Avokati Besnik R. BERISHA ka reaguar ashpër pas aktgjykimit të Departamentit Special, me të cilin ish-ministri Endrit Shala është shpallur fajtor, duke e cilësuar vendimin si një devijim serioz nga parimet themelore të së drejtës penale dhe një precedent shqetësues për sigurinë juridike në vend.
“Ka aktgjykime me të cilat nuk pajtohesh për shkak të mënyrës se si janë vlerësuar provat. Ka aktgjykime që, ndonëse mund të jenë të pafavorshme, i respekton, sepse në to gjen një arsyetim juridik të mbështetur në ligj dhe një përpjekje serioze për të ruajtur ekuilibrin ndërmjet interesit publik dhe lirive individuale. Por, ka edhe aktgjykime që zgjojnë një shqetësim më të thellë, jo vetëm për fatin juridik të të gjykuarit, por për standardin e drejtësisë që po ndërtohet. Ky është një prej tyre”, ka shkruar Berisha.
Sipas tij, rasti i Endrit Shalës nuk ngre dilema të ndërlikuara faktike, por paraqet një problem të pastër juridik.
Berisha ka theksuar se neni 417 paragrafi 6 i Kodit Penal të Republikës së Kosovës përcakton në mënyrë të qartë dhe shteruese rrethin e personave që konsiderohen anëtarë të familjes për qëllime të veprës penale të konfliktit të interesit.
“Në atë dispozitë nuk përfshihet baxhanaku, nuk përfshihet kunati dhe nuk përfshihen personat në gjini krushqie. Ligjvënësi ka zgjedhur me vetëdije se kë do të përfshijë dhe kë do të përjashtojë nga kjo normë penale. Kjo zgjedhje mund të pëlqehet ose jo, por ajo nuk mund të korrigjohet nga gjykata”, ka deklaruar ai.
Avokati Berisha ka rikujtuar se parimi nullum crimen, nulla poena sine lege ndalon zgjerimin e përgjegjësisë penale përmes analogjisë dhe se askush nuk mund të shpallet fajtor për një sjellje që ligji nuk e ka përcaktuar shprehimisht si vepër penale.
Ai ka përmendur edhe Opinionin nr. prot. 01-3393/14 të Agjencisë Kundër Korrupsionit, sipas të cilit burri i motrës së gruas, përkatësisht baxhanaku, nuk cilësohet si person i afërt me zyrtarin dhe nuk hyn në kategorinë e personave që mund të shkaktojnë konflikt interesi penal sipas Kodit Penal.
Po ashtu, Berisha i është referuar praktikës gjyqësore në çështjen PKR.nr.16/24, duke theksuar se Gjykata Themelore në Pejë kishte nxjerrë aktgjykim lirues në një rast të ngjashëm, vendim ky i vërtetuar më pas edhe nga Gjykata e Apelit me aktgjykimin PAKR.nr.457/24. Sipas tij, edhe Apeli kishte konstatuar se personat në gjini krushqie nuk hyjnë në rrethin e personave të përcaktuar nga neni 417.6 i KPRK-së dhe se kjo dispozitë nuk mund të plotësohet përmes ligjeve të tjera.
Megjithatë, sipas avokatit Berisha, elementi më shqetësues i këtij rasti mbetet fakti se vetë Prokuroria kishte pushuar hetimet për veprën penale të konfliktit të interesit.
“Paradoksi qëndron në faktin se ajo që nuk qëndroi si konflikt interesi në vlerësimin e Prokurorisë, në fund shërbeu si themel për shpalljen e fajësisë nga Departamenti Special. Kjo nuk është thjesht një kundërthënie procedurale; kjo prek vetë koherencën e arsyetimit penal”, ka shkruar ai.
Në fund të reagimit të tij, Berisha ka deklaruar se rasti i Endrit Shalës tejkalon fatin juridik të një individi dhe prek besimin e qytetarëve në sundimin e ligjit.
“Për këtë arsye, sot e them me bindje të plotë profesionale dhe morale: Endrit Shala është i pafajshëm. Gjykata gaboi rëndë. Aktgjykimet janë të detyrueshme për t’u respektuar, por ato nuk janë të pagabueshme. Historia e së drejtës ka dëshmuar se mbrojtja e sundimit të ligjit fillon pikërisht aty ku lind guximi për t’i thënë gjykatës se ka gabuar”, përfundon reagimi i avokatit Besnik R. Berisha.
Sinjali – aty ku e vërteta flet para lajmit!
/GazetaSinjali/
The post “Endrit Shala është i pafajshëm, Gjykata gaboi rëndë” – Avokati BERISHA me reagim të ashpër pas aktgjykimit të Departamentit Special appeared first on Sinjali.
Login
