TIRANË, 4 qershor /ATSH/ Qeveria shqiptare e konsideron Planin e Rritjes të Bashkimit Evropian dhe Agjendën Kombëtare të Reformave si mundësi reale për modernizimin e shtetit dhe vendit dhe përshpejtimin e rrugës drejt Bashkimit Evropian.

Kështu deklaroi nga Kuvendi i Shqipërisë, ministri për Evropën dhe Punët e Jashtme, Ferit Hoxha, gjatë një interpelance me fokus jetësimin e agjendës së reformave dhe përfitimet konkrete të Shqipërisë nga Plani i Rritjes.

Rezultatet e Shqipërisë në këtë drejtim, theksoi Hoxha, janë më të mirat në rajon dhe konkretisht, në vlerësimin e Komisionit Evropian, Shqipëria renditet e para në Ballkanin Perëndimor për cilësinë dhe koherencën e Agjendës Kombëtare të Reformave; përqindjen e hapave të realizuar; dhe nivelin e fondeve të disbursuara.

Sipas Ministrit, ky është një tregues i seriozitetit institucional por edhe i kapacitetit për të menaxhuar instrumente komplekse evropiane.

“Rezultatet e Shqipërisë janë më të mirat në rajon. Ky nuk është vlerësimi ynë, është vlerësim i Komisionit Evropian. Dhe këto janë më të mirat në tre aspekte: në cilësinë dhe koherencën e Agjendës Kombëtare të Reformave; përqindjen ose numrin e masave të realizuara deri tani; dhe nivelin e fondeve, shumën e disbursuar që kemi marrë në kuadër të paketës financiare”, tha ai.

Ky, vijoi Hoxha, “është një tregues i seriozitetit institucional por edhe i kapacitetit që ka administrata publike shqiptare, institucionet shqiptare, për të menaxhuar instrumente komplekse evropiane”.

“Vetëm dy javë më parë, më 20 maj 2026, Komisioni Evropian vuri në dispozicion 49 milionë euro për Shqipërinë. Kjo është kërkesa e tretë për pagesë dhe është pjesë e vlerësimit pozitiv të Komisionit për hapat e reformave të zbatuara në fushat e konkurrueshmërisë së biznesit dhe inovacionit”, tha Hoxha.

“Në total, deri më tani, Shqipëria ka realizuar 33 hapa, Mali i Zi 32, Maqedonia e Veriut 22. Pas këtij disbursimi të fundit që është bërë në maj, shuma totale e disbursuar në kuadër të këtij instrumenti, arrin në 212.8 milionë euro për Shqipërinë, 89.3 milionë euro për Malin e Zi dhe 142.1 milionë euro për Maqedoninë e Veriut. Po flas për vendet që janë të përfshira me të njëjtën filozofi, me të njëjtën paketë”, deklaroi Hoxha.

Për Shqipërinë, paketa e përgjithshme financiare arrin në 922 milionë euro për periudhën 2024–2027.

/gj.m/

The post Plani i Rritjes së BE, Hoxha: Shqipëria renditet e para në Ballkanin Perëndimor për cilësinë dhe koherencën e reformave appeared first on Agjencia Telegrafike Shqiptare.

TIRANË, 4 qershor /ATSH/ Deputeti i Partisë “Mundësia”, Erald Kapri, zhvilloi sot një interpelancë në seancën plenare të Kuvendit me ministrin për Evropën dhe Punët e Jashtme, Ferit Hoxha, ku kërkoi sqarime lidhur me ligjin për investimet strategjike, ligjin për zonat e mbrojtura, si dhe procesin e dixhitalizimit të pronave.

Gjatë fjalës së tij, Kapri ngriti shqetësime mbi angazhimet që, sipas tij, qeveria i ka dhënë Komisionit Evropian për shfuqizimin e ligjit për investimet strategjike brenda këtij viti.

“Ministri i ka dhënë garancinë Komisionit Evropian që ligji për investimet strategjike do të shfuqizohet brenda këtij viti. A mund të na thoni kur do të vijë kërkesa për shfuqizimin e këtij ligji? Pse nuk e sillni?”, u shpreh Kapri në Kuvend.

Deputeti i Partisë “Mundësia” kërkoi gjithashtu sqarime edhe për ligjin mbi zonat e mbrojtura, duke pyetur qeverinë mbi hapat konkretë që do të ndërmerren lidhur me ndryshimet e paralajmëruara.

Në interpelancë, Kapri ndaloi edhe te çështja e pronave dhe procesi i dixhitalizimit të hartave kadastrale. Ai tha se qeveria ka raportuar pranë Komisionit Evropian se rreth 90% e kartelave të pronave janë dixhitalizuar, ndërsa vetëm gjysma e hartave janë përfunduar.

“Prej disa vitesh thuhet se procesi i dixhitalizimit të hartave është në nivelin 50%. Si i regjistron hipoteka hartat me mbivendosje? A i keni bërë me dije Komisionit Evropian se brenda këtij viti nuk do të arrini të dixhitalizoni hartat?”, deklaroi Kapri.

Ai ngriti pyetje edhe për procesin e legalizimeve, duke kërkuar informacion mbi ecurinë dhe afatet e përfundimit të tij.

/gj.m/j.p/

The post Kapri interpelancë me ministrin Hoxha: Kur do shfuqizohet ligji për investimet strategjike appeared first on Agjencia Telegrafike Shqiptare.

TIRANË, 4 qershor /ATSH/ Ministrja e Shtetit për Marrëdhëniet me Parlamentin, Erjona Ismaili iu përgjigj në Kuvend deklaratave të kreut të grupit parlamentar të Partisë Demokratike, Gazment Bardhi lidhur me delegimin e interpelancës së kërkuar prej tij me kryeministrin Edi Rama, duke theksuar se procedura është e rregullt.

Në replikën e saj, Ismaili tha se duhet të bëhet dallimi mes kërkesës për praninë e kryeministrit dhe kërkesës për zhvillimin e një debati mbi një çështje konkrete.

“Në fakt është totalisht e drejtë që interpelanca është e kryeministrit, por është e deleguar. Në rast se ju kërkoni interpelanca vetëm sepse kërkoni prezencën e kryeministrit, është një gjë. Dhe në rast se kërkoni të zhvilloni interpelanca mbi çështje të caktuara, për të zhvilluar një debat apo diskutim, është një gjë tjetër”, deklaroi ministrja.

Ministrja theksoi se opozita ka të drejtën të tërheqë kërkesën për interpelancë, por kërkoi që të bëhet e qartë nëse dëshiron apo jo zhvillimin e saj.

“Është e drejta juaj për të tërhequr kërkesën mbi arsyetimin që bëtë, thjesht na bëni të ditur në qoftë se dëshironi që të zhvillohet sot apo jo. Unë jam e disponueshme, jam e përgatitur për të bërë një diskutim dhe debat mbi çështjen”, u shpreh Ismaili.

Në fund të fjalës së saj, Ismaili hodhi poshtë pretendimet e opozitës se fjalimet e saj përgatiten nga persona të tjerë.

“Unë kurrë në jetën time, që ta dish sot i nderuar koleg, as kam pranuar, as do të pranoj të më bëjë ndonjëherë fjalim gati. Kurrë”, deklaroi ministrja, duke shtuar se opozita mat punën e të tjerëve vetëm  me metrin  e vet.

Bardhi kërkoi që interpleanca të shtyhej, pasi sipas tij kryeministri Rama nuk mudn t’ia delegonte interpelancën ministres Ismaili.

/gj.m/j.p/

The post Ismaili reagon ndaj opozitës: E gatshme për interpelancë, le të bëjmë debat për çështjen appeared first on Agjencia Telegrafike Shqiptare.

TIRANË, 4 qershor /ATSH/ Kuvendi nderoi me një minutë heshtje efektivin e Policisë së Shtetit, Enea Mekolli, i cili humbi jetën gjatë një operacioni për kapjen e një personi shumë të kërkuar në Maliq, të kërkuar nga kryetari i grupit parlamentar të Partisë Socialiste, Taulant Balla.

Në fjalën e tij, Balla tha se, operacioni ishte i vështirë dhe i rrezikshëm, ndërsa autori, i cili prej vitesh i fshihej policisë dhe kishte mundur t’u shpëtonte disa rrethimeve, hapi zjarr ndaj forcave të rendit. Si pasojë, Enea Mekolli humbi jetën, ndërsa një tjetër efektiv mbeti i plagosur. Autori u plagos dhe u vu në pranga nga Policia e Shtetit.

Balla theksoi se, sakrifica e efektivit duhet të shërbejë si moment reflektimi për respektin që shoqëria duhet të tregojë ndaj uniformës së Policisë së Shtetit.

“Gjaku i Policisë së Shtetit është gjaku i vetë shtetit. Kush ngre dorë kundër punonjësve të policisë ka ngritur dorë kundër shtetit”, deklaroi ai.

Kreu i grupit parlamentar socialist shprehu ngushëllimet për familjen e Enea Mekollit, uroi shërim të shpejtë për efektivin e plagosur dhe kërkoi dënimin maksimal për autorin e ngjarjes.

Në përfundim, Balla kërkoi mbajtjen e një minute heshtje në Kuvend në nderim të Enea Mekollit, i cili është shpallur Dëshmor i Atdheut. Kërkesa u pranua dhe seanca plenare nisi me homazhe për efektivin e rënë në krye të detyrës

/gj.m/j.p/

The post Balla: Sakrifica e efektivit Mekolli, moment reflektimi për respektin ndaj uniformës së policisë appeared first on Agjencia Telegrafike Shqiptare.

TIRANË, 4 qershor /ATSH/ Në kryeqytet u çel edicioni i dytë i festivalit ndërkombëtar “Bread & Heart”, një aktivitet unik i Shqipërisë Europiane që mbledh mbi 600 arkitektë, urbanistë, zhvillues dhe profesionistë të njohur nga Europa, Azia, Amerika e Veriut dhe Amerika Latine. Festivali shërben si një platformë për shkëmbimin e eksperiencave, diskutimin e sfidave të zhvillimit urban dhe social, si dhe për formulimin e ideve dhe politikave në mbështetje të transformimit të mëtejshëm të Shqipërisë.

Në fjalën e tij, Kryeministri Edi Rama theksoi rolin e arkitekturës si një instrument që shkon përtej ndërtimit të objekteve fizike, duke ndikuar mënyrën se si njerëzit jetojnë dhe bashkëjetojnë dhe duke vënë në dukje rëndësinë e gjetjes së ekuilibrit mes zhvillimit dhe mbrojtjes së natyrës.

Kryeministri deklaroi sot se Shqipëria po tërheq gjithnjë e më shumë arkitektë me famë botërore, duke u kthyer në një hapësirë referimi për zhvillimin urban dhe arkitekturën bashkëkohore ndërsa vlerësoi pjesëmarrjen e arkitektëve nga Europa, Azia, Amerika e Veriut dhe Amerika Latine, të cilët po kontribuojnë në projektet transformuese të vendit.

“Ajo që më duket e jashtëzakonshme sot, edhe më shumë sesa vitin e kaluar, nuk është fakti që kemi një numër më të madh arkitektësh profesionistë që vijnë në këtë festival. Por ka të bëjë me faktin që këtu nuk kemi vetëm disa arkitektë të mëdhenj, i kemi edhe ata, por arkitektë që vijnë nga të gjitha anët, nga Europa në Kinë, nga SHBA-ja në Amerikën Latine”, u shpreh Rama.

Kryeministri e cilësoi nder të veçantë praninë në festival të arkitektit të njohur botëror Santiago Calatrava, duke theksuar se dikur e konsideronte të pamundur praninë e tij në Shqipëri.

“Është nder i madh për mua që kam sot këtu dikë që edhe në ëndrrat e mia më të çmendura nuk mendoja se do ta shihja të vinte në Shqipëri”, tha Rama.

Ai vlerësoi gjithashtu rolin e zhvilluesve dhe investitorëve në afrimin e emrave më të rëndësishëm të arkitekturës ndërkombëtare në vend, duke nënvizuar rëndësinë e harmonizimit të zhvillimit urban me natyrën dhe hapësirat publike.

Rama ndau edhe një episod personal, duke treguar se kishte marrë një mesazh vlerësues nga një lider i një vendi të pasur jashtë Europës, pasi i kishte dërguar pamje nga festivali dhe projektet arkitekturore në Shqipëri.

“Sapo pa pamjet nga festivali dhe projektet, ai më shkroi: ‘Uau, Shqipëria. Duhet të ulemi një ditë dhe të më tregosh si e bën gjithë këtë pa para’”, tregoi Rama.

Festivali “Bread & Heart” mbledh në Tiranë arkitektë, urbanistë dhe zhvillues nga vende të ndryshme të botës për të diskutuar mbi sfidat e zhvillimit urban, arkitekturës moderne dhe transformimit të qyteteve.

/gj.m/j.p/

The post Rama në “Bread & Heart”: Shqipëria po bëhet pikë referimi për arkitekturën ndërkombëtare appeared first on Agjencia Telegrafike Shqiptare.

TIRANË, 3 qershor /ATSH/ Kryeministri Edi Rama publikoi sot një mesazh të dërguar nga një qytetar vlonjat për situatën në zonën e Zvërnecit sot.

Rama u shpreh se pamjet janë pasqyrë e qartë e realitetit të trishtë të parajsës që armiqtë e Shqipërisë Europiane, konkurrentët e Shqipërisë Turistike dhe të verbërit e “Shqipërisë së shqiptarëve” duan ta mbajnë të gjithë bashkë tamam kështu si është sot – siç do ta shihni vetë – tokë të ndotur e të paprekur nga tradhtia ime, që dua të sjell një investim 4 miliardë në funksion të një projekti që e kthen Vlorën në beben e syrit të turizmit në këtë anë të botës, ndërsa Shqipërinë e ngjit në Ligën e Kampionëve të turizmit botëror.

Rama theksoi se shpreson që tanimë t’u jetë pastruar gjaku nga helmi i luftës hibride online atyre të tijve, që u dëshpëruan prej një rreziku imagjinar.

“Përshëndetje Kryeministër! Jam vlonjat dhe pro investimit në Zvërnec. Mos ndalo. Po të nis një video dhe te lutem postoje. Behet fjale fiks për zonën ku njerëz te papërgjegjshëm qe dhe ndoshta janë ngritur në protestë e kanë katandisur zonën e mbrojtur si mos me keq. Kurse ata që erdhën për sherr dihet që e kane me ty jo me natyrën se po ta kishin për natyrën duhet të shanin pse është ber hale, jo pse do te hedhesh 4 miliardë që s’janë hedhur tërë historinë në anët tona. Shihe videon dhe nëse do mund të të nis dhe video të tjera të zonave ku mbrohen me ligj po nuk mbrohen dot nga njerëzit e liq pa tru qe sa me shumë plehra hedhin poshtë aq me tepër çirren me zërin lart. Të falënderoj nëse e merr në konsideratë këtë video dhe tregoja Shqipërisë se duan të sabotojnë zhvillimin qe e shëron këtë zonë. Bëje këtë zhvillim e vlonjatët do të të bekojnë në breza. Këta jo nuk e duan Shqipërinë aq sa thonë po e duan edhe pa te huaj qe ta kthejnë si Vlora para se ta merrje ti në dorë. Po të nis videon”

/gj.m/

The post Rama ndan pamjet nga Zvërneci: Pasqyrë e realitetit të trishtë të parajsës që armiqtë e Shqipërisë Europiane duan ta mbajnë kështu appeared first on Agjencia Telegrafike Shqiptare.

TIRANË, 3 qershor /ATSH/ Kombëtarja shqiptare është mposhtur me rezultatin 0-1 nga Izraeli në miqësoren e zhvilluar mbrëmjen e sotme në stadiumin “Air Albania”, duke i dhënë kështu një nisje jo pozitive epokës së re nën drejtimin e trajnerit italian, Rolando Maran.

Maran zgjodhi t’i besojë që nga minuta e parë Anis Mehmetit në repartin sulmues përkrah Armando Brojës, ndërsa pas tyre aktivizoi Qazim Laçin në rolin e trekuartistit.

Ndryshime pati edhe në portë, ku Alen Sherri mori fanellën e titullarit. Në mbrojtje u konfirmua rreshtimi i zakonshëm me Mario Mitajn në të majtë, Elseid Hysajn në të djathtë dhe dyshen Arlind Ajeti – Berat Gjimshiti në qendër.

Mesfusha u përbë nga Kristjan Asllani, Ylber Ramadani dhe Arbër Hoxha.

Shqipëria pati më shumë kontroll loje gjatë pjesës së parë, por pa arritur të krijojë raste të pastra për gol. I njëjti skenar u përsërit edhe në fraksionin e dytë, ku kuqezinjtë qarkulluan topin, por u treguan pak konkretë në fazën finale.

Gjatë pjesës së dytë, tekniku italian aktivizoi Nedim Bajramin, Mirlind Dakun, Shehun, Shendin, Hadrojin, Pajazitin dhe debutuesin Luis Hasa, i cili regjistroi minutat e para me fanellën kuqezi.

Megjithatë, ndryshimet nuk sollën efektin e dëshiruar dhe Izraeli arriti të gjejë golin e vetëm të takimit në minutën e 73-të me Gloukh, duke vulosur fitoren 0-1.

Pavarësisht humbjes, sfida shërbeu si një test i parë për Rolando Maran dhe një mundësi për të parë elementë të rinj në prag të angazhimeve të ardhshme të kombëtares.

Miqësorja Shqipëri-Izrael; fotoreporter Andrin Hoxha

1 nga 25

/gj.m/r.e/

The post Maran e nis me humbje aventurën kuqezi, Shqipëria mposhtet 0-1 nga Izraeli appeared first on Agjencia Telegrafike Shqiptare.

TIRANË, 3 qershor /ATSH/ Shqipëria dhe Izraeli janë ndarë në barazim 0-0 pas 45 minutave të para në stadiumin “Air Albania”, në sfidën miqësore të mbrëmjes së sotme që shënon debutimin e trajnerit italian Rolando Maran në pankinën kuqezi.

Pjesa e parë u karakterizua nga ritëm i mirë dhe disa tentativa nga të dyja skuadrat, por pa arritur të zhbllokohej rezultati. Shqipëria u shfaq më kërkuese në fazën sulmuese, me Kristjan Asllanin që provoi dy herë nga distanca në minutat 18 dhe 22, por pa gjetur kuadratin.

Një tjetër rast i mirë për kuqezinjtë erdhi në minutën e 10-të, kur Elseid Hysaj krosoi në zonë, ndërsa tentativa me kokë e Anis Mehmetit përfundoi mbi traversë. Në minutën e 43-të, Armando Broja depërtoi në zonë dhe provoi të godiste drejt portës, por u ndal nga mbrojtja izraelite.

Edhe Izraeli krijoi momente rreziku, ku më i spikaturi ishte ai i minutës së 15-të, kur Glukh provoi me një goditje të rrezikshme drejt shtyllës së largët, por pa gjetur portën.

Në fund të pjesës së parë, rezultati mbetet i pandryshuar 0-0, ndërsa pritet që pjesa e dytë të sjellë më shumë emocione në “Arena Kombëtare”.

Miqesorja Shqiperi-Izrael; fotoreporter Andrin Hoxha

1 nga 26

/gj.m/r.e/

The post Mbyllet 0-0 pjesa e parë e miqësores Shqipëri – Izrael appeared first on Agjencia Telegrafike Shqiptare.

TIRANË, 3 qershor /ATSH/ Komisioni i Posaçëm Parlamentar për Reformën Administrativo-Territoriale zhvilloi sot një seancë dëgjimore me kryetarët e bashkive të qarkut Vlorë, ku u diskutuan problematikat dhe efektet e reformës territoriale të vitit 2014, si dhe nevoja për përmirësime të mëtejshme.

Bashkëkryetari i Komisionit nga Partia Socialiste, Arbjan Mazniku, u shpreh se këto seanca kanë në fokus funksionimin e pushtetit vendor dhe sfidat që lidhen me kompetencat, financat dhe organizimin territorial.

“Këto seanca kanë në fokus kompetencat e bashkive, çfarë ka funksionuar dhe çfarë jo lidhur me kompetencat dhe funksionet, mundësinë për t’i zbatuar ato, aspektin financiar dhe kuadrin rregullator apo burimet njerëzore”, deklaroi Mazniku.

Sipas tij, një tjetër element i rëndësishëm i diskutimeve lidhet me financimin e pushtetit vendor dhe mekanizmat mbështetës për bashkitë.

“Fokusi është edhe tek financat, mekanizmat financiarë të bashkive, grantet. Kolona e tretë lidhet me territorin dhe qeverisjen e tij, si dhe ofrimin e shërbimeve eficente për qytetarët”, u shpreh ai.

Nga ana tjetër, bashkëkryetari i Komisionit nga Partia Demokratike, Luçiano Boçi, kritikoi mungesën në seancë të kryetarëve të bashkive Vlorë dhe Finiq.

“Kryetarët duhet të paraqiten përpara komisionit për të prezantuar situatën në bashkitë e tyre dhe duhet të vijnë patjetër përpara komisionit. Çdo shmangie është e papranueshme”, deklaroi Boçi.

Gjatë seancës dëgjimore, kryetari i Bashkisë Himarë, Vangjel Tavo, u shpreh se reforma administrativo-territoriale duhet të analizohet mbi bazën e disa indikatorëve kryesorë dhe jo vetëm nga këndvështrimi territorial.

“Kjo reformë administrativo-territoriale duhet të ketë parasysh disa indikatorë dhe më pas qëllimi politik është territori”, tha Tavo.

Sipas tij, elementi kryesor duhet të jetë shërbimi ndaj qytetarëve.

“Indikatorët kryesorë që duhet të ndjekim për të arritur në përfundimin e reformës janë së pari shërbimi ndaj komunitetit. Bashkitë misionin e tyre kanë shërbimin ndaj komunitetit”, deklaroi ai.

Tavo theksoi se funksionimi i pushtetit vendor lidhet ngushtë me kompetencat, financat dhe burimet njerëzore.

“Kjo është e lidhur ngushtë me kompetencat dhe me financat që duhet të ketë pushteti vendor, po ashtu edhe me kapacitetet njerëzore për të bërë detyrën e vet”, u shpreh ai.

Duke folur për reformën e vitit 2014, Tavo tha se ajo ka pasur ndikime pozitive në disa drejtime, edhe pse sipas tij ka ende vend për korrigjime.

“Sa i përket ndikimit të reformës administrative të 2014-ës, ka pasur ndikim pozitiv në shumë drejtime, ashtu siç ka vend për të rregulluar dhe korrigjuar”, deklaroi ai.

Ai shtoi se, megjithëse nuk e kishte mbështetur reformën në kohën kur u miratua, sot do ta votonte.

“Unë nuk e votova në 2014-ën këtë reformë, por sot që jam kryebashkiak do ta votoja”, tha Tavo.

Sipas tij, një nga efektet pozitive të reformës ishte bashkimi i njësive vendore që nuk kishin mundësi të mbijetonin financiarisht.

“Reforma e 2014-ës pati të mirë se bashkoi disa komuna që e kishin të pamundur të mbijetonin financiarisht”, u  shpreh Tavo.

Duke iu përgjigjur pyetjeve të deputetit Xhelal Mziu, kryetari i Bashkisë Himarë, Vangjel Tavo, u ndal te menaxhimi i emergjencave civile dhe zjarreve gjatë sezonit veror.

“Mbështetja për zjarrfikëset ka qenë mbresëlënëse. Himara vjet është përballur me një numër zjarresh që na gjeti deri diku të papërgatitur dhe nëse nuk do të ishte qeveria dhe emergjencat civile do të kishim dëme në prona dhe pasuri, por ndoshta edhe jetë njerëzore”, deklaroi Tavo.

Ai theksoi se ndërhyrja e institucioneve qendrore ka shmangur pasoja më të rënda.

“Ishte ndërhyrja e qeverisë që e evitoi këtë. Në Himarë ka ardhur disa herë helikopteri”, u shpreh ai.

Sipas Tavos, gjatë sezonit turistik duhet të shtohen kapacitetet e shërbimit zjarrfikës për shkak të rritjes së popullsisë.

“Tek zjarrfikëset duhet shtuar numri i forcave gjatë sezonit veror, sepse edhe numri i popullsisë shtohet gjatë sezonit veror”, tha ai.

Kryebashkiaku i Himarës u ndal edhe te investimet në arsim, duke përmendur rikonstruksionin e disa shkollave.

“Kemi rikonstruksionet e disa shkollave, shkollën e Himarës dhe të Dhërmiut, janë rikonstruktuar shkollat në Kuç, Vranisht, Lukovë etj.”, deklaroi Tavo.

Sa i përket sistemit arsimor parauniversitar, ai kërkoi më shumë kompetenca për pushtetin vendor.

“Patjetër që duhet të kemi më tepër kompetenca, jo vetëm në mirëmbajtje”, u shpreh ai.

Duke folur për reformën administrativo-territoriale, Tavo tha se kompetencat e pushtetit vendor duhet të jenë në përputhje me Kartën Europiane të Vetëqeverisjes Vendore.

“Kompetencat e pushtetit vendor duhet të zbatohen sipas Kartës që është ratifikuar nga parlamenti në vitin 1999. E kam votuar, kam qenë deputet”, tha ai.

Sipas Tavos, problematika kryesore nuk lidhet vetëm me territorin, por me financat dhe kompetencat.

“Ngërçi i reformës nuk vjen nga territori, por nga kompetencat dhe financat”, deklaroi ai.

Ai shtoi se bashkitë më të mëdha kanë më shumë mundësi financiare për të mbështetur zonat më të dobëta ekonomikisht.

“Sa më e madhe bashkia, aq më shumë mundësi ka të mbledhë të ardhura dhe të ndihmojë ato territore që nuk e mbajnë dot veten”, u shpreh Tavo.

Ndërkohë, kryetari i Bashkisë Sarandë, Oltion Çaçi, deklaroi se Saranda është ndër bashkitë me të ardhura më të larta për frymë në vend.

“Saranda është një nga qytetet me të ardhurat për frymë më të larta në Shqipëri”, tha ai.

Ai theksoi bashkëpunimin mes bashkive për menaxhimin e emergjencave gjatë verës.

“Ne kemi qenë në ndihmë të të gjitha bashkive, Konispolit, Delvinës. Kemi pasur bashkëpunim të shkëlqyer”, deklaroi Çaçi.

Sipas tij, rritja e fluksit turistik gjatë sezonit veror kërkon më shumë financime dhe shërbime.

“Ne 7-fishohemi gjatë verës dhe patjetër që ka nevojë për shërbime më të forta”, u shpreh ai.

Sa i përket menaxhimit të plazheve, Çaçi kërkoi që kjo kompetencë t’u kalojë bashkive.

“Menaxhimi i plazheve t’u kalojë bashkive dhe ka një dakordësi që bashkitë kanë resurset e duhura për t’i menaxhuar vetë plazhet”, tha ai.

Nga ana tjetër, kryebashkiaku i Delvinës, Besmir Veli, deklaroi se reforma territoriale ka sjellë rritje të buxhetit vendor dhe investimeve.

“Sot Bashkia Delvinë, në krahasim me periudhën para vitit 2014, ka një buxhet dyfish më të madh”, deklaroi ai.

Sipas Velit, funksionimi si bashki e madhe ka përmirësuar shërbimet dhe investimet në infrastrukturë.

“Ka pasur investime në infrastrukturë që, po të ishte komunë, do të duheshin vite për t’u realizuar”, tha ai.

Ai theksoi gjithashtu nevojën për rishikimin e formulës së financimit të bashkive.

“Patjetër që ka nevojë për rishikim të formulës së financimit të bashkive”, deklaroi Veli.

Duke iu referuar emergjencave civile, ai tha se Delvina ka përfituar mbështetje më të madhe financiare për përballimin e zjarreve.

“Delvina ka qenë e prekur nga zjarret dhe sot kemi 7-fishim të buxhetit për emergjencat civile krahasuar me një vit më parë”, u shpreh ai.

Ndwrsa kryetari i Bashkisë Selenicë, Nertil Bellaj, deklaroi gjatë seancës dëgjimore në Komisionin e Posaçëm Parlamentar për Reformën Administrativo-Territoriale se bashkia që ai drejton ka profil kryesisht bujqësor dhe blegtoral, me potencial edhe në turizmin malor.

“Bashkia e Selenicës është një bashki tipike bujqësore, blegtorale, me turizëm malor”, u shpreh Bellaj.

Duke folur për emergjencat civile dhe zjarret, ai theksoi se territori i bashkisë paraqet rrezik të shtuar për shkak të sipërfaqeve pyjore dhe tokave bujqësore.

“Bashkia jonë ka risk për shkak të territorit me pyje, fusha dhe vitet e fundit qeveria ka pasur fokus të veçantë tek emergjencat civile”, deklaroi ai.

Bellaj u ndal edhe te sektori i bujqësisë dhe investimet në sistemet vaditëse.

“Kemi bashki bujqësore dhe kemi të paktën mbi 15 mijë hektarë toka bujqësore dhe mbi 300 kilometra kanale. Tokat bujqësore, pjesa më e madhe sot janë duke u vaditur”, tha ai.

Sa i përket arsimit dhe infrastrukturës shkollore, kryebashkiaku i Selenicës vlerësoi investimet e realizuara gjatë viteve të fundit.

“Këto katër vite në Bashkinë e Selenicës ka pasur rikonstruksion total të shkollave të mesme. Nuk ka asnjë shkollë që ka mbetur pa ndërhyrë”, deklaroi Bellaj.

Sipas tij, këto investime janë realizuar falë bashkëpunimit mes pushtetit vendor dhe qeverisë qendrore.

“Kjo është bërë falë mbështetjes së qeverisë në bashkëpunim me bashkinë”, u shpreh Bellaj.

Kryetari i Bashkisë Konispol, Ergest Dule, deklaroi se fokusi duhet të jetë forcimi i bashkive me më shumë burime financiare dhe kapacitete administrative.

“Jemi këtu që Konispolin dhe bashkitë si ai t’i bëjmë më të fuqishme, me më shumë burime, me më shumë kapacitete”, u shpreh Dule.

Ai theksoi se statusi i Konispolit si bashki nuk duhet të vihet në diskutim, duke nënvizuar rëndësinë historike dhe simbolike të kësaj zone.

Dule kujtoi se Konispoli ka ekzistuar si njësi administrative edhe përpara reformës territoriale të vitit 2015.

“Konispoli nuk është bashki e krijuar që nga viti 2015, por ka qenë aty”, tha ai.

Sipas tij, pas reformës administrativo-territoriale, bashkia ka njohur përmirësime të ndjeshme në infrastrukturë dhe shërbime.

“Pas vitit 2015 punët në Konispol kanë ecur për mirë. Ujë 24 orë, rrugë dhe drita; në Konispol nuk kemi çfarë të ofrojmë më përveçse një aksi rrugor rural”, u shpreh Dule.

Ai u ndal edhe te investimet në arsim, duke theksuar rikonstruksionin e shkollave dhe mbështetjen për nxënësit.

“Në arsim, tre shkollat janë të rikonstruktuara me terrene sportive dhe nxënësit transportohen falas”, deklaroi kryebashkiaku i Konispolit.

/gj.m/

The post Dëgjesë me kryebashkiakët e Vlorës për Reformën Territoriale, kërkesa për kompetencat dhe financat appeared first on Agjencia Telegrafike Shqiptare.

TIRANË, 3 qershor /ATSH/ Kryetari i Partisë Demokratike, Sali Berisha deklaroi sot, gjatë mbledhjes së grupit parlamentar, se PD mbështet plotësisht investimet e huaja në vend, duke u ndalur veçanërisht tek investimi në Zvërnec.

Berisha theksoi se çështja e Zvërnecit është bërë, sipas tij, një debat me përmasa kombëtare dhe ndërkombëtare, ndërsa paraqiti qëndrimin e opozitës për këtë çështje.

“Prej disa ditësh është shndërruar në çështje kombëtare dhe ndërkombëtare problemi i Zvërnecit. Kërkoj nga ju mirëkuptimin të kthehemi dy apo tre vite më parë kur është dhënë lajmi, që kompania “Affinity” e dhëndrit të ish-presidentit amerikan Trump në atë kohë, se nuk ishte në pushtet, ka treguar interes të veçantë dhe do të investojë në Sazan dhe Zvërnec, në atë kohë u tha 2 miliardë a diçka e kësaj natyre. Reagimi im ndaj këtij lajmi ka qenë ky: Pavarësisht se ai ishte në opozitë, plotësisht dakord. Pse? Që të jemi të hapur me ju. Kam thënë vetëm një fjalë, sepse i ka paratë”, deklaroi ai.

Berisha shtoi se, sipas tij, qëndrimi mbështetës ka ardhur nga vlerësimi për kapacitetin financiar të investitorëve.

“Sepse thuhej që Fondi Saudit i investimeve janë fondet publike të investimeve, është fond trilioner. Ai ka triliona dhe natyrisht paratë ishin. Unë, arsyeja bazë pse kam thënë po, ka qenë kjo dhe e kam lidhur me paratë”, tha ai.

“Me këtë unë absolutisht nuk kisha asnjë dyshim se Edi Rama po blinte influenca politike. Nuk dyshoja fare në këtë. Por përsëri për mua interesi kombëtar dilte mbi këtë”, tha ai.

Duke iu referuar zhvillimeve të mëparshme, Berisha pretendoi se disa projekte të tjera investimi janë penguar.

“Investimi pasi ishte përzënë kompania “Omnix”, për të cilën ndjeja këtë keqardhjen më të madhe, që kishte të përgatitur 1,5 miliardë euro investime në Gjirin e Lalëzit dhe e përzuri, e kam marrë vesh mbrapa, mafia shqiptare”, tha Berisha.

Në vijim, kreu i PD-së u ndal te projekti në Sazan, duke theksuar se nuk bëhet fjalë për një investim të thjeshtë.

“Për sa i përket ishullit, ata që qajnë elitarët e Sazanit, ata janë një grup hipokritësh, për të cilët le të derdhin lot krokodili sa të duan, se Sazani në mënyrë absolute, se jam marrë vetë direkt, edhe paraardhësi im është marrë, Fatos Nano, ua kemi ofruar investitorëve dhe nuk është një investim i thjeshtë. Asgjë nuk prishet aty”, tha ai.

Duke krahasuar dy zonat, Berisha u shpreh se Zvërneci është tokë private dhe e banueshme, ndërsa përsëriti qëndrimin e tij pro investimeve të huaja.

“Sazani është tokë publike. Zvërneci është tokë private në tërësinë e saj. Është e banueshme, kanë banuar. Dakord. Pra, ne mbështesim investimin e huaj”, theksoi Berisha.

Kreu i PD-së vuri në dukje se “ky zotëria në këtë proces që duhet të ishte një zhvillim, ta quajmë festiv për shqiptarët, që investoheshin dy miliardë apo tre miliardë sa thotë tani, ky e ka shtruar këtë në procesin më të mbyllur. Pavarësisht se si e ndryshon ti ligjin, aty është peizazh i mbrojtur”.

Sipas tij, qeveria duhet të ulet “me mjedisorët dhe do u japësh garanci. Do t’u thuash që ju nuk jeni që të ndërtohet fare, ne do ndërtojmë në përputhje me standardet e Bashkimit Europian. Kjo zonë e bën Shqipërinë të famshme në botë. Absolutisht e bën. Jua them unë, se është një zonë fantazi natyrore. Është një mrekulli, mrekulli. Po e bën të famshme me kusht që mos ta shëmtosh, mos ta shkatërrosh, me kusht që ta zhvillosh në përputhje me të gjitha kushtet”.

Sa i përket çështjes së pronësisë, kreu i PD-së tha se “dy burime më thonë, që në qoftë se merr pretendimet e njerëzve për pronësi në atë zonë, t’i marrësh të gjitha në sipërfaqe bëhen nja 28 mijë kilometra katrorë. Aty s’ka njeri që i zgjidh çështjet e pronësisë sepse kanë ndryshuar 17 drejtorë kadastre në Vlorë”.

“Atëherë, aty duhet të jetë shteti që duhet të garantojë. Nuk i thuhet fare siç thotë ai që ‘unë jua ktheva këtë projekt’. Qeveria ka detyrim. Kur vendos, të thotë ‘ndërtimet në këtë zonë, peizazh natyror, do bëhen në përshtatje të plotë me peizazhin'”, u shpreh Berisha.

/gj.m/r.e/ /a.g/

The post Berisha: Shteti duhej të ishte garanti në Zvërnec, ndërtimet të bëhen sipas standardeve të BE-së appeared first on Agjencia Telegrafike Shqiptare.

TIRANË, 3 qershor /ATSH/ Ministri për Evropën dhe Punët e Jashtme, Ferit Hoxha priti pranë misionit të Republikës së Shqipërisë në Bashkimin Evropian, në Bruksel, Komisioneren për Zgjerimin, Marta Kos, përfaqësues të vendeve anëtare dhe të institucioneve kryesore të BE, në një ceremoni falënderimi, në përfundim të Konferencës së tetë Ndërqeveritare dhe rezultateve pozitive të arritura nga Shqipëria me miratimin e raportit IBAR.

Gjatë takimit, Komisionerja Kos theksoi se arritje të tilla si të Shqipërisë në rrugën drejt anëtarësimit, janë rezultat i shumë viteve pune të palodhur.

Sipas Kos, asnjë vend tjetër kandidat nuk ka bërë kaq shumë në këtë proces, me kaq vendosmëri dhe me kaq shumë mbështetje nga qytetarët e vet.

“Dhe pikërisht këtu dua të vlerësoj punën tuaj, Ferit. Arritje të tilla nuk realizohen brenda një muaji apo një viti. Ato janë rezultat i shumë viteve pune të palodhur. Sigurisht, jo gjithçka është përfunduar ende, por ky nuk është qëllimi. Qëllimi i procesit të anëtarësimit është që, kur të arrini në fund të tij, të jeni plotësisht të përgatitur”, vuri në dukje Kos në bisedë me kryediplomatin shqiptar.

“Prandaj, kur dikush dyshon se Shqipëria është vërtet ndër vendet me performancën më të mirë, përgjigjja ime është e thjeshtë: më tregoni një vend tjetër që ka bërë kaq shumë, me kaq vendosmëri dhe me kaq mbështetje nga qytetarët e vet. Asnjë vend tjetër kandidat nuk e ka bërë këtë. Prandaj, ju lutem, vazhdoni në këtë rrugë”, deklaroi Kos.

Në ceremoni, ministri Hoxha deklaroi se Konferenca Ndërqeveritare ishte një moment i vërtetë historik për Shqipërinë dhe se me miratimin e IBAR, tashmë kemi konfirmimin se puna që po bëhet në Shqipëri është serioze, e besueshme dhe efektive.

Hoxha falënderoi Komisioneren Kos dhe çdo koleg në shërbimet e Komisionit Evropian që kanë kontribuar në këtë proces thelbësor për Shqipërinë.

/gj.m/j.p/

The post Kos e ftuar në misionin shqiptar pranë BE-së: Asnjë vend tjetër kandidat nuk ka bërë kaq shumë sa Shqipëria appeared first on Agjencia Telegrafike Shqiptare.

TIRANË, 3 qershor /ATSH/ Kryetari i Partisë Demokratike, Sali Berisha deklaroi sot në mbledhjen e grupit parlamentar se, Partia Demokratike hyn në një etapë të re pas Kuvendit Kombëtar, duke theksuar se prioritetet kryesore të kësaj faze janë “ripërtëritja, vizioni, modernizimi dhe organizimi”.

“Ne pas Kuvendit Kombëtar hyjmë në një etapë të re. Në një kohë të re në të cilën kërkohet që çdonjëri prej nesh të përsërisë nga mëngjesi në darkë, jo një, por qindra herë fjalën: ripërtëritje, vizion, modernizim, organizim”, u shpreh Berisha.

Ai theksoi se kjo platformë duhet të udhëheqë punën e çdo drejtuesi dhe deputeti të partisë, duke e cilësuar si rrugën e vetme për përmbushjen e misionit politik të PD-së.

“Rruga e vetme e përmbushjes së misionit tonë kalon në këto drejtime. Kilometri i fundit i maratonës sonë do mund të përshkohet me sukses vetëm atëherë kur ne, në radhë të parë ne si deputetë, pas të gjithash ne si deputetë, ne si drejtues dhe më pas drejtuesit dhe anëtarët e Partisë Demokratike në çdo nivel, do ndalen t’i përsërisin vetes këtë moto”, deklaroi ai.

Berisha theksoi se opozita duhet të forcojë veprimin politik dhe organizativ përballë qeverisë.

“Kjo është rruga e sigurt që ne të përballemi me sukses me pushtetin dhe regjimin e kalbur të Edi Ramës. Kjo është rruga e sigurt e transformimit të opozitës, e vitalizimit të saj, e mbjelljes kudo të shpresës për shqiptarët”, u shpreh ai.

Sipas tij, objektivi final mbetet rikthimi i votës së lirë dhe fitorja elektorale.

“Rruga e cila çon Partinë Demokratike në përmbushje të plotë të misionit të saj, rikthimit të votës së lirë dhe fitores së saj në zgjedhjet e përgjithshme”, tha Berisha.

Ai nënvizoi se opozita duhet të rrisë komunikimin publik dhe të mbrojë programin e saj politik.

“Nuk janë dhe nuk do të jetë askush tjetër përveç nesh që do zhvillojmë, do promovojmë vizionin e kësaj partie. Nuk është askush tjetër përveç nesh që do modernizojë në çdo segment këtë parti. Nuk është askush tjetër përveç nesh që do riorganizojë plotësisht Partinë Demokratike”, deklaroi kreu i PD-së.

Berisha theksoi gjithashtu nevojën për përkthimin e problematikave të qytetarëve në nisma konkrete ligjore.

“Ne duhet të transkriptojmë në ligje, të gjitha problematikat e mëdha me të cilat përballen qytetarët, me të cilat përballen prodhuesit, me të cilat përballen fermerët”, tha ai.

Ai solli si shembull edhe kostot për bizneset, duke u shprehur.

“A mund ta imagjinoni ju se çfarë gjobë të tmerrshme iu marrin atyre për ambalazhet? Vetëm për ambalazhin, për arkat. Një sistem hajdutësh, i shndërruar në rregulla se si e si të rëndojnë mbi ta”, tha Berisha.

Berisha tha se, opozita do të hyjë në një fazë të re veprimi politik.

“Ndaj dhe ne kemi këtë platformë dhe mbi bazën e saj opozitarizmin në Shqipëri do ta ngremë në një nivel të ri, të paparë ndonjëherë më parë”, u shpreh Berisha.

/gj.m/j.p/

The post Berisha me grupin parlamentar: Problematikat e qytetarëve të përkthehen në nisma konkrete ligjore appeared first on Agjencia Telegrafike Shqiptare.

TIRANË, 3 qershor /ATSH/ Kryetari i Kuvendit, Niko Peleshi, në ndalesën e dytë të turit të diplomacisë parlamentare në vendet baltike, vijoi me vizitën zyrtare në Letoni, ku u prit nga kryetarja e Parlamentit të Letonisë (Saeima), Daiga Mieriņa.

Gjatë takimit u diskutua mbi marrëdhëniet dypalëshe, procesin e integrimit europian të Shqipërisë, sigurinë europiane dhe euroatlantike, mbështetjen për Ukrainën, si dhe mundësitë për zgjerimin e bashkëpunimit mes dy vendeve.

Peleshi shprehu mirënjohjen për mbështetjen e vazhdueshme dhe të fuqishme të Letonisë për anëtarësimin e Shqipërisë në Bashkimin Europian, duke theksuar se integrimi europian mbetet një prioritet kombëtar që gëzon konsensus të gjerë politik e parlamentar, si dhe mbështetjen e mbi 90 për qind të qytetarëve shqiptarë.

Ai vlerësoi gjithashtu faktin se Presidenca letoneze e Bashkimit Europian në vitin 2028 do të përkojë me një moment të rëndësishëm për rrugëtimin europian të Shqipërisë.

Duke u ndalur te zhvillimet në rajon, kryetari i Kuvendit theksoi se stabiliteti dhe perspektiva europiane e Ballkanit Perëndimor përbëjnë një kontribut të drejtpërdrejtë për sigurinë dhe paqen në Europë.

Ai nënvizoi se prania e NATO-s në rajon mbetet jetike për ruajtjen e stabilitetit dhe sigurisë, ndërsa Shqipëria dhe Letonia, edhe pse vende të vogla, japin një kontribut të rëndësishëm si aleatë të besueshëm në Aleancë.

Nga ana e saj, Kryetarja e Parlamentit të Letonisë, Daiga Mieriņa, rikonfirmoi mbështetjen e vendosur të vendit të saj për zgjerimin e Bashkimit Europian, duke e cilësuar atë një objektiv strategjik të BE-së në kushtet e sfidave të sotme gjeopolitike.

Ajo theksoi se Letonia do të vazhdojë të mbështesë anëtarësimin sa më të shpejtë të Shqipërisë dhe integrimin europian të vendeve të Ballkanit Perëndimor.

Kryetarja Mieriņa vlerësoi progresin e Shqipërisë në rrugën drejt Bashkimit Europian dhe nënvizoi rëndësinë e vazhdimit të bashkëpunimit mes vendeve tona në përballjen me fushatat dezinformuese dhe kërcënimet hibride. Ajo vlerësoi kontributin e Shqipërisë dhe riafirmoi mbështetjen e Letonisë për Ukrainën dhe theksoi nevojën për ruajtjen e unitetit euroatlantik përballë sfidave të sigurisë.

Dy homologët vlerësuan gjithashtu bashkëpunimin e ngushtë mes dy vendeve në kuadër të NATO-s. Mieriņa shprehu vlerësimin për kontributin e Shqipërisë në Aleancë dhe veçanërisht për praninë e forcave shqiptare në Letoni, në kuadër të forcimit të krahut lindor të NATO-s.

Gjatë takimit u diskutua edhe për zgjerimin e bashkëpunimit parlamentar dhe dypalësh në fusha me interes të përbashkët, si arsimi, turizmi, ekonomia dhe kontaktet mes qytetarëve, me synimin për t’i dhënë një dimension edhe më konkret marrëdhënieve shumë të mira mes Shqipërisë dhe Letonisë.

Në Saeima, Peleshi zhvilloi gjithashtu takime me Kryetaren e Komisionit për Çështjet e Jashtme, Ināra Mūrniece, dhe Kryetarin e Komisionit për Çështjet e Bashkimit Europian, Edmunds Cepurītis.

Në fokus të diskutimeve ishin aspektet politike dhe teknike të procesit të anëtarësimit të Shqipërisë në Bashkimin Europian, mbështetja parlamentare dhe publike në shtetet anëtare, intensifikimi i diplomacisë parlamentare, si dhe roli i Letonisë si një prej mbështetëseve më aktive të politikës së zgjerimit të BE-së.

Vizita në Letoni konfirmoi nivelin e shkëlqyer të marrëdhënieve mes dy vendeve dhe mbështetjen e palëkundur të Rigës për integrimin europian të Shqipërisë. Ajo dëshmoi gjithashtu angazhimin e përbashkët për forcimin e partneritetit në NATO, mbështetjen për Ukrainën dhe zgjerimin e bashkëpunimit në fusha me interes të përbashkët.

1 nga 14

/gj.m/j.p/

The post Peleshi në Letoni: Mbështetje e fortë për Shqipërinë dhe Ballkanin Perëndimor në rrugën drejt BE-së appeared first on Agjencia Telegrafike Shqiptare.

TIRANË, 3 qershor /ATSH/ Presidenti i Partisë së Lirisë, Ilir Meta, ka dalë sërish këtë të martë nga ambientet e paraburgimit, pasi ka marrë leje për disa orë për të pritur ngushëllimet për babanë e tij të ndjerë, pranë një hoteli në kryeqytet.

Meta shoqërohej nga efektivë të Policisë së Burgjeve, ndërsa jashtë ambienteve ku po zhvilloheshin homazhet u prit nga mbështetës, bashkëpunëtorë dhe figura politike.

Në ngushëllime mori pjesë edhe kryetari i Partisë Demokratike dhe ish-kryeministri Sali Berisha, i cili komentoi edhe procesin gjyqësor ndaj Metës.

Berisha e cilësoi procesin ndaj ish-Presidentit të Republikës si “një farsë të turpshme”, duke pretenduar se akuzat ndaj tij janë të pabazuara dhe me motive politike.

“Është një farsë e turpshme, e mbajtur gjallë me falsitete dhe si zbatim i porosisë së Edi Ramës”, deklaroi Berisha para mediave.

Ai u bëri thirrje mediave që të hetojnë dokumentacionin e çështjes, duke pretenduar se akuzat ndaj Metës “nuk kanë substancë”.

“Edhe njëherë u them, asnjëra prej akuzave nuk ka absolutisht substancë”, u shpreh Berisha.

Berisha gjithashtu shtoi se, “Meta është një i burgosur politik”.

/gj.m/j.p/

The post Berisha: Procesi gjyqësor ndaj Metës, farsë e turpshme appeared first on Agjencia Telegrafike Shqiptare.

TIRANË, 3 qershor /ATSH/ Anëtarët e Komisionit për Çështjet e Brendshme dhe të Mbrojtjes të Kuvendit, Agron Malaj dhe Bujar Rexha, morën pjesë në takimin vjetor të komisioneve parlamentare të Sigurisë dhe Mbrojtjes të vendeve të Evropës Juglindore, i zhvilluar në Zagreb, Kroaci.

Aktiviteti u organizua nga Parlamenti i Kroacisë, RACVIAC, DCAF dhe OSCE ODIHR, duke mbledhur deputetë, ekspertë dhe përfaqësues të institucioneve të sigurisë nga vendet e rajonit.

Gjatë punimeve të takimit u diskutuan zhvillimet më të fundit në mjedisin e sigurisë në Evropën Juglindore dhe më gjerë, sfidat e reja që lidhen me stabilitetin rajonal, kërcënimet hibride, sigurinë kibernetike, si dhe nevoja për forcimin e bashkëpunimit ndërmjet vendeve të rajonit në përballimin e sfidave të përbashkëta.

Një vëmendje e veçantë iu kushtua rolit të parlamenteve në mbikëqyrjen demokratike të sektorit të sigurisë dhe mbrojtjes, forcimit të mekanizmave të kontrollit parlamentar, si dhe rritjes së transparencës dhe llogaridhënies së institucioneve përgjegjëse për sigurinë kombëtare.

Pjesëmarrja në këtë forum rajonal shërbeu si një mundësi e rëndësishme për shkëmbimin e përvojave dhe praktikave më të mira parlamentare, si dhe për forcimin e bashkëpunimit ndërparlamentar.

/gj.m/j.p/

The post Deputetët shqiptarë marrin pjesë në takimin rajonal të komisioneve të Sigurisë dhe Mbrojtjes në Zagreb appeared first on Agjencia Telegrafike Shqiptare.

TIRANË, 2 qershor /ATSH/ Ministri për Evropën dhe Punët e Jashtme, Ferit Hoxha, zhvilloi në Bruksel një takim me kryetaren e Komisionit të Punëve të Jashtme të Dhomës së Përfaqësuesve, Els Van Hoof, ku në fokus ishte forcimi i mëtejshëm i marrëdhënieve mes Shqipëria dhe Belgjika.

Në një postim në platformën X, Hoxha e cilësoi takimin si një shkëmbim shumë të mirë idesh mbi bashkëpunimin dypalësh dhe perspektivën evropiane të rajonit.

Ministri shprehu mirënjohjen për mbështetjen e vazhdueshme të Belgjikës ndaj procesit të zgjerimit të Bashkimi Evropian dhe në veçanti ndaj procesit të anëtarësimit të Shqipërisë në BE.

“Përcolla vlerësimin e sinqertë të Shqipërisë për mbështetjen e vazhdueshme të Belgjikës për zgjerimin e BE-së dhe, në veçanti, për procesin tonë të anëtarësimit në BE, si dhe për bashkëpunimin konstruktiv dypalësh që është thelluar vazhdimisht gjatë viteve”, shkroi Hoxha.

Sipas Hoxhës, gjatë takimit u diskutua rëndësia e ruajtjes së një dialogu të fortë dhe të rregullt politik, si dhe zgjerimi i shkëmbimeve parlamentare mes dy vendeve.

“Diskutimi ynë e pati theksin në rëndësinë e ruajtjes së një dialogu të fortë dhe të rregullt politik, duke përfshirë edhe shkëmbimet e zgjeruara parlamentare, të ankoruara në angazhimin tonë të përbashkët për një Evropë më të fortë dhe të udhëhequr nga një qasje praktike dhe e orientuar drejt rezultateve”, tha Hoxha.

Ai theksoi se diplomacia parlamentare luan një rol të rëndësishëm në forcimin e mirëkuptimit të ndërsjellë, mbështetjen e reformave dhe afrimin e institucioneve dhe shoqërive të dy vendeve.

“Diplomacia parlamentare ka një rol të rëndësishëm për të luajtur në nxitjen e mirëkuptimit të ndërsjellë, mbështetjen e proceseve të reformave dhe afrimin e institucioneve dhe shoqërive tona”, theksoi Hoxha.

Palët shkëmbyen gjithashtu pikëpamje mbi procesin e zgjerimit të BE-së dhe rëndësinë strategjike të Ballkani Perëndimor për sigurinë, stabilitetin dhe prosperitetin e Evropës.

Hoxha ritheksoi vendosmërinë e Shqipërisë për të vijuar avancimin e reformave dhe për të ecur përpara me negociatat e anëtarësimit në Bashkimin Evropian.

“Shkëmbyem pikëpamje mbi momentumim e ripërtërirë të zgjerimit të BE-së dhe rëndësinë strategjike të Ballkanit Perëndimor për sigurinë, stabilitetin dhe prosperitetin e Evropës. Në këtë kontekst, nënvizova vendosmërinë e Shqipërisë për të vazhduar avancimin e axhendës së saj të reformave dhe për të ecur përpara me vendosmëri në negociatat e anëtarësimit”, nënvizoi ministri.

Në përfundim, ministri shqiptar shprehu vlerësim për angazhimin dhe lidershipin e Els Van Hoof, duke theksuar pritshmërinë për ta përkthyer dialogun konstruktiv në nisma konkrete që forcojnë më tej marrëdhëniet shqiptaro-belge.

1 nga 4

/gj.m/j.p/

The post Hoxha në Bruksel: Shqipëria dhe Belgjika të thellojnë dialogun politik dhe bashkëpunimin parlamentar appeared first on Agjencia Telegrafike Shqiptare.

TIRANË, 2 qershor /ATSH/ Presidenti i Këshillit Europian, António Costa vlerësoi sot progresin e Shqipërisë në procesin e integrimit evropian dhe ritheksoi mbështetjen e Bashkimit Evropian për zgjerimin.

Në një konferencë të përbashkët me kryeministrin Edi Rama në Kryeministri, Costa vlerësoi angazhimin e Shqipërisë në procesin e anëtarësimit në BE.

“Sot vlerësoj dhe përgëzoj vendosmërinë e Shqipërisë dhe përpjekjet e saj për t’u bërë shtet anëtar i BE-së dhe në veçanti rolin tuaj, Edi, një rol aspak i vogël sigurisht, dhe angazhimin tuaj personal në këtë proces”, u shpreh Costa.

Ai theksoi se progresi i vendit është reflektuar edhe në rezultatet e fundit të procesit të negociatave.

“Javën e shkuar, ashtu siç u konfirmua edhe në Konferencën Ndërqeveritare, ne pamë ecurinë e Shqipërisë dhe Shqipëria në fakt ka përmbushur piketat e ndërmjetme për grupkapitullin e parë të çështjeve themelore”, deklaroi Presidenti i Këshillit Europian.

Sipas tij, kjo dëshmon vlerësimin e shteteve anëtare për reformat e ndërmarra nga Shqipëria.

“Kjo tregon se shtetet anëtare kanë kuptuar dhe vlerësuar angazhimin e Shqipërisë për të vijuar dhe për të ecur përpara më tej në anëtarësimin dhe rrugëtimin e saj drejt BE-së”, tha Costa.

Ai shtoi se procesi i integrimit po hyn në një fazë më kërkuese, ku fokusi do të jetë zbatimi i reformave.

“Ky është fillimi i një faze të re, një faze tjetër e cila është impenjative, e cila do të përqendrohet tek çështja e zbatimit dhe tek historiku që do të ketë Shqipëria”, u shpreh ai.

Costa theksoi gjithashtu rëndësinë e reformave në funksion të forcimit të institucioneve demokratike.

“Këto reforma, më shumë sesa kushte të vendosura nga BE, janë në fakt zgjedhje nga ana juaj për të ndërtuar institucione të forta demokratike. Kjo do të thotë një angazhim i vazhdueshëm, i prekshëm politik për sundimin e ligjit dhe për ruajtjen e një gjyqësori të pavarur dhe llogaridhënës”, deklaroi ai.

Ai inkurajoi gjithashtu intensifikimin e përpjekjeve në luftën kundër korrupsionit dhe krimit të organizuar.

“Ju inkurajoj që të përshpejtoni përpjekjet tuaja për luftën kundër korrupsionit dhe krimit të organizuar”, u shpreh Costa.

Presidenti i Këshillit Europian vlerësoi BE-në si partnerin më të rëndësishëm të rajonit.

“BE është në fakt partneri më i besueshëm i Ballkanit Perëndimor dhe i Shqipërisë. Është investuesi kryesor dhe partneri më i rëndësishëm tregtar”, tha ai.

Ai përmendi gjithashtu procesin gradual të integrimit të Shqipërisë në tregun evropian.

“BE mbështet ecurinë e Shqipërisë që Shqipëria të jetë një vend i begatë i sigurt, me anë të projekteve konkrete dhe politikave të tilla, si për shembull qasja që ju tashmë keni në zonën SEPA të pagesës në euro. Ju ndërkohë në formë graduale po integroheni në tregun unik të BE-së, në programin e roamingut apo në skemën “zbulo hekurudhën e BE””, u shpreh Costa.

Duke folur për rëndësinë strategjike të zgjerimit, ai theksoi se procesi shkon përtej dimensionit ekonomik.

“Anëtarësimi në BE është shumë më shumë sesa thjesht të jesh pjesë e tregut unik. Do të thotë që ti bëhesh pjesë e një bashkimi politik i cili është ndërtuar në bazë të disa vlerave të përbashkëta dhe zgjedhjeve të rëndësishme strategjike”, deklaroi Costa.

Sipas tij, në kontekstin aktual ndërkombëtar, zgjerimi i BE-së merr edhe një dimension gjeostrategjik.

“Në këtë kohë plot pasiguri gjeopolitike në mbarë globin dhe pa stabilitet ekonomik, më shumë sesa mundësi zgjerimi është gjithashtu një domosdoshmëri gjeostrategjike për Evropën. Është investim për paqen, stabilitetin dhe sigurinë e kontinentit tonë”, tha ai.

Në përmbyllje, Costa njoftoi edhe takimin e radhës me liderët e rajonit.

“Me këtë rast unë me kërshëri pres që të ritakohemi shumë shpejt në samitin e përbashkët BE–Ballkani Perëndimor, të premten e kësaj jave në Tivat”, u shpreh presidenti i Këshillit Europian, António Costa.

Konferencë e përbashkët Rama-Costa në Tiranë, foto: Andrin Hoxha

1 nga 20

/gj.m/j.p/r.e/

The post Costa: Shqipëria përmbushi piketat e ndërmjetme për çështjet themelore, integrimi hyn në fazë më kërkuese appeared first on Agjencia Telegrafike Shqiptare.

TIRANË, 2 qershor /ATSH/ Kombëtarja U-21 vijon përgatitjet në Durrës në kuadër të dy ndeshjeve miqësore të muajit qershor ndaj Sllovenisë U-21 dhe Italisë U-21.

Nën drejtimin e trajnerit Alban Bushi dhe stafit teknik, kuqezinjtë janë stërvitur rregullisht gjatë këtyre ditëve, duke punuar për të qenë sa më të përgatitur për dy sfidat e rëndësishme ndërkombëtare.

Pasditen e sotme, ekipi do të zhvillojë seancën e fundit stërvitore në Durrës, ndërsa nesër do të udhëtojë drejt Italisë.

Përballja e parë, Slloveni U-21 – Shqipëri U-21, do të zhvillohet më 5 qershor, në orën 20:15, në stadiumin “Ajdovščina”.

Tre ditë më vonë, më 8 qershor, kuqezinjtë do të sfidojnë Italinë U-21. Takimi Itali U-21 – Shqipëri U-21 është programuar të nisë në orën 18:15 dhe do të luhet në stadiumin “Omero Tognon”.

Dy ndeshjet miqësore do t’i shërbejnë stafit teknik për të vlerësuar gjendjen e grupit dhe për të vijuar përgatitjet në kuadër të kampionatit Europian U-21 2027.

1 nga 6

/gj.m/j.p/

The post Miqësoret e qershorit ndaj Sllovenisë dhe Italisë, Kombëtarja U-21 vijon përgatitjet në Durrës appeared first on Agjencia Telegrafike Shqiptare.

TIRANË, 2 qershor /ATSH/ Ministri për Evropën dhe Punët e Jashtme, Ferit Hoxha, zhvilloi në Bruksel takime me deputetët me prejardhje shqiptare në Parlamentin Evropian dhe Raportuesin për Shqipërinë, Andreas Schieder.

Në një postim në platformën X, Hoxha vlerësoi takimin si një mundësi të rëndësishme për shkëmbim pikëpamjesh mbi ecurinë e negociatave të anëtarësimit të Shqipëria në Bashkimi Evropian, si dhe për forcimin e bashkëpunimit institucional.

“Gjithmonë një mundësi e çmuar për t’u takuar dhe për të shkëmbyer pikëpamje me anëtarët e Parlamentit Evropian mbi çështjet që lidhen me zgjerimin e BE-së dhe dinamikën më të gjerë që formëson axhendën politike të Evropës. Isha veçanërisht i kënaqur të takohesha me Raportuesin për Shqipërinë në Parlamentin Evropian, Andreas Schieder, si dhe me deputetët suedezë Arba Kokalari dhe Adnan Dibrani, të dy me prejardhje shqiptare dhe shembuj frymëzues të integrimit të suksesshëm, angazhimit qytetar dhe shërbimit publik në shoqëritë evropiane të hapura, demokratike dhe gjithëpërfshirëse”, shkroi Hoxha.

Hoxha e falënderoi Raportuesin Schieder për punën e tij të shkëlqyer në udhëheqjen e procesit mbi raportin mbi Shqipërinë, të miratuar muajin e kaluar në Komitetin e Parlamentit Evropian për Punët e Jashtme.

Ai u shpreh veçanërisht i kënaqur për takimet me eurodeputetët me prejardhje shqiptare, Arba Kokalari dhe Adnan Dibrani, të cilët, sipas tij, përfaqësojnë një shembull të suksesshëm të integrimit dhe angazhimit qytetar në shoqëritë evropiane.

Hoxha u shpreh se “ky takim ishte gjithashtu një rast për të njohur, përtej punës dhe kontributit të tyre si deputetë, rrugëtimin personal dhe profesional të Arbës dhe Adnanit, që pasqyrojnë jo vetëm kontributin e vlefshëm që japin shqiptarët në të gjithë Evropën, por edhe mundësitë që ofrojnë shoqëritë e lira dhe demokratike për individët që janë të përkushtuar ndaj punës së palodhur, pjesëmarrjes dhe përsosmërisë”.

“Ato qëndrojnë si një dëshmi e fuqishme e lidhjeve të forta njerëzore të Shqipërisë me Evropën dhe për rolin pozitiv që luajnë komunitetet e diasporës në forcimin e mirëkuptimit të ndërsjellë, bashkëpunimit dhe vlerave të përbashkëta evropiane”, theksoi Hoxha.

“Suksesi i tyre është një burim krenarie për shqiptarët kudo dhe një kujtesë se projekti evropian në fund të fundit ka të bëjë me njerëzit, mundësitë dhe aftësinë për të kontribuar plotësisht në shoqëritë që ne i quajmë shtëpi”, nënvizoi ministri.

Hoxha theksoi se diskutimet u fokusuan në fazën aktuale të procesit të anëtarësimit të Shqipërisë, prioritetet e negociatave dhe ruajtjen e ritmit të procesit të zgjerimit të BE-së, duke nënvizuar rolin e rëndësishëm të Parlamentit Evropian në mbështetjen e një procesi të bazuar në meritë.

“Diskutimi ynë u përqendrua në fazën aktuale të procesit të anëtarësimit të Shqipërisë në BE, prioritetet dhe punën përpara me negociatat në vazhdim, si dhe objektivin e përbashkët të ruajtjes së momentumit aktual të zgjerimit”, shkroi Hoxha.

“Ne gjithashtu nënvizuam rolin e rëndësishëm të Parlamentit Evropian në mbështetjen e një procesi të besueshëm dhe të bazuar në meritë të zgjerimit dhe në avancimin e perspektivës evropiane të Ballkanit Perëndimor”, shtoi ministri.

Sipas tij, forcimi i dialogut me institucionet evropiane mbetet thelbësor për avancimin e perspektivës evropiane të Ballkanit Perëndimor dhe për ndërtimin e një konsensusi më të gjerë politik brenda BE-së mbi zgjerimin.

“Në një kohë kur Bashkimi Evropian po e njeh gjithnjë e më shumë rëndësinë strategjike të zgjerimit, angazhimi i vazhdueshëm me Parlamentin Evropian mbetet thelbësor për forcimin e mbështetjes politike dhe ndërtimin e një konsensusi më të gjerë dhe në komunikimin e ndikimit transformues të një procesi anëtarësimi të bazuar në meritë”, u shpreh ministri Hoxha.

/gj.m/j.p/

The post Hoxha në Bruksel: Bashkëpunimi me Parlamentin Evropian, kyç për avancimin e zgjerimit të BE-së appeared first on Agjencia Telegrafike Shqiptare.

TIRANË, 2 qershor /ATSH/ Kanë përfunduar me sukses finalet e ekipeve elitë në disiplinën e volejbollit, në kuadër të programit “Ekipet Sportive në Shkolla – Edicioni IV”.

Ndeshjet finale u zhvilluan në Pallatin e Sportit “Feti Borova”, duke sjellë emocione, rivalitet dhe nivel të lartë gare mes ekipeve pjesëmarrëse.

Në konkurrimin e vajzave, përfaqësuesja e bashkisë Fier triumfoi ndaj Korçës me rezultatin 2-1, ndërsa në konkurrimin e djemve, përfaqësuesja e bashkisë Elbasan mposhti Shkodrën po me rezultatin 2-1.

Programi “Ekipet Sportive në Shkolla – Edicioni IV” kontribuon në masivizimin e sportit në shkolla, përfshirjen më të gjerë të fëmijëve dhe të rinjve në aktivitetet sportive, si dhe në evidentimin e talenteve dhe kampionëve të ardhshëm.

/gj.m/j.p/

The post Finalet e volejbollit të “Ekipeve Sportive në Shkolla”, shpallen kampionët e edicionit IV appeared first on Agjencia Telegrafike Shqiptare.