UASHINGTON, 21 korrik /ATSH/- Presidenti amerikan Donald Trump premtoi sot se Shtetet e Bashkuara të Amerikës do ta ndihmojnë Libanin, gjatë takimit në Shtëpinë e Bardhë me presidentin libanez, Joseph Aoun, sipas AP.

Aoun vizitoi Uashingtonin për të kërkuar mbështetje për paqen dhe stabilitetin afatgjatë në Liban, pas disa muajsh përleshjesh mes Izraelit dhe grupit militant Hezbollah, i mbështetur nga Irani.

Trump tha se Libani është trajtuar keq në të kaluarën dhe se SHBA-ja do ta ndihmojë vendin “të marrë respektin që meriton”, pa dhënë detaje konkrete për ndihmën e premtuar.

Takimi u zhvillua në një kohë kur vëmendja e Uashingtonit është përqendruar te konflikti me Iranin, i cili ka rritur tensionet në Lindjen e Mesme.

Ndërkohë, Libani dhe Izraeli kanë zhvilluar bisedime të rralla të drejtpërdrejta me ndërmjetësimin e SHBA-së.

Pas takimit, Trump bëri një njoftim të papritur. “Kompanitë ajrore amerikane do të lejohen të rifillojnë fluturimet direkte drejt Libanit, pas një pezullimi prej më shumë se 40 vitesh”, tha ai.

“Po udhëzoj administratën time të lejojë të gjitha kompanitë ajrore amerikane të fluturojnë drejt Libanit, në mënyrë që amerikanët të mund ta vizitojnë lehtësisht këtë vend të bukur”, shkroi Trump.

Fluturimet direkte mes SHBA-së dhe Libanit ishin ndërprerë në vitin 1985, pas rrëmbimit të avionit të “Trans World Airlines” (TWA Flight 847) gjatë administratës së presidentit Ronald Reagan. //a.i/

The post UASHINGTON – Trump: Pas 40 vitesh, SHBA-ja rikthen fluturimet direkte drejt Libanit appeared first on Agjencia Telegrafike Shqiptare.

UASHINGTON, 21 korrik /ATSH/- Sekretari amerikan i Mbrojtjes, Pete Hegseth deklaroi sot para Senatit se lufta e SHBA-së kundër Iranit i ka kushtuar deri tani 37,5 miliardë dollarë, një vlerësim më i lartë se ai i bërë më parë, sipas AP.

Hegseth dëshmoi në Komisionin e Ndarjeve Buxhetore të Senatit, për të mbështetur kërkesën e presidentit Donald Trump për 87,6 miliardë dollarë fonde shtesë, të cilat synojnë kryesisht rimbushjen e rezervave të Pentagonit pas operacioneve ushtarake kundër Iranit.

Ai e cilësoi këtë financim si urgjent dhe të domosdoshëm, duke paralajmëruar se pa këto fonde ushtria amerikane, do të përballej me mungesa të konsiderueshme.

Seanca u ndërpre disa herë nga protestues, ndërsa Hegseth u përball me pyetje të forta nga senatorët lidhur me kostot dhe zhvillimin e luftës.

Gjatë dëshmisë, Pentagoni bëri të ditur se 17 ushtarë amerikanë kanë humbur jetën që nga fillimi i konfliktit dhe mbi 100 të tjerë janë plagosur.

Ushtria identifikoi gjithashtu një ushtar të vrarë në Irak gjatë çaktivizimit të një droni dhe dy ushtarë të tjerë të vrarë në Jordani, gjatë mbrojtjes nga sulmet iraniane me raketa balistike dhe dronë.

Nga ana tjetër, demokratët shprehën kundërshtimin e tyre ndaj konfliktit.

Senatorja Patty Murray paralajmëroi se SHBA-ja rrezikon të përfshihet në një tjetër luftë, duke kritikuar administratën Trump për kërkesat e vazhdueshme për fonde shtesë dhe për mungesën e një zgjidhjeje të shpejtë.

Ndërkohë, presidenti Donald Trump deklaroi se SHBA-ja nuk ka interes të zhvillojë bisedime me Iranin, derisa Teherani të jetë i gatshëm të negociojë “në mënyrë kuptimplotë”.

Gjithashtu, Trump priti sot në Shtëpinë e Bardhë presidentin e Libanit, Joseph Aoun.

Pas takimit, ai njoftoi se do të lejojë rifillimin e fluturimeve direkte të linjave ajrore amerikane drejt Libanit, për herë të parë në më shumë se 40 vjet.

Në të njëjtën kohë, republikanët po përgatisin një paketë buxhetore prej 95 miliardë dollarësh, e cila përfshin financimin shtesë për ushtrinë, si edhe fonde për prioritete të tjera të administratës Trump. //a.i/

The post SHBA – Hegseth: Lufta me Iranin ka kushtuar 37,5 miliardë dollarë appeared first on Agjencia Telegrafike Shqiptare.

UASHINGTON, 21 korrik /ATSH/- SHBA-ja dhe Meksika nisën sot në Ciudad de Mexico, raundin e tretë të bisedimeve për rishikimin e Marrëveshjes Tregtare SHBA-Meksikë-Kanada (USMCA), ndërsa Kanadaja nuk merr pjesë në negociata, sipas “Reuters”.

Bisedimet zhvillohen vetëm një ditë pasi presidenti amerikan, Donald Trump njoftoi tarifa të reja prej 50% ndaj një sërë produktesh kanadeze, duke rritur tensionet tregtare mes dy vendeve.

Administrata amerikane synon të ndryshojë marrëveshjen, për të ulur deficitin tregtar të SHBA-së, për të rikthyer më shumë prodhimin industrial në territorin amerikan dhe për të rritur përmbajtjen e prodhimit amerikan, në automjetet e prodhuara në Amerikën e Veriut.

Nga ana tjetër, Meksika shpreson që një marrëveshje e re, të arrihet deri në fund të vitit dhe kërkon lehtësimin e tarifave amerikane për automjetet, çelikun dhe aluminin meksikan.

Në qendër të diskutimeve është edhe forcimi i mbrojtjes së tregut të Amerikës së Veriut nga produktet kineze, me synimin që mallrat nga Kina të mos hyjnë në tregun amerikan përmes Meksikës ose Kanadasë. //a.i/

The post FOKUS – SHBA-ja dhe Meksika rifillojnë bisedimet për marrëveshjen tregtare, Kanadaja mbetet jashtë negociatave appeared first on Agjencia Telegrafike Shqiptare.

OTAVË, 21 korrik /ATSH/- Kryeministri kanadez, Mark Carney deklaroi se ai dhe presidenti amerikan, Donald Trump, ranë dakord të intensifikojnë negociatat tregtare, pas një bisede telefonike të zhvilluar sot, sipas “Reuters”.

Carney tha se objektivi kryesor është arritja e një marrëveshjeje gjithëpërfshirëse, por paralajmëroi se Kanadaja do të shqyrtojë të gjitha opsionet nëse SHBA-ja zbaton tarifat e reja, të paralajmëruara nga Trump.

Një ditë më parë, Trump njoftoi vendosjen e tarifave prej 50% për një gamë të gjerë importesh nga Kanadaja, duke akuzuar Otavën për trajtim diskriminues ndaj automjeteve, pijeve alkoolike dhe produkteve të bulmetit amerikane.

Carney theksoi se ndalimi i shitjes së pijeve alkoolike amerikane, në shumicën e provincave kanadeze, do të hiqet vetëm në kuadër të një marrëveshjeje më të gjerë tregtare me SHBA-në.

Ndërkohë, kryeministrat e provincave kanadeze dënuan tarifat e reja.

Kryeministri i Ontarios, Doug Ford, kërkoi që Kanadaja t’u përgjigjet SHBA-së “dollar për dollar”, ndërsa drejtues të tjerë paralajmëruan se masat do të dëmtojnë punonjësit dhe ekonominë e të dy vendeve.

Tarifat e reja amerikane pritet të hyjnë në fuqi pas 30 ditësh dhe do të prekin mallra si produktet e bulmetit, mobiliet, veshjet, pajisjet sportive dhe një sërë produktesh të tjera kanadeze. //a.i/

The post OTAVË – Carney: Kanadaja paralajmëron kundërpërgjigje ndaj tarifave të Trump appeared first on Agjencia Telegrafike Shqiptare.

UASHINGTON, 21 korrik /ATSH/- Presidenti i SHBA-së, Donald Trump deklaroi sot se Shtetet e Bashkuara të Amerikës do të godasin “shumë shpejt” zonën pranë Malit të Kazmës, një kompleks i fortifikuar nëntokësor pranë një prej objekteve kryesore të pasurimit të uraniumit në Iran, sipas AP.

Duke folur para gazetarëve në Zyrën Ovale të Shtëpisë së Bardhë, Trump tha se operacioni do të synojë këtë zonë, si pjesë e përpjekjeve për të penguar Iranin të sigurojë armë bërthamore.

“Do ta godasim atë zonë shumë shpejt dhe me forcë të madhe”, u shpreh presidenti amerikan.

Deklarata e Trump erdhi pasi u pyet nëse beson se Irani ka zhvendosur centrifugat bërthamore në këtë kompleks nëntokësor.

Ai tha se një veprim i tillë “nuk do të thotë asgjë”, nëse Teherani nuk disponon uranium për ta pasuruar.

“Ne ndjekim materialin. Aty është thelbi i çështjes”, deklaroi Trump, duke nënkuptuar se fokusi i SHBA-së mbetet monitorimi i materialeve bërthamore dhe jo vetëm i infrastrukturës së pasurimit.

Deklarata e presidentit amerikan vjen në një kohë tensionesh të larta mes Uashingtonit dhe Teheranit, ndërsa administrata amerikane vijon të theksojë se nuk do të lejojë Iranin të ndërtojë armë bërthamore. //a.i/

The post UASHINGTON – Trump: SHBA-ja do të godasë “shumë shpejt” zonën pranë Malit të Kazmës appeared first on Agjencia Telegrafike Shqiptare.

UASHINGTON, 21 korrik /ATSH/- Presidenti i SHBA-së, Donald Trump, deklaroi sot se Shtetet e Bashkuara të Amerikës do të ndërmarrin veprime nëse rebelët Houthi, të mbështetur nga Irani, vendosin një bllokadë në Detin e Kuq, sipas AP.

Duke iu përgjigjur pyetjeve të gazetarëve në Zyrën Ovale të Shtëpisë së Bardhë, Trump la të kuptohej se situata nuk përbën aktualisht një shqetësim të menjëhershëm.

“Deri më tani, kjo nuk ka ndodhur. Mendoj se nëse ndodh diçka e tillë, ne thjesht do të kujdesemi për situatën”, tha ai.

Agjencia e lajmeve SABA, e drejtuar nga Hourhi, raportoi se gjashtë anije u detyruan të ndryshonin itinerarin sot, pasi morën paralajmërime nga rebelët.

Kjo ndodhi një ditë pasi rebelët Houthi shpallën një embargo detare ndaj Arabisë Saudite.

“Kohët e fundit, nuk kemi pasur asnjë problem me rebelët Houthi dhe as ata nuk kanë pasur probleme me ne, për një periudhë të gjatë, përfshirë edhe gjatë këtij konflikti”, tha Trump. //a.i/

The post UASHINGTON – Trump: SHBA-ja do të “veprojë” nëse rebelët Houthi vendosin bllokadë në Detin e Kuq appeared first on Agjencia Telegrafike Shqiptare.

UASHINGTON, 21 korrik /ATSH/-  Presidenti amerikan, Donald Trump deklaroi sot se Shtetet e Bashkuara të Amerikës nuk janë të interesuara për zhvillimin e bisedimeve me Iranin në këtë fazë, duke thënë se Teherani duhet të tregojë gatishmëri për një dialog “kuptimplotë”, sipas AP.

“Ata duan me dëshpërim të takohen. Por derisa të jenë gati për një takim serioz, ne nuk kemi interes të takohemi”, tha Trump para gazetarëve në Zyrën Ovale të Shtëpisë së Bardhë.

Sipas tij, zyrtarët iranianë kanë shprehur përmes kanaleve diplomatike, dëshirën për të zhvilluar bisedime për t’i dhënë fund konfliktit, pasi Irani po përballet me goditje të rënda.

Deklarata e Trump vjen në një kohë kur marrëveshja e përkohshme mes SHBA-së dhe Iranit për ndalimin e luftimeve është drejt dështimit, ndërsa dy vendet kanë vijuar shkëmbimin e sulmeve për 10 ditë radhazi.

Gjatë përshkallëzimit të fundit, Irani sulmoi një anije-cisternë në Ngushticën e Hormuzit, duke detyruar ekuipazhin të braktiste anijen, ndërsa ushtria amerikane kreu sulme ajrore ndaj objektivave në Iran.

Ndërkohë, ministri i Brendshëm iranian, Eskandar Momeni, është takuar me ndërmjetësues në Pakistan, në përpjekje për të shpëtuar marrëveshjen e përkohshme mes Uashingtonit dhe Teheranit.

Megjithatë, ende nuk është e qartë nëse mund të arrihet një pakt i ri për ndalimin e luftimeve.

Në të njëjtën ditë, Trump priti në Shtëpinë e Bardhë presidentin e Libanit, Joseph Aoun, në një takim që zhvillohet në një kohë kur Libani dhe Izraeli po zhvillojnë bisedime të drejtpërdrejta me ndërmjetësimin e SHBA-së, me synim uljen e tensioneve pas disa muajsh përleshjesh mes Izraelit dhe Hezbollahut, grupit të mbështetur nga Irani.

Konflikti ka sjellë edhe viktima amerikane. Ushtria amerikane njoftoi se një ushtar amerikan, rreshteri Michael Emmanuel Swinton, 30 vjeç, nga Karolina e Veriut, humbi jetën gjatë çmontimit të një droni në Irak.

Një ditë më parë u konfirmua vdekja e dy ushtarëve të tjerë amerikanë në Jordani, gjatë mbrojtjes ndaj sulmeve iraniane me raketa balistike dhe dronë.

Sipas të dhënave të ushtrisë amerikane, 17 ushtarë amerikanë kanë humbur jetën që nga fillimi i luftës.

Trump paralajmëroi se çdo sulm i ri iranian ndaj forcave amerikane do të pasohet nga kundërpërgjigje e shumëfishtë.

Ndërkohë, Senati amerikan pritet të shqyrtojë kërkesën e administratës Trump për një paketë shtesë financimi prej 87,6 miliardë dollarësh, kryesisht për të mbuluar kostot e luftës.

Në seancë pritet të dëshmojnë sekretari i Mbrojtjes, Pete Hegseth dhe kreu i Shtabit të Përbashkët të Ushtrisë, gjenerali John Caine.

Përplasja mes SHBA-së dhe Iranit vijon të mbetet e hapur, ndërsa përpjekjet diplomatike për një marrëveshje të re, ende nuk kanë sjellë rezultat konkret. //a.i/

The post UASHINGTON – Trump: SHBA-ja nuk ka interes për negociata me Iranin për momentin appeared first on Agjencia Telegrafike Shqiptare.

BUDAPEST, 21 korrik /ATSH/- Prokuroria dhe hetuesit e autoritetit tatimor në Hungari kanë bastisur sot zyrat ku ndodhen serverët e të dhënave të përdorura nga partia “Fidesz” e ish-kryeministrit Viktor Orban, në kuadër të një hetimi për dyshime për përvetësim fondesh dhe vepra të tjera penale, sipas AP.

Zëdhënësja e prokurorisë së qarkut Bács-Kiskun, Marianna Bodó, tha se operacioni lidhet me një hetim mbi dyshimin për keqpërdorimin e fondeve të dhëna, përmes Fondit Kombëtar të Kulturës të Hungarisë gjatë kohës kur qeveria drejtohej nga Orban.

Sipas autoriteteve, gjashtë zyrtarë aktualë dhe ish-zyrtarë janë akuzuar për keqpërdorimin e rreth 17 miliardë forintëve hungarezë (rreth 53,5 milionë dollarë). Ata i kanë mohuar akuzat.

Hetuesit dyshojnë se fondet janë shpërndarë në mënyrë jo transparente për artistë dhe figura të lidhura me partinë “Fidesz”.

Disa prej përfituesve thuhet se kanë marrë pjesë edhe në fushata elektorale në mbështetje të kësaj force politike.

Autoriteti Kombëtar i Tatimeve dhe Doganave ka asistuar në operacionin e kontrollit, ndërsa prokuroria nuk dha detaje të tjera, duke thënë se informacioni i mëtejshëm mund të dëmtojë hetimin.

Partia “Fidesz” e ka dënuar bastisjen, duke akuzuar qeverinë e re të kryeministrit pro-evropian, Péter Magyar dhe partinë e tij “Tisza” se po përdorin sistemin e drejtësisë për ta shkatërruar politikisht.

Në një reagim në rrjetet sociale, partia “Fidesz” tha se hetuesit kanë vepruar “pa njoftim paraprak” dhe se synimi ishte marrja e kontrollit mbi sistemin e komunikimit dhe bazat e të dhënave të partisë.

Sipas saj, një veprim i tillë nuk kishte ndodhur në Hungari që prej përfundimit të komunizmit në vitin 1990.

Viktor Orban dhe “Fidesz” qeverisën Hungarinë për 16 vite, deri në humbjen e thellë në zgjedhjet e prillit.

Gjatë periudhës së tyre në pushtet, ata janë përballur vazhdimisht, me akuza për korrupsion, dobësim të institucioneve demokratike dhe ndërhyrje në sistemin e drejtësisë.

Pas marrjes së pushtetit në maj, kryeministri Péter Magyar ka nisur një seri ndryshimesh institucionale, duke larguar disa zyrtarë të emëruar gjatë qeverisjes së Orban.

Ai e ka përshkruar sistemin e mëparshëm si një “strukturë mafioze”, ndërsa kundërshtarët e tij e akuzojnë për hakmarrje politike.

Përplasja mes qeverisë së re dhe kampit të Orban pritet të vazhdojë, ndërsa hetimi për fondet publike dhe rolin e figurave të lidhura me partinë “Fidesz” mbetet në zhvillim. //a.i/

The post HUNGARI – Bastiset selia e të dhënave të partisë së Orban, nis hetimi për përvetësim fondesh appeared first on Agjencia Telegrafike Shqiptare.

LONDËR, 21 korrik /ATSH/- Pas disa ditësh përplasjeje me Shtetet e Bashkuara të Amerikës për kontrollin e Ngushticës së Hormuzit, një nga rrugët më të rëndësishme të transportit të naftës në botë, udhëheqja iraniane përballet me një dilemë të madhe, shkruan BBC.

Teherani ka disa mundësi, por asnjëra nuk i garanton një rezultat të favorshëm.

Opsioni i parë: Arritja e një marrëveshjeje me SHBA-në. Irani mund të pranojë kërkesat amerikane për garantimin e lëvizjes së lirë të anijeve tregtare në Hormuz, të kufizojë rezervat e uraniumit të pasuruar dhe të lejojë kontrolle më të rrepta ndërkombëtare mbi programin bërthamor.

Në këmbim, Teherani do të kërkonte lehtësimin e sanksioneve, ndalimin e presionit ushtarak amerikan dhe garanci kundër sulmeve të reja.

Kjo do të ishte zgjidhja më pak e kushtueshme për ekonominë iraniane, por politikisht do të ishte shumë e vështirë.

Në Iran, veçanërisht mes rrymave konservatore, një marrëveshje e tillë mund të shihej si dorëzim përballë presionit amerikan.

Opsioni i dytë: Përshkallëzim i luftës.
Teherani mund të zgjedhë rritjen e sulmeve ndaj bazave amerikane në rajon, anijeve tregtare dhe infrastrukturës energjetike në vendet e Gjirit Persik.

Qëllimi do të ishte rritja e kostove ekonomike për SHBA-në dhe aleatët e saj, përmes rritjes së çmimeve të energjisë dhe destabilizimit të tregjeve globale.

Por, kjo rrugë mbart rrezikun më të madh, pasi një sulm me viktima të shumta ose dëmtime serioze ndaj vendeve të Gjirit, mund të sjellë një përfshirje më të gjerë të shteteve të tjera dhe një konflikt rajonal.

Opsioni i tretë: Ruajtja e tensioneve aktuale.
Irani mund të vazhdojë të ushtrojë presion mbi trafikun detar dhe tregjet e energjisë, por pa kaluar në një luftë të plotë me SHBA-në.

Kjo qasje lidhet me strategjinë tradicionale të Teheranit, të rezistojë dhe të presë që kundërshtari të lodhet nga konflikti.

Për udhëheqjen iraniane, edhe mbijetesa përballë një fuqie më të madhe mund të paraqitet si një fitore.

Megjithatë, kjo strategji ka edhe rreziqe. Sanksionet, dëmet nga lufta dhe kriza ekonomike po rrisin presionin brenda vendit.

Për më tepër, nëse Hormuzi mbetet i pasigurt për një kohë të gjatë, vendet e tjera mund të kërkojnë rrugë alternative për transportin e energjisë, duke ulur ndikimin strategjik të Iranit.

Përplasjet brenda udhëheqjes iraniane

Një tjetër problem është mungesa e qartësisë se kush ka kontrollin përfundimtar mbi vendimet strategjike të Iranit.

Presidenti Masoud Pezeshkian dhe diplomatët e tij, mund të favorizojnë një marrëveshje për të ulur presionin ekonomik dhe për të rikthyer stabilitetin.

Ndërsa forcat konservatore, institucionet e fuqishme jo të zgjedhura dhe Garda Revolucionare mund të kundërshtojnë çdo lëshim, duke e parë atë si një dobësim të regjimit.

Garda Revolucionare ka një rol kyç në programin raketor të Iranit, aleancat rajonale dhe strategjinë për Ngushticën e Hormuzit.

Megjithatë, ende nuk është e qartë se sa ndikim kanë komandantët ushtarakë në vendimet për përshkallëzim apo negociata.

Populli iranian përballet me pasojat

Ndërsa udhëheqësit iranianë flasin për “rezistencë”, shumë qytetarë po përballen me vështirësi të mëdha ekonomike.

Disa raportojnë rritje të çmimeve, ndërprerje të energjisë dhe ujit, humbje vendesh pune dhe pasiguri për të ardhmen.

Për shumë iranianë, vazhdimi i konfliktit sjell frikë për shkatërrimin e mëtejshëm të ekonomisë dhe infrastrukturës.

Përballja mes Iranit dhe SHBA-së mund të vazhdojë për shumë muaj, përmes sulmeve, ndërmjetësimeve dhe armëpushimeve të përkohshme.

Pyetja kryesore mbetet nëse Teherani mund ta përdorë Ngushticën e Hormuzit si mjet presioni, pa shkaktuar një luftë të gjerë ose pa humbur gradualisht rëndësinë e saj strategjike. //a.i/

The post ANALIZË – Pse Irani po rrezikon kaq shumë për Ngushticën strategjike të Hormuzit? appeared first on Agjencia Telegrafike Shqiptare.

TIRANË, 21 korrik /ATSH/- Kryeqyteti i Shqipërisë renditet ndër destinacionet urbane më ekonomike në Evropë. Por çfarë ofron Tirana për vizitorët?, shkruan media britanike “Daily Mail”.

Kur një arkeolog në portin shqiptar të Durrësit vuri re se një pemë fiku ishte rrëzuar në një gropë pranë mureve të qytetit, ai nuk e kishte kuptuar fillimisht se çfarë zbulimi të rëndësishëm kishte bërë.

Gjatë gërmimeve të mëtejshme, ai zbuloi disa gurë të lashtë, të cilët rezultuan të ishin pjesë e një prej monumenteve më të rëndësishme të trashëgimisë romake në Shqipëri: një amfiteatri madhështor me kapacitet rreth 20 mijë spektatorë, i ndërtuar rreth vitit 100 pas Krishtit.

Ishte viti 1966 dhe, pas një nisme të gjerë arkeologjike, Durrësi zbuloi një arenë të lashtë rreth 20 metra të lartë, duke i shtuar qytetit një tjetër dëshmi të rëndësisë së tij historike.

Tirana, kryeqyteti i Shqipërisë, dhe Durrësi, qyteti port rreth 40 kilometra në perëndim të saj, janë vende ku historia, kultura dhe zbulimet e papritura ndërthuren vazhdimisht.

Por ato kanë edhe një tjetër të përbashkët: ofrojnë një raport të jashtëzakonshëm mes cilësisë dhe kostos.

Tirana është renditur së fundmi, si qyteti i tretë më i lirë në Evropë, sipas Barometrit të Kostove të Qyteteve të kompanisë britanike të shërbimeve postare dhe financiare “Post Office”, për vitin 2026.

Vizita në amfiteatrin e Durrësit kushton vetëm 2,30 paund.

Një biletë për një shfaqje në Teatrin e Operas në Tiranë rreth 3,50 paund.

Hyrja në muzetë kryesorë rreth 6 paund.

Ndërsa një vakt me tre pjata dhe verë, në një restorant të nivelit të lartë me kuzhinë tradicionale shqiptare kushton rreth 25 paund.

Edhe akomodimi mbetet me çmime të përballueshme: një dhomë dyshe në një hotel cilësor në Tiranë, kushton rreth 65 paund, ndërsa fluturimet vajtje-ardhje mund të gjenden edhe për rreth 30 paund.

Për këtë arsye, shumë ekspertë e konsiderojnë Tiranën një nga destinacionet më të leverdishme për një pushim urban në Evropë.

Analistët e kompanisë së kartave të kreditit “Zable” e kanë vlerësuar gjithashtu Tiranën për raportin e lartë mes përvojës së ofruar dhe kostos, duke e renditur përpara qyteteve si Plovdivi në Bullgari dhe Talini në Estoni në një studim mbi destinacionet që ofrojnë “më shumë vlerë për paratë e shpenzuara”.

Një fundjavë në Tiranë dhe Durrës është një mënyrë ideale, për të njohur këtë vend ende relativisht pak të eksploruar nga turistët ndërkombëtarë.

Durrësi, qyteti i dytë më i madh i Shqipërisë, është një zgjedhje e shkëlqyer për një udhëtim njëditor.

Një biletë autobusi vajtje-ardhje kushton vetëm 2,70 paund.

Shëtitorja pranë marinës dhe amfiteatrit ofron një atmosferë të këndshme, me ajrin e freskët që vjen nga deti Adriatik.

Përgjatë bregdetit ndodhet një park i zbukuruar me statuja gladiatorësh, peshkatarësh të lashtë, por edhe figura të artistëve të famshëm ndërkombëtarë si John Lennon, Tina Turner, Bob Dylan dhe Mick Jagger.

Këto vepra janë një element veçantë i qytetit.

Jagger është paraqitur në lëvizje, Lennon duke luajtur kitarën, Dylan me një pamje të menduar, ndërsa Tina Turner në një pozë energjike skenike.

Statujat u vendosën si simbol i hapjes kulturore pas rënies së komunizmit, një periudhë që përfundoi vetëm rreth 35 vite më parë, me shembjen e regjimit të izoluar të udhëhequr nga Enver Hoxha.

Vizita vazhdon me Kullën Veneciane, ku një picë kushton rreth 4,50 paund dhe një birrë Korça rreth 2,70 paund.

Një përvojë që ndërthur çmimet e përballueshme, me qetësinë larg turmave masive turistike të destinacioneve të tjera mesdhetare.

Në Tiranë, një ndalesë e rëndësishme është Shtëpia me Gjethe, ish-qendra e hetimeve e përdorur nga Sigurimi, policia sekrete e regjimit komunist.

Aty dokumentohen historitë e mijëra viktimave, përndjekjet politike, përgjimet masive dhe kontrolli i rreptë mbi jetën private të qytetarëve.

Gjatë regjimit të tij, Enver Hoxha ndërtoi rreth 175 mijë bunkerë, të projektuar për t’u përdorur në rast lufte apo sulmi bërthamor.

Një prej tyre ndodhet pranë Sheshit Skënderbej dhe sot njihet si Bunk’Art 2.

Brenda këtij kompleksi, dhomat e izoluara dhe ekspozitat tregojnë historinë e represionit komunist, ndërsa elementët e artit modern, krijojnë një kontrast me atmosferën e rëndë të së kaluarës.

Një tjetër objekt i rëndësishëm është Bunk’Art 1, një strehim shumë më i madh që ishte projektuar si seli e udhëheqjes komuniste, në rast të një sulmi bërthamor.

Vizitorët mund të shohin edhe ambientet personale të Hoxhës, përfshirë dhomën e gjumit dhe zyrën e tij me panele druri, ku ruhet edhe një fotografi e Josif Stalinit.

Pranë këtij kompleksi ndodhet teleferiku që të çon në malin e Dajtit, rreth 900 metra mbi nivelin e detit.

Nga aty ofrohet një nga pamjet më të bukura panoramike të Tiranës, e rrethuar nga vargmale mbresëlënëse.

Ajo që e bën Tiranën të veçantë është atmosfera e saj sociale: një qytet i gjallë, i hapur dhe i çlirët, ku ende ndihet kontrasti mes energjisë së sotme dhe së kaluarës së vështirë komuniste.

Edhe gastronomia është një nga pikat e forta të kryeqytetit.

Në zonën Blloku, dikur lagjja e rezervuar për elitën komuniste, vizitorët mund të shijojnë gatime tradicionale dhe verë shqiptare.

Banorët e Tiranës flasin me dashuri për qytetin e tyre.

Dhe vizitorët shpesh arrijnë në të njëjtin përfundim: Tirana është një qytet plot energji, surpriza dhe kontraste. //a.i/

The post “Daily Mail”: Tirana në sytë e turistëve: Një nga qytetet më ekonomike dhe më interesante të Evropës appeared first on Agjencia Telegrafike Shqiptare.

UASHINGTON, 20 korrik /ATSH/- Kreu i Qendrës amerikane për Standardet dhe Inovacionin në Inteligjencën Artificiale, Chris Fall, ka dhënë dorëheqjen vetëm tre muaj pasi u emërua në krye të institutit federal, që merret me testimin e inteligjencës artificiale pranë Departamentit amerikan të Tregtisë, njoftoi sot një zëdhënës i departamentit, sipas “Reuters”.

Largimi i tij shënon ndryshimin më të fundit, në planet e administratës Trump për menaxhimin dhe mbikëqyrjen e zhvillimit të inteligjencës artificiale.

Përkohësisht, detyrën e Fall do ta marrë Arvind Raman, i cili drejton zyrën e Departamentit të Tregtisë, që mbikëqyr institutin e testimit të inteligjencës artificiale.

Raman ka qenë më herët, dekan i inxhinierisë në Universitetin Purdue.

Departamenti i Tregtisë nuk dha një arsye për largimin e Fall.

Largimi i Fall është ndryshimi i fundit në qasjen e administratës Trump ndaj inteligjencës artificiale.

Pas rikthimit në detyrë në vitin 2025, Trump deklaroi se qeveria federale duhet të ndërhynte sa më pak, në sektorin e teknologjisë.

Megjithatë, më vonë ai ka marrë një rol më aktiv në monitorimin e kësaj fushe, ndërsa deklaratat dhe politikat e tij për inteligjencën artificiale kanë ndryshuar shpesh.

Instituti amerikan për testimin e inteligjencës artificiale, ka për detyrë të bashkëpunojë me kompanitë kryesore të teknologjisë, si Anthropic, Google DeepMind dhe OpenAI, për të kontrolluar modelet e reja të inteligjencës artificiale, përpara se ato të dalin në përdorim publik dhe për të zbuluar dobësitë e mundshme të tyre.

Instituti përbëhet nga shkencëtarë dhe inxhinierë, që analizojnë rreziqet konkrete që mund të sjellin sistemet e avancuara të inteligjencës artificiale.

Një nga shqetësimet kryesore është parandalimi, që kundërshtarët e SHBA-së të përdorin IA-në për ndërtimin e armëve kimike apo biologjike, ose për manipulimin e të dhënave – me të cilat trajnohen sistemet amerikane të inteligjencës artificiale.

Instituti bashkëpunon gjithashtu me Microsoft dhe kompaninë e Elon Musk, xAI, për testimin e modeleve të tyre të inteligjencës artificiale. //a.i/

The post SHBA – Dorëhiqet kreu i agjencisë amerikane për sigurinë e IA-së appeared first on Agjencia Telegrafike Shqiptare.

KIEV, 20 korrik /ATSH/- Ukraina ka lëshuar më shumë se 400 dronë drejt Moskës, në sulmin e saj të fundit të madh ndaj kryeqytetit rus, njoftoi sot kryebashkiaku i Moskës, sipas AP.

Sulmi masiv erdhi vetëm disa orë, pasi Rusia bombardoi Kievin dhe qytetet e tjera ukrainase me raketa balistike.

Kjo valë sulmesh të ndërsjella, ka thelluar ciklin e përplasjeve mes dy vendeve dhe e ka bërë edhe më të largët mundësinë e një marrëveshjeje, për t’i dhënë fund pushtimit të gjithanshëm rus në Ukrainë, që ka zgjatur më shumë se katër vjet.

Ndërkohë, presidenti ukrainas Volodymyr Zelensky tha se do të zhvillojë sot “bisedime të rëndësishme”, ndërsa përpiqet të zbusë krizën e brendshme politike.

Kjo krizë shpërtheu pas riorganizimit të qeverisë javën e kaluar, i cili nxori në pah një mosmarrëveshje të thellë, mes figurave të vjetra të ushtrisë dhe reformatorëve të rinj mbi mënyrën se si duhet të zhvillohet lufta.

Zelensky duhet të bindë ukrainasit se largimi i 35-vjeçarit Mykhailo Fedorov nga posti i ministrit të Mbrojtjes dhe vazhdimi i mbështetjes për gjeneralin 60-vjeçar Oleksandr Syrskyi, i trajnuar në kohën sovjetike dhe që drejton forcat e armatosura, nuk do të dëmtojë përpjekjet e Ukrainës kundër Rusisë.

Pas vendimit të Zelensky, në ditët e fundit janë zhvilluar protesta në rrugë, në mbështetje të Fedorov dhe kundër Syrskyi.

Ukraina godet një tjetër depo nafte ruse

Kryebashkiaku i Moskës, Sergei Sobyanin, tha se më shumë se 400 dronë ukrainas u nisën drejt kryeqytetit rus nga mbrëmja e djeshme deri sot në mëngjes.

Sipas tij, shumica e tyre u rrëzuan larg qytetit, ndërsa 85 u interceptuan pranë Moskës.

Guvernatori i rajonit të Moskës, Andrei Vorobyov, deklaroi se 10 persona u plagosën nga sulmet me dronë, ndërsa u dëmtuan disa ndërtesa banimi dhe objekte të infrastrukturës civile.

Sulmi shkaktoi një zjarr në parkun industrial “Yuzhnye Vrata”, rreth 30 kilometra në jug të Moskës, sipas Yevgeniya Khrustaleva, drejtuese e zonës Domodedovo në rajonin e Moskës.

Media ruse “Astra” raportoi gjithashtu se sulmi shkaktoi zjarr në një depo nafte në Podolsk, rreth 20 kilometra në jug të Moskës, por ky informacion nuk është konfirmuar zyrtarisht. //a.i/

The post FOKUS – Ukraina lëshon 400 dronë drejt Moskës, ndërsa Zelensky përballet me protesta appeared first on Agjencia Telegrafike Shqiptare.

YAWATA, 20 korrik /ATSH/- Kryebashkiakja e qytetit Yawata në Japoninë perëndimore u bë sot gruaja e parë që drejton një bashki në vend, dhe merr zyrtarisht leje lindjeje, një vendim që ka sjellë si mbështetje ashtu edhe kritika, sipas “Reuters”.

Shoko Kawata, 35 vjeçe, e zgjedhur në vitin 2023 si kryebashkiakja më e re në historinë e qytetit, tha se kishte planifikuar të bëhej nënë, por zbuloi se për kryetarët e bashkive nuk ekzistonte asnjë rregull për lejen e lindjes.

Ndërsa punonjësit e bashkisë kanë të drejtë për 16 javë leje lindjeje, për postin e kryebashkiakut nuk kishte një procedurë të tillë.

Për këtë arsye, Kawata u detyrua të krijonte një rregull të ri për pozicionin e saj.

“U habita kur mësova se jam kryebashkiakja e parë që merr leje lindjeje. Kjo tregon se deri tani nuk ka pasur shumë gra të reja apo gra në përgjithësi në poste të tilla drejtuese”, tha ajo.

Para se të largohej me leje, Kawata mori pjesë në një festival tradicional japonez, por për shkak të shtatzënisë së avancuar nuk hipi mbi faltoren portative të festivalit, siç kërkon tradita, por e ndoqi atë duke ecur pas saj.

Vendimi i saj, ka hapur debat në Japoni për barazinë gjinore dhe rolin e grave në politikë.

Vendi renditet ndër më të dobëtit mes vendeve të zhvilluara, për përfaqësimin politik të grave.

Kawata tha se Japonia ka nevojë për reforma të mëtejshme, sidomos përballë rënies së numrit të lindjeve dhe plakjes së popullsisë.

Sipas saj, shoqëria duhet të krijojë kushte që njerëzit, edhe ata në poste drejtuese, të mos kenë frikë të bëhen prindër.

Shumica e banorëve të Yawata, e mbështetën vendimin e saj, por disa të tjerë kritikuan faktin që ajo do të vazhdojë të marrë pagën e plotë gjatë lejes së lindjes.

Kawata tha se u zhgënjye nga disa komente negative në internet, ku disa persona e akuzuan se po e përdorte postin, vetëm për të marrë leje lindjeje. Foshnja e saj pritet të lindë në shtator. //a.i/

The post JAPONI – Kryebashkiakja hyn në histori, bëhet gruaja e parë në detyrë që merr leje lindjeje appeared first on Agjencia Telegrafike Shqiptare.

PARIS, 20 korrik /ATSH/- Ligjvënësit francezë arritën sot një kompromis, që mund t’i hapë rrugën hyrjes në fuqi, që në fillim të vitit të ri shkollor në shtator, të një ligji që ndalon përdorimin e rrjeteve sociale nga fëmijët nën moshën 15 vjeç, sipas AP.

Për shkak se Parlamenti do të ndërpresë punimet për pushimet verore, ligji duhet të miratohet sa më shpejt

Pasi Komisioni Evropian vlerësoi se versioni i fundit i projektligjit, nuk ishte plotësisht në përputhje me legjislacionin e Bashkimit Evropian, deputetët e Asamblesë Kombëtare dhe senatorët zhvilluan sot bisedime përfundimtare dhe arritën një marrëveshje për një version të ndryshuar të projektligjit.

Ai do t’i nënshtrohet nesër votimit përfundimtar në të dy dhomat e Parlamentit.

Presidenti francez, Emmanuel Macron, e ka mbështetur fuqishëm këtë nismë, e cila mund të jetë një nga masat e fundit të rëndësishme të miratuara gjatë mandatit të tij, përpara ai se të largohet nga posti vitin e ardhshëm.

Projektligji parashikon gjithashtu ndalimin e përdorimit të telefonave celularë në shkollat e mesme.

Pika kryesore e mosmarrëveshjes kishte të bënte me platformat që do të përfshiheshin në ndalim.

Asambleja Kombëtare votoi ndalimin e të gjitha rrjeteve sociale online, ndërsa Senati propozoi hartimin e një liste të veçantë platformash, që do t’i nënshtrohen këtij kufizimi.

Projektligji u hartua në përputhje me Aktin e Shërbimeve Digjitale, ligjin e BE-së që vendos rregulla të rrepta, për të garantuar sigurinë e përdoruesve në internet.

Megjithatë, edhe pse mbështeti synimin për mbrojtjen më të mirë të të miturve, Komisioni Evropian vlerësoi se disa dispozita të projektligjit, mbivendoseshin me rregulloren evropiane dhe kërkoi ndryshimin e tij.

Në fund, ligjvënësit ranë dakord për një ndalim të përgjithshëm, në përputhje me versionin e miratuar fillimisht, nga Asambleja Kombëtare, ndërsa përgjegjësia për të siguruar që platformat të zbatojnë kufirin e moshës, do t’i takojë autoriteteve të Bashkimit Evropian.

Ndalimi nuk do të zbatohet për enciklopeditë online, platformat arsimore ose shkencore, si edhe për platformat që përdoren për zhvillimin dhe shpërndarjen e programeve me kod të hapur (open-source). //a.i/

The post Franca miraton ligjin për ndalimin e rrjeteve sociale për fëmijët nën 15 vjeç appeared first on Agjencia Telegrafike Shqiptare.

GAZA, 20 korrik, /ATSH/- Lëvizja palestineze Hamas ka emëruar Khalil Al-Hayya si udhëheqësin e ri të përgjithshëm të organizatës. Lajmi u bë i ditur përmes një deklarate zyrtare të Hamasit, raportoi “Reuters”.

Al-Hayya zëvendëson Yahya Sinwar, i cili u vra në tetor të vitit 2024, gjatë luftimeve me forcat izraelite në Rripin e Gazës.

Al-Hayya, ish-shefi i Hamasit në Gaza dhe negociatori kryesor i grupit, është bërë një nga figurat më të rëndësishme të organizatës, pas vrasjes së Sinwarit dhe të ish-udhëheqësit Ismail Haniyeh, i cili u vra në Iran në korrik 2024.

Sipas analistëve, Al-Hayya konsiderohet më i ashpër se rivali i tij Khaled Meshaal dhe emërimi i tij, mund të sinjalizojë një qëndrim edhe më të fortë të Hamasit kundër kërkesave ndërkombëtare për çarmatimin e grupit.

Situata në Gaza

Hamasi po përballet me një nga periudhat më të vështira që nga themelimi i tij në vitin 1987.

Edhe pse armëpushimi i ndërmjetësuar nga SHBA-ja në tetor, ka ulur intensitetin e luftimeve, Izraeli vazhdon të kontrollojë mbi 60% të Rripit të Gazës, ndërsa sulmet vazhdojnë dhe kushtet humanitare për rreth 2 milionë banorët mbeten shumë të rënda.

Një sulm izraelit në Khan Younis, vrau të paktën tre palestinezë. Ushtria izraelite deklaroi se kishte goditur një militant të Hamasit në zonë.

Sipas autoriteteve shëndetësore në Gaza, më shumë se 1150 palestinezë, kryesisht civilë, janë vrarë nga sulmet izraelite që prej armëpushimit të tetorit, ndërsa katër ushtarë izraelitë janë vrarë gjatë së njëjtës periudhë.

Çfarë sinjalizon emërimi?

Sipas analistes palestineze Reham Owda, zgjedhja e Al-Hayyas tregon se Hamasi mbetet i përkushtuar ndaj luftës së armatosur, refuzon çarmatimin në çdo rrethanë dhe synon të rindërtojë kapacitetet e tij ushtarake, duke ruajtur aleancën me Iranin dhe të ashtuquajturin “Boshti i Rezistencës”.

Kjo, sipas saj, do t’i bëjë edhe më të vështira negociatat për çarmatimin e Hamasit.

Plani i armëpushimit i propozuar nga presidenti amerikan, Donald Trump parashikon çarmatimin e Hamasit, tërheqjen graduale të ushtrisë izraelite dhe administrimin e Gazës nga një qeveri teknokrate palestineze.

Megjithatë, bisedimet mes Hamasit, Izraelit dhe ndërmjetësve deri tani, nuk kanë arritur një marrëveshje gjithëpërfshirëse për përfundimin e konfliktit. //a.i/

The post GAZA – Hamasi emëron Khalil Al-Hayya si udhëheqësin e ri të përgjithshëm appeared first on Agjencia Telegrafike Shqiptare.

DUBAI, 20 korrik /ATSH/- Ndërmjetësit ndërkombëtarë i kanë paraqitur Iranit një propozim për uljen e tensioneve me Shtetet e Bashkuara të Amerikës, i cili parashikon një armëpushim 10-ditor – me synimin për të krijuar hapësirë për rifillimin e negociatave – dhe rikthimin e një marrëveshjeje të përkohshme të arritur muajin e kaluar, sipas “Reuters”.

Sipas burimit, propozimi synon të ndalojë përkohësisht përshkallëzimin e konfliktit dhe t’u japë palëve mundësinë, të rikthehen në tryezën e bisedimeve për të diskutuar zbatimin e marrëveshjes së përkohshme, e cila kishte mbetur pezull për shkak të tensioneve ushtarake.

Burimi nuk dha detaje nëse Teherani e ka pranuar apo refuzuar propozimin, por tha se ndërmjetësit po vazhdojnë kontaktet intensive me të dyja palët, për të shmangur një përshkallëzim të mëtejshëm.

Marrëveshja e përkohshme, e negociuar muajin e kaluar, synonte të krijonte një bazë për rifillimin e dialogut mbi programin bërthamor iranian dhe çështje të tjera të sigurisë rajonale.

Megjithatë, përplasjet e fundit ushtarake dhe sulmet reciproke mes Iranit dhe SHBA-së e vunë atë në rrezik.

Një armëpushim 10-ditor do të shërbente si një periudhë “qetësimi”, gjatë së cilës diplomatët do të përpiqeshin të gjenin një formulë kompromisi, për të rikthyer procesin diplomatik dhe për të parandaluar zgjerimin e konfliktit në Lindjen e Mesme. //a.i/

The post FOKUS – Ndërmjetësit propozojnë armëpushim 10-ditor për të rikthyer marrëveshjen e përkohshme mes Iranit dhe SHBA-së appeared first on Agjencia Telegrafike Shqiptare.

LONDËR, 20 korrik /ATSH/- Kevin Keegan, një nga futbollistët dhe trajnerët më të mëdhenj në historinë e futbollit anglez, ka ndërruar jetë në moshën 75-vjeçare, raportoi “The Sun”.

Familja bëri të ditur se ai ishte diagnostikuar me kancer të stomakut në fazën e katërt në janar, pasi ishte shtruar në spital për probleme të vazhdueshme.

Në deklaratën e familjes thuhet se Keegan luftoi me sëmundjen deri në fund dhe ndërroi jetë pranë bashkëshortes Jean dhe dy vajzave të tyre.

Ata falënderuan ekipin mjekësor për kujdesin e treguar dhe kërkuan privatësi në këtë periudhë të vështirë.

Keegan ishte dy herë fitues i Topit të Artë (Ballon d’Or), duke mbetur i vetmi anglez që e ka fituar këtë çmim dy herë.

Ai konsiderohet një nga futbollistët më të mëdhenj të Anglisë. Me Liverpoolin fitoi:

• 3 tituj kampionë të Anglisë,
• 2 Kupa UEFA,
• 1 Kupë FA,
• 1 Kupë Evropiane

Me Newcastle United, fillimisht si lojtar dhe më pas si trajner, Keegan u shndërrua në një figurë legjendare.

Si trajner, ai e riktheu klubin mes më të mirëve në Angli dhe e udhëhoqi drejt dy vendeve të dyta radhazi në “Premier League”, duke qenë shumë pranë fitimit të titullit në sezonin 1995–1996.

Ai drejtoi edhe kombëtaren e Anglisë nga viti 1999 deri në vitin 2000, si dhe Manchester City, të cilin e riktheu në “Premier League” në vitin 2002.

Pas lajmit për vdekjen e tij, Newcastle United e cilësoi Keegan si “një nga figurat më ikonike, më me ndikim dhe më të dashura në historinë e klubit”, ndërsa Manchester City vlerësoi rolin e tij në ringritjen e skuadrës.

Ish-sulmuesi Alan Shearer, që luajti nën drejtimin e tij, shkroi: “Heroi im. Trajneri im. Miku im. Pusho në paqe, shef.”

Edhe Princi William e nderoi me një mesazh, duke e përshkruar Keegan si një futbollist dhe trajner të jashtëzakonshëm, i cili frymëzoi breza të tërë me talentin, pasionin dhe dashurinë për futbollin.

Kevin Keegan la pas bashkëshorten Jean, me të cilën ishte martuar që nga viti 1974, dhe dy vajzat e tyre, Laura Jane dhe Sarah Marie.

Ai do të kujtohet si një nga emrat më të mëdhenj në historinë e futbollit anglez. //a.i/

The post Legjenda e futbollit anglez Kevin Keegan ndahet nga jeta në moshën 75-vjeçare appeared first on Agjencia Telegrafike Shqiptare.

ODESA, 20 korrik /ATSH/- Një sulm rus me raketa ndaj një anijeje që transportonte misër pranë portit të Odesës, në jug të Ukrainës ka shkaktuar vdekjen e 10 personave, njoftuan sot autoritetet ukrainase, sipas “Reuters”.

Ky është sulmi më vdekjeprurës në javët e fundit të përplasjeve në Detin e Zi.

Anija “Golden Leo”, me flamur të Guinesë-Bisau dhe me ekuipazh nga India dhe Siria, u godit dje nga tre raketa ruse, duke shkaktuar zjarr në bord.

Sipas autoriteteve ukrainase, në operacionin e shpëtimit, që zgjati gjithë natën, u gjetën të vdekur nëntë anëtarë të ekuipazhit dhe një pilot detar ukrainas, ndërsa tetë persona u shpëtuan.

Sulmi ndodhi pranë një prej porteve më të rëndësishme të Ukrainës, ndërsa një tjetër sulm rus ndaj qytetit të Odesës, vrau tre persona dhe plagosi tre të tjerë.

Autoritetet thanë se u goditën objekte infrastrukturore, pa dhënë detaje të tjera.

Përshkallëzohet lufta për rrugët detare

Deti i Zi është kthyer sërish në një zonë të rëndësishme të konfliktit, pasi Rusia dhe Ukraina kanë rritur sulmet ndaj infrastrukturës detare dhe burimeve ekonomike të njëra-tjetrës.

Rusia po intensifikon sulmet ndaj porteve ukrainase dhe anijeve të mallrave, ndërsa Ukraina ka goditur infrastrukturën energjetike ruse, përfshirë anijet cisternë me naftë.

Të dyja vendet janë eksportues të mëdhenj të grurit dhe misrit, ndaj sulmet në këtë korridor detar, kanë rritur shqetësimet për furnizimet globale me ushqime.

Ukraina ka humbur një pjesë të madhe të kapacitetit të saj për eksportin e grurit përmes porteve të Detit të Zi, për shkak të sulmeve me raketa dhe dronë.

Ndërkohë, sulmet ukrainase kanë detyruar Rusinë të kufizojë transportin në Detin Azov, një rrugë e rëndësishme për eksportet e saj të grurit.

Sulmi ndaj “Golden Leo” shënon një tjetër goditje ndaj tregtisë detare në Detin e Zi, duke rritur frikën për ndikimin e luftës në çmimet globale të ushqimeve dhe energjisë. //a.i/

The post UKRAINË – Dhjetë të vdekur pas sulmit rus ndaj anijes së mallrave në brigjet e Odesës appeared first on Agjencia Telegrafike Shqiptare.

JEMEN, 20 korrik /ATSH/- Grupi i armatosur i Jemenit, Houthi, të mbështetur nga Irani, njoftuan sot se po vendosin një bllokadë detare ndaj Arabisë Saudite, raportoi “Reuters”.

Ky veprim hap një front të ri përballë Shteteve të Bashkuara të Amerikës, në konfliktin e tyre me Iranin dhe zgjeron rrezikun për furnizimet globale me energji dhe tregtinë ndërkombëtare, përtej rajonit të Gjirit.

Grupi “Houthi” deklaroi se masat synojnë anijet dhe interesat saudite në Detin e Kuq dhe në ujërat përreth Jemenit.

Ky zhvillim rikthen tensionet në një nga korridoret më të rëndësishme detare në botë, ku kalon një pjesë e konsiderueshme e transportit global të naftës dhe mallrave.

Lëvizja vjen në një periudhë përshkallëzimi të tensioneve mes SHBA-së dhe Iranit, ndërsa “Houthi” është bërë një nga grupet aleate kryesorë rajonalë të Teheranit.

Grupi jemenas ka kryer më herët sulme ndaj anijeve tregtare në Detin e Kuq, duke shkaktuar devijime të trafikut detar dhe rritje të kostove të transportit.

Arabia Saudite, e cila ndodhet në konflikt të gjatë me “Houthi” dhe ka mbështetur qeverinë rivale të Jemenit, mund të përballet me presion të ri ndaj eksporteve të saj energjetike dhe rrugëve tregtare.

Ekspertët paralajmërojnë se një përshkallëzim i mëtejshëm në Detin e Kuq, mund të ndikojë në tregjet globale të naftës, megjithëse ndikimi real do të varet nga kohëzgjatja dhe përmasat e bllokadës. //a.i/

The post FOKUS – Grupi rebel “Houthi” vendos bllokadë detare ndaj Arabisë Saudite, duke hapur një front të ri në luftën SHBA–Iran appeared first on Agjencia Telegrafike Shqiptare.

TIRANË, 20 korrik /ATSH/- Ajo nuk është një mace e zakonshme shtëpie. Suki, një mace e racës “bengal” nga Kanadaja, është kthyer në një nga kafshët më të njohura në rrjetet sociale falë pasionit të saj për udhëtimet, natyrën dhe aventurat në vende të ndryshme të botës, sipas medias italiane “La Stampa”.

Me pamje spektakolare pranë liqeneve me ujëra të kristalta, në pyje, male dhe peizazhe të egra, Suki ka fituar zemrat e miliona njerëzve në mbarë botën.

Fotografitë e saj duke lundruar me kanoe, duke eksploruar shtigje malore apo duke qëndruar mbi shpatullat e pronarëve të saj janë bërë virale, duke e shndërruar atë, në një simbol të asaj që sot quhet “Macja aventuriere”.

Suki jeton në Alberta të Kanadasë me pronaren e saj, fotografen e peizazheve Martina Gutfreund, dhe partnerin e saj Kenny Hildebrandt.

Fillimisht, Martina nisi të publikonte fotografitë e maces në llogarinë e saj personale, por shumë shpejt kuptoi se imazhet e Sukit tërhiqnin më shumë vëmendje se fotografitë e saj profesionale.

Për këtë arsye krijoi një profil të veçantë për të në Instagram, i cili u kthye në një fenomen global.

Sot, profili i Sukit ndiqet nga rreth 1,9 milionë njerëz dhe dokumenton udhëtimet e saj në natyrë, nga malet dhe pyjet e Kanadasë deri në destinacione të ndryshme ndërkombëtare.

Ajo ka vizituar më shumë se 13 vende, përfshirë Kanadanë, Shtetet e Bashkuara të Amerikës dhe disa shtete evropiane si Italia, Franca, Gjermania, Republika Çeke, Kroacia dhe të tjera.

Nga macja e shtëpisë te aventurierja e natyrës

Rruga e Sukit drejt famës nisi që në moshë të vogël.

Martina filloi ta mësonte gradualisht me daljet në natyrë, duke përdorur një parzmore dhe duke e shpërblyer me ushqime gjatë trajnimit.

Pas marrjes së vaksinave të nevojshme, macja nisi të eksploronte ambientet jashtë shtëpisë dhe me kalimin e kohës u përshtat me udhëtimet, ecjet dhe aktivitetet në natyrë.

Sipas pronarëve të saj, Suki nuk detyrohet të pozojë për fotografitë.

Ajo zakonisht eksploron vetë zonën përreth dhe fotografitë kapin momentet e saj natyrore.

Martina përdor fotografinë profesionale dhe shkrepjet e shpejta për të kapur pamjet më të bukura të maces së saj në mjedise spektakolare.

Megjithëse në shumë fotografi duket sikur ecën e lirë në natyrë, pronarja ka sqaruar se Suki përdor gjithmonë parzmore gjatë aventurave jashtë ambienteve të sigurta.

Në disa imazhe rripi hiqet gjatë përpunimit fotografik për një pamje më estetike, por siguria e maces mbetet prioritet.

Një ambasadore e udhëtimeve me kafshë shtëpiake

Aventurat e Sukit kanë ndihmuar në ndryshimin e perceptimit tradicional, se macet preferojnë vetëm jetën brenda shtëpisë.

Historia e saj ka treguar se, me durim dhe kujdes, disa kafshë shtëpiake mund të përshtaten edhe me një mënyrë jetese aktive.

Përveç fotografive në rrjetet sociale, aventurat e saj janë përmbledhur edhe në librin “Travels of Suki the Adventure Cat”, i cili përmban fotografi nga udhëtimet e saj dhe mesazhe frymëzuese për eksplorimin e natyrës.

Suki është bërë jo vetëm një yll i internetit, por edhe një frymëzim për mijëra pronarë kafshësh në mbarë botën, që duan të ndajnë përvoja udhëtimi me miqtë e tyre me katër putra. //a.i/

The post Suki, “macja aventuriere” që pushtoi rrjetet sociale me udhëtimet e saj spektakolare appeared first on Agjencia Telegrafike Shqiptare.