dhe Kina.
Për këtë qëllim, Komisioni ka paraqitur një paketë ligjore për sovranitet digjital.
Këto plane nuk janë fantazi, sipas zëvendëspresidentes së Komisionit Evropian, Henna Virkkunen, por kërkojnë një vendim “që duhet ta marrin së bashku”.
Pavarësi në prodhimin e çipave
Evropa synon të jetë më pak e varur nga prodhimi i çipave jashtë kontinentit dhe të rrisë prodhimin e tyre brenda Evropës.
Prodhimi i gjysmëpërçuesve duhet të nxitet më tej – kompanitë do të tërhiqen me energji më të lirë dhe më pak burokraci.
Ligji ekzistues i BE-së për gjysmëpërçuesit do të zgjerohet me masa emergjente.
Fushat kritike si industria e armëve dhe teknologjia mjekësore do të kenë përparësi në furnizim në rast mungesash.
Komisioni Evropian gjithashtu synon të përshpejtojë ndjeshëm zhvillimin e strukturave cloud evropiane.
Qëllimi është i njëjtë: më pak varësi strategjike nga Kina dhe sidomos nga SHBA, pasi aktualisht në Evropë përdoren kryesisht ofrues amerikanë.
Përveç kësaj, BE planifikon një strategji për burim të hapur (open source): administratat dhe kompanitë nuk duhet të mbështeten vetëm tek ofruesit tradicionalë amerikanë, por të largohen gradualisht prej tyre.
Qendrat evropiane të të dhënave duhet të trajnojnë modelet më moderne të Al në Evropë, dhe jo në Azi apo Amerikë.
Evropa kërkon t’i përgjigjet dominimit të Tajvanit në prodhimin e çipave të avancuar. Një paketë e re mbështetëse nga BE synon të ndihmojë në këtë drejtim.
Rivalitetet gjeopolitike si arsye
Komisioneri i BE-së, Dan Jorgensen, e përmendi rivalitetin gjeopolitik si arsyen kryesore për reformat digjitale.
Tregu global i teknologjisë po largohet nga tregtia e lirë drejt një nacionalizmi ekonomik më të ashpër.
Në këtë situatë, Evropa mund të marrë drejtimin dhe të veprojë në mënyrë të përgjegjshme.
27 shtetet anëtare mbështesin të paktën një pjesë të paketës – iniciativën për çipat.
Ajo i përgjigjet kërkesës së industrisë për të rritur prodhimin në Evropë, në mënyrë që të shmanget varësia nga eksportet dhe shantazhi në rast mungesash.
Presidenti i shoqatës së industrisë Bitkom, Ralf Wintergerst, e përgëzoi paketën: “Ne e mirëpresim që Komisioni Evropian nuk fokusohet vetëm në teknologji individuale, por në të gjithë zinxhirin e vlerës digjitale”.
Megjithatë, tani është vendimtare që të mos mbetet vetëm në njoftime, sepse Evropa ka nevojë për veprim të shpejtë.
Financimi si sfidë
Një pengesë e madhe mund të jetë financimi.
Raporti i Draghi-t i vitit 2024 për konkurrueshmërinë e Evropës vlerëson se nevojiten rreth 800 miliardë euro shtesë çdo vit për të mbajtur hapin me SHBA-në dhe Kinën.
Paketa e re synon të mobilizojë kapital privat të riskut dhe parashikon një fond të ri të BE-së për konkurrueshmëri në buxhetin e ardhshëm.
Negociatat mund të zgjasin deri në vitin 2027, ndërsa miratimi mund të ndodhë në fund të vitit të ardhshëm.
A ka shanse plani?
“Ofruesit amerikanë janë dominues dhe do të mbeten të tillë”, tha eurodeputeti i SPD-së Matthias Ecke.
“Megjithatë, BE nuk duhet t’i nënshtrohet presionit nga SHBA. Ne vendosim rregulla për qytetarët tanë”, shtoi ai.
Nga ana tjetër, Markus Ferber (CSU) dyshon nëse Evropa mund të fitojë garën globale për fabrikat më moderne të gjysmëpërçuesve: “Përpjekja për të konkurruar me Tajvanin, SHBA-në apo Korenë e Jugut në terrenin e tyre ka qenë iluzion dhe e kushtueshme që në fillim”.
Sipas tij, ligji i ri për çipat duhet të analizojë realisht zinxhirin e vlerës dhe të investojë në segmentet ku Evropa ka avantaze të qarta konkurruese.
Sa larg duhet të shkojë sovraniteti?
Bertram Brossardt nga Shoqata e Ekonomisë Bavareze thekson se sovraniteti teknologjik nuk duhet të kufizohet vetëm në sektorin digjital, por të përfshijë edhe teknologji të tjera kyçe si bioteknologjia dhe energjia.
Eurodeputeti i SPD-së Bernd Lange paralajmëron nga pritshmëri të tepruara: “Sovraniteti teknologjik nuk do të thotë Evropa e para”.
“Ai nënvizon se Evropa duhet të zhvillojë aftësi vetjake në fusha kritike, por të mbetet e hapur ndaj tregtisë, investimeve dhe bashkëpunimit ndërkombëtar”, shtoi ai./ET
E ardhmja e Leon Goretzkës vazhdon të mbetet një nga çështjet më të diskutuara në merkaton europiane. Mesfushori gjerman, është futur në ditët e fundit të kontratës me Bayern Munich.
Për një periudhë të gjatë dukej se rruga e tij do ta çonte në Serinë A, ku Milani ishte klubi më i interesuar për shërbimet e futbollistit. Drejtuesit kuqezi e kishin identifikuar Goretzkën si një përforcim të rëndësishëm për mesfushën dhe palët kishin arritur një mirëkuptim paraprak për transferimin.
Në atë periudhë, projekti sportiv i Milanit parashikonte rikthimin në Ligën e Kampioneve dhe mesfushori gjerman konsiderohej një element me eksperiencë ndërkombëtare që mund të rriste nivelin e skuadrës.
Megjithatë, situata ndryshoi ndjeshëm pas fundit të sezonit. Mungesa e kualifikimit në Ligën e Kampioneve dhe ndryshimet e rëndësishme në strukturën teknike dhe drejtuese të klubit sollën pezullimin e negociatave.
Pas tërheqjes së Milanit, përfaqësuesit e futbollistit nisën të shqyrtonin alternativa të tjera në tregun europian. Një nga klubet që vazhdon të monitorojë situatën është Arsenal. Klubi londinez ka qenë prej kohësh një destinacion që pëlqehet nga mesfushori gjerman dhe mbetet një nga mundësitë më serioze për të ardhmen e tij.
Përveç Premier League, interesime kanë ardhur edhe nga kampionati turk. Klubet turke po vazhdojnë të investojnë në futbollistë me emër dhe përvojë ndërkombëtare, duke ofruar kontrata të rëndësishme financiare. Për këtë arsye, edhe emri i Goretzkës është lidhur me disa skuadra të elitës së futbollit turk.
Në Itali, vëmendja mbetet te Juventusi. Bardhezinjtë kishin kërkuar informacione për lojtarin që në pranverë, në kuadër të planit për të afruar futbollistë me eksperiencë dhe personalitet ndërkombëtar. Profili i Goretzkës vlerësohej si i përshtatshëm për të shtuar cilësi dhe peshë në repartin e mesfushës.
Megjithatë, kushtet aktuale e bëjnë operacionin më të komplikuar. Mungesa e Juventusit në Ligën e Kampioneve ka kufizuar mundësitë financiare të klubit dhe ka ndryshuar prioritetet në merkato./mxh
Kupa e Botës 2026 do të sjellë në skenë jo vetëm talentet e rinj të futbollit botëror, por edhe disa legjenda që vazhdojnë të sfidojnë moshën.
Me listat përfundimtare të kombëtareve tashmë të publikuara, vëmendja është përqendruar edhe te lojtarët më të vjetër që do të marrin pjesë në turneun më të madh të futbollit.
Interesant është fakti se as Lionel Messi nuk bën pjesë në dhjetëshen e parë, ndërsa Cristiano Ronaldo renditet vetëm në vendin e dytë.
10. Hernan Galindez (Ekuador) – 39 vjeç, 2 muaj e 12 ditë
Portieri i lindur në Argjentinë, por që përfaqëson Ekuadorin, pritet të jetë zgjedhja e parë e kombëtares së tij në Botëror. Ai është bërë figurë e rëndësishme për ekipin që nga debutimi në vitin 2021.
9. Yuto Nagatomo (Japoni) – 39 vjeç, 8 muaj e 30 ditë
I njohur për periudhën e tij te Interi, Nagatomo vazhdon të jetë pjesë e Japonisë edhe në moshën 39-vjeçare. Mbrojtësi me përvojë pritet të ketë një rol më shumë si lider në dhomat e zhveshjes.
8. Fernando Muslera (Uruguai) – 39 vjeç, 11 muaj e 26 ditë
Legjenda e portës uruguaiane është rikthyer në kombëtare pas një mungese të gjatë. Edhe pse nuk pritet të jetë titullar, eksperienca e tij mbetet e paçmueshme.
7. Vozinha (Kepi i Gjelbër) – 40 vjeç e 8 ditë
Portieri veteran i Kepit të Gjelbër ka kaluar kufirin e 40 viteve dhe vazhdon të jetë një nga figurat kryesore të kombëtares së tij.
6. Manuel Neuer (Gjermani) – 40 vjeç, 2 muaj e 15 ditë
Pas pensionimit nga kombëtarja, Neuer u rikthye për shkak të problemeve me lëndimet në repartin e portierëve të Gjermanisë. Mbetet për t’u parë nëse do të jetë titullar apo jo.
5. Edin Dzeko (Bosnje dhe Hercegovinë) – 40 vjeç, 2 muaj e 25 ditë
Sulmuesi legjendar vazhdon të jetë vendimtar për Bosnjën. Ai ishte një nga protagonistët kryesorë në kualifikimin e ekipit për Kupën e Botës 2026.
4. Luka Modric (Kroaci) – 40 vjeç, 9 muaj e 2 ditë
Kapiteni kroat vazhdon të jetë zemra e ekipit kombëtar. Botërori 2026 mund të jetë turneu i fundit i karrierës së tij madhështore.
3. Guillermo Ochoa (Meksikë) – 40 vjeç, 10 muaj e 29 ditë
Heroi i shumë Botërorëve për Meksikën vazhdon të jetë pjesë e kombëtares, edhe pse nuk konsiderohet më zgjedhja e parë në portë.
2. Cristiano Ronaldo (Portugali) – 41 vjeç, 4 muaj e 6 ditë
Një rekord më vete. Cristiano Ronaldo do të marrë pjesë në Kupën e tij të gjashtë të Botës, duke vendosur një tjetër standard historik. Portugezi synon trofeun e vetëm madhor që ende mungon në koleksionin e tij.
Megjithatë, ai nuk do të mund të thyejë rekordin e golashënuesit më të vjetër në historinë e Botërorëve, që vazhdon të mbahet nga Roger Milla.
1. Craig Gordon (Skoci) – 43 vjeç, 5 muaj e 11 ditë
Portieri skocez është futbollisti më i moshuar që do të marrë pjesë në Kupën e Botës 2026.
Gordon debutoi në futbollin profesionist në një epokë kur shumë prej yjeve të sotëm ende nuk kishin lindur.
Megjithatë, edhe nëse luan në turne, ai nuk do të arrijë rekordin absolut të portierit egjiptian Essam El-Hadary, i cili mbetet futbollisti më i vjetër që ka luajtur ndonjëherë në Kupën e Botës, në moshën 45-vjeçare gjatë Botërorit të vitit 2018.
Vlen të theksohet se Lionel Messi, pavarësisht se do të jetë 38 vjeç në këtë Botëror, nuk arrin të futet në Top 10, duke u renditur në vendin e 11-të në listën e lojtarëve më të moshuar të turneut. /ET
Pak më shumë se një e pesta e të gjitha veturave të reja të shitura në Evropë deri më tani këtë vit janë plotësisht elektrike.
Sipas të dhënave të publikuara nga Shoqata Evropiane e Prodhuesve të Automobilave (ACEA), automjetet elektrike përbënin 20.9 përqind të regjistrimeve të reja në katër muajt e parë të vitit 2026.
Megjithatë, ka ende shumë për të bërë para se të gjithë të binden të bëjnë kalimin në elektrike.
Sipas Volkswagen, diskutimet rreth ndalimit të shitjes së veturave të reja me motor me djegie të brendshme nuk e kuptojnë thelbin e çështjes.
Martin Sander, anëtar i Bordit Ekzekutiv për Shitjet dhe Marketingun, tha se fokusi duhet të jetë tek arsyeja pse automjetet elektrike janë thjesht vetura më të mira në përgjithësi, në vend që të vajtohet ekzistenca e vazhdueshme e motorëve me benzinë dhe naftë.
Mendimi i VW është se sapo më shumë njerëz të kuptojnë se automjetet elektrike janë superiore, do të ketë një tranzicion të natyrshëm nga ICE në EV.
Sander bëri paralele me ditët e para të industrisë automobilistike, kur veturat filluan gradualisht të zëvendësonin kuajt, pasi njerëzit e kuptuan se ata ishin një mjet më i mirë transporti.
Ai beson se e njëjta gjë do të ndodhë përfundimisht me automjetet me motor me djegie të brendshme, me ose pa ndalim, ndërsa automjetet elektrike do të zënë vendin e tyre gradualisht. /ET
Një numër shtetesh anëtare të Bashkimit Evropian po i bëjnë trysni Komisionit Evropian ta sjellë një legjislacion, i cili do ta bënte më të lehtë refuzimin e vizave turistike për qytetarët rusë, për shkak të pushtimit të plotë të Ukrainës nga Moska.
Suedia do ta paraqesë këtë çështje për diskutim – me mbështetjen e Republikës Çeke, Danimarkës, Estonisë, Finlandës, Letonisë, Lituanisë dhe Holandës, si dhe të vendeve të zonës Shengen që nuk janë pjesë e BE-së, Islandës dhe Norvegjisë – kur ministrat e Brendshëm të bllokut të mblidhen në Luksemburg për takimin e tyre të rregullt mujor më 4 qershor.
Para takimit, këto vende i dërguan gjithashtu një letër Komisionit Evropian ku shprehën shqetësimet e tyre.
Sipas tekstit, të cilin e ka parë Radio Evropa e Lirë (REL), është “thellësisht shqetësuese të shohësh një numër në rritje turistësh rusë që shijojnë pushimet në plazhet dhe resortet evropiane, ndërkohë që raketat dhe dronët vazhdojnë t’i godasin civilët dhe infrastrukturën civile në Ukrainë”.
“Kjo është edhe më e dhimbshme duke pasur parasysh se mijëra fëmijë ukrainas të dëbuar në mënyrë të paligjshme dhe të dërguar me forcë nuk mund të kthehen te familjet e tyre”, thuhet në tekst.
Kjo çështje po shtrohet në një kohë kur statistikat e BE-së, të cilat i ka parë REL-i, tregojnë një rritje të numrit të vizave turistike të zonës Shengen të lëshuara për rusët gjatë vitit 2025, duke arritur në gati 480.000.
Ky është numri më i lartë që nga nisja e pushtimit të plotë të Ukrainës nga Rusia në vitin 2022.
Nuk pritet që legjislacioni i ri të miratohet menjëherë, dhe kjo do të thotë se nuk ka gjasa të ketë ndryshime para sezonit veror, kur lëshohet shumica e vizave turistike.
Në vend të kësaj, shpresohet që një propozim të paraqitet më vonë gjatë këtij viti dhe të miratohet në vitin 2027.
Megjithatë, kjo nuk do të jetë aspak e lehtë.
Tri shtetet e BE-së që lëshojnë më së shumti viza turistike për rusët janë Franca, Italia dhe Spanja. Në këto vende turizmi kontribuon ndjeshëm në ekonomitë kombëtare.
Megjithëse një ligj i mundshëm i BE-së kërkon vetëm shumicë të thjeshtë, pra 55 për qind të shteteve anëtare që përfaqësojnë 65 për qind të popullsisë së përgjithshme të bllokut, pesha e madhe e këtyre tri vendeve së bashku do të thotë se atyre u nevojitet vetëm edhe një shtet tjetër anëtar për ta bllokuar çfarëdo mase të propozuar.
Një alternativë mund të jetë paraqitja e një legjislacioni të përgjithshëm që do t’u lejonte shteteve anëtare – të cilat kanë autonomi të gjerë në çështjet kombëtare – të refuzojnë viza turistike për qytetarët e çdo vendi që shkel të drejtat e njeriut.
Me fjalë të tjera, kjo masë nuk do ta përmendte ose veçonte në mënyrë specifike Rusinë.
Deri tani, Komisioni Evropian ka nxjerrë vetëm udhëzime për shtetet anëtare lidhur me kufizimin e udhëtimeve joesenciale drejt BE-së nga qytetarët rusë.
Vendet fqinje me Rusinë, si Estonia, Finlanda, Letonia dhe Lituania, i kanë përdorur tashmë këto udhëzime për të ndaluar pothuajse plotësisht lëshimin e vizave për rusët, me përjashtim të vizave humanitare për gazetarë dhe politikanë opozitarë, aktivistë të shoqërisë civile dhe persona me nevoja të veçanta mjekësore.
Pikërisht këto udhëzime vendet nënshkruese të dokumentit shpresojnë t’i shndërrojnë në diçka më të qëndrueshme dhe më të unifikuar, siç do të ishte një legjislacion i vlefshëm në gjithë BE-në.
“Zbatimi i pabarabartë i këtyre udhëzimeve nga shtetet anëtare lë shumë për të dëshiruar, pasi i mungojnë si solidariteti ashtu edhe qëndrueshmëria. Ai gjithashtu rrezikon të vendosë shtetet anëtare në pozita të pabarabarta ekonomike”, thuhet në dokument.
Dokumenti shton gjithashtu se “një situatë në të cilën shtetet anëtare zbatojnë qasje thellësisht të ndryshme për lëshimin e vizave për udhëtime joesenciale, jo vetëm që nxit të ashtuquajturin ‘turizëm vizash’, por përbën edhe rrezik sigurie për gjithë zonën Shengen”.
Në vjeshtën e vitit 2022, BE-ja e vështirësoi gjithashtu hyrjen e rusëve në bllok duke pezulluar për një kohë të pacaktuar marrëveshjen për lehtësimin e vizave midis Brukselit dhe Moskës, e cila kishte vendosur rregullat e udhëtimit që nga viti 2007.
Ky pezullim nënkuptonte se nuk duhej të lëshoheshin më viza me hyrje të shumëfishta, se tarifa e vizës u rrit nga rreth 35 euro në 90 euro dhe se u kërkuan më shumë dokumente, si dhe u zgjat koha e shqyrtimit të aplikimeve.
Në një lëvizje të veçantë, por të lidhur me këtë çështje, Estonia po u bën thirrje shteteve të tjera anëtare të BE-së që të përpiqen t’ua ndalojnë hyrjen në zonën Shengen veteranëve rusë të luftës në Ukrainë, duke hartuar lista të gjera personash që do t’i nënshtroheshin ndalimeve të hyrjes në gjithë Evropën./mxh
Login
