TIRANË, 21 korrik /ATSH/ Ministrja e Arsimit Mirela Kumbaro vizitoi mjediset e Universitetit “Fan Noli” në Korçë, në një bisedë të hapur për sfidat e ndërkombëtarizimit dhe ndryshimet në ligjin e Arsimit të Lartë. Gjatë takimit ku u shoqërua nga kryetari i Kuvendit Niko Peleshi, ministrja Kumbaro bisedoi me rektorin e Universitetit “Fan Noli” Lorenc Ekonomi, dekanët e fakulteteve, si dhe pedagogë e stafin akademik mbi ndryshimet në draftin për ligjin e rishikuar të arsimit të lartë, si dhe përparësitë e hapjes së Liceut Francez të Korçës me orientim shkencor e teknologjik.

“Jemi në një moment shumë të rëndësishëm, siç është rishikimi i Ligjit të Arsimit, punë e cila ka filluar që në Nëntor të vitit 2025, kur Ministria e Arsimit u është drejtuar përmes një letre të gjitha universiteteve shqiptare, publike dhe jopublike për t’iu kërkuar mendime, opinione dhe sugjerime lidhur me efikasitetin dhe aktualitetin e ligjit ekzistues. Ka kaluar një periudhë dhjetëvjeçare që nga ligji i vitit 2015, gjatë së cilës të gjitha universitetet kanë pasur përvojat dhe sugjerimet e tyre, por edhe mundësi të konstatojnë se ku ky ligj ka ndikuar në rritjen e cilësisë dhe standardeve, por edhe për të përmirësuar aspekte të ndryshme ligjore që ndryshojnë dhe bëjnë më cilësore jetën e arsimit të lartë”, u shpreh ministrja Kumbaro.

“Dua të theksoj që nuk bëhet fjalë për një ligj të ri, por për një rishikim të disa aspekteve të ligjit ekzistues,  në radhë të parë me ndërkombëtarizimin, i cili është sfida e të gjithë universiteteve, përfshirë edhe Universitetin e Korçës, në shumë nivele. Nuk jemi ende në draftin përfundimtar të rishikimit të ligjit dhe dua të theksoj se nuk bëhet  fjalë për një ligj të ri, si sugjerim i të gjithë Universiteteve, përfshirë edhe universitetin e Korçës”, tha ministrja Kumbaro.

Më tej, ajo tha se ky universitet është model i një programi investimi dhe filozofie në gjithë qarkun e Korçës, me synimin për t’u kthyer në një pol ndërkombëtar dijeje, ndërsa hapja e liceut francez të Korçës do të ushqejë linjën e universiteteve me profile teknike e shkencore.

“Universiteti i Korçës  është pjesë e një ekosistemi arsimor shumë të rëndësishëm, si model i një programi investimi dhe filozofie në qarkun e Korçës, ku universiteti, me zhvillimin që do të marrë si një pol dijeje duke u bërë pikë atraktive e universiteteve ndërkombëtare, bashkë me investimin për  liceun francez të Korçës  i cili do të jetë një lice me orientim teknologjik dhe shkencor, e do të jetë një bazë shumë e mirë për të ushqyer linjën  e Universitetit të Korçës si dhe universitetet e tjera me profile tekniko-shkencore të teknologjisë së informacionit e kështu me radhë”, vijoi Kumbaro.

Gjatë vizitës në Korçë, ajo inspektoi edhe punimet në shkollën 9-vjeçare “Sotir Gurra” e cila do të hapë dyert e rikonstruktuar në vitin e ri shkollor për më shumë se 600 nxënës.

/e.i/j.p/

The post Kumbaro: Hapja e Liceut Francez të Korçës do të ushqejë linjën e universiteteve me profile teknike e shkencore appeared first on Agjencia Telegrafike Shqiptare.

TIRANË, 21 korrik /ATSH/ Punimet për zgjerimin e shëtitores bregdetare “Lungomare 4” në zonën e Plazhit të Vjetër në Vlorë po shkojnë drejt përfundimit.

Kryeministri Edi Rama bëri me dije lajmin, ndërsa në një postim në rrjetet sociale ndau pamje nga ky investim në qytetin bregdetar.

Ky projekt është një tjetër investim i rëndësishëm për qytetin turistik, i cili synon të shtrijë standardet moderne të infrastrukturës dhe të japë një impuls të ri zhvillimit urban.

Ndërhyrja në këtë zonë, do të ndikojë drejtpërdrejt në përmirësimin e hapësirave publike dhe në rritjen e cilësisë së jetesës për qytetarët, si dhe në forcimin e potencialit turistik të Vlorës.

Lungomare që nisi në qytetin e Vlorës, tashmë është zgjatur edhe në drejtim të Orikumit duke sjellë hapësira rekreative për pushuesit.

“Lungomare 4” është vazhdimi i shëtitores ekzistuese në krahun perëndimor, me një gjatësi fillestare prej rreth 500 metrash linear.

Projekti parashikon ndërtimin e një promenade me gjerësi rreth 7 metra, si dhe një piste biçikletash prej 2 metrash, duke krijuar një hapësirë funksionale dhe të integruar për këmbësorët dhe përdoruesit e biçikletave.

/e.i/j.p/

The post Drejt përfundimit punimet për Lungomare 4 në Plazhin e Vjetër të Vlorës appeared first on Agjencia Telegrafike Shqiptare.

TIRANË, 21 korrik /ATSH/ Ministria e Shëndetësisë dhe Mirëqenies Sociale informoi sot, se reformat e ndërmarra së fundmi në sistemin shëndetësor po sjellin rezultate konkrete për qytetarët.

Treguesit e 6-mujorit të parë të vitit 2026 të Ministrisë së Shëndetësisë dhe Mirëqenies Sociale konfirmojnë se reformat e ndërmarra së fundmi në sistemin shëndetësor po japin rezultate konkrete, duke reduktuar ndjeshëm kohën e pritjes për disa nga shërbimet më të kërkuara diagnostikuese dhe procedurat e specializuara.

Sipas të dhënave, koha mesatare e pritjes për kryerjen e skanerit është ulur në 7.8 ditë, nga 24.3 ditë që ishte në vitin 2025.

Edhe për rezonancën magnetike, koha e pritjes është reduktuar nga 80.3 ditë në vitin 2025 në 72.3 ditë gjatë 6-mujorit të parë të vitit 2026.

Përmirësimi më i ndjeshëm është regjistruar në shërbimin e koronarografisë, ku koha e pritjes ka rënë nga 111 ditë në vitin 2025 në 46 ditë gjatë 6-mujorit të parë të vitit 2026.

Reduktimi i kohës së pritjes është rezultat i masave të ndërmarra për rritjen e kapaciteteve, përmirësimin e organizimit të shërbimeve dhe rritjen e efikasitetit në sistemin shëndetësor, me qëllim garantimin e një aksesi më të shpejtë dhe cilësor për qytetarët.

/e.i/j.p/

The post Ulet ndjeshëm koha e pritjes për CT, MRI dhe koronarografinë appeared first on Agjencia Telegrafike Shqiptare.

TIRANË, 20 korrik /ATSH/ Tre persona mbetën të plagosur mbrëmjen e sotme, si pasojë e të shtënave me armë zjarri në verandën e një lokali në lagjen “Vullnetari” në Elbasan.

Sipas njoftimit të Policisë së Shtetit, rreth orës 20:30, një person ende i paidentifikuar ka qëlluar me armë zjarri, pistoletë, në drejtim të shtetasve A.T., 32 vjeç, R.M., 31 vjeç dhe B.H., 19 vjeç, të cilët mbetën të plagosur dhe ndodhen jashtë rrezikut për jetën.

Në momentin e ngjarjes, në ambientet e lokalit ndodhej një efektiv policie jashtë shërbimit, i cili, sapo ka dëgjuar të shtënat, ka dalë menjëherë dhe është vënë në ndjekje të autorit.

Gjatë largimit, autori ka hedhur armën e zjarrit dhe ka mundur të largohet në thellësi të lagjes.

Forca të shumta policie kanë rrethuar zonën dhe vijojnë kontrollet intensive për lokalizimin dhe kapjen e autorit.

Ndërkohë, grupi hetimor, nën drejtimin e Prokurorisë, po kryen veprimet procedurale për zbardhjen e plotë të rrethanave të ngjarjes dhe administrimin e provave materiale që do t’i shërbejnë hetimit.

/e.i/a.f/

The post Të shtëna me armë në Elbasan, plagosen tre të rinj appeared first on Agjencia Telegrafike Shqiptare.

TIRANË, 20 korrik /ATSH/ Delegacionet dhe grupet artistike pjesëmarrëse në edicionin e gjashtë të International Folk Festival Tirana, “Ditë Festash në Tiranë” u pritën në ministrinë e Turizmit, Kulturës dhe Sportit, pas tre netëve të mbushura me ritëm, traditë dhe ngjyra nga kultura të ndryshme të botës.

Ministri i Turizmit, Kulturës dhe Sportit, Blendi Gonxhja, vlerësoi kontributin e artistëve dhe grupeve pjesëmarrëse në këtë aktivitet, duke theksuar rolin e folklorit në afrimin e kulturave dhe forcimin e miqësisë mes vendeve.

Sipas Gonxhes, festivali e shndërroi Tiranën në një skenë të kulturave të botës, duke sjellë për publikun tradita, kostume, muzikë dhe valle nga vende të ndryshme.

“Folklori mbetet një gjuhë universale që bashkon njerëzit dhe forcon miqësinë mes popujve”, u shpreh ai.

Gonxhja nënvizoi rëndësinë e aktiviteteve kulturore ndërkombëtare në promovimin e trashëgimisë, shkëmbimin artistik dhe pasurimin e jetës kulturore të vendit.

/e.i/

The post Gonxhja: Folklori, gjuhë universale që bashkon kulturat dhe popujt appeared first on Agjencia Telegrafike Shqiptare.

TIRANË, 20 korrik /ATSH/ Festivali Ndërkombëtar i Bandave Frymore Air Beat Festival – Lulu Fest solli për dy netë me radhë në Korçë një atmosferë të jashtëzakonshme artistike, duke bërë bashkë mbi 200 muzikantë nga Shqipëria, Italia, Mali i Zi, Kosova dhe Maqedonia e Veriut.

Kryeministri Edi Rama ndau sot në rrjetet sociale, pamje nga ky aktivitet, ndërsa theksoi se “paradat dhe koncertet në qytet u shndërruan në një festë të muzikës, kulturës dhe traditave, duke e kthyer Korçën në një pikëtakim ndërkombëtar të artistëve dhe publikut”.

Në festival, artistët interpretuan repertore të larmishme dhe prezantuan traditat muzikore të vendeve që përfaqësonin.

Paradat artistike dhe koncertet e organizuara në hapësirat publike të qytetit tërhoqën një numër të madh spektatorësh, duke e kthyer Korçën në një qendër të rëndësishme të aktiviteteve kulturore gjatë sezonit veror.

Air Beat Festival i shtohet kalendarit të pasur të aktiviteteve kulturore të Korçës, duke kontribuar në promovimin e qytetit si një destinacion tërheqës turistik dhe kulturor, si edhe në pasurimin e ofertës për vizitorët vendas e të huaj.

/e.i/a.f/

The post Festivali “Air Beat-Lulu Fest”, 200 artistë pjesëmarrës nga Shqipëria dhe rajoni appeared first on Agjencia Telegrafike Shqiptare.

TIRANË, 20 korrik /ATSH/ Ministri i Punëve të Brendshme, Besfort Lamallari, bëri apel sot për respektimin e rregullave të qarkullimit rrugor, duke theksuar se sjelljet që pengojnë lëvizjen e qytetarëve dhe krijojnë bllokime në trafik do të ndëshkohen.

Në një reagim në rrjetet sociale, Lamallari u shpreh se për “kapriço të dikujt” nuk duhet të vuajnë drejtuesit e tjerë të mjeteve që respektojnë rregullat e qarkullimit.

“Djema, nëse mendoni se jeni të privilegjuar dhe mund të bëni ç’të doni në trafik duke vonuar dhe bllokuar të tjerët që respektojnë rregullat e qarkullimit rrugor dhe normat qytetare, përshëndeteni pak dronin sipër jush dhe prisni sa të takoni patrullën më të afërt me gjobën tuaj”, tha Lamallari.

Ministri Lamallari bëri të ditur se dronëve të Policisë së Shtetit do t’u shtohen së shpejti edhe kamerat inteligjente të sistemit Smart City, të cilat do të vendosen në akset kombëtare dhe rrugët kryesore të vendit.

Sipas tij, qëllimi është garantimi i zbatimit të ligjit dhe rritja e sigurisë në rrugë, duke nënvizuar se rregullat e qarkullimit duhet të respektohen nga të gjithë qytetarët, pa përjashtim.

/e.i/a.f/

The post Lamallari: Dronët dhe kamerat Smart do të monitorojnë shkeljet në rrugë appeared first on Agjencia Telegrafike Shqiptare.

TIRANË, 20 korrik /ATSH/ Protesta e qytetarëve në Tiranë ka hyrë sot në ditën e 51-të.

Organizimi që nisi me kundërshtimin e investimit të parashikuar në Zvërnec, përgjatë 51 ditëve u zgjerua edhe me kërkesa të tjera nga ana e protestuesve, si largimi i qeverisë dhe dorëheqja e Kryeministrit Edi Rama, si edhe të gjithë klasës politike të 30 viteve të fundit.

Ditën e sotme, protestuesit pas grumbullimit në sheshin “Skënderbej”, marshuan drejt Kryeministrisë përgjatë bulevardit “Dëshmorët e Kombit”, duke shprehur kundërshtimin e tyre ndaj projektit dhe duke ngritur shqetësime të tjera lidhur me politikat për zonat e mbrojtura dhe investimet strategjike.

Gjatë grumbullimit në sheshin “Skënderbej”, një nga protestuesit u shpreh se Qeveria ka vënë dorë mbi çdo pronë të shqiptarëve.

“Dalim në protestë për skandalet e qeverisë shqiptare. Duhet ta nisim nga Enver Hoxha në vitin 1945 me pronat, që na i mori. Pastaj në vitin 1991 u tha se do kompensoheshin sidomos pronat bregdetare. Mirë i morën, por ta na japin të hanë, se iku kjo, të paktën të na kompensohen”, tha ai.

Një tjetër i moshuar, u shpreh nga protesta se “shqiptarët janë shqiponja dhe jo sorra”. Ai ngriti problemin e shpopullimit dhe tha se shqiptarët po zëvendësohen me njerëz nga Afrika dhe Azia.

Aktivisti i Lëvizjës Bashkë, Emiljando Kita, tha nga se ata që protestojnë janë njerëz, të cilët punojnë nga mëngjesi në darkë.

“Punonjësit janë në kushte mjerane me paga mjerane, pensionistët janë në pamundësi për të shtyrë muajin, bujqësia, blergtoria dhe industria janë në kolaps. Kjo protestë është shpresë që gjërat mund të ndryshojnë”, pohoi ai.

Me pankarta në duar dhe flamuj kombëtarë, protestuesit kërkojnë shfuqizimin e ndryshimeve në ligjin për zonat e mbrojtura, ndryshimin e ligjit zgjedhor, si dhe largimin e asaj që ata e cilësuan “kastë të vjetër politike”.

Pas qendrimit në Sheshin “Skënderbe”, protestuesit vijuan marshimin drejt kryeministrisë, ku vijuan fjalimet e rastit.

Vijon…

1 nga 13

/e.i/a.f/

The post Protesta për Zvërnecin në ditën e 51-të appeared first on Agjencia Telegrafike Shqiptare.

TIRANË, 20 korrik /ATSH/ Ministri i Bujqësisë dhe Zhvillimit Rural, Andis Salla vizitoi një pikë grumbullimi në Peqin, ku u njoh me aktivitetin e kësaj sipërmarrjeje dhe bashkëpunimin me fermerët e zonës.

Së bashku me kryetarin e bashkisë Peqin, Bukurosh Maçi, Salla pa nga afër punën e pikës së grumbullimit, e cila jo vetëm tregton prodhimet e fermës së saj, por bashkëpunon edhe me fermerë të tjerë të bashkisë, duke krijuar një zinxhir vlere për prodhimet bujqësore të zonës.

“Produktet Made in Albania nga kjo pikë grumbullimi eksportohen në Kosovë, Maqedoninë e Veriut, vendet e Ballkanit dhe më gjerë në tregun europian”, tha Salla.

Sipas tij, organizimi i fermerëve në shoqëri bashkëpunimi po krijon mundësi të reja për rritjen e prodhimit, garantimin e cilësisë dhe zgjerimin e tregjeve për produktet shqiptare.

Ministri Salla theksoi se skema e kompensimit në masën 10% të vlerës së faturave të shitjes po kontribuon në formalizimin e sektorit, rritjen e të ardhurave të fermerëve dhe forcimin e konkurrueshmërisë së prodhimit vendas.

“Mbështetja ndaj fermerëve dhe lidhja e tyre me tregun janë hapa të rëndësishëm për zhvillimin e një bujqësie më të organizuar dhe më konkurruese”, u shpreh Salla.

/e.i/a.f/

The post Salla: Organizimi i fermerëve dhe zgjerimi i tregjeve forcojnë prodhimin vendas appeared first on Agjencia Telegrafike Shqiptare.

TIRANË, 20 korrik /ATSH/ Testimi i informatizuar për kandidatët e portalit “Mësues për Shqipërinë” nis nesër, 21 korrik, dhe do të vijojë deri më 28 gusht.

Ministrja e Arsimit, Mirela Kumbaro bëri me dije lajmin, ndërsa shtoi se procesi do të zhvillohet në ambientet e Qendrës së Shërbimeve Arsimore (QSHA), sipas kalendarit të përcaktuar për secilin profil.

Kumbaro u bëri thirrje mësuesve kandidatë që të verifikojnë paraprakisht datën, orën dhe profilin përkatës në kalendarin zyrtar të publikuar nga institucioni, në mënyrë që të paraqiten sipas planifikimit.

Testimi i informatizuar është pjesë e procedurave të Portalit “Mësues për Shqipërinë”, përmes të cilit realizohet përzgjedhja e kandidatëve për sistemin arsimor parauniversitar.

/e.i/a.f/

The post Nis nesër testimi i informatizuar për portalin Mësues për Shqipërinë appeared first on Agjencia Telegrafike Shqiptare.

TIRANË, 20 korrik /ATSH/ Në vijën bregliqenore të Pogradecit, çdo ditë, vijon puna në terren e inspektorëve të Agjencisë Kombëtare të Bregdetit, për garantimin e administrimit të rregullt të vijës bregdetare dhe mbrojtjen e hapësirave të plazheve publike.

Ministri i Turizmit, Kulturës dhe Sportit, Blendi Gonxhja, përcolli në rrjetet sociale, fotografi nga vija bregliqenore në Pogradec, ku kryhen monitorime të vazhdueshme në terren për garantimin e zbatimit të kontratave dhe administrimin e rregullt të hapësirave publike.

Gonxhja tha se “gjatë inspektimit u bë lirimi i çadrave të vendosura jashtë sipërfaqes së miratuar, gjithashtu u mor dhe masë administrative “Paralajmërim”, për subjektet shkelëse, në përputhje me legjislacionin në fuqi”.

“Hapësirat publike janë për të gjithë. Respektimi i rregullave garanton një bregdet dhe vijë bregliqenore të mirëmenaxhuar për qytetarët dhe vizitorët”, tha Gonxhja.

Me herët, ministri Gonxhja ka bërë të ditur se, monitorimet do të vijojnë gjatë gjithë sezonit veror. Hapësirat publike në bregdet mbeten një nga prioritetet e menaxhimit të sezonit turistik, duke synuar që qytetarët të kenë akses të lirë në vijën ranore dhe një përvojë sa më cilësore gjatë pushimeve verore.

/e.i/a.f/

The post Monitorime në vijën bregliqenore të Pogradecit për respektimin e hapësirave publike appeared first on Agjencia Telegrafike Shqiptare.

TIRANË, 20 korrik /ATSH/ Një vatër zjarri është aktivizuar pasditen e sotme në zonën e Ujit të Ftohtë, mbi tunelin e Vlorës, duke përfshirë një sipërfaqe me shkurre dhe bimësi.

Sipas medieve, për shkak të temperaturave të larta dhe erës, flakët po përhapen me shpejtësi, duke iu afruar zonës së banuar dhe duke krijuar rrezik për qytetarët dhe banesat pranë.

Në vendngjarje po ndërhynë shërbimet zjarrfikëse, në bashkëpunim me forcat e Policisë, të cilat po punojnë për izolimin e vatrës së zjarrit dhe mbrojtjen e banesave.

Operacioni për shuarjen e plotë të flakëve vijon, ndërsa autoritetet po monitorojnë situatën dhe po marrin masat e nevojshme për të parandaluar përhapjen e mëtejshme të zjarrit dhe eliminimin e çdo rreziku për zonën e banuar.

Vijon…

/e.i/a.f/

The post Zjarr në zonën e Ujit të Ftohtë në Vlorë, ndërhyrje për izolimin e flakëve appeared first on Agjencia Telegrafike Shqiptare.

TIRANË, 20 korrik /ATSH/ Kuvendi miratoi me 76 vota pro dhe 25 kundër propozimin për shtyrjen e shqyrtimit të projektrezolutave për veprimtarinë e disa institucioneve kushtetuese dhe të pavarura për në seancën e ardhshme plenare.

Vendimi erdhi pas bllokimit të foltores nga opozita, e cila nuk pranon që Avokati i Popullit, Endrit Shabani të paraqesë projektrezolutën, duke mos e njohur Shabanin si drejtues të Institucionit të Avokatit të Popullit, pasi sipas Partisë Demokratike, emërimi i tij është realizuar në mënyrë antikushteteuse dhe për këtë kanë paraqitur edhe një kallëzim në Gjykatën Kushtetuese.

Në këto kushte, Partia Socialiste propozoi shtyrjen shqyrtimit të projektrezolutave për seancën e ardhshme, më 23 korrik 2026.

Propozimi u paraqit nga kryetari i grupit parlamentar të Partisë Socialiste, Taulant Balla, i cili tha se “ishte e papërshtatshme që institucione si Avokati i Popullit të konsideroheshin se e kishin përmbushur detyrimin kushtetues të raportimit vetëm përmes raportit të shkruar”.

“Është absurde që një institucion kushtetues si Avokati i Popullit, raportimi i të cilit në Kuvend parashikohet nga neni 63 i Kushtetutës dhe që tradicionalisht ka raportuar i pari në Kuvend, të konsiderohet se e ka kryer raportimin vetëm përmes paraqitjes së raportit me shkrim”, tha Balla.

Balla bëri të ditur se mazhoranca ka pranuar në mënyrë konsensuale propozimin e grupit parlamentar të Partisë Demokratike që gjashtë institucionet e planifikuara për të raportuar në këtë seancë të ruanin praktikën e raportimit në seancë plenare.

Balla propozoi që shqyrtimi i projektrezolutave për Këshillin e Lartë Gjyqësor (KLGJ), Këshillin e Lartë të Prokurorisë (KLP), Kontrollin e Lartë të Shtetit (KLSH), Prokurorinë e Përgjithshme, Prokurorinë e Posaçme Kundër Korrupsionit dhe Krimit të Organizuar (SPAK), Inspektorin e Lartë të Drejtësisë (ILD) dhe Avokatin e Popullit të vijojë në seancën e ardhshme.

Nga ana e tij, kreu i grupit parlamentar të Partisë Demokratike, Gazment Bardhi, kundërshtoi propozimin e Ballës, duke deklaruar se ndryshimi i rendit të ditës në një seancë plenare përcaktohet nga kryetari i Kuvendit.

“Meqë bie dakord për të ndryshuar renditjen, ta vazhdojmë seancën tani. Kanë ardhur për të raportuar, t’i dëgjojmë dhe të vazhdojmë diskutimin me institucionet e tjera”, tha Bardhi.

Bardhi shtoi se opozita kërkon që raportimet të vijojnë sipas rendit të ditës, duke nisur me Këshillin e Lartë Gjyqësor.

Nga ana e tij, kryetari i Kuvendit, Niko Peleshi, theksoi se rendi i ditës nuk mund të ndryshohet gjatë zhvillimit të seancës për shkak të bllokimit fizik të foltores.

Peleshi sqaroi se as Balla dhe as deputetët nuk kanë kompetencë të vendosin rendin e ditës së seancës pasardhëse, por kanë të drejtë të paraqesin propozime sipas rregullores së Kuvendit.

“Rendin e ditës e shpall kryetari i Kuvendit, nuk mund të vendosim pas shtatë orësh si do ta bëjmë aq më keq në presionin e bllokimit fizik të foltores. Nuk i vlen askujt. Si mund të bllokosh Kuvendin se nuk të pëlqen dikush? Ju thoni është antikushtetues se e shpall unë, të ligjshëm a të paligjshëm e shpallin gjykatat. Nëse do të ishte pranuar nga Gjykata Kushtetuese do ta zbatonim, unë i pari dhe gjithë të tjerët. S’kemi vendim pezullimi, kur të shqyrtohet do të respektohet vendimi i Gjykatës Kushtetuese. Këto janë mendime personale apo të një grupi të caktuar. Rendi i ditës nuk mund të ndryshojë gjatë ditës së seancës vetëm sepse kemi bllokim fizik të foltores, do të ishte fundi i parlamentarizmit”, tha Peleshi.

Peleshi, në mbështetje të rregullores, hodhi në votim propozimin e kreut të grupit parlamentar të PS-së, për shtyrjen e pikave të rendit të ditës për seancën e së enjtes.

/e.i/a.f/

The post Diskutimi i projektrezoltuave të disa institucioneve shtyhet për në seancën e ardhshme plenare appeared first on Agjencia Telegrafike Shqiptare.

TIRANË, 11 korrik /ATSH/ Ministri i Punëve të Brendshme, Besfort Lamallari përgëzoi sot Forcën Operacionale dhe partnerët amerikanë të Shërbimit Diplomatik të Sigurisë (DSS) për arrestimin e dy personave me rrezikshmëri të lartë shoqërore në Durrës.

Lamallari deklaroi se këta persona ishin shpallur në kërkim ndërkombëtar nga autoritetet në Shkup.

“Krimi është më i dobët përballë një fronti të përbashkët të agjencive brenda dhe jashtë vendit dhe qytetarëve që distancohen dhe raportojnë çdo paligjshmëri apo person të rrezikshëm që përpiqet të përfitojë në kurriz të tyre dhe shtetit të së drejtës”, tha ai.

Ky operacion i përbashkët ndërkombëtar i koduar“Fury”, u zhvillua nga Drejtoria e Forcës së Posaçme Operacionale e Departamentit të Policisë Kriminale, në bashkëpunim me Drejtorinë Vendore të Policisë Durrës dhe partnerët amerikanë të Shërbimit Diplomatik të Sigurisë (DSS).

Operacioni ndërkombëtar i koduar“Fury” çoi në arrestimin e dy shtetasve të shpallur në kërkim ndërkombëtar nga autoritetet e Republikës së Maqedonisë së Veriut.

Në pranga ranë M. Xh., 26 vjeç, i lindur në Shkup, dhe S. N., 34 vjeç, i lindur në Norvegji.

Sipas Policisë, ndaj tyre Interpol kishte lëshuar urdhra arresti ndërkombëtar për veprat penale të vrasjes, plagosjes, armëmbajtjes pa leje dhe kryerjes së veprave penale në kuadër të një organizate kriminale.

/e.i/ /a.g/

The post Lamallari: Krimi është më i dobët përballë një fronti të përbashkët të agjencive brenda dhe jashtë vendit appeared first on Agjencia Telegrafike Shqiptare.

TIRANË, 11 korrik /ATSH/ Bashkia Lezhë ka vënë në dispozicion të pushuesve kontaktet e stafit drejtues, me qëllim adresimin e menjëhershëm të çdo shqetësimi gjatë sezonit turistik, në zonat bregdetare të Lezhës.

Kryetari i bashkisë Lezhë, Pjerin Ndreu, bëri të ditur se qytetarët dhe vizitorët mund të drejtohen pranë strukturave përgjegjëse për çdo problematikë që lidhet me shërbimet, standardet e turizmit, çmimet apo hapësirat publike.

Sipas Ndreut, kjo nismë vjen në kuadër të angazhimit për garantimin e një sezoni turistik sa më cilësor dhe transparent, si dhe për të reaguar ndaj çdo rasti që bie në kundërshtim me rregullat dhe interesin e pushuesve.

Bashkia Lezhë ka bërë publike edhe çmimet e miratuara për përdorimin e shezloneve në zonat turistike të administruara, të cilat variojnë sipas zonave dhe kategorive të shërbimit.

Ndreu bën me dije se për shezlonet bazike prej alumini, çmimet janë 300 lekë në Tale, 400 lekë në Shëngjin (qendër) dhe Kune, si dhe 500 lekë në Ranën e Hedhun. Ndërsa, shezlonet prej druri me dyshek kanë çmime nga 700 lekë në Tale, 800 lekë në Shëngjin (qendër) dhe 1000 lekë në Ranën e Hedhun. Gazebot familjare variojnë nga 1500 deri në 2500 lekë.

Kryebashkiaku i Lezhës u bëri thirrje pushuesve që çdo rast i çmimeve abuzive apo problematikave të tjera të denoncohet pranë kontakteve të vëna në dispozicion, me qëllim marrjen e masave të menjëhershme.

Bashkia Lezhë thekson se garantimi i cilësisë së shërbimeve turistike, mbrojtja e interesit të pushuesve dhe promovimi i destinacioneve bregdetare mbeten prioritet gjatë sezonit veror.

Numrat e kontaktit për pushuesit:

Pjerin Ndreu – Kryetar i Bashkisë: +355 69 404 5011
Fatjon Zefi – Zv/Kryetar i Bashkisë: +355 69 559 1150
Brahim Demi – Administrator i Shëngjinit: +355 69 333 4446
Zhaneta Frroku – Administratore e Shënkollit-Talës: +355 69 996 1800
Besmir Frroku – Drejtor i Lezha Invest: +355 69 393 0434
Renaldo Xhanej – Drejtor i Turizmit: +355 69 626 7623

/e.i/ /a.g/

The post Ndreu publikon numrat e kontaktit dhe çmimet në plazhet e Lezhës: Denonconi çdo rast abuzimi appeared first on Agjencia Telegrafike Shqiptare.

TIRANË, 11 korrik /ATSH/ Ura e Mesit është një nga monumentet më të vizituara të qytetit të Shkodrës, duke tërhequr çdo ditë vizitorë vendas dhe të huaj.

E vendosur në një peizazh të veçantë natyror, kjo urë historike u ofron turistëve një përvojë që ndërthur trashëgiminë, arkitekturën dhe bukuritë natyrore të zonës.

Kryetari i bashkisë së Shkodrës, Benet Beci ndau sot pamje nga ura e Mesit e mbushur me vizitorë nga vende të ndryshme të botës që ndalen për të njohur më nga afër historinë dhe autenticitetin e kësaj ure.

Beci tha se vlerësimet për bukuritë e Shqipërisë dhe mikpritjen e njerëzve shërbejnë si një tregues i rritjes së interesit për destinacionet turistike shqiptare.

“Ruajtja dhe promovimi i trashëgimisë kulturore vijon të luajë një rol të rëndësishëm në zhvillimin e turizmit, duke e pozicionuar Shkodrën si një nga destinacionet më të veçanta për vizitorët vendas dhe ndërkombëtarë”, tha ai.

Një turist u shpreh se vjen nga Australia dhe deri tani përvoja në Shqipëri i ka pëlqyer shumë.

“Njerëzit janë shumë sjellshëm. Gjithçka është kaq e bukur.  Është vUra e Mesit në Shkodër, ”, tha ai.

Një tjetër pushuese, u shpreh se të gjithë në Shkodër janë shumë miqësorë.

“Kjo është shtëpia ime. Shtëpia ime e dytë. Kjo është zemra ime. Këtu janë sytë e mi. Besomë, ky është vëllai im”, vijoi një tjetër pushues.

“Është thjesht e mrekullueshme. Është hera ime e parë në Shqipëri. Mbërrita vetëm dje. Vendi më i bukur në botë. Njerëzit më të mirë në botë”, tha një tjetër.

Një turist italian, tha se ka ardhur disa herë në Shqipëri dhe se i pëlqen shumë Taraboshi dhe Shiroka.

“Unë tani kam shoqëruar disa miq për të vizituar urën e Mesit. Shqipëria është shumë e bukur”, tha ai.

E ndërtuar në shekullin XVIII mbi lumin Kir, ura është një monument i trashëgimisë kulturore dhe një nga destinacionet më të vizituara të veriut të vendit.

Ura e Mesit u ndërtua në vitin 1768 nga Mehmet Pashë Bushati dhe dikur shërbente për të lidhur Drishtin me Shkodrën. Ura e Mesit ka gjatësi 108 metra, gjerësi 3,4 metra dhe ka 13 harqe jo simetrike.

/e.i/ /a.g/

The post Turistë nga e gjithë bota njihen me historinë dhe autenticitetin e Urës së Mesit: Thjesht e mrekullueshme appeared first on Agjencia Telegrafike Shqiptare.

TIRANË, 11 korrik /ATSH/ Policia Kufitare e Vlorës ndëshkoi ditën e sotme me gjobë disa të rinj që duke lëvizur me mjete lundruese në afërsi të bregut, rrezikuan pushuesit.

Policia Kufitare e Vlorës vendosi gjoba në masën prej 500.000 dhe 510.000 lekë të rinj, si dhe u bllokon mjetet lundruese.

Sipas njoftimit të Policisë së Shtetit, shërbimet e Drejtorisë Vendore për Kufirin dhe Migracionin Vlorë, në bashkëpunim me Njësinë Policore Detare dhe Drejtorinë Vendore të Policisë Fier, evidentuan drejtuesin e një mjeti lundrues tip Jet Ski, i cili kishte lundruar pranë bregut në plazhin e Semanit, duke rrezikuar sigurinë e pushuesve.

Drejtuesi i mjetit, shtetasi E. D., u ndëshkua me masë administrative prej 500 mijë lekësh të rinj, ndërsa mjeti lundrues u bllokua administrativisht.

Po ashtu, gjatë patrullimeve në afërsi të Zvërnecit, në zonën e plazhit të Hidrovorit, Policia Kufitare konstatoi një gomone që lëvizte në mënyrë të paligjshme brenda perimetrit të sigurisë, pranë zonës ku pushonin qytetarët.

Nga verifikimet rezultoi se drejtuesi i mjetit, shtetasi J. H., nuk dispononte dokumentacionin përkatës të mjetit lundrues. Për këtë shkelje ndaj tij u vendos një masë administrative prej 510 mijë lekësh të rinj, si dhe u bllokua administrativisht gomonia.

Policia e Shtetit u bën apel të gjithë përdoruesve të mjeteve lundruese dhe subjekteve që operojnë me to të respektojnë rregullat e lundrimit dhe perimetrat e sigurisë, duke theksuar se çdo shkelje që cenon jetën dhe sigurinë e pushuesve do të ndëshkohet menjëherë në përputhje me ligjin.

/e.i/ /a.g/

The post Policia Kufitare e Vlorës, gjoba dhe bllokime të mjeteve lundruese për shkelësit e ligjit appeared first on Agjencia Telegrafike Shqiptare.

TIRANË, 11 korrik /ATSH/ Shërbimi shëndetësor për pushuesit vijon pa ndërprerje në 36 Qendrat Shëndetësore Verore në të gjithë vendin. Për herë të parë këtë sezon turistik po zbatohet kuadri i unifikuar i tarifave për shërbime të caktuara shëndetësore vetëm për turistët e huaj, jo rezidentë në Shqipëri. Të ardhurat e krijuara nga këto tarifa do të përdoren nga vetë qendrat shëndetësore për përmirësimin e cilësisë së shërbimeve dhe plotësimin e nevojave më imediate.

Gjatë inspektimit në Qendrën Shëndetësore Verore në Tale, Lezhë, ministrja e Shëndetësisë dhe Mirëqenies Sociale, Evis Sala, theksoi se tarifat nuk prekin në asnjë rast qytetarët shqiptarë, të cilët vijojnë të marrin shërbim shëndetësor falas, siç parashikohet nga sistemi publik.

“Një risi që kemi implementuar këtë vit është pagesa e disa shërbimeve shëndetësore nga turistët e huaj. E theksoj edhe njëherë, vetëm për turistët e huaj, jo për shtetasit shqiptarë, për të cilët shërbimi vazhdon të jetë falas, siç ka qenë gjithmonë. Kemi vendosur disa tarifa të thjeshta, të cilat krijojnë mundësinë që qendrat shëndetësore të sigurojnë të ardhura dytësore. Këto të ardhura do të përdoren nga vetë qendrat për të investuar në përmirësimin e shërbimeve dhe për të plotësuar nevojat më imediate që ato kanë,” u shpreh ministrja Sala.

Që nga nisja e sezonit turistik, më 1 qershor 2026, mbi 17 mijë pushues kanë marrë shërbim në Qendrat Shëndetësore Verore, ndërsa rreth 21% e tyre kanë qenë turistë të huaj, duke konfirmuar rolin gjithnjë e më të rëndësishëm të këtyre qendrave në garantimin e kujdesit shëndetësor gjatë sezonit veror.

Ministria e Shëndetësisë dhe Mirëqenies Sociale, përmes Operatorit të Shërbimeve të Kujdesit Shëndetësor, vijon monitorimin e përditshëm të funksionimit të qendrave, duke garantuar furnizimin me barna, pajisje mjekësore dhe mbarëvajtjen e shërbimit në të gjitha zonat turistike.

Një tjetër risi e këtij sezoni është pajisja e të 36 Qendrave Shëndetësore Verore me sistemin e pagesave elektronike (POS), duke u mundësuar turistëve të huaj të kryejnë pagesat në mënyrë të shpejtë, të sigurt dhe transparente, si pjesë e përmirësimit të aksesit dhe modernizimit të shërbimeve shëndetësore.

Ministrja e Shëndetësisë dhe Mirëqenies Sociale, Evis Sala në Qendrën Shëndetësore Verore në Ta...

1 nga 4

/e.i/ /a.g/

The post Sala: Tarifat vlejnë vetëm për turistët e huaj, të ardhurat do të përdoren nga qendrat shëndetësore verore appeared first on Agjencia Telegrafike Shqiptare.

TIRANË, 11 korrik /ATSH/ Tirana do të presë sonte një nga emrat më të mëdhenj të muzikës hip-hop botërore, Kanye West. Reperi amerikan, i njohur edhe me emrin artistik Ye, do të mbajë koncertin në “Eagle Stadium”, një stadium i përkohshëm i ndërtuar posaçërisht për këtë aktivitet përgjatë aksit Tiranë–Durrës dhe që pritet të mbledhë dhjetëra mijëra fansa.

Kryeministri Edi Rama, reagoi sërish në lidhje me koncertin e artistit me famë botërore, Kanye West.

Duke ndarë për herë të parë pamje nga stadiumi i përfunduar, në një postim në rrjetet sociale, Rama shkruan se stadiumi është gati për këtë koncert që do të fusë Shqipërinë në një tjetër hartë globale, atë të komunitetit botëror të amatorëve të muzikës, të cilët falë ngjarjes muzikore të mbrëmjes së sotme do të bëjnë atë që bëjnë kudo shkon Kanye West: Do të vijnë të vizitojnë Shqipërinë.

Rama shprehet se “disa vazhdojnë të flasin për 4 milionë euro shpenzim për një natë, ndërkohë që vetëm kush nuk do s’e kupton që ato 4 milionë janë një investim, i cili do të rikthehet nga mijëra vizitorët që në 48 orët e fundit janë shtuar në hotelet, apartamentet, restorantet, baret, dyqanet, taksitë. Më shumë se sa 4 milionë do të jenë ato që do të rikthehen edhe në vetë arkën e shtetit, nga rritja e konsumit dhe është vërtetë gjynah që rrimë bëjmë këtë bisedë, në një ditë të shënuar kulturore si kjo për Shqipërinë”.

Sipas tij, një koncert i kësaj përmase dhe i këtij artisti, nuk është thjesht një ngjarje artistike. “Është marketing global për Shqipërinë, një reklamë që do të kushtonte shumë më tepër po të blihej me fushata tradicionale. Dhe kjo nuk është një shpikje shqiptare. Është mënyra se si veprojnë vendet më të zhvilluara të Europës. Kush kujton se kultura është luks duhet ta rishikojë këtë opinion të gabuar”, deklaroi Kreu i Ekzekutivit.

Sipas tij, kultura nuk është vetëm një vlerë artistike, por edhe një motor zhvillimi ekonomik, që ndikon drejtpërdrejt në turizëm, punësim dhe rritjen e konsumit. “S’kemi bukë, s’na duhet kultura”? Gabim, kultura nuk është vetëm ushqim shpirtëror, po edhe ekonomi, turizëm, zhvillim. Bukë! Prandaj ta paraqesësh një investim të tillë si para të hedhura në erë është të mos kuptosh se si krijohet vlerë monetare nga ngjarjet kulturore e sportive, ndërkohë që e kundërta, anullimi i koncertit, do të ishte turpërim i Shqipërisë dhe dëm i madh në imazhin e mezingritur të vendit tonë”, nënvizon ai.

Kryeministri përfundon reagimin e tij duke u shprehur se “Shqipëria nuk fiton duke u fshehur nga bota. Shqipëria fiton duke e sjellë botën në shtëpinë e saj.

/e.i/  /a.g/

The post Rama: Koncerti i Kanye West, marketing global që sjell turizëm dhe ekonomi për Shqipërinë appeared first on Agjencia Telegrafike Shqiptare.

TIRANË, 11 korrik /ATSH/ Policia e Tiranës ka finalizuar operacionin e koduar “Last Bet”, në kuadër të goditjes së veprimtarisë së kundërligjshme të organizimit të lojërave të fatit, duke zbuluar tre ambiente ku zhvillohej kjo veprimtari.

Si rezultat i operacionit, Policia bën me dije se u sekuestruan tre makineta për lojëra fati, një tavolinë pokeri, çipsa, letra bixhozi dhe pesë telefona celularë që dyshohet se përdoreshin për organizimin e lojërave të fatit dhe basteve sportive.

Gjatë veprimeve policore u arrestuan në flagrancë dy shtetas, katër të tjerë u proceduan penalisht në gjendje të lirë, ndërsa dy persona u shpallën në kërkim.

Sipas Policisë, specialistët për Hetimin e Krimeve të Komisariatit nr. 1 arrestuan një 22-vjeçar dhe shpallën në kërkim dy shtetas të tjerë, pasi dyshohet se organizonin lojëra fati në një ambient të marrë me qira në rrugën “Aleks Çaçi”. Në këtë ambient u gjetën dy makineta për lojëra fati, një tavolinë pokeri, si dhe çipsa e letra bixhozi.

Ndërkohë, specialistët për Hetimin e Krimeve të Komisariatit nr. 5 arrestuan një 39-vjeçar, pasi në lokalin që administronte në zonën e Bathores u gjetën një makinetë dhe një telefon celular që dyshohet se përdoreshin për organizimin e lojërave të fatit.

Po ashtu, specialistët e Seksionit për Hetimin e Krimeve Kibernetike nisën procedim penal ndaj katër shtetasve, pasi gjatë kontrollit në një lokal në rrugën “Irfan Tomini”, secilit prej tyre iu gjet një telefon celular që dyshohet se përdorej për organizimin e basteve sportive.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme hetimore.

/e.i/ /a.g/

The post Paligjshmëria në lojërat e fatit, policia arreston dy persona dhe shpall në kërkim dy të tjerë appeared first on Agjencia Telegrafike Shqiptare.