LOS ANXHELES, 4 qershor /ATSH/- Regjisori legjendar i Hollivudit, Steven Spielberg ka deklaruar se tani beson se jeta jashtëtokësore ekziston dhe se kjo bindje ka ndikuar drejtpërdrejt në realizimin e filmit të tij më të ri, “Disclosure Day”, që do të shfaqet në kinema më 11 qershor, raportoi AP.

Spielberg tha se për shumë vite, ka qenë i hapur ndaj mundësisë së ekzistencës së alienëve dhe se ata kanë vizituar Tokën, por nuk ishte i gatshëm ta pranonte pa patur prova bindëse.

Megjithatë, sipas tij, informacionet, raportet dhe dëshmitë e viteve të fundit e kanë bërë të ndryshojë mendim.

Filmi “Disclosure Day” bazohet pikërisht në idenë se, mund të ketë pasur kontakte mes njerëzimit dhe qenieve jashtëtokësore, si dhe në pretendimet se disa informacione rreth këtyre kontakteve janë mbajtur të fshehta për dekada.

Sipas Spielberg, ndryshe nga filmat e tij të mëparshëm për alienët, ky projekt është më i lidhur me debatet dhe zhvillimet reale që po ndodhin sot, duke reflektuar interesin në rritje për fenomenet ajrore të paidentifikuara (UFO) dhe mundësinë e ekzistencës së jetës përtej Tokës.

Filmi i ri, që vjen pothuajse 50 vjet pas “Close Encounters of the Third Kind”, trajton pretendimet për kontakte me alienët dhe fshehjen e tyre nga autoritetet.

Spielberg theksoi se ndryshe nga filmat e tij të mëparshëm fantastiko-shkencorë, këtë projekt e sheh më shumë si një pasqyrim të zhvillimeve dhe zbulimeve të epokës sonë.

Regjisori 79-vjeçar zbuloi se frymëzimi për filmin erdhi pas dëshmive të vitit 2023 në Kongresin amerikan mbi fenomenet ajrore të paidentifikuara (UAP), ku ish-zyrtarë të inteligjencës pretenduan se qeveria kishte fshehur programe hetimore, lidhur me këto fenomene.

Përtej temës së alienëve, Spielberg tha se mesazhi kryesor i filmit është empatia.

“Çdo film duhet të theksojë rëndësinë e empatisë, sepse ajo duket se po mungon gjithnjë e më shumë në shoqëri”, u shpreh ai.

I pyetur për të ardhmen e industrisë së filmit, Spielberg u tregua optimist, duke theksuar se publiku vazhdon të kërkojë përvojën e përbashkët të të parit të filmave në kinema, pavarësisht sfidave nga platformat streaming dhe inteligjenca artificiale.

Ndërsa i afrohet moshës 80-vjeçare, Spielberg tha se synon të vazhdojë të realizojë filma, për aq kohë sa do të gjejë histori që e frymëzojnë.

Ai zbuloi gjithashtu se projekti i tij i ardhshëm mund të jetë një film “Western”, një zhanër që ende nuk e ka eksploruar plotësisht gjatë karrierës së tij. //a.i/

The post KINEMA – Spielberg: Kam ndryshuar mendim, jeta jashtëtokësore ekziston appeared first on Agjencia Telegrafike Shqiptare.

BEJRUT, 4 qershor /ATSH/- Hezbollahu ka refuzuar marrëveshjen e fundit të armëpushimit, të ndërmjetësuar nga SHBA-ja, mes Izraelit dhe qeverisë libaneze, duke kërkuar tërheqjen e plotë të forcave izraelite nga Libani, raportoi AP.

Lideri i Hezbollahut, Naim Kassem, deklaroi se kërkesa për largimin e luftëtarëve të grupit nga jugu i Libanit do të përbënte një “dorëzim dhe humbje”, duke theksuar se rezistenca do të vazhdojë për sa kohë që ekziston pushtimi izraelit.

Ndërkohë, sulmet izraelite shkaktuan sot të paktën katër të vrarë në Liban, ndërsa një paqeruajtës serb i misionit të OKB-së (UNIFIL) humbi jetën dhe dy të tjerë u plagosën nga një predhë mortaje pranë qytetit Marjayoun.

Marrëveshja e armëpushimit parashikon që, ushtria libaneze të marrë kontrollin e zonave të sigurisë në jug të vendit, ndërsa Hezbollahu të mos jetë i pranishëm në këto territore.

Megjithatë, grupi ka deklaruar se nuk do ta respektojë marrëveshjen, pa ndalimin e sulmeve izraelite dhe nisjen e tërheqjes së trupave.

Presidenti i Libanit, Joseph Aoun e cilësoi marrëveshjen si “mundësinë e fundit” për një armëpushim të plotë dhe të qëndrueshëm.

Sipas të dhënave të fundit, Izraeli kontrollon rreth një të pestën e territorit libanez, në jug të vendit.

Konflikti ka shkaktuar mbi 3 500 viktima në Liban dhe ka zhvendosur më shumë se 1,2 milionë banorë.

Edhe Irani ka kërkuar një armëpushim të qëndrueshëm në Liban dhe tërheqjen e forcave izraelite, ndërsa tensionet rajonale vazhdojnë të ndikojnë në sigurinë dhe ekonominë globale. //a.i/

The post FOKUS – Hezbollahu refuzon armëpushimin e ri me Izraelin, luftimet vazhdojnë në Liban appeared first on Agjencia Telegrafike Shqiptare.

NJU JORK, 4 qershor /ATSH/- Çmimi i naftës regjistroi sot një rënie, pasi Izraeli dhe Libani ranë dakord të rinovojnë armëpushimin, duke ulur frikën e investitorëve për përshkallëzim të konfliktit në rajon, raportoi AP.

Një tjetër zhvillim që ndikoi në tregje ishte votimi në Dhomën e Përfaqësuesve të SHBA-së për të kufizuar veprimet ushtarake amerikane kundër Iranit, i cili u pa si një hap drejt uljes së tensioneve.

Si pasojë, çmimi i naftës “Brent” ra në 95,39 dollarë për fuçi, ndërsa nafta amerikane WTI zbriti në 93,72 dollarë për fuçi.

Investitorët besojnë se mund të rihapet Ngushtica e Hormuzit, rruga kryesore nga ku kalon një pjesë e madhe e naftës botërore.

Nëse kjo ndodh, furnizimi me naftë do të normalizohet dhe çmimet mund të bien më tej.

Në SHBA, tregjet e aksioneve u paraqitën të paqëndrueshme. Disa kompani të mëdha pësuan humbje të forta, pavarësisht rezultateve të mira financiare.

Në Evropë, shumica e bursave shënuan rritje, ndërsa në Azi tregjet ranë, kryesisht për shkak të shitjeve të aksioneve të kompanive teknologjike.

Edhe pse lufta në Lindjen e Mesme dhe inflacioni po krijojnë pasiguri për ekonominë botërore, vlera e aksioneve në bursat kryesore vazhdon të jetë shumë e lartë, afër niveleve më të larta të regjistruara ndonjëherë. //a.i/

The post FOKUS – Bie çmimi i naftës pas sinjaleve për ulje të tensioneve në Lindjen e Mesme appeared first on Agjencia Telegrafike Shqiptare.

UASHINGTON, 4 qershor /ATSH/- Presidenti amerikan, Donald Trump ka pranuar se gjatë një telefonate me kryeministrin izraelit Benjamin Netanyahu e ka quajtur atë “të çmendur” në një bisedë të tensionuar, ku janë përdorur edhe fjalë të rënda, raportoi AP.

Gjithashtu, presidenti Trump tha se ishte “pak i shqetësuar” që luftimet e Izraelit me militantët e Hezbollahut, në Liban po pengonin bisedimet e paqes me Iranin.

Megjithatë, Trump theksoi se pavarësisht tensioneve, marrëdhënia e tij me Netanyahun mbetet e fortë.

Ai tha se të dy e kuptojnë njëri-tjetrin si liderë “në kohë lufte” dhe se bashkëpunojnë mirë për çështje të sigurisë dhe rajonit.

“Ne kemi punuar shumë mirë së bashku. Më pëlqen Bibi dhe bashkëpunoj shumë mirë me të”, u shpreh Trump në një intervistë për CNBC.

Nga ana e tij, Netanyahu reagoi duke thënë se ai dhe Trump kanë ndonjëherë “mosmarrëveshje taktike”, por ndajnë të njëjtat objektiva kryesore.

Sipas tij, të dy liderët respektojnë njëri-tjetrin dhe gjithmonë gjejnë mënyra për të zgjidhur dallimet dhe për të vazhduar bashkëpunimin.

Në të njëjtën kohë, situata në Lindjen e Mesme mbetet e tensionuar. Shtetet e Bashkuara të Amerikës, po përpiqen të ndërmjetësojnë bisedime, për një armëpushim më të gjerë mes Izraelit dhe Hezbollahut në Liban, ndërsa konflikti është ndërlidhur edhe me përplasje më të gjera me Iranin.

Sipas raportimeve, këto luftëra dhe tensione rajonale po e komplikojnë procesin e paqes dhe po ndikojnë edhe në ekonominë globale, për shkak të rritjes së pasigurisë dhe çmimeve të energjisë.

Në Liban, pavarësisht një marrëveshjeje të brishtë armëpushimi të ndërmjetësuar nga SHBA-ja, luftimet kanë vazhduar.

Izraeli dhe Libani kanë rënë dakord për një kuadër të ri sigurie, që përfshin krijimin e zonave pilot, ku Hezbollahu do të ndalohet, si dhe rritjen e rolit të ushtrisë libaneze në kontrollin e këtyre zonave.

Megjithatë, zbatimi i marrëveshjes mbetet i paqartë dhe i brishtë.

Sulmet ajrore dhe përplasjet kanë vazhduar në disa zona të Libanit jugor dhe pranë qyteteve kryesore, duke shkaktuar viktima dhe zhvendosje të mëdha të popullsisë.

Konflikti ka shkaktuar mijëra të vdekur dhe mbi një milion të zhvendosur, ndërsa situata humanitare përkeqësohet.

Ndërkohë, tensionet politike po rriten edhe në SHBA, ku Kongresi ka miratuar, për herë të parë, një rezolutë që synon të kufizojë veprimet ushtarake të SHBA-së ndaj Iranit, duke sfiduar kompetencat e presidentit.

Trump ka sinjalizuar se mund të mos e pranojë një kufizim të tillë, në rolin e tij si komandant i përgjithshëm.

Në përgjithësi, pavarësisht përpjekjeve diplomatike, situata mbetet e paqëndrueshme, me negociata të vazhdueshme dhe luftime që vazhdojnë të kenë një ndikim të madh në rajon. //a.i/

The post SHBA – Trump: Luftimet Izrael-Hezbollah po pengojnë bisedimet e paqes me Iranin appeared first on Agjencia Telegrafike Shqiptare.

BEJRUT, 4 qershor /ATSH-DPA/- Sulmet izraelite në Liban kanë vazhduar, pavarësisht përpjekjes për të zbatuar armëpushimin, i cili deri tani ka qenë vetëm pjesërisht funksional në konfliktin mes Izraelit dhe Hezbollahut, raportoi sot Agjencia Kombëtare e Lajmeve e Libanit (NNA).

Sipas raportimeve, të paktën dy sulme me dronë janë kryer në mëngjes ndaj automjeteve të ndryshme në jug të vendit.

Ushtria izraelite nuk ka reaguar menjëherë lidhur me këto akuza.

Izraeli dhe Libani ranë sërish dakord gjatë natës, për një rrugë drejt zbatimit të armëpushimit, i cili varet nga ndalimi i plotë i sulmeve ndaj Izraelit, nga milicia pro-iraniane Hezbollah, thuhet në një deklaratë të përbashkët pas bisedimeve mes përfaqësuesve të qeverive në Uashington.

Që nga fillimi i marsit, lufta ka shkaktuar zhvendosjen e qindra mijëra banorëve në Liban.

Sot në mëngjes, autoriteti i mbrojtjes civile në Liban, u bëri thirrje qytetarëve të tregojnë durim, dhe të mos kthehen ende në qytetet e tyre.

Sipas tyre, kthimi në fshatrat e jugut, duhet të bëhet vetëm pas njoftimeve zyrtare, pasi ekziston ende rreziku nga mbetjet e luftës dhe municionet e pashpërthyera. //a.i/

The post FOKUS – Libani raporton sulme izraelite pavarësisht armëpushimit appeared first on Agjencia Telegrafike Shqiptare.

SEUL, 4 qershor /ATSH-DPA/- Partia Demokratike (DP) në pushtet në Korenë e Jugut shënoi një fitore të thellë në zgjedhjet rajonale të mbajtura dje, duke siguruar numrin më të madh të votave në 12 nga 16 rajonet e vendit, sipas rezultateve të publikuara nga Komisioni Kombëtar i Zgjedhjeve.

Partia konservatore e opozitës, Partia e Pushtetit Popullor (PPP), triumfoi në katër rajonet e mbetura, përfshirë kryeqytetin Seul, ku kryebashkiaku Oh Se Hoon, i konsideruar si një kandidat i mundshëm për president në të ardhmen, fitoi një mandat të ri.

Rezultatet përfaqësojnë një përmbysje të ndjeshme, krahasuar me zgjedhjet rajonale të vitit 2022, kur PPP-ja fitoi në 12 rajone.

Votimi u konsiderua gjerësisht, si një test i mbështetjes për presidentin Lee Jae Myung, i Partisë Demokratike me prirje të majta, i cili ndodhet në pushtet prej rreth një viti.

Lee vijon të gëzojë mbështetje relativisht të fortë publike, ndërsa konservatorët ende po përballen me pasojat e krizës politike, të shkaktuar në vitin 2024 nga ish-presidenti Yoon Suk Yeol.

Yoon, anëtar i PPP-së, e futi vendin në një periudhë trazirash politike, pasi shpalli papritur gjendjen e jashtëzakonshme ushtarake. Ai u dënua më pas me burgim të përjetshëm.

Pjesëmarrja në votime arriti në 61%, një nivel relativisht i lartë për zgjedhjet rajonale.

Procesi u shoqërua me probleme logjistike, pasi më shumë se 12 qendra votimi raportuan mungesë fletësh votimi për disa orë.

Politikanët e PPP-së kërkuan pezullimin e numërimit të votave dhe përsëritjen e zgjedhjeve, ndërsa protestat u zhvilluan pranë selisë së Komisionit Kombëtar të Zgjedhjeve dhe në disa qendra votimi në Seul. //a.i/

The post KOREJA E JUGUT – Partia Demokratike në pushtet fitore spektakolare në zgjedhjet rajonale appeared first on Agjencia Telegrafike Shqiptare.

BRUKSEL, 4 qershor /ATSH-DPA/- Bashkimi Evropian ka nisur përgatitjet për hapjen zyrtare të grupkapitullit të parë të negociatave të anëtarësimit me Ukrainën dhe Moldavinë, duke rritur shpresat për përparim, pas një bllokimi që zgjati rreth dy vjet.

Qipro, e cila mban presidencën e radhës të BE-së, njoftoi dje se faza e parë e negociatave mund të hapet më 15 qershor, në kuadër të takimit të ministrave të BE-së në Luksemburg.

Megjithëse Bashkimi Evropian hapi zyrtarisht negociatat e anëtarësimit me Ukraine dhe Moldavia në qershor të vitit 2024, nisja e negociatave konkrete me Ukrainën u bllokua nga vetoja e Hungarisë.

Procesi rifitoi vrull pas humbjes në zgjedhje të ish-kryeministrit hungarez, Viktor Orban.

Pasardhësi i tij, Peter Magyar njoftoi dje se Hungaria dhe Ukraina, kanë arritur një marrëveshje për forcimin e të drejtave të pakicës hungareze në Ukrainë, një kusht kyç për mbështetjen e Budapestit ndaj procesit të anëtarësimit.

Grupkapitulli i parë i negociatave përqendrohet te çështjet themelore, përfshirë shtetin e së drejtës, reformën në drejtësi dhe standardet e administratës publike.

Negociatat për anëtarësim në BE, zakonisht janë procese të gjata që mund të zgjasin me vite.

Ato ndahen në gjashtë grupkapituj tematikë dhe nuk garantojnë automatikisht anëtarësimin e vendit kandidat.

Një shembull i tillë është Turqia, negociatat e së cilës me BE-në nisën në vitin 2005, por prej vitesh janë praktikisht të ngrira, për shkak të shqetësimeve lidhur me demokracinë, shtetin e së drejtës dhe të drejtat themelore. //a.i/

The post BRUKSEL – BE-ja përgatitet të hapë kapitullin e parë të negociatave me Ukrainën dhe Moldavinë appeared first on Agjencia Telegrafike Shqiptare.

UASHINGTON, 4 qershor /ATSH-DPA/- Izraeli dhe Libani kanë rënë dakord të rinovojnë armëpushimin e brishtë mes tyre, pas bisedimeve të zhvilluara në Uashington, me ndërmjetësimin e Shteteve të Bashkuara të Amerikës, sipas një deklarate të përbashkët të publikuar nga SHBA-ja, Libani dhe Izraeli.

Marrëveshja e kushtëzon armëpushimin me ndalimin e plotë të sulmeve nga milicia pro-iraniane, Hezbollah dhe tërheqjen e luftëtarëve të saj nga zonat në jug të lumit Litani, pranë kufirit me Izraelin.

Sipas deklaratës së publikuar nga Departamenti Amerikan i Shtetit (DASH), marrëveshja parashikon gjithashtu krijimin e zonave pilot të sigurisë, ku kontrolli do t’i kalojë ekskluzivisht Forcave të Armatosura Libaneze, pa praninë e grupeve të armatosura jo-shtetërore.

Megjithatë, detajet për mënyrën e zbatimit të këtyre zonave nuk janë bërë ende të qarta.

“Ky proces do të mundësojë progresin drejt një marrëveshjeje gjithëpërfshirëse për paqen dhe sigurinë”, thuhet në deklaratë.

Konflikti përfshin Izraelin dhe Hezbollahun, lëvizjen shiite që vepron në mënyrë të pavarur nga shteti libanez dhe që nuk mori pjesë në bisedime.

Qeveria libaneze nuk konsiderohet palë në konflikt dhe ka kontroll të kufizuar mbi grupin.

Marrëveshja e re, vjen pas takimeve të nivelit të lartë mes zyrtarëve izraelitë dhe libanezë, të zhvilluara të martën dhe të mërkurën, në Uashington me ndërmjetësimin amerikan.

Ende nuk është bërë e ditur nëse armëpushimi i rinovuar ka një afat të përcaktuar, siç ka ndodhur me zgjatjet e mëparshme.

Një armëpushim i ndërmjetësuar nga SHBA-ja në muajin prill, nuk arriti t’i ndalonte plotësisht armiqësitë, pasi të dyja palët akuzuan vazhdimisht njëra-tjetrën për shkelje të marrëveshjes.

Deklarata thekson se e ardhmja e marrëdhënieve mes Izraelit dhe Libanit duhet të përcaktohet nga vetë qeveritë e të dy vendeve, duke kundërshtuar përpjekjet e “çdo shteti ose aktori jo-shtetëror për të mbajtur peng të ardhmen e Libanit”, në një referencë të dukshme ndaj Iranit, mbështetësit kryesor të Hezbollahut.

Ndërkohë, gjatë negociatave me SHBA-në, për një marrëveshje kornizë që synon t’i japë fund luftës me Iranin, Teherani ka kërkuar gjithashtu përfundimin e konfliktit në Liban. //a.i/

The post FOKUS – Izraeli dhe Libani bien dakord për rinovimin e armëpushimit pas bisedimeve të ndërmjetësuara nga SHBA-ja appeared first on Agjencia Telegrafike Shqiptare.

UASHINGTON, 4 qershor /ATSH-DPA/- Dhoma e Përfaqësuesve e SHBA-së miratoi dje një rezolutë mbi kompetencat e luftës, e cila synon të detyrojë presidentin Donald Trump të tërheqë forcat amerikane, nga çdo përfshirje ushtarake kundër Iranit, duke rritur presionin politik ndaj kreut të Shtëpisë së Bardhë.

Rezoluta përcakton se çdo veprim ushtarak kundër Iranit duhet të autorizohet nga Kongresi ose të shoqërohet me një shpallje formale lufte.

Përjashtim bëjnë operacionet e nevojshme për mbrojtjen e Shteteve të Bashkuara të Amerikës ose të aleatëve të tyre, nga sulme të afërta dhe të pashmangshme.

Masa u miratua me 215 vota pro dhe 208 kundër, pasi katër ligjvënës republikanë iu bashkuan demokratëve për të siguruar kalimin e rezolutës.

Megjithëse rezoluta nuk sjell pasoja të menjëhershme për politikën amerikane ndaj Iranit, ajo pasqyron rritjen e presionit politik ndaj Trump, veçanërisht në prag të zgjedhjeve të mesmandatit për Kongresin, që pritet të mbahen pas pesë muajsh.

Një numër gjithnjë e më i madh republikanësh po shprehin publikisht kundërshtimin ndaj strategjisë së presidentit Trump për luftën me Iranin.

Aktualisht është në fuqi një armëpushim në konfliktin mes SHBA-së dhe Iranit, ndërsa po zhvillohen negociata për një marrëveshje kornizë, që do t’i jepte fund përplasjes. Megjithatë, të dyja palët kanë shkëmbyer sulme edhe gjatë ditëve të fundit.

Rezoluta duhet të miratohet edhe nga Senati, dhoma tjetër e Kongresit.

Edhe nëse kalon aty, presidenti ka të drejtën e vetos. Për të rrëzuar një veto presidenciale nevojitet një shumicë prej dy të tretash në të dyja dhomat, një skenar që konsiderohet pak i mundshëm.

Rreth dy javë më parë, edhe Senati amerikan votoi për forcimin e mbikëqyrjes së veprimeve ushtarake ndaj Iranit, me mbështetjen e katër senatorëve republikanë që dolën kundër qëndrimit zyrtar të partisë së tyre. //a.i/

The post SHBA – Dhoma e Përfaqësuesve miraton rezolutën për ndalimin e veprimeve ushtarake ndaj Iranit appeared first on Agjencia Telegrafike Shqiptare.

BUDAPEST, 4 qershor /ATSH-DPA/- Hungaria dhe Ukraina kanë arritur një marrëveshje për të drejtat e pakicës etnike hungareze në Ukrainë, një hap që mund të ndihmojë përparimin e përpjekjeve të Kievit, për anëtarësim në Bashkimin Evropian.

Kryeministri hungarez, Peter Magyar, njoftoi se marrëveshja u arrit pas tre javësh negociatash dhe do të forcojë të drejtat arsimore, gjuhësore, kulturore dhe politike, të më shumë se 100 mijë hungarezëve etnikë, që jetojnë në rajonin perëndimor të Transkarpatias në Ukrainë.

“Në vetëm tre javë kemi arritur atë që Viktor Orban dhe qeveria e tij nuk arritën ta realizonin në dhjetë vjet”, shkroi Magyar në platformën X.

Sipas tij, Ukraina është angazhuar të zbatojë ndryshimet ligjore dhe t’i përfshijë ato në planin e veprimit të dorëzuar pranë Bashkimit Evropian.

Marrëdhëniet mes dy vendeve fqinje ishin përkeqësuar gjatë qeverisjes së Orban, i cili shpesh bllokonte nismat e BE-së në mbështetje të Ukrainës.

Më herët gjatë kësaj jave, Magyar deklaroi se mosmarrëveshja për të drejtat e pakicave, pritej të zgjidhej shpejt dhe shprehu gatishmërinë për t’u takuar me presidentin ukrainas, Volodymyr Zelensky.

Megjithatë, pavarësisht marrëveshjes, Magyar theksoi se Hungaria vazhdon të kundërshtojë procesin e përshpejtuar të anëtarësimit të Ukrainës në BE.

Ai tha se Budapesti do ta mbështeste anëtarësimin e Ukrainës, nëse Kievi përfundon të gjitha kapitujt e negociatave brenda 10 deri në 15 viteve të ardhshme dhe nëse kjo mbështetet përmes një referendumi me fuqi detyruese ligjore. //a.i/

The post FOKUS – Hungaria dhe Ukraina arrijnë marrëveshje për të drejtat e pakicave, lehtësohet rruga drejt negociatave me BE-në appeared first on Agjencia Telegrafike Shqiptare.

TIRANË, 4 qershor /ATSH/- Pushimet verore shpesh lidhen me të njëjtat destinacione të njohura: ishujt grekë dhe Baleare, qytetet klasike të Mesdheut apo vendpushimet bregdetare, që në muajt e verës mbushen shumë shpejt dhe kërkojnë rezervime të hershme, sipas medias italiane “Skyscanner”.

Këto janë destinacione të sigurta, të njohura dhe të vizituara nga shumë turistë, por në të njëjtën kohë nuk përbëjnë të vetmen mundësi për të kaluar pushimet verore pranë detit.

Gjithnjë e më shumë vizitorë po kërkojnë alternativa më të qeta dhe më autentike, destinacione që ofrojnë një përvojë ndryshe nga turizmi masiv, por që ruajnë komoditetin e një pushimi gjithëpërfshirës.

Këto mund të jenë ishuj më pak të njohur, qytete bregdetare me karakter të veçantë, zona në zhvillim turistik ose vende ku natyra dhe kultura ndërthuren në mënyrë të natyrshme.

Ideja nuk është të largohemi nga deti apo nga pushimet relaksuese, por të ndryshojmë mënyrën se si i përjetojmë ato: më pak turma, më shumë hapësirë, më shumë autenticitet dhe më shumë mundësi për të zbuluar vende të reja jashtë itinerareve të zakonshme.

Pikërisht në këtë kontekst, ekspertët e udhëtimeve, kanë bërë një përzgjedhje të disa destinacioneve të pazakonta për verën, ideale për turistët që duan pushime ndryshe, por të lidhura ngushtë me detin dhe natyrën.

Saranda, Shqipëri

Zgjedhja ideale për të zbuluar Rivierën Shqiptare

Saranda është një nga destinacionet më interesante, nëse kërkon një verë ndryshe nga pikat më klasike të Mesdheut.

Nuk është më një destinacion “sekret”, sidomos në muajt e pikut të verës, por mbetet një bazë shumë e mirë, për të eksploruar jugun e Shqipërisë mes plazheve, ekskursioneve dhe siteve arkeologjike.

Qyteti ka një shëtitore bregdetare plot gjallëri, lidhje të mira me zonat përreth, dhe shumë plazhe që mund të vizitohen brenda një dite.

Nga këtu mund të organizoni një vizitë në Ksamil, të shkoni drejt burimit natyror të Syrit të Kaltër ose të kaloni disa orë në Butrint, një sit UNESCO, i banuar që nga periudha parahistorike dhe i formuar ndër shekuj nga grekët, romakët, bizantinët dhe venedikasit.

Saranda dallohet gjithnjë e më shumë, si një nga pikat më të rëndësishme të turizmit në rajon, falë kombinimit unik të detit të pastër, çmimeve ende konkurruese dhe afërsisë me disa nga plazhet më të bukura të Mesdheut lindor.

Në vitet e fundit, Riviera Shqiptare është kthyer në një alternativë të rëndësishme, për ata që kërkojnë diçka ndryshe nga destinacionet e mbipopulluara.

Duhet ditur se: Saranda është shumë e përshtatshme nëse dëshironi të alternoni detin, restorantet, ekskursionet dhe lëvizjet përgjatë bregdetit.

Ksamili është shumë i kërkuar, për këtë arsye mund të jetë i populluar gjatë pikut të sezonit veror.

Butrinti dhe Syri i Kaltër janë zonat ideale për ekskursione në natyrë dhe vendet kulturore.

Përveç Shqipërisë, “Skyscanner” ka rekomanduar edhe disa destinacione të tjera interesante për pushimet verore, si Lastovo në Kroaci, Folegandros në Greqi, Lanzarote dhe El Hierro në Ishujt Kanarie, L’Aia në Holandë dhe Essaouira në Marok. //a.i/

The post “Skyscanner”: Saranda kryeson listën e destinacioneve verore për t’u zbuluar në 2026-ën appeared first on Agjencia Telegrafike Shqiptare.

TIRANË, 4 qershor /ATSH/- Në fillim të verës, qershori është një periudhë ideale për të zgjedhur destinacionin e duhur të udhëtimit, shkruan media italiane “Si Viaggia”.

Në këtë përzgjedhje, ekspertët e udhëtimit kanë sugjeruar disa vende, ku mund të udhëtohet gjatë këtij muaji, duke përfshirë destinacionet bregdetare dhe malore.

Me muajin qershor nis zyrtarisht vera, bashkë me udhëtimet drejt destinacioneve më të bukura bregdetare dhe malore, si dhe ndjesinë e çlodhjes, që shumica e njerëzve kërkojnë pas një periudhe të gjatë pune.

Zgjedhja e destinacionit varet nga disa faktorë: dëshira për të vizituar vendet klasike turistike, shpesh në brigjet e Mesdheut, apo dëshira për të zbuluar destinacione më pak të njohura, ku mund të shmangen turmat e mëdha në qytete, plazhe apo shtigje malore për ecje.

Në këtë përzgjedhje ju prezantojmë disa ide se ku mund të shkoni në qershor, me destinacione të ndryshme të arritshme nga aeroportet kryesore italiane, së bashku me një pasqyrë të përgjithshme mbi kostot e udhëtimit.

Media italiane “Si Viaggia” ka rekomanduar 9 destinacione për pushime bregdetare dhe malore, duke përfshirë Shqipërinë, Kroacinë, Provencën në Francë, Greqinë, Kirgistanin, Korsikën, Perunë, Sicilinë në Itali dhe Slloveninë.

Shqipëria, plazhe idilike dhe festivale

Shqipëria ofron plazhe aq të bukura sa mund të krahasohen me ato të Greqisë fqinje dhe, megjithëse popullariteti i saj po rritet, ajo mbetet ende një destinacion alternativ, i përshtatshëm për t’u vizituar në qershor.

Sapo të mbërrini në Aeroportin Ndërkombëtar të Tiranës, merrni një makinë me qira dhe nisni eksplorimin e bregdetit të saj, pa hequr dorë, edhe nga udhëtimet nëpër male, pasi në këtë periudhë ofrohen shumë itinerare për ecje dhe trekking.

Për më tepër, nëse gjatë verë dëshironi të merrni pjesë në festivale, në Shqipëri organizohet një nga eventet më të bukura në Evropë, pikërisht në rivierën e saj: “Kala Festival”.

Ky festival ofron një kombinim të përkryer mes festivalit muzikor dhe pushimeve në plazh. //a.i/

The post “Si Viaggia”: Shqipëria, destinacioni që bashkon detin dhe malin në një udhëtim të vetëm appeared first on Agjencia Telegrafike Shqiptare.

SEUL (Koreja e Jugut) – Hapja e Qendrës “Pompidou Hanwha”, me ekspozitën e saj inauguruese mbi figurat kryesore të Kubizmit

LOS ANXHELES (SHBA) – Votimi i aktorëve të SAG-AFTRA përfundon një marrëveshje page me studiot, që përfshin mbrojtje mbi përdorimin e IA-së

UASHINGTON (SHBA) – Gjykata Supreme e SHBA-së lëshon vendime

LUKSEMBURG – Takimi i Ministrave të Brendshëm të BE-së (deri më 5)

SHËN PETESBURG (Rusi) – Putini takohet me krerët e agjencive ndërkombëtare të lajmeve

SHËN PETERBURG (Rusi) – Konferencë javore për shtyp nga zëdhënësja e Ministrisë së Jashtme ruse, Maria Zakharova

JERUSALEM – Parada e Krenarisë në Jerusalem

PRETORIA (Afrika e Jugut) – Vizitë e presidentit kenian, William Ruto

KAMPALA (Uganda) – Fjalimi i presidentit Yoweri Museveni për Gjendjen e Kombit

ROMË (Itali) – Atletikë: Gala e Artë 2026

SOLNA (Suedi) – Futboll: Ndeshje Miqësore: Suedia kundër Greqisë

A CORUNA (Spanjë) – Futboll: Ndeshje Miqësore: Spanja kundër Irakut

NANTES (Francë) – Futboll: Ndeshje Miqësore: Franca kundër Bregut të Fildishtë / /a.i/

The post AGJENDA NDËRKOMBËTARE 04.06.2026 appeared first on Agjencia Telegrafike Shqiptare.

LUKSEMBURG, 3 qershor /ATSH-DPA/- “Meta” ka humbur apelin kundër vendimit të Bashkimit Evropian, për të vendosur rregulla të rrepta ndaj aplikacionit të saj të mesazheve “Messenger”.

Gjykata e Përgjithshme e Bashkimit Evropian në Luksemburg konfirmoi sot vendimin e Komisionit Evropian, për të klasifikuar “Messenger” si një “gatekeeper” sipas Aktit për Tregjet Digjitale.

Në të njëjtën kohë, gjykata anuloi një vendim të mëparshëm të revokuar, që kishte të bënte me shërbimin e blerjeve “Marketplace”.

Komisioni Evropian përcaktoi në vitin 2023, se “Messenger” dhe “Marketplace” përmbushnin kriteret për t’u konsideruar “gatekeepers” – platforma të mëdha që shërbejnë si porta kryesore për bizneset që të arrijnë konsumatorët në tregjet digjitale.

Ky status i vendos kompanive, detyrime të veçanta, për të garantuar konkurrencë më të drejtë në tregun digjital.

Në vitin 2025, Komisioni Evropian anuloi vendimin për përcaktimin për “Marketplace”, pasi nuk ishte arritur pragu i kërkuar i përdoruesve komercialë.

Gjykata vendosi se ky anulim ishte i pavlefshëm, duke argumentuar se vlerësimi i të dhënave nga Komisioni ishte i pasaktë dhe arsyetimi i tij ishte “hipotetik dhe i paplotë”.

Përsa i përket “Messenger-it”, gjykata mbështeti Komisionin Evropian, dhe la në fuqi përcaktimin si “gatekeeper”.

Si “Meta” ashtu edhe Komisioni Evropian mund ta apelojnë vendimin në Gjykatën e Drejtësisë së Bashkimit Evropian, instanca më e lartë gjyqësore e BE-së.

Përveç “Messenger-it”, disa shërbime të tjera të “Meta-s” janë aktualisht të klasifikuara si “gatekeepers”, përfshirë “Facebook”, “Instagram”, “WhatsApp” dhe “Meta Ads”. / /a.i/

The post Gjykata e BE-së lë në fuqi rregullat e rrepta ndaj “Messenger”, “Meta” humbet apelin appeared first on Agjencia Telegrafike Shqiptare.

NJU DELHI, 3 qershor /ATSH-DPA/- Të paktën 21 persona kanë humbur jetën sot, si pasojë e një zjarri që shpërtheu në një ndërtesë shumëkatëshe që shërbente si hotel, në një zonë të populluar të kryeqytetit indian.

Më shumë se 40 persona u shpëtuan nga ndërtesa në zonën Hauz Rani, në jug të Nju Delhit, tha një zyrtar i policisë.

Të plagosurit u dërguan në spitalet e afërta, ndërsa 21 prej tyre u shpallën të vdekur.

Sipas agjencisë së lajmeve PTI, viktimat përfshijnë edhe shtetas të huaj nga Azia Qendrore dhe Afrika, por policia ende nuk i ka identifikuar zyrtarisht të ndjerët.

“Shkaku i zjarrit mbetet i paqartë. Shërbimi zjarrfikës ka shuar flakën dhe po vijon kontrollin brenda ndërtesës”, tha zëvendës-shefi i zjarrfikësve AK Malik.

Nuk dihet ende, nëse objekti kishte dalje emergjente dhe lejet e nevojshme të sigurisë.

Kryeministrja e Delhit, Rekha Gupta tha se do të hapet një hetim, për të përcaktuar shkaqet e zjarrit dhe premtoi mbështetje për të plagosurit dhe familjet e viktimave.

Kryeministri i Indisë, Narendra Modi shprehu ngushëllimet e tij dhe njoftoi ndihmë financiare për familjet e prekura.

Vdekjet nga zjarret janë të zakonshme në Indi dhe shpesh lidhen me masa të dobëta sigurie, mungesë daljeje emergjente dhe pajisje elektrike të vjetruara ose me standarde të ulëta. //a.i/

The post INDI – Të paktën 21 të vdekur nga zjarri në një hotel në Nju Delhi appeared first on Agjencia Telegrafike Shqiptare.

KIEV, 3 qershor /ATSH-DPA/- Sekretari i përgjithshëm i NATO-s, Mark Rutte mbërriti sot në Kiev, disa ditë pas një tjetër sulmi të madh dhe vdekjeprurës me raketa dhe dronë nga Rusia ndaj kryeqytetit ukrainas dhe pjesëve të tjera të vendit.

Sekretari i Përgjithshëm i NATO-s, mbërriti sot në Kiev, i shoqëruar nga ambasadorët e vendeve anëtare të aleancës, bëri të ditur zëdhënësja e tij.

Ambasadorët e NATO-s formojnë Këshillin e Atlantikut të Veriut, organin më të lartë vendimmarrës politik të aleancës, i cili zakonisht mblidhet të paktën një herë në javë në Bruksel.

Pamje të publikuara në mediet ukrainase treguan Rutte duke zbritur nga një tren në stacionin e Kievit.

Për arsye sigurie, zëdhënësja e shefit të NATO-s nuk dha detaje mbi itinerarin e saktë të vizitës.

Rutte ka vizituar disa herë Kievin, për t’u takuar me presidentin Volodymyr Zelensky dhe zyrtarët e tjerë ukrainas.

NATO ka vazhduar të mbështesë Ukrainën përmes programit “Lista e Kërkesave me Përparësi të Ukrainës” (PURL), një iniciativë që parashikon furnizimin me municione dhe armë të prodhuara në SHBA, të cilat ju shiten aleatëve evropianë dhe Kanadasë, për t’iu dorëzuar më pas Ukrainës. //a.i/

The post FOKUS – Rutte mbërrin në Kiev pas sulmit vdekjeprurës rus appeared first on Agjencia Telegrafike Shqiptare.

UASHINGTON, 3 qershor /ATSH-DPA/- Ushtria amerikane njoftoi se ka zmbrapsur një seri sulmesh me raketa balistike dhe dronë, të lëshuara nga Irani ndaj objektivave në rajonin e Gjirit gjatë natës.

Në një deklaratë në rrjetin social X, Komanda Qendrore e SHBA-së (CENTCOM) bëri të ditur se forcat amerikane neutralizuan disa raketa dhe dronë iranianë, si dhe kryen goditje vetëmbrojtëse në ishullin Qeshm, në përgjigje të sulmeve të pretenduara iraniane në Lindjen e Mesme më 2 qershor.

Pretendimet e ushtrisë amerikane nuk mund të verifikohen në mënyrë të pavarur.

Para publikimit të deklaratës së CENTCOM-it, Kuvajti dhe Bahreini raportuan sulme me raketa dhe dronë. Të dyja vendet e Gjirit strehojnë baza të rëndësishme ushtarake amerikane.

Sipas ushtrisë amerikane, dy raketa iraniane të lëshuara drejt Kuvajtit nuk arritën objektivin ose u shkatërruan gjatë fluturimit, ndërsa tre raketa të drejtuara ndaj Bahreinit u interceptuan nga sistemet e mbrojtjes ajrore të SHBA-së dhe Bahreinit.

CENTCOM deklaroi gjithashtu se forcat amerikane rrëzuan tre dronë sulmues, të nisur nga Irani drejt anijeve civile, që po lundronin ligjërisht në ujërat e rajonit.

“Forcat tona mbeten vigjilente dhe të gatshme për t’u mbrojtur ndaj çdo agresioni të pajustifikuar iranian gjatë armëpushimit në fuqi”, thuhet në deklaratë.

Në një përditësim të mëvonshëm, CENTCOM njoftoi se një valë tjetër dronësh iranianë tentoi të sulmonte forcat amerikane në Kuvajt, por pa sukses.

Sipas ushtrisë amerikane, mbrojtja ajrore rrëzoi disa dronë dhe nuk pati dëme në personel apo pajisje.

Sulmi ndaj një anijeje cisternë me naftë mund të ketë nxitur përshkallëzimin

Shkëmbimi i fundit i sulmeve, pavarësisht armëpushimit dhe negociatave për t’i dhënë fund konfliktit, duket se lidhet me një operacion ushtarak amerikan të kryer dje.

Ushtria amerikane deklaroi se kishte sulmuar me raketë një anije cisternë pa ngarkesë pranë ishullit Kharg, një qendër kyçe për eksportet iraniane të naftës, pasi ajo kishte tentuar të hynte në një port iranian. Sipas CENTCOM-it, anija u nxor jashtë funksionit.

Nga ana tjetër, një zëdhënës ushtarak iranian konfirmoi se sulmet hakmarrëse u kryen nga Garda Revolucionare Islamike (IRGC), forca elitare e Republikës Islamike.

Zëdhënësi deklaroi se Irani kishte paralajmëruar më herët se, në rast agresioni, përgjigjja do të ishte ndryshe dhe më e ashpër, duke shtuar se veprimet e fundit duhej të shërbenin si një mësim.

Zyrtari iranian paralajmëroi gjithashtu se çdo kërcënim ndaj sigurisë së Ngushticës së Hormuzit, do të kishte pasoja të rënda për forcat ushtarake amerikane në rajon. //a.i/

The post SHBA – CENTCOM: Forcat amerikane zmbrapsën një seri sulmesh iraniane me raketa dhe dronë appeared first on Agjencia Telegrafike Shqiptare.

BRUKSEL, 3 qershor /ATSH-DPA/- Negociatat mes vendeve anëtare të Bashkimit Evropian dhe Parlamentit Evropian për reformimin e shumëdiskutuar, të të drejtave të pasagjerëve ajrorë nuk kanë arritur ende një kompromis, duke lënë të paqartë të ardhmen e ndryshimeve të propozuara.

Parlamenti Evropian bëri të ditur se bisedimet do të vazhdojnë, por theksoi se eurodeputetët nuk janë të gatshëm të pranojnë një marrëveshje, që do të dobësonte mbrojtjen ekzistuese të pasagjerëve.

Ndërkohë, presidenca qipriote e BE-së deklaroi se negociatat do të vijojnë sot pasdite, duke vlerësuar se një marrëveshje është ende e arritshme.

Nga ana tjetër, Parlamenti Evropian nuk dha detaje se kur do të rifillojnë zyrtarisht bisedimet.

Nëse nuk arrihet një marrëveshje deri në mesin e qershorit, afati i propozimit për reformën, i paraqitur fillimisht nga Komisioni Evropian në vitin 2013, do të përfundojë, duke lënë në fuqi rregullat aktuale të BE-së për të drejtat e pasagjerëve.

Një nga pikat kryesore të mosmarrëveshjes mbetet kompensimi për vonesat e fluturimeve.

Sipas rregullave aktuale, pasagjerët mund të përfitojnë kompensim, nëse fluturimi i tyre mbërrin me të paktën tre orë vonesë.

Vitin e kaluar, shtetet anëtare të BE-së propozuan rritjen e këtij kufiri në katër orë, për shumicën e fluturimeve dhe në gjashtë orë për fluturimet ndërkontinentale, si dhe uljen e shumave të kompensimit në disa raste.

Parlamenti Evropian i ka kundërshtuar këto ndryshime dhe ka kërkuar ruajtjen në thelb të sistemit aktual.

Sipas propozimit të tij, pasagjerët do të vazhdonin të kishin të drejtë kompensimi, pas tre orësh vonesë ose në rast anulimi të fluturimit, do të përfitonin 300 euro për udhëtime deri në 1,500 kilometra, 400 euro për fluturime deri në 3,500 kilometra dhe 600 euro për itinerare më të gjata. //a.i/

The post BRUKSEL – BE ende pa marrëveshje për kompensimin e pasagjerëve pas vonesave të fluturimeve appeared first on Agjencia Telegrafike Shqiptare.

TIRANË, 3 qershor /ATSH/- Viti 2026 pritet të jetë viti i destinacioneve të reja turistike, me gjithnjë e më shumë vizitorë, që kërkojnë përvoja autentike, çmime të përballueshme dhe vende ende të paprekura nga turizmi masiv, shkruan media italiane “TgYou24”.

Sipas tendencave të turizmit ndërkombëtar, Shqipëria renditet ndër destinacionet më të kërkuara për vitin e ardhshëm, duke tërhequr vëmendjen e turistëve nga e gjithë Evropa.

Shqipëria, perla e re e Mesdheut

Shqipëria vazhdon të konsolidojë pozicionin e saj si një nga destinacionet turistike me rritjen më të shpejtë në Evropë.

Kombinimi i plazheve mahnitëse, trashëgimisë historike, mikpritjes tradicionale dhe kostove më të ulëta, krahasuar me destinacionet e tjera mesdhetare e ka kthyer vendin, në një zgjedhje gjithnjë e më të preferuar për pushuesit.

Bregdeti shqiptar, veçanërisht Riviera Shqiptare, po fiton famë ndërkombëtare falë ujërave të kristalta, gjireve të fshehura dhe peizazheve mbresëlënëse.

Ndër destinacionet më të vizituara renditen Himara, Ksamili, Saranda, Dhërmiu dhe Vlora, ndërsa zona të tjera si Borshi, Qeparoi dhe Lukova po tërheqin gjithashtu interes në rritje.

Përtej detit, turistët po zbulojnë gjithnjë e më shumë edhe pasuritë kulturore të vendit.

Tirana është shndërruar në një qendër dinamike urbane me jetën e gjallë kulturore dhe gastronomike, ndërsa qytetet historike si Berati dhe Gjirokastra ofrojnë një udhëtim unik në historinë dhe traditat shqiptare.

Nga ana tjetër, Alpet Shqiptare, me destinacione si Thethi dhe Valbona, po tërheqin adhuruesit e turizmit natyror dhe aventurës.

Ekspertët e turizmit vlerësojnë se Shqipëria do të vazhdojë të jetë një nga zgjedhjet kryesore, për turistët që kërkojnë pushime cilësore me kosto të përballueshme, larg mbipopullimit, që karakterizon disa nga destinacionet tradicionale të Mesdheut.

Destinacione të tjera në rritje për vitin 2026

Përveç Shqipërisë, disa vende të tjera po fitojnë popullaritet në mesin e turistëve ndërkombëtarë:

* Gjeorgjia – po tërheq vizitorët me peizazhet malore, kulturën e pasur dhe kuzhinën tradicionale.
* Omani – ofron shkretëtira spektakolare, kanione natyrore dhe plazhe të egra.
* Filipinet – mbeten një parajsë për adhuruesit e ishujve tropikalë, zhytjes dhe natyrës së paprekur.
* Sllovenia – vlerësohet për turizmin e qëndrueshëm, liqenet alpine dhe qytetet e mirëorganizuara.
* Kolumbia – vazhdon të tërheqë turistë falë kulturës së larmishme dhe bregdetit të Karaibeve.
* Uzbekistani – po magjeps vizitorët me qytetet historike të Rrugës së Mëndafshit.
* Madagaskari – mbetet një nga destinacionet më unike për biodiversitetin dhe natyrën e egër.
* Arabia Saudite – po investon fuqishëm në turizëm dhe po hap gjithnjë e më shumë dyert për vizitorët e huaj.
* Mali i Zi – ofron kombinimin e detit, maleve dhe çmimeve konkurruese në rajonin e Adriatikut.

Pse turistët po zgjidhen këto destinacione?

Turistët po orientohen gjithnjë e më shumë drejt vendeve më pak të eksploruara sepse ato ofrojnë, çmime më të ulëta; më pak mbipopullim; përvoja autentike kulturore; kontakte më të afërta me komunitetet lokale; peizazhe dhe atraksione ende të paprekura nga turizmi masiv.

Nëse po planifikoni pushimet e vitit 2026, Shqipëria mbetet një nga alternativat më interesante dhe premtuese në Evropë dhe Mesdhe.

Me kombinimin e plazheve spektakolare, qyteteve historike, maleve mbresëlënëse dhe mikpritjes së njohur shqiptare, vendi po forcon pozitat si një nga pikat më të nxehta të turizmit ndërkombëtar, duke konkurruar gjithnjë e më shumë me destinacionet tradicionale të rajonit. //a.i/

The post Media italiane “TgYou24”: Mes plazheve dhe trashëgimisë kulturore, Shqipëria në krye të tendencave turistike appeared first on Agjencia Telegrafike Shqiptare.

Destinacionet e fshehura të Evropës po shndërrohen në pikat më të kërkuara të pushimeve për turistët britanikë.

TIRANA, 3 qershor /ATSH/- Himara po forcon pozitat si një nga perlat turistike të Mesdheut, ndërsa interesi i turistëve britanikë, për qytetin bregdetar të Rivierës Shqiptare, është rritur ndjeshëm, shkruan Sarra Gray në një artikull të botuar në median britanike “GB News”.

Të dhënat e reja të platformës “Airbnb” tregojnë se gjithnjë e më shumë pushues nga Britania e Madhe po orientohen drejt destinacioneve më pak të njohura, në kërkim të natyrës së paprekur, përvojave autentike dhe çmimeve më të favorshme.

Në këtë trend të ri evropian, Himara renditet mes destinacioneve që po tërheqin vëmendjen më të madhe.

Sipas të dhënave të publikuara nga “Airbnb”, turistët britanikë po kërkojnë gjithnjë e më shumë alternativa kundrejt destinacioneve tradicionale, ndërsa Shqipëria dhe Kroacia janë ndër vendet që po përfitojnë më shumë nga kjo tendencë.

Në Britaninë e Madhe, kërkimet për pushime brenda vendit janë rritur me më shumë se 11 për qind krahasuar me një vit më parë.

Megjithatë, në Evropë, turistët po shikojnë gjithnjë e më shumë përtej destinacioneve klasike.

Të dhënat e reja për rezervimet dhe kërkimet tregojnë një rritje të fortë të interesit për Shqipërinë, ku Himara spikat si një nga destinacionet më të preferuara.

Qyteti piktoresk i Rivierës Shqiptare ka shënuar një rritje prej 92 për qind të kërkimeve krahasuar me një vit më parë.

Me plazhet e kristalta, gjiret e fshehura, peizazhet mbresëlënëse mes detit dhe maleve, si dhe me çmime ende konkurruese krahasuar me shumë vende të Mesdheut, Himara po shihet si një alternativë ideale për pushuesit, që duan të shmangin turmat e destinacioneve të mbipopulluara.

Përveç bukurive natyrore, zona ofron edhe një kombinim të trashëgimisë historike, gastronomisë tradicionale dhe jetës bregdetare, elementë që po e bëjnë gjithnjë e më tërheqëse për turistët e huaj.

Raporti, i bazuar në kërkimet dhe rezervimet për periudhën 21 qershor – 22 shtator 2026, krahasuar me të njëjtën periudhë të vitit 2025, tregon gjithashtu se turistët po orientohen drejt destinacioneve që ofrojnë aktivitete në natyrë dhe përvoja autentike.

Ndër destinacionet e tjera që kanë shënuar rritje të interesit janë Novalja në Kroaci, Portimao në Portugali, Estepona në Spanjë dhe Cortina d’Ampezzo në Itali, të njohura për kombinimin e plazheve, peizazheve natyrore dhe aktiviteteve në natyrë.

Të dhënat tregojnë gjithashtu se udhëtimet në grup po bëhen gjithnjë e më të zakonshme.

Rezervimet e grupeve nga Britania e Madhe drejt destinacioneve evropiane janë rritur me 13 për qind krahasuar me një vit më parë, pasi turistët kërkojnë të ndajnë kostot dhe të kalojnë më shumë kohë me familjen dhe miqtë.

Rritja e interesit për Himarën konsiderohet një tjetër tregues i fuqizimit të imazhit turistik të Shqipërisë, në tregun ndërkombëtar, me Rivierën Shqiptare që po konsolidohet si një nga destinacionet më premtuese dhe më të kërkuara të Mesdheut për vitet në vijim. //a.i/

The post “GB News”: Himara mes destinacioneve më të kërkuara nga britanikët për verën e 2026-ës appeared first on Agjencia Telegrafike Shqiptare.