TIRANË, 21 korrik /ATSH/ Presidenti i Komitetit Olimpik Kombëtar Shqiptar (KOKSH), Fidel Ylli, priti në një takim në zyrën e tij Koordinatorin e Programit të Agjencisë Turke për Bashkëpunim dhe Koordinim (TİKA) në Tiranë, Murat Ölçenoğlu, ku u diskutuan mundësitë e bashkëpunimit në projekte që mbështesin zhvillimin e sportit dhe infrastrukturës sportive në Shqipëri.

Sipas njoftimit të KOKSH-it, takimi kishte si qëllim njohjen reciproke dhe shqyrtimin e mundësive për realizimin e projekteve të përbashkëta në shërbim të sportit shqiptar.

Gjatë bisedës, Ylli prezantoi arritjet e viteve të fundit, projektet strategjike dhe vizionin për zhvillimin e sportit në vend.

Një vëmendje e veçantë iu kushtua projektit “Tirana Olympic City”, i cilësuar si projekti më ambicioz për krijimin e një qendre moderne sportive me standarde ndërkombëtare, që synon të transformojë infrastrukturën sportive në Shqipëri dhe të krijojë kushte më të mira për sportistët dhe brezat e rinj.

Në njoftim theksohet se TİKA, e cila vepron në më shumë se 170 vende, është një nga agjencitë kryesore të bashkëpunimit për zhvillim të Turqisë, me përvojë në zbatimin e projekteve në fusha si arsimi, kultura, shëndetësia, infrastruktura dhe sporti.

Presidenti i KOKSH-it, Fidel Ylli, e vlerësoi takimin si një hap të rëndësishëm drejt nismave konkrete të bashkëpunimit në të ardhmen në mbështetje të zhvillimit të sportit shqiptar.

/gj.m/j.p/

The post Ylli pret koordinatorin e TİKA-s në Tiranë, diskutohet bashkëpunimi për zhvillimin e sportit dhe infrastrukturës sportive appeared first on Agjencia Telegrafike Shqiptare.

TIRANË, 21 korrik /ATSH/ Ministri i Mbrojtjes, Ermal Nufi, deklaroi sot se kapacitetet e vendit për përballimin e situatave të zjarreve janë rritur ndjeshëm, si në nivel vendor, ashtu edhe në strukturat qendrore të angazhuara për menaxhimin e emergjencave civile.

I pyetur në një konferencë për shtyp për situatën e zjarreve në vend, Nufi u shpreh se investimet në kapacitete njerëzore dhe teknike kanë sjellë një përmirësim të ndjeshëm të gatishmërisë për ndërhyrje.

“Sa i përket situatës së zjarreve, kapacitetet janë shtuar ndjeshëm. Ka një investim jo vetëm në nivel vendor, por edhe te Forcat e Armatosura, te kapacitetet që kemi në BMEC (Baza e Mbështetjes për Emergjencat Civile), apo edhe te të gjitha strukturat e tjera që merren me menaxhimin e emergjencave civile”, tha Nufi.

Ministri theksoi se Shqipëria ka sot kapacitete të konsoliduara për ndërhyrje si nga toka, ashtu edhe nga ajri.

“Kemi një situatë jashtëzakonisht shumë të mirë sa i përket kapaciteteve konkrete që kemi në Republikën e Shqipërisë, si fizike në ndërhyrjet nga toka, por edhe ndërhyrjet nga ajri”, u shpreh ai.

Sipas Nufit, ky vit mund të konsiderohet ndër më të mirët për sa i përket gatishmërisë së kapaciteteve ajrore për shuarjen e zjarreve.

“Besoj që mund të konsiderohet viti më i mirë për gatishmërinë e Forcave Ajrore për shuarjen e zjarreve. Shumë shpejt do të kemi në Republikën e Shqipërisë avionët që qeveria shqiptare ka kontraktuar, në mënyrë që të jenë operacionalë”, deklaroi ministri.

Ai bëri të ditur se kapacitetet e angazhuara deri tani kanë dhënë rezultat dhe se situata e zjarreve është menaxhuar me sukses.

“Besoj që të gjitha këto kapacitete deri tani kanë dhënë rezultat dhe janë menaxhuar të gjitha zjarret. Deri dje në darkë nuk kemi pasur asnjë zjarr aktiv”, tha Nufi.

Ministri bëri të ditur se ndjekja e situatës bëhet në mënyrë të vazhdueshme përmes raporteve ditore të Agjencisë Kombëtare të Mbrojtjes Civile (AKMC), si dhe në koordinim me strukturat përgjegjëse.

“Unë marr çdo ditë informacion nga AKMC, raport ditor, raport konkret për çdo situatë zjarri në ndjekje, si me drejtorin, ashtu edhe me shefin e Shtabit të Përgjithshëm në momentin kur aktivizohen forcat tona”, u shpreh ai.

Nufi garantoi se angazhimi i strukturave shtetërore është maksimal, duke nisur nga njësitë e qeverisjes vendore, deri te strukturat qendrore dhe Forcat e Armatosura.

“Ju garantoj që qeveria shqiptare, qoftë në nivel vendor, për anën që ka të bëjë me përgjigjen e parë që vjen nga bashkitë, por edhe pjesën që na takon ne në qeverinë qendrore për angazhimin e trupave tona, është maksimale në kohë reale”, deklaroi ministri.

Ai shtoi se koordinimi me prefektët dhe aktivizimi i AKMC-së dhe Forcave të Armatosura bëhet sipas nevojës, me synim menaxhimin dhe shuarjen e plotë të çdo vatre zjarri.

“Vëmendja është 100% deri në mitigimin e plotë të situatës së zjarrit, shuarjes së tij. Raportohet që zjarri u shua dhe cilat janë pasojat apo masat e marra. Jemi në ndjekje të plotë. Deri dje kemi pasur një rezultat shumë të mirë”, përfundoi Nufi.

/gj.m/j.p/

The post Nufi: Kapacitetet për përballimin e zjarreve janë rritur ndjeshëm, jemi në monitorim të plotë appeared first on Agjencia Telegrafike Shqiptare.

TIRANË, 21 korrik /ATSH/ Ministri i Mbrojtjes, Ermal Nufi, deklaroi sot se deklaratat e ministres serbe Snezhana Paunoviç në lidhje me spastrimin etnik në Kosovë, janë skandaloze dhe të papranueshme.

I pyetur në një konferencë për shtyp për këtë deklaratë, Nufi u shpreh se nuk ka nevojë për shumë komente për natyrën e kësaj deklarate, pasi ajo është e skandaloze dhe e papranueshme.

“Besoj që çdo koment mbi natyrën e asaj deklarate, përveç këtyre dy fjalëve, është i pavend. Është e papranueshme sot që të ketë një deklaratë të tillë. Këtë qëndrim e ka shprehur kryeministri, e ka shprehur edhe Ministria e Punëve të Jashtme. Unë, si ministër i Mbrojtjes, bashkohem plotësisht me qëndrimin e kryeministrit”, tha Nufi.

Ministri theksoi se deklarata të tilla nuk kanë vend në një shoqëri që synon të ecë drejt vlerave evropiane dhe vlerësoi reagimet e atyre qytetarëve serbë që distancohen nga retorika nacionaliste.

“Është e papranueshme që sot ne të kemi një deklaratë të tillë. Besoj që edhe vetë reagimi në Serbi ka treguar se edhe atje njerëzit e arsyes dhe ata që nuk bëjnë pjesë te ultranacionalistët vazhdojnë të kenë atë qëndrim evropian që ne duam të shohim nga pala serbe”, u shpreh ai.

Nufi nënvizoi se çdo deklaratë që lidhet me spastrim etnik apo nxitje të urrejtjes rikthen kujtime të dhimbshme nga e kaluara e rajonit.

“Është e papranueshme çdo lloj deklarate që lidhet me kombin, me spastrime etnike apo me ngjarje që i bëjnë referencë një të shkuare shumë të hidhur dhe një periudhe shumë të errët, sidomos asaj ku ne jemi vetë dëshmitarë: vitit 1999, asaj që ka ndodhur në Kosovë, por edhe asaj që ka ndodhur në Bosnjë-Hercegovinë dhe në ish-Jugosllavi”, tha ministri.

Sipas tij, çdo retorikë e kësaj natyre është e papranueshme dhe duhet dënuar nga të gjithë.

“Çdo retorikë e kësaj natyre është e papranueshme, është e dënueshme dhe është në nderin e gjithë atyre që e kanë pasur në kurriz ta denoncojnë dhe të distancohen prej saj. Ky është qëndrimi ynë i prerë. Çdo lloj përkrahjeje apo çdo lloj heshtjeje përballë një deklarate të tillë është po aq vrastare”, përfundoi Nufi.

/gj.m/j.p/

The post Nufi: Deklaratat e ministres serbe për Kosovën, të papranueshme appeared first on Agjencia Telegrafike Shqiptare.

TIRANË, 21 korrik /ATSH/ Kryetari i grupit parlamentar të Partisë Socialiste, Taulant Balla prezantoi sot në mbledhjen e Komisionit për Burimet Natyrore, Infrastrukturën dhe Zhvillimin e Qëndrueshëm projektligjin për disa ndryshime në ligjin “Për Turizmin”, të cilin e cilësoi një hap të rëndësishëm për rritjen e standardeve të sektorit dhe zhvillimin e qëndrueshëm të turizmit në Shqipëri.

Në fjalën e tij, Balla e vuri theksin te transformimi i vendit.

“Së bashku do ta bëjmë Shqipërinë evropiane princeshë të turizmit mesdhetar dhe do t’u tregojmë edhe të gjithë atyre që e përgojuan si s’ka më keq shtetin tonë, se Shqipëria e ka shumë seriozisht transformimin e saj epokal”, tha Balla.

Më tej gjatë fjalës së tij, Balla u shpreh se Shqipëria ndodhet në një moment historik të zhvillimit të turizmit, duke theksuar se numri i turistëve është rritur gjashtë herë krahasuar me 13 vite më parë. Sipas tij, kjo rritje kërkon standarde më të larta për strukturat akomoduese, shërbimet dhe administrimin e sektorit.

Projektligji parashikon përmirësimin e procesit të kategorizimit dhe klasifikimit të strukturave akomoduese, regjistrimin elektronik të klientëve, krijimin e Regjistrit Qendror të Turizmit, forcimin e administrimit të mbetjeve nga hotelet, si dhe masa për pezullimin e punimeve të ndërtimit gjatë sezonit turistik në zonat turistike.

“Nuk mund të fillojë ndërtimi i një objekti si pallat dhe të përfundojë si hotel. Nëse ndërtohet hotel, ai duhet të projektohet dhe të ndërtohet si i tillë që në fillim”, u shpreh Balla, duke theksuar se Shqipëria duhet të ecë me standardet më të mira evropiane.

/gj.m/j.p/

The post Balla prezanton ndryshimet ligjore: Rritja e turizmit kërkon standarde më të larta për strukturat akomoduese dhe shërbimet appeared first on Agjencia Telegrafike Shqiptare.

TIRANË, 21 korrik /ATSH/ Presidenti i Republikës, Bajram Begaj, pranoi sot letrat kredenciale të ambasadorit të ri të Meksikës, rezident në Romë, Genaro Fausto Lozano Valencia.

Gjatë takimit, Presidenti Begaj vlerësoi marrëdhëniet miqësore mes Shqipërisë dhe Meksikës.

Kreu i Shtetit shprehu bindjen se mandati i ambasadorit të ri do t’i japë një shtysë të re forcimit të dialogut politik, si edhe zgjerimit të bashkëpunimit ekonomik, tregtar, kulturor dhe turistik mes dy vendeve.

/gj.m/j.p/

The post Begaj pranon letrat kredenciale të ambasadorit të ri të Meksikës: Shtysë bashkëpunimit ekonomik appeared first on Agjencia Telegrafike Shqiptare.

TIRANË, 21 korrik /ATSH/ Dinamo City ka mësuar emrin e kundërshtarit të mundshëm të raundit të tretë të UEFA Conference League.

Në shortin e hedhur mesditën e sotme në Nion, skuadra shqiptare mësoi se do të përballet me fituesin e çiftit FCSB – Auda, nëse arrin të eliminojë sllovenët e NK Aluminij në raundin e dytë.

Ekipi i drejtuar nga Ilir Daja do ta luajë ndeshjen e parë ndaj NK Aluminij në transfertë, më 23 korrik, duke nisur nga ora 20:00, ndërsa sfida e kthimit do të zhvillohet më 30 korrik, në orën 21:00, në stadiumin “Elbasan Arena”.

Në rast kualifikimi, Dinamo City do të përballet me fituesin e çiftit FCSB – Auda. Ndeshja e parë e raundit të tretë është planifikuar të luhet më 6 gusht, ndërsa ajo e kthimit më 13 gusht.

/gj.m/j.p/

The post Conference League, Dinamo City mëson rivalin e mundshëm të raundit të tretë appeared first on Agjencia Telegrafike Shqiptare.

TIRANË, 21 korrik /ATSH/ Kryetari i grupit parlamentar të Partisë Socialiste, Taulant Balla, priti sot në Kuvendin e Shqipërisë, Altin Markun, përfaqësues të diasporës shqiptare në Zvicër dhe drejtues i platformës “Fol Shqip Show”, e cila promovon historitë e suksesit të shqiptarëve në diasporë.

Gjatë takimit, Balla shprehu vlerësimin për kontributin e diasporës në forcimin e lidhjeve me Shqipërinë dhe promovimin e imazhit të vendit jashtë kufijve.

Balla falënderoi Altin Markun për punën e tij në evidentimin e figurave të suksesshme shqiptare përmes platformës “Fol Shqip Show”, duke e cilësuar këtë një nismë me vlerë për komunitetin shqiptar dhe për ruajtjen e identitetit kombëtar.

/gj.m/j.p/

The post Balla pret përfaqësuesin e komunitetit shqiptar në Zvicër: Diaspora, vlerë e çmuar për vendin appeared first on Agjencia Telegrafike Shqiptare.

TIRANË, 21 korrik /ATSH/ Kryeministri Edi Rama reagoi sot ndaj kritikave dhe kërkesave për shfuqizimin e Paketës së Maleve duke theksuar se nisma synon t’u japë mundësi banorëve të zonave malore të zhvillojnë pronat e tyre dhe të tërheqin investime.

Gjatë një bashkëbisedimi online me qytetarët, Rama u shpreh se Paketa e Maleve nuk parashikon shitjen e maleve, por krijon mundësi për ata që kanë trashëguar prona ose që prej vitesh mirëmbajnë pemëtore e sipërfaqe bujqësore, por nuk kanë mundur të pajisen me dokumentacionin përkatës.

“Këtu nuk jemi në kushtet ku shiten malet. Këtu jemi në kushtet kur malet po hapen për ata që në male kanë trashëguar një pronë”, tha Rama.

Sipas tij, paketa u krijon mundësi qytetarëve të pajisen me leje për aktivitete agropërpunimi dhe investime në turizëm, duke e kthyer pronën në një aset ekonomik.

Kryeministri theksoi se mijëra emigrantë kanë shprehur interes për të investuar në zonat malore dhe se turizmi do të ketë një rol gjithnjë e më të rëndësishëm në ekonominë e vendit.

Ai shtoi se Paketa e Maleve është rezultat i konsultimeve dhe përpjekjeve të gjata me komunitetet lokale, duke kundërshtuar pretendimet se ajo cenon pronësinë.

“Nuk kam parë ndonjë komunitet që preket nga kjo paketë të thotë se po i merren pronat. Ata mezi e presin”, u shpreh Rama.

Duke iu përgjigjur një komentuesi në rrjetet sociale që shkruante “Zvicra e vogël do bëhet, se s’bën”, Rama tha se zhvillimi i zonave malore arrihet duke u krijuar mundësi banorëve të investojnë në harmoni me natyrën.

“Bëhet pikërisht duke u dhënë mundësi njerëzve që të investojnë në harmoni me natyrën dhe të krijojnë mirëqenie pa qenë të detyruar t’i braktisin ato male”, deklaroi ai.

Rama komentoi edhe kritikat dhe komentet në rrjetet sociale, duke u shprehur se ato nuk ndikojnë tek ai, por, sipas tij, “i bëhen shëndet e forcë”.

/gj.m/j.p/

The post Rama: Paketa e Maleve zhvillon zonat malore me investime në harmoni me natyrën appeared first on Agjencia Telegrafike Shqiptare.

TIRANË, 21 korrik /ATSH/ Në selinë e UEFA-s në Nyon është hedhur shorti i raundit të tretë kualifikues të UEFA Champions League, ku Egnatia ka mësuar kundërshtarin e mundshëm nëse arrin të kalojë me sukses raundin e dytë.

Kampionët e Shqipërisë, të cilët siguruan një kualifikim historik pas fitores bindëse ndaj Petrocub, do të përballen fillimisht me skuadrën sllovene NK Celje në raundin e dytë kualifikues të kompeticionit.

Sipas shortit të hedhur nga UEFA, fituesi i çiftit Egnatia – NK Celje do të përballet në raundin e tretë me fituesin e përballjes FC Ararat-Armenia – Shamrock Rovers F.C. .

Ndërkohë, edhe në rast të eliminimit nga skuadra sllovene, kampionët e Shqipërisë do të vijojnë rrugëtimin europian. Egnatia do të kalonte në raundin e tretë kualifikues të UEFA Europa League, ku do të përballej me humbësin e çiftit Ararat Armenia – Shamrock Rovers.

Ndeshja e parë e raundit të dytë mes Egnatias dhe NK Celje do të zhvillohet më 22 korrik në “Arena Egnatia”, në orën 21:00, ndërsa sfida e kthimit do të luhet një javë më vonë në Slloveni.

Pas paraqitjeve mbresëlënëse në raundin e parë, Egnatia do të synojë të vazhdojë rrugëtimin e saj historik në UEFA Champions League dhe të hedhë një tjetër hap të rëndësishëm në arenën europiane, duke përfaqësuar futbollin shqiptar në kompeticionin më prestigjioz për klube në Europë.

/gj.m/j.p/

The post Champions League, Egnatia mëson kundërshtarin e mundshëm në raundin e tretë appeared first on Agjencia Telegrafike Shqiptare.

TIRANË, 20 korrik /ATSH/ Seanca plenare e Kuvendit u përfshi nga tensione, pasi deputetët e Partisë Demokratike u mblodhën pranë foltores, duke bllokuar vijimin normal të punimeve.

Deputetët e opozitës kundërshtuan raportimin e Avokatit të Popullit, Endrit Shabani, duke mos lejuar nisjen e fjalës së tij.

Kreu i grupit parlamentar të Partisë Demokratike,Gazment Bardhi, deklaroi se opozita ka ndjekur rrugën institucionale, duke iu drejtuar Gjykatës Kushtetuese për çështjen e zgjedhjes së Avokatit të Popullit.

Sipas Bardhit, deri në një vendimmarrje të Gjykatës Kushtetuese mbi këtë proces, Endrit Shabani nuk duhet të raportojë në Kuvend.

Kryetari i Kuvendit, Niko Peleshi, u bëri disa herë thirrje deputetëve të lirojnë foltoren dhe të lejojnë vijimin normal të seancës, por kërkesa e tij nuk u respektua.
Për shkak të situatës së krijuar, Peleshi ndërpreu përkohësisht punimet e Kuvendit, duke shpallur një pushim pesëminutësh.

Opozita bllokon foltoren e Kuvendit-Foto: Andrin Hoxha

1 nga 7

/gj.m/j.p/

The post PD bllokon raportimin e Avokatit të Popullit, ndërpritet seanca plenare appeared first on Agjencia Telegrafike Shqiptare.

TIRANË, 20 korrik /ATSH/ Presidenti i Republikës, Bajram Begaj, priti sot në takim përfaqësues të Këshillave Ndërfetarë të Europës, të cilët ndodhen në Tiranë në kuadër të Forumit Evropian “Shared Sacred Flourishing”.

Gjatë takimit, Presidenti Begaj vlerësoi rëndësinë e forumit si një platformë për forcimin e dialogut ndërfetar dhe promovimin e paqes, mirëkuptimit dhe bashkëpunimit ndërmjet komuniteteve fetare në Evropë.

Kreu i Shtetit theksoi se “Shqipëria përbën një model të harmonisë, bashkëjetesës ndërfetare si dhe mikpritjes”.

“Këto vlera janë pjesë e identitetit tonë dhe uroj që, gjatë qëndrimit tuaj, t’i prekni nga afër”, u shpreh Presidenti gjatë bashkëbisedimit me përfaqësuesit e Këshillave Ndërfetarë.

Gjithashtu, Presidenti Begaj theksoi se shoqëria shqiptare si mbartëse e këtyre vlerave arriti t’i mbijetojë kohërave më të errëta të besimit.

“Megjithëse regjimi diktatorial e shpalli Shqipërinë vendin e parë ateist në botë, shembi objektet e kultit apo ndryshoi destinacionin e tyre, ai nuk arriti dot të zhbënte besimin e shqiptarëve në Zot”, vijoi Presidenti Begaj.

Kreu i Shtetit u ndal, gjithashtu, te vlera që ka për shoqërinë shqiptare respektimi i besimit të tjetrit.

Presidenti Begaj vlerësoi rolin e Këshillit Ndërfetar të Shqipërisë në promovimin e dialogut dhe bashkëpunimit ndërmjet komuniteteve fetare.

Në fund të takimit, Presidenti theksoi se, në një kohë kur bota përballet me sfida të shumta, polarizim dhe konflikte, dialogu ndërfetar mbetet një instrument i rëndësishëm për ndërtimin e urave të besimit, solidaritetit dhe paqes.

Në këtë frymë, shtoi Presidenti Begaj, Shqipëria vijon të japë kontributin e saj, duke promovuar modelin unik të harmonisë fetare dhe bashkëjetesës paqësore.

1 nga 2

/gj.m/j.p/

The post Begaj pret përfaqësuesit e Këshillave Ndërfetarë të Evropës  appeared first on Agjencia Telegrafike Shqiptare.

TIRANË, 20 korrik /ATSH/ Kryetari i Partisë Demokratike, Sali Berisha, ka akuzuar qeverinë se po tërhiqet nga reforma territoriale dhe po vijon, sipas tij, një projekt të shpopullimit të vendit.

Në fjalën e tij në seancën plenare të Kuvendit, Berisha tha se reforma gjithëpërfshirëse zgjedhore dhe ajo territoriale janë ndër detyrat kryesore në kuadër të procesit të integrimit europian.

“BE në procesin e integrimit, në krye të radhës përcaktoi dy detyra më kryesore: reformën gjithëpërfshirëse zgjedhore dhe reformën gjithëpërfshirëse territoriale”, tha Berisha.

Ai deklaroi se opozita ka marrë pjesë në grupet e punës për këto reforma me kushtin që të merret ekspertiza e ODIHR për reformën zgjedhore dhe ajo e Kongresit të Autoriteteve Lokale dhe Rajonale të Këshillit të Europës për reformën territoriale.

Sipas Berishës, përfaqësuesit e opozitës në këto komisione kanë mbrojtur interesat e qytetarëve dhe kanë dhënë kontribut në proces.

“Papritmas, Edi Rama tërhiqet de facto nga reforma territoriale dhe mbyll procesin duke vazhduar projektin e tij të shpopullimit të mëtejshëm të Shqipërisë”, u shpreh Berisha.

Ai pretendoi se qeveria ka parashikuar reduktimin e numrit të bashkive në territorin e vendit, duke e cilësuar këtë si një praktikë që dëmton komunitetet lokale.

“Ka parashikuar reduktimin me 25 bashki nga Konispoli në Krumë në të gjithë territorin e vendit. Dhe kjo përbën një praktikë të qartë shpopullimi”, tha Berisha.

Berisha u bëri thirrje qytetarëve që të angazhohen në protesta për mbrojtjen e interesave të komuniteteve të tyre.

“Ngrihuni në këmbë për të mbrojtur interesat jetike të komuniteteve tuaja”, tha ai, duke ftuar qytetarët t’i bashkohen protestave që po zhvillohen në Tiranë.

Në replikë me kreun e grupit parlamentar të Partisë Socialiste, Taulant Balla, gjatë seancës plenare në Kuvend, Berisha deklaroi se përfaqësuesit e opozitës kishin kërkuar zgjatjen e afatit të komisionit dhe marrjen e ekspertizës së Kongresit të Autoriteteve Lokale dhe Rajonale të Këshillit të Europës.

Sipas tij, ky kusht ishte i panegociueshëm për opozitën, ndërsa akuzoi kryeministrin Edi Rama se ka kërkuar një proces të njëanshëm.

“E vërteta është se pati një ujdi për të zgjatur afatin e komisionit, sikundër kushti për të marrë ekspertizën e Kongresit të Autoriteteve Rajonale dhe të Këshillit të Evropës është për ne i panegociueshëm”, tha Berisha.

Ai theksoi se projekti i diskutuar për reformën territoriale parashikon reduktimin e mëtejshëm të numrit të bashkive.

“Projekti i diskutuar nga ju shkurton edhe të paktën 20 bashki të tjera, të shpërndara në të gjithë vendin, nga Kruja, Fushë Arrëzi, Mirdita, deri në Konispol, Delvinë, Finiq”, u shpreh Berisha.

/gj.m/j.p/

The post Berisha: Mazhoranca mbylli procesin e Reformës Territoriale, vazhdon projekti i shpopullimit appeared first on Agjencia Telegrafike Shqiptare.

TIRANË, 20 korrik /ATSH/ Seanca plenare e Kuvendit të Shqipërisë nisi me debate mes mazhorancës dhe opozitës, e cila u rikthye në sallën plenare pas disa javësh mungesë.

Debatet u përqendruan te rendi i ditës dhe shqyrtimi i nismave ligjore që lidhen me procesin e integrimit europian.

Në seancën e sotme janë parashikuar shqyrtimi i raportit të Këshillit Kombëtar të Integrimit Europian, projektligji “Për shoqëritë europiane të bashkëpunimit”, si dhe disa projektrezoluta për institucionet e pavarura të drejtësisë dhe kontrollit.

Kreu i grupit parlamentar të Partisë Socialiste, Taulant Balla, propozoi që projektligjet që lidhen me procesin e integrimit europian të shqyrtohen në një seancë të posaçme.

“Duke qenë se ligji ‘Për shoqëritë evropiane të bashkëpunimit (SHEB)’ është një ligj që ka të bëjë me detyrat dhe punën që po bën qeveria për kapitullin 17, propozoj që të gjitha ligjet lidhur me të të bashkohen në një seancë, në seancën paraardhëse. Përgëzoj ministrat që po punojnë për përafrimin e legjislacionit”, tha Balla.

Ndërkohë, kreu i grupit parlamentar të Partisë Demokratike, Gazment Bardhi, kërkoi që në rendin e ditës të përfshihen edhe nismat e deputetëve të opozitës.

“Keni 7 javë që mbani të bllokuara 7 iniciativa të deputetëve të opozitës. Nuk janë disa të privilegjuara dhe disa jo”, u shpreh Bardhi.

Ndërkaq, kreu i Partisë Demokratike, Sali Berisha iu drejtua kreu të Kuvendit duke i thënë se është vasal i kryeministrit Rama.

“Do mbetesh në historinë e këtij vendi si vasali më i shpifur i Edi Ramës, si armik i egër i Kushtetutës dhe të drejtave kushtetuese të deputetëve, si armik i egër i procesit të integrimit të Shqipërisë.Ka një muaj që janë dorëzuar amendamentet për amendimin e ligjeve të cilat BE, KE, Parlamenti Evropian kërkon të anulohen dhe të amendohen”, tha Berisha.

Ai shtoi se anulimi kërkohet edhe nga ajo që e cilësoi si protesta më e fuqishme pas viteve ‘90. “Dhe ti në radhë të parë me përgjegjësi absolute të tënden, i injoron sikur nuk ekzistojnë”, tha Berisha.

Kryetari i Kuvendit, Niko Peleshi, deklaroi se ndryshimet në rendin e ditës nuk bëhen në mënyrë arbitrare, por vendosen përmes votimit të deputetëve.

Në vijim, deputetët miratuan ndryshimet në rendin e ditës së seancës plenare.

/gj.m/j.p/

The post Opozita i rikthehet seancës plenare, debate me mazhorancën për rendin e ditës appeared first on Agjencia Telegrafike Shqiptare.

TIRANË, 20 korrik /ATSH/ Ministri i Mbrojtjes, Ermal Nufi, vlerësoi Atasheun Ushtarak të Turqisë në Shqipëri, Kolonel Tolga Kip, për kontributin e tij në forcimin e marrëdhënieve mes Forcave të Armatosura të Shqipërisë dhe Turqisë, si dhe në thellimin e bashkëpunimit në fushën e mbrojtjes dhe sigurisë.

Në përmbyllje të mandatit të tij në vendin tonë, Kolonel Tolga Kip u vlerësua me Certifikatë Mirënjohjeje për kontributin e tij të veçantë në forcimin e marrëdhënieve ndërmjet Forcave të Armatosura të Shqipërisë dhe Turqisë, si dhe në thellimin e bashkëpunimit në fushën e mbrojtjes dhe sigurisë.

Ministri theksoi se, Shqipëria dhe Turqia, aleate në NATO dhe partnere strategjike, vijojnë të ndërtojnë një bashkëpunim të ngushtë, të bazuar në besim të ndërsjellë dhe mbështetje konkrete për modernizimin e Forcave të Armatosura, zhvillimin e kapaciteteve ushtarake, trajnimin e personelit dhe koordinimin në kuadër të misioneve ndërkombëtare.

1 nga 10

/gj.m/j.p/

The post Kontribut në forcimin e bashkëpunimit në mbrojtje, Nufi vlerëson Atasheun Ushtarak të Turqisë appeared first on Agjencia Telegrafike Shqiptare.

TIRANË, 20 korrik /ATSH/ Kuvendi zhvillon sot, në orën 12:00, seancën plenare ku deputetët do të shqyrtojnë një sërë çështjesh që lidhen me procesin e integrimit europian, legjislacionin ekonomik, si edhe veprimtarinë vjetore të institucioneve kushtetuese dhe të drejtësisë.

Sipas rendit të ditës të miratuar me urdhrin e  kryetarit të Kuvendit, Niko Peleshi, seanca do të nisë me miratimin e procesverbalit të mbledhjes së 16 korrikut dhe njoftimet.

Një nga pikat kryesore të rendit të ditës është paraqitja e Raportit të Këshillit Kombëtar të Integrimit Europian për vitin 2025, i cili do të prezantohet nga bashkëkryetarët e këtij këshilli, në zbatim të ligjit për rolin e Kuvendit në procesin e negociatave dhe anëtarësimit të Shqipërisë në Bashkimin Europian.

Deputetët do të shqyrtojnë gjithashtu projektligjin “Për shoqëritë evropiane të bashkëpunimit (SHEB)”, i cili synon përafrimin e legjislacionit shqiptar me standardet e Bashkimit Europian në fushën e bashkëpunimit ndërkufitar dhe ekonomik.

Në vijim të seancës, Kuvendi pritet të diskutojë dhe të votojë tetë projektrezoluta për vlerësimin e veprimtarisë së institucioneve të pavarura dhe organeve të sistemit të drejtësisë për vitin 2025.

Konkretisht, do të shqyrtohen raportet dhe projektrezolutat për Avokatin e Popullit, Këshillin e Lartë Gjyqësor, Këshillin e Lartë të Prokurorisë, Kontrollin e Lartë të Shtetit, Prokurorinë e Përgjithshme, Strukturën e Posaçme kundër Korrupsionit dhe Krimit të Organizuar (SPAK), si edhe Inspektorin e Lartë të Drejtësisë.

Për secilën prej këtyre çështjeve parashikohet prezantimi i raporteve nga drejtuesit e institucioneve përkatëse, paraqitja e projektrezolutave nga Komisioni për Nismat Qytetare, Bashkëpunimin dhe Mbikëqyrjen Institucionale, si edhe zhvillimi i debateve parlamentare, në rast se ato kërkohen sipas Rregullores së Kuvendit.

Seanca plenare do të përmbyllet me diskutimet e deputetëve për çështje jashtë rendit të ditës, në përputhje me dispozitat e Rregullores së Kuvendit.

/gj.m/j.p/

The post Kuvendi në seancë plenare, diskutohet raporti i Këshillit Kombëtar të Integrimit Europian appeared first on Agjencia Telegrafike Shqiptare.

TIRANË, 20 korrik /ATSH/ Kryetari i Partisë Demokratike, Sali Berisha, u paraqit këtë të hënë në ambientet e Prokurorisë së Posaçme kundër Korrupsionit dhe Krimit të Organizuar (SPAK), në zbatim të masës së sigurisë “detyrim paraqitje” në lidhje me dosjen “Partizani”.

Pas daljes nga SPAK, Berisha në një prononcim për mediet foli për çështjen në fjalë, duke përsëritur akuzat e tij ndaj drejtuesve të institucioneve të drejtësisë.

Berisha deklaroi se në dokumentin që la në SPAK kishte shkruar mesazhin: “Drejtësia vonon, por nuk harron”, ndërsa akuzoi ish-drejtuesin e SPAK, Altin Dumani si, “avokat të narkoshtetit shqiptar”.

“Në dokumentin që lashë, sot kam shkruar: ‘Altin Gjoka Troplini Hajri, armikut primitiv të pluralizmit politik të Shqipërisë dhe avokatit të narkoshtetit shqiptar, drejtësia vonon, por nuk harron’”, theksoi Berisha.

Berisha u pyet se çfarë kishte gjetur në korridoret e SPAK-ut, ndërsa u shpreh se aty kishte “thasë dhe arka plot e përplot me narko-euro”.

“Me një fjalë, institucioni ishte tërësisht i pushtuar nga paratë e drogës”, deklaroi Berisha.

Ai vijoi akuzat ndaj institucioneve të drejtësisë, duke pretenduar se prej të paktën një viti mbahen sekret emrat e disa zyrtarëve të lartë që, sipas tij, kanë udhëtuar me biznesmenë me një çarter të veçantë nga Tirana në Aruba.

Berisha deklaroi se kërkesa e tij për shfuqizimin e masës së sigurisë është depozituar në Gjykatën Kushtetuese rreth 10 muaj më parë dhe se shqyrtimi i saj është shtyrë për në muajin tetor.

Berisha theksoi se kjo gjykatë ka shqyrtuar më shpejt kërkesa të tjera, ndërsa për çështjen e tij nuk ka respektuar afatet ligjore.

Ai kritikoi gjithashtu vendimmarrje të Gjykatës Kushtetuese lidhur me ligjin për investimet strategjike, mbrojtjen e trashëgimisë kulturore dhe zonat e mbrojtura, duke deklaruar se këto çështje janë kundërshtuar nga opozita.

“Grupi parlamentar i PD ka kundërshtuar në parlament dhe ka dërguar në Gjykatë Kushtetuese ligjin e investimeve strategjike. Gjykata Kushtetuese, pavarësisht kërkesave të prera të Komisionit Evropian dhe Bashkimit Evropian, e ka lënë në fuqi ligjin. PD ka dërguar në këtë gjykatë ligjin për mbrojtjen e trashëgimisë kulturore dhe ishte fjala konkretisht për parkun absolutisht më të bukur, më të mirë në Evropë, që është parku i Butrintit. Gjykata Kushtetuese firmosi për shkatërrimin e tij, vendimin e qeverisë. Gjykata Kushtetuese mbajti në fuqi amendimin e ligjit për mbrojtjen e zonave të mbrojtura dhe peizazheve natyrore, të kundërshtuar me forcë nga PD”, tha Berisha.

GJKKO ka kaluar për gjykim dosjen e ish-kompleksit sportiv “Partizani”, ku ish-kryeministri Sali Berisha akuzohet për veprën penale “Korrupsion pasiv i funksionarëve të lartë shtetërorë ose i të zgjedhurve vendorë”.

/gj.m/j.p/

The post Berisha: Kushtetuesja mbajti në fuqi amendimin e ligjit për zonat e mbrojtura, të kundërshtuar me forcë nga PD appeared first on Agjencia Telegrafike Shqiptare.

TIRANË, 20 korrik /ATSH/ Policia e Tiranës ka vijuar kontrollet për monitorimin e nivelit të zhurmave në zonën e ish-Bllokut, me qëllim garantimin e qetësisë publike dhe respektimin e normave të përcaktuara ligjore.

Në kuadër të masave sensibilizuese, strukturat e Policisë kanë zhvilluar takime informuese me administratorë subjektesh dhe persona fizikë, aktiviteti i të cilëve gjeneron zhurmë nga muzika.

Kontrollet në terren janë kryer nga strukturat e sigurisë publike të Drejtorisë Vendore të Policisë Tiranë, në bashkëpunim me Komisariatin e Policisë Nr. 2, ku janë testuar me matës zhurme ambiente të hapura dhe të mbyllura.

Sipas Policisë, matjet e kryera kanë rezultuar brenda kufijve të lejuar, ndërsa është verifikuar edhe respektimi i orarit të lejuar për muzikën në ambientet e hapura në zonat e banuara.

Policia e Tiranës bën të ditur se do të vijojë kontrollet dhe monitorimin në zonat me aktivitet të lartë, me qëllim garantimin e rendit publik dhe qetësisë për qytetarët dhe vizitorët.

/gj.m/j.p/

The post Policia e Tiranës, kontrolle për nivelin e zhurmave në zonën e ish-Bllokut appeared first on Agjencia Telegrafike Shqiptare.

TIRANË, 20 korrik /ATSH/ Kryeministri Edi Rama ftoi sot qytetarët të marrin pjesë në Festivalin Kombëtar “NONA”, i cili do të zhvillohet nga 7 deri më 9 gusht në Përmet.

Përmes një postimi në rrjetet sociale, Rama e cilësoi festivalin si një aktivitet kushtuar traditës, kulinarisë dhe vlerësimit të brezit të tretë.

Rama theksoi se në Festivalin Kombëtar ‘NONA’, festohen tradita, kulinaria, respekti dhe dashuria për brezin e tretë.

Festivali Kombëtar “NONA” synon të promovojë trashëgiminë kulturore, gastronominë tradicionale dhe rolin e gjysheve në ruajtjen dhe përcjelljen e vlerave familjare e kulinare, duke e shndërruar Përmetin në një pikëtakim të traditës, mikpritjes dhe turizmit.

Edicioni i gjashtë i festivalit pritet të gjallërojë fundjavën e qytetit të Përmetit, duke sjellë një program të pasur artistik me pjesëmarrjen e këngëtarëve dhe instrumentistëve nga treva të ndryshme të vendit.

I kthyer tashmë në një traditë të përvitshme, Festivali “NONA” promovon kulinarinë karakteristike, vlerat kulturore dhe pasuritë natyrore të zonës së Përmetit, duke tërhequr çdo vit vizitorë të shumtë vendas dhe të huaj.

Festivali është një homazh për gjyshet shqiptare, e veçanërisht ato përmetare, të cilat kanë ruajtur dhe përcjellë ndër breza traditën e mikpritjes, gatimeve tradicionale dhe kulturës vendase.

/gj.m/j.p/

The post Festivali kombëtar “NONA” në Përmet, festohet tradita dhe respekti për moshën e tretë appeared first on Agjencia Telegrafike Shqiptare.

TIRANË,19 korrik /ATSH/ Kreu i Partisë Demokratike, Sali Berisha, shprehu ngushëllimet për ndarjen tragjike nga jeta të gazetarit Enrik Mehmeti, duke e cilësuar atë një profesionist të talentuar dhe një zë të rëndësishëm të qytetarëve të Vlorës.

Në një reagim në rrjetet sociale, Berisha u shpreh se kjo është një ditë zie për familjen Mehmeti, për gazetarinë dhe median në vend, si dhe për qytetin e Vlorës.

“Enrik Mehmeti do të mbahet mend gjithmonë nga familja dhe qyteti i tij si bir, bashkëshort, prind dhe qytetar shembullor, si një gazetar i talentuar, i guximshëm dhe avokat i vërtetë i interesit publik të qytetarëve të Vlorës”, shkroi Berisha.

Ai i shprehu ngushëllimet familjes, të afërmve dhe kolegëve të gazetarit, duke uruar që shpirti i tij të gjejë paqen e merituar.

Gazetari Enrik Mehmeti u nda nga jeta në moshën 40-vjeçare pas një aksidenti me motor në zonën e Porto Novës, në Zvërnec të Vlorës.

/gj.m/j.p/

The post Berisha për ndarjen nga jeta të gazetarit Enrik Mehmeti: Profesionist i guximshëm appeared first on Agjencia Telegrafike Shqiptare.

TIRANË, 19 korrik /ATSH/ Kryeministri Edi Rama ka marrë pjesë në homazhet e zhvilluara për gazetarin Enrik Mehmeti, në teatrin “Petro Marko” në Vlorë.

Pas daljes nga ambientet e teatrit, Rama në dalje i ka shprehur gazetarëve ngushëllime për humbjen e kolegut Enrik Mehmetit.

Gazetari Enrik Mehmeti u nda nga jeta pasditen e së shtunës, në moshën 40-vjeçare, pas një aksidenti me motor në zonën e Porto Novës, në Zvërnec.

Mehmeti ishte një nga zërat më të njohur të raportimit nga qarku i Vlorës. Për vite me radhë ai solli në ekranin e News24 zhvillimet më të rëndësishme të jugut të vendit, nga kronika e zezë dhe operacionet policore, te çështjet sociale, politike dhe turistike.

Kolegët e kanë përshkruar gazetarin si një profesionist të përkushtuar, i njohur për praninë e tij në terren, raportimet e drejtpërdrejta dhe përpjekjen për të sjellë informacion të verifikuar edhe në situata të vështira.

Familjarë, miq dhe kolegë do t’i japin sot lamtumirën e fundit gazetarit Enrik Mehmeti.

/gj.m/

The post Rama në homazhet për gazetarin Enrik Mehmeti në Vlorë appeared first on Agjencia Telegrafike Shqiptare.