Një 35-vjeçar rezulton i zhdukur prej 3 ditësh në Tiranë. Bëhet fjalë për Eglant Koçin, i datëlindjes, 17 shtator 1991, i cili nuk ka kontaktuar me familjarët. Për herë të fundit është parë në zonën pranë sheshit “Wilson” në kryeqytet, teksa po lëvizte me një automjet me targa “CT969”.

Një ditë më parë në Komisariatin nr. 2 është bërë denoncim nga familjarët e tij, të cilët kanë kërkuar ndihmë për gjetjen.

Burime pranë policisë bëjnë me dije se familjarët janë shprehur se nuk ka konflikte me njeri. Policia ka nisur gjurmimin për të riun, ndërsa po kontrollohen kamerat e sigurisë për të parë drejtimin e lëvizjes. Paraprakisht, nga pamjet e administruara prej bluve, lëvizjet me makinë janë normale, ndërkohë që kërkimet vijojnë.

Kupa e Botës me 48 ekipe dhe 104 ndeshje që fillon javën e ardhshme në 16 qytete në SHBA, Meksikë dhe Kanada, paraqet një sfidë të paparë sigurie, me më shumë ekipe, më shumë ndeshje dhe një shtrirje gjeografike më të madhe se kurrë më parë.

Kjo gjithashtu vjen gjithashtu në një sfond të tensionuar, mes dhunës politike në rritje dhe I paraqet autoriteteve një peizazh kompleks sigurie në të cilin duhet të përgatiten për kërcënime të panumërta.

Mbikëqyrja e aparatit të sigurisë së shtrirë është një një numër agjencish federale, departamentesh policore shtetërore dhe lokale dhe subjektesh private. Detyrat e tyre të mbivendosura përfshijnë sigurimin e stadiumeve dhe zonave të tifozëve, shoqërimin e ekipeve për në dhe nga ndeshjet dhe mbrojtjen e personaliteteve të pranishme.

Në ditët e ndeshjeve, FBI do të aktivizojë një qendër të përbashkët operacionesh në secilin qytet pritës, duke bashkuar agjencitë lokale, shtetërore dhe federale të zbatimit të ligjit për të monitoruar dhe hetuar kërcënimet – në mediat sociale dhe në terren.

FBI ka punuar në planin e saj të sigurisë së turneut për dy vjet, duke përfshirë mësime nga ngjarje të tjera të mëdha.

Herën e fundit që Shtetet e Bashkuara pritën Kupën e Botës në vitin 1994 nuk kishte dronë, as telefona inteligjentë apo inteligjencë artificiale. Në atë kohë, shqetësimet më të mëdha ishin terrorizmi dhe huliganizmi.

Që nga Kupa e Botës e fundit në Katar në vitin 2022, dronët janë shfaqur si një armë kryesore e preferuar për njerëzit që kërkojnë të shkaktojnë dëm.

Stadiumet dhe zonat e tifozëve të Kupës së Botës janë të ndaluara për dronë dhe FBI ka një numër opsionesh për të penguar ndërhyrjet.

Deri më tani, nuk ka kërcënime të besueshme, sipas autoriteteve, teksa Departamenti i Sigurisë Kombëtare, i vlerëson se deri në 7 milionë njerëz do të vizitojnë Shtetet e Bashkuara për Kupën e Botës.

Në vazhdën e spekulimeve, teorive konspirative dhe protestave qytetarë kundër ndërtimit të një resorti luksoz në Zvërnec, kryeministri Edi Rama ka ndarë foto nga “Ria Formosa”.

Rama thotë se “pak dekada më parë, Algarve ishte një rajon periferik, me ekonomi të mbështetur kryesisht tek bujqësia dhe peshkimi, me të ardhura të ulëta dhe emigracion të lartë. Në vend që të ndiqte modelin e turizmit masiv me vlerë të ulët, Portugalia bëri një zgjedhje strategjike: investoi tek turizmi luksoz dhe me vlerë të lartë”.

Më tej kreu i qeverisë shkruan se “Ria Formosa” është një resort në jug të Portugalisë dhe është një ndër lagunat më të rëndësishme të Europës. Një peizazh unik me flamingo, shpendë migratorë, ishuj ranorë, dunat bregdetare dhe një biodiversitet të jashtëzakonshëm.

Duke ndarë foto të resortit në rrjetet sociale, Rama shprehet se natyra dhe investimet për turizmin, mund të bashkëjetojnë në një mënyrë perfekte.

“Kur flitet për zhvillimin në zonat e mbrojtura, shumëkush e paraqet debatin si një zgjedhje të detyrueshme mes natyrës dhe ekonomisë. Por ka vende që tregojnë se realiteti mund të jetë krejt tjetër. Ria Formosa, në jug të Portugalisë, është një nga lagunat më të rëndësishme të Europës. Një peizazh unik me flamingo, shpendë migratorë, ishuj ranorë, dunat bregdetare dhe një biodiversitet të jashtëzakonshëm. Dhe pikërisht aty, në zemër të këtij peizazhi, Portugalia ndërtoi një nga historitë më të suksesshme të transformimit ekonomik në Europë”, shkruan Rama.

Duke shtuar se resorti luksoz nuk u ndërtua kundër natyrë, por falë natyrës, Rama liston benefitet që mori zona nga një investim i jashtëzakonshëm: “miliarda euro investime private, mijëra vende pune direkte dhe indirekte, rritje e ndjeshme e vlerës së pronave, të ardhura shumë më të larta për çdo turist, një sezon turistik që zgjat gjatë gjithë vitit dhe transformimi i Algarve në një nga destinacionet më prestigjioze të Europës.“

Krahas investimit që ka sjellë shumë të ardhura për zonën, Rama shprehet se natyra, flamengot, shpendët mirgatorë madje vetë biodiversiteti është bërë pjesë e produktit turistik.

Sipas Ramës mësimi për Shqipërinë dhe shqiptarët është i thjeshtë: Pyetja nuk është nëse natyra dhe zhvillimi mund të bashkëjetojnë. Pyetja është nëse kemi vizionin, dijen dhe vullnetin për t’i bërë ato të bashkëjetojnë, sepse pasuria nuk krijohet duke zgjedhur mes natyrës dhe zhvillimit. E pra, boll i kemi paguar haraç budallallëkut tonë 100 vite! Shqipëria e rilindur turistike do hyjë me se s’bën në ligën e kampionëve të turizmit botëror dhe Europa e bota do të na vlerësojë përfundimisht si vend i bekuar jo i mallkuar.

Skena tronditëse u panë sot në Ankara kur një burrë mbajti peng vajzën e tij trevjeçare, e kërcënoi me thikë dhe e vari nga dritarja e një apartamenti pas një debati të ashpër me gruan e tij.

Fëmija u shpëtua i padëmtuar pas një operacioni nga forcat speciale të policisë turke.

Sipas Haberler, incidenti ndodhi në lagjen Etimesgut të Ankarasë. Raportimet fillestare tregojnë se burri pati një debat me gruan e tij për një arsye të panjohur dhe më pas kërcënoi se do të vriste fëmijën e tij.

Më konkretisht, gjatë incidentit, ai kapi vajzën e tij trevjeçare dhe e mbajti peng ndërsa mbante një thikë. Situata mori një kthesë edhe më dramatike kur ai u shfaq në dritaren e apartamentit duke mbajtur fëmijën të varur jashtë, duke shkaktuar panik midis banorëve të zonës.
Një video e incidentit, e cila u shpërnda në mediat sociale, kap momentet dramatike para se policia të ndërhynte.

Ankara Etimesgut'ta eşiyle tartıştıktan sonra 3 yaşındaki kızını bıçakla rehin alan şüpheli, özel harekat polislerinin düzenlediği operasyonla etkisiz hale getirildi https://t.co/1K5QWzkfcb pic.twitter.com/M1ineSXFFy

— Halk TV (@halktvcomtr) June 5, 2026

Liqeni i Shkodrës është shpallur Rezervë Biosfere e UNESCO-s. Lajmin e dha kryetari i Bashkisë Shkodër, Benet Beci, përmes një postimi në rrjetet sociale.

Sipas Becit, ky është një vlerësim ndërkombëtar për një nga pasuritë më të mëdha natyrore që ka Shqipëria.

“Mirëmëngjes me një super lajm për Shkodrën dhe Liqenin tonë!

Liqeni i Shkodrës është shpallur Rezervë Biosfere e UNESCO-s, një vlerësim ndërkombëtar për një nga pasuritë më të mëdha natyrore që kemi.

Ky është një moment krenarie për Shkodrën, për komunitetet që jetojnë pranë liqenit dhe për potencialin e jashtëzakonshëm që ky territor mbart për turizmin, ekonominë lokale, zhvillimin e rajonit dhe rritjen e mirëqenies.

Liqeni i Shkodrës nuk është vetëm një pasuri natyrore. Është identitet, histori dhe një nga asetet më të çmuara të Shkodrës”, shkruan Beci.

Me këtë vendim, Rrjeti Botëror i Rezervave të Biosferës arrin në 797 zona të mbrojtura në 145 vende të botës. Rrjeti Botëror i Rezervave të Biosferës arrin në 797 zona të mbrojtura në 145 vende të botës.Së bashku me sitet e Trashëgimisë Botërore dhe Gjeoparqet Globale, këto zona mbrojnë mbi 13 milionë kilometra katrorë ekosisteme tokësore dhe detare, duke kontribuar në objektivin global për mbrojtjen e 30% të tokës dhe detit deri në vitin 2030.

Përfshirja e Liqenit të Shkodrës në këtë rrjet ndërkombëtar është një vlerësim i rëndësishëm për pasurinë natyrore, biodiversitetin dhe rëndësinë ekologjike që ky ekosistem ka për Shqipërinë dhe rajonin, dosja e të cilit është dorëzuar në shtator të vitit të kaluar, ndërsa është punuar shumë vite në këtë drejtim.

Nis zyrtarisht kërkimi i operatorit që do të ofrojë shërbimin e transportit hekurudhor të pasagjerëve në linjën Tiranë–Durrës–Rinas, duke hedhur një tjetër hap drejt rikthimit të trenit për udhëtarët pas dekadash mungese.

Ministria e Infrastrukturës dhe Energjisë ka publikuar një thirrje për shprehje interesi drejtuar kompanive dhe konsorciumeve ndërkombëtare me eksperiencë në operimin e transportit hekurudhor, në kuadër të përgatitjes së kontratës së parë të shërbimit publik hekurudhor të pasagjerëve në vend. Thirrja për shprehje interesi është publikuar edhe në faqen e prokurimeve publike të Bashkimit Evropian.

Sipas dokumenteve të publikuara, paketa fillestare e shërbimit do të mbulojë korridorin Durrës–Tiranë–Aeroporti Ndërkombëtar i Tiranës, ndërsa në të ardhmen kontrata mund të zgjerohet edhe drejt Hanit të Hotit dhe Pogradecit, në varësi të përfundimit të investimeve infrastrukturore në këto segmente. Linja e elektrifikuar Tiranë – Durrës – Rinas pritet të përfundojë në tremujorin e tretë të vitit 2027 dhe do të jetë linja e parë ku do të ofrohet shërbimi i ri i transportit hekurudhor të pasagjerëve.

Kontrata e shërbimit publik parashikohet të ketë një kohëzgjatje nga 10 – 15 vjet, ndërsa operatori fitues do të jetë përgjegjës për sigurimin e trenave, vënien e tyre në shërbim dhe mirëmbajtjen gjatë gjithë periudhës së kontratës.

Në fazën fillestare parashikohet realizimi i rreth 1.1 mln kilometrave tren në vit, me 44 shërbime ditore në linjën Tiranë–Durrës dhe 74 shërbime në linjën Tiranë–Aeroport. Me zgjerimin e rrjetit drejt Hanit të Hotit dhe Pogradecit, volumi i operimit mund të arrijë në rreth 4 milion kilometra tren në vit deri në vitin 2036.

Kompanitë e interesuara kanë afat deri më 26 korrik 2026 për të paraqitur shprehjen e interesit, ndërsa tenderi për përzgjedhjen e operatorit pritet të hapet në tremujorin e katërt të këtij viti. Nisja e shërbimit të parë të transportit hekurudhor të pasagjerëve parashikohet në fund të vitit 2027.

Kreu i opozitës, Sali Berisha në një bashkëbisedim virtual me qytetarët komentoi takimin e djeshëm të kryeministrit Edi Rama me banorët e zonës në Zvërnecit, në të cilën parashikohet që të ndërtohet një resort luksoz.

Berisha deklaroi se Rama ka dhënë lejen e zhvillimit për këtë zonë, megjithëse ajo po hetohej prej një viti nga Prokuroria Speciale për korrupsion të lartë dhe krim të organizuar. Sipas liderit të opozitës, ky veprim është një kurth i qëllimshëm i kryeministrit, i cili shpreson të përdorë autoritetin e investitorëve Jared Kushner dhe Ivanka Trump për të mbyllur dosjen investigative.

“Çfarë zbuloi dje takimi në Zvërnec? Zbuloi se Zvërneci po hetohej prej një viti nga ai organ që ka dy vepra penale në hetim, korrupsionin e lartë dhe krimin e organizuar. Pra, në një dosje ku prokuroria shqiptare kishte nisur hetimet për krim të organizuar ose korrupsion në nivelet më të larta, zotëria e tij jepte lejen e zhvillimit për kompaninë duke shpresuar se autoriteti i zotit Kushner dhe vajzës do të mjaftonin për të mbyllur çdo dosje.

A nuk është ky një kurth i shëmtuar i një të paburri që bën çdo lloj akti për përlyer cilindo për përfitime të vetat? Si mundesh ti të japësh leje zhvillimi në një zonë, e cila e di mirë se po hetohej nga prokuroria speciale për krim të organizuar dhe korrupsion? Pra, a nuk është ky një kurth i yti për qëllimet e tua?”, tha Berisha,

Më tej, ai denoncoi mungesën totale të transparencës në këtë aferë, duke sjellë në vëmendje përplasjet e fundit me banorët dhe pronarët lokalë të cilët u përballën me tela me gjemba.

Berisha gjithashtu kritikoi ashpër heqjen e Zvërnecit nga lista e zonave të mbrojtura, duke nënvizuar se ky vendim cenon habitatet ekologjike që mbrohen me ligj nga Bashkimi Evropian.

“Se e kam thënë që në fillim, se në këtë aferë, ajo që të bën që në fillim një përshtypje tepër dërrmuese është mungesa totale e transparencës. Zero transparencë. Ne pamë telat me gjemba, pamë një njeri që zvarritej, pamë protestuesit dhe qeveria që fajësonte kompaninë se nuk ke zgjidhur problemet me pronarët, paçka se i kishte dhënë titullin e investitorit strategjik, paçka se i kishte dhënë lejen e zhvillimit.

Aty pra, ky i cili e mori Zvërnecin zonë të mbrojtur, e hoqi nga zona e mbrojtur, e heq ti, po nuk e heq Evropa, sepse habitatet e mbrojtura nuk janë vetëm për vendin përkatës, por janë për të gjitha vendet anëtare të BE dhe për vendet që ndjekin procesin e integrimit në BE”, shtoi Rama.

Zbardhet një ngjarje kriminale, vrasje në familje, e ndodhur në fshatin Fushë Mamurras, Kurbin.

Dyshohet se ka vrarë nënën e saj me mjet prerës (thikë), vihet në pranga 57-vjeçarja.

Procedohet penalisht edhe një shtetase (mjeke), e cila ka plotësuar aktin si vdekje natyrale dhe nuk ka raportuar në Polici rastin.

Drejtoria Vendore e Policisë Lezhë siguroi të dhëna në rrugë operative se në fshatin Fushë Mamurras kishte ndërruar jetë një 85-vjeçare më datë 30.04.2026, duke u pretenduar vdekje natyrale dhe pa u raportuar në Polici.

Nga të dhënat e siguruara nga Policia lindën dyshime të arsyeshme për një ngjarje kriminale.

Bazuar në informacionet e siguruara, Drejtoria Vendore e Policisë Lezhë ngriti menjëherë një grup të posaçëm hetimor, i cili në bashkëpunim me Prokurorinë nisi menjëherë veprimet verifikuese dhe hetimore në lidhje me rastin.

Nga tërësia e veprimeve hetimore dhe procedurale ka rezultuar se shtetasja D. Sh., 85 vjeçe, ka humbur jetën si pasojë e goditjeve me mjet prerës (thikë), ndërsa si autore e dyshuar e ngjarjes rezulton vajza e saj, shtetasja V. Sh., e cila jetonte në të njëjtën banesë me viktimën dhe vuante nga probleme të shëndetit mendor.

Në vijim të veprimeve, u bë ndalimi i shtetases V. Sh., 57 vjeçe, banuese në Fushë-Mamurras, e dyshuar si autore e veprës penale “Vrasje për shkak të marrëdhënieve familjare”.

Në cilësinë e provës materiale është sekuestruar mjeti prerës (thikë), si dhe prova të tjera që lidhen me ngjarjen.

Gjithashtu, janë referuar materialet procedurale në gjendje të lirë për shtetasen A. Ll., mjeke, për veprën penale “Shpërdorim detyre”, e cila ka plotësuar aktin e vdekjes, duke e cilësuar si vdekje natyrale dhe duke mos e raportuar në Polici vdekjen e 85-vjeçares.

Në bashkëpunim me Prokurorin vijon puna për dokumentimin e plotë ligjor të ngjarjes dhe, nëse ka persona të tjerë të përfshirë, për identifikimin dhe vënien e tyre përpara përgjegjësisë ligjore.

Bordi i Transparencës në datë 6 Qershor 2026, në mbledhjen e radhës vendosi:

Çmimi i shitjes me pakicë i nënproduktit gazoil i standardit SSH EN 590 të jetë jo më shumë se 190 lekë/litri, ndërsa i shitjes me shumicë jo më shumë se 178 lekë/litër.

Çmimi i shitjes me pakicë i nënproduktit benzinë e standardit SSH EN të jetë jo më shumë se 173 lekë/litri, ndërsa i shitjes me shumicë jo më shumë se 161 lekë/litër.

Çmimet e caktuara nga Bordi do të hynë në fuqi sot datë 6 ora 14.30 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.

Gjykata e Posaçme ka lënë në burg këtë të shtunë Kristo Qiricin alias Jetmir Hoxha alias Jetmir Qirici , Aleks Pepaj alias Shkëlqim Pepaj, Ilir Lazri alias Ilir Sula dhe Shkëlzen Kraja.

Ata u ekstraduan një ditë më parë nga Dubai teksa ishin shpallur në kërkim ndërkombëtar për vepra të ndryshme penale, si të përfshirë në grupe kriminale.

Kristi Qirici alias Jetmir Hoxhaj apo Jetmir Qirici, së bashku me Shkëlzen Kraja, janë të dyshuar si pjesë e grupit kriminal që kultivonte kanabis në Sarandë dhe zonat përreth në vitet 2019-2021 dhe më pas droga trafikohej drejt Greqisë. Qirici është gjithashtu dhe vëllai i Edmond Papës, biznesmeni i ekzekutuar në dhjetor 2022.

Qytetarët janë kthyer sërish në protestë në Zvërnec, zonën ku parashikohet të ndërtohet resorti nga dy vëllezërit Al-Khayyat nga Katari. Report Tv po ndjek nga afër protestën-marshim të qytetarëve të cilët janë mbledhur në plazhin e Dalanit, në një protestë sensibilizuese për të mbrojtur zonën e mbrojtur.

“Ne nuk i lejuam, e hodhëm gardhin poshtë. Ta çlirojmë Shqipërinë. U bëj thirrje vlonjatëve, a jeni pas ardhës të Ismail Qemalit. Vlorës në 1920 iu bashkuan gjithë shqiptarët. Lufta u bë për Vlorën, Vlorën duan të marrin, pro shqiptarët janë gjallë. Prandaj vlonjatë mos rrini në kafe, po na marrin pronat, po u përzënë fëmijët, po ngelen vetëm pleq e plaka. Shqipëria e shqiptarëve, vdekje tradhtarëve”, tha një protestues.

Mbrëmë për më shumë se 3 orë para godinës së qeverisë, qytetarët në ditën e 6-të të protestës, artikuluan sërish thirrjet për anulimin e projektit dhe dorëheqje të kryeministrit.

Dashi

Dite shume e trazuar dhe e mbushur me debate te mëdha kjo e sotmja për te dashuruarit. Shume persona do ndërhyjnë ne jetën tuaj dhe do ua prishin atmosferën. Beqaret nuk do jene te qarte për hapat qe duhet te hedhin dhe nuk do i pranojnë te gjitha ftesat qe do iu bëhen. Ne planin financiar do jeni shume te kujdesshëm dhe do arrini t’i zgjidhni shpejt problemet.

Demi

Sot do i jepni me shume prioritet se kurrë jetës suaj ne çift dhe do bëni gjithçka qe atmosfera te mbetet e ngrohte ne çdo moment. Beqaret do jene te paparashikueshëm. E sigurte është qe asgjë nuk do jete ashtu si me pare dhe do përjetoni kënaqësi te mëdha. Financat do varen nga mënyra sesi ju do i menaxhoni ato para qe keni. Matuni disa here para se te veproni.

Binjaket

Te dashuruarit do merren vesh mire me njeri-tjetrin dhe atmosfera do ngrohet me shume se kurrë me pare. Ne orët e mesditës mund te ndodhin edhe emocione me te mëdha. Beqaret do joshin çdo person qe do ju vije rreth e rrotull dhe do e ndryshojnë statusin me shpejt nga sa kishin menduar. Gjendja e te ardhurave do lere shume për te dëshiruar. Beni kujdes!

Gaforrja

Priten shume përmirësime sot ne jetën tuaj ne çift. Partneri do jete gati te beje edhe sakrifica vetëm për t’iu lumturuar sa me shume. Beqaret do ja kalojnë mire me miqtë e tyre te ngushte dhe nuk do e ndiejnë aspak nevojën për te ndryshuar statusin. Gjendja e financave do jete e mire dhe aspak problematike. Do mund te kryeni edhe ndonjë shpenzim me tepër nga zakonisht.

Luani

Çiftet do bëjnë mire te mos rrezikojnë shume gjate kësaj dite sepse mund te gabojnë rende. Merrini gjerat shtruar dhe për çdo gjë bëni parashikime. Beqaret do ëndërrojnë me shume nga sa duhet dhe realiteti do jete paksa zhgënjyes. Gjendja financiare do jete e paparashikuar dhe do varet tërësisht nga mënyra sesi ju do veproni. Nëse kryeni shpenzime te konsiderueshme do keni edhe tronditje.

Virgjeresha

Nëse jeni ne një lidhje, sot duhet te përgatiteni për emocione te njëpasnjëshme. Partneri do ju surprizoje ne momentet qe me pak e prisni dhe do ndiheni me te dashuruar se kurrë. Beqaret do kenë një dite delikate dhe pa ndonjë mundësi reale për takime. Kujdes! Financat do jene goxha me te mira. Do i shlyeni borxhet dhe do kryeni investimet e dëshiruara.

Peshorja

Do ndani çdo mendim dhe ide me partnerin tuaj gjate gjithë kësaj dite prandaj dhe marrëdhënia mes jush do jete me fantastike. Beqaret do jene pasionante dhe gati te bëjnë çdo lloj sakrifice vetëm për ta bere për vete atë qe pëlqejnë. Me financat duhet te tregoheni shume here me te kujdesshëm. Gabimi me i vogël do ju kushtoje shume me shtrenjte nga sa e keni menduar.

Akrepi

Dite shume e zakonshme dhe pa te papritura kjo e sotmja për ata qe janë ne një lidhje. Do Benit mire t’i merrnit gjera si t’iu vinin dhe te mos nguteshit për asgjë. Beqaret do fillojnë një marrëdhënie te ngrohte me një person qe kane pëlqyer prej kohesh dhe do ndihen te plotësuar. Ne planin financiar do përballeni me goxha probleme delikate.

Shigjetari

Do keni konflikte te njëpasnjëshme sot ju qe jeni ne një lidhje dhe asgjë nuk ka për t’iu ecur ashtu si e kishit menduar. Beqaret do jene shume te shpërqendruar dhe as qe do e kenë mendjen për te filluar një lidhje. Do ju bien me shkelm mundësive qe do iu jepen. Gjendja e financave do jete e mire dhe aspak problematike. Kryeni shpenzimet e dëshiruara.

Bricjapi

Do e konsolidoni jetën tuaj ne çift gjate kësaj dite dhe do ndiheni shume me te qete. Gjerat do ju ecin ashtu si i kishit ëndërruar. Beqaret do jene te përqendruar tek një çështje qe ka lidhje me punën dhe nuk do dëshirojnë te dalin neper takime. Ne planin financiar do keni fat me shumice. Do ndiheni te qete kur te shpenzoni për gjerat me te nevojshme.

Ujori

Do jeni shume te përqendruar sot ne jetën tuaj ne çift dhe do bëni çdo gjë qe marrëdhënia juaj te jete e ngrohte. Beqaret do jene gjithë kohës ne kërkim dhe do e gjejnë shume shpejt princin tyre te kaltër. Shume gjera kane për te ndryshuar rrënjësisht ne jetën e tyre. Financat do mbeten delikate edhe për disa kohe. Mundohuni te shpenzoni me kursim.

Peshqit

Do jeni shume te përkushtuar ndaj partnerit tuaj sot dhe do e bëni atë te ndihet me se miri. edhe ai nga ana e tij do ju dashuroje pa fund dhe do ju mbaje ne pëllëmbe te dorës. Beqaret do ndihen aq mire me miqtë e tyre saqë nuk do e ndiejnë mungesën e dikujt ne krah. Çështjet e financave do jene te mira sepse do dini si te kujdeseni sa me shume.

Një përçarje në rritje mes Shteteve të Bashkuara dhe vendeve evropiane lidhur me të ardhmen e Bosnjë dhe Hercegovinës është bërë publike pas një mosmarrëveshjeje për emërimin e një posti të lartë administrativ ndërkombëtar. Situata ka çuar deri te një paralajmërim amerikan se Uashingtoni mund të “rishqyrtojë” rolin e tij në misionet ndërkombëtare të paqes në vend.

Ambasada amerikane në Sarajevë reagoi pasi shtetet evropiane refuzuan të mbështesnin kandidatin e preferuar nga SHBA për postin e Përfaqësuesit të Lartë të komunitetit ndërkombëtar në Bosnjë dhe Hercegovinë. Në mbledhjen e kësaj jave të Këshillit për Zbatimin e Paqes (PIC) – një grup shumëkombësh që mbikëqyr zbatimin e Marrëveshjes së Dejtonit të vitit 1995 – Uashingtoni mbështeti diplomatin italian Antonio Zanardi Landi, ndërsa Britania e Madhe, Franca, Gjermania dhe shumica e vendeve evropiane u rreshtuan pas diplomatit francez René Troccaz, i dërguar i Francës për Ballkanin Perëndimor.

Administrata e presidentit Donald Trump argumentoi gjithashtu për kufizimin e kompetencave të Përfaqësuesit të Lartë në zbatimin e parimeve të Marrëveshjes së Dejtonit. Kjo marrëveshje i dha fund luftës që mori rreth 100 mijë jetë njerëzish, por nuk arriti të kapërcejë plotësisht ndarjet etnike në Bosnjë.

Në një postim në rrjetin X, Ambasada e SHBA-së në Sarajevë deklaroi:

“Shtetet e Bashkuara marrin parasysh dështimin e vendeve evropiane për të arritur konsensus rreth një kandidati evropian dhe janë të zhgënjyera që këto ndarje e penguan PIC-in të përmbushte detyrën e tij për zgjedhjen e një Përfaqësuesi të ri të Lartë. Pavendosmëria evropiane dhe heqja dorë e PIC-it nga përgjegjësitë e veta ndaj Bosnjë dhe Hercegovinës po e detyrojnë SHBA-në të rishqyrtojë rolin e saj në praninë aktuale ndërkombëtare në vend.”

Megjithëse SHBA nuk ka më një prani të konsiderueshme ushtarake në Bosnjë – ku aktualisht operon vetëm një forcë e vogël paqeruajtëse e Bashkimit Evropian – ajo vazhdon të ushtrojë ndikim të rëndësishëm përmes PIC-it dhe marrëdhënieve dypalëshe.

PIC pritet të përpiqet sërish në fund të muajit për të arritur konsensus mbi postin e Përfaqësuesit të Lartë, ndërsa nuk përjashtohet mundësia e paraqitjes së kandidatëve kompromis.

Një zyrtar evropian sugjeroi se rajoni mund të përfitonte nëse SHBA do të zvogëlonte rolin e saj, duke përmendur dyshimet në rritje për motivet e administratës Trump. Vitin e kaluar, Uashingtoni hoqi sanksionet ndaj liderit serb të Bosnjës, Milorad Dodik, i njohur për lidhjet e tij me Moskën dhe për qëndrimet separatiste, pas një fushate lobimi në SHBA që raportohet të ketë kushtuar miliona dollarë.

SHBA gjithashtu ushtroi presion ndaj Përfaqësuesit të Lartë në largim, Christian Schmidt, që të jepte dorëheqjen pasi ai vendosi masa ndëshkuese ndaj Dodikut për veprime që konsideroheshin si minim i Marrëveshjes së Dejtonit.

Në të njëjtën kohë, familjarë dhe bashkëpunëtorë të Donald Trump kanë shtuar interesat e tyre biznesore në Bosnjë. Kjo përfshiu edhe vizitën e Donald Trump Jr. në qytetin e Banja Lukës në prill, ku ai ishte i ftuar nga djali i Milorad Dodikut.

Analisti politik i Ballkanit, Jasmin Mujanović, autor i dy librave mbi Bosnjën, vlerësoi se administrata Trump duket se ka mbivlerësuar ndikimin e saj mbi partnerët evropianë në PIC.

“Amerikanët duket se menduan se qëndrimi i evropianëve ishte i parëndësishëm dhe supozuan se ata do t’i bashkoheshin automatikisht linjës amerikane. Mendoj se ky ishte një vlerësim i gabuar i situatës,” tha Mujanović.

Sipas tij, SHBA nuk duket se është konsultuar gjerësisht me aleatët e saj për përzgjedhjen e Antonio Zanardi Landit.

“Kjo ngre pyetjen pse amerikanët këmbëngulin kaq shumë për zotin Landi. Nuk e dimë çfarë marrëveshjesh apo mirëkuptimesh mund të ekzistojnë mes tij dhe SHBA-së që e bëjnë Uashingtonin kaq entuziast për kandidaturën e tij,” shtoi ai.

Sipas raportimeve nga mbledhja e PIC-it në Sarajevë, SHBA promovoi kandidaturën e Landit më energjikisht sesa vetë Italia.

Ndërkohë, Kurt Bassuener, bashkëthemelues i organizatës analitike Democratization Policy Council me bazë në Berlin, tha se çështja nuk lidhet vetëm me emrin e një kandidati.

“Kjo nuk është thjesht një vendimmarrje për personelin. Është një vendim strategjik që duhet të lidhet me një strategji më të gjerë rajonale. Duket se pozicioni amerikan nuk udhëhiqet vetëm nga ideologjia, por edhe nga interesa biznesore. Krijohet përshtypja se prioriteti kryesor është sigurimi i koncesioneve, kontratave dhe përfitimeve ekonomike,” u shpreh ai.

Mbi 45 ikona të përzgjedhura nga fondi i pasur i Muzeut Kombëtar të Artit Mesjetar do të prezantohen për herë të parë në Francë, në ekspozitën “Ikonat e Shqipërisë – Thesaret e Muzeut Kombëtar të Artit Mesjetar të Korçës”, e cila do të çelet më 13 qershor në Musée des Beaux-Arts de Chambéry. Ministri Blendi Gonxhja e bëri të ditur lajmin në një postim në rrjetet sociale.

Ekspozita, që do të qëndrojë e hapur deri më 13 nëntor, përbën një ngjarje të rëndësishme kulturore dhe një hap domethënës në promovimin ndërkombëtar të trashëgimisë shqiptare. Ajo realizohet në kuadër të bashkëpunimit mes Korçës dhe Chambéry-t, me mbështetjen e institucioneve kulturore shqiptare dhe franceze.

Publiku francez do të ketë mundësinë të zbulojë një pjesë të veçantë të artit ikonografik shqiptar përmes veprave që dëshmojnë mjeshtërinë artistike, historinë dhe dimensionin shpirtëror të traditës sonë shumë shekullore. Ekspozita vë në pah veçantinë e artit të krishterë mesdhetar dhe dialogun e tij me traditat artistike evropiane.

Veprat e ekspozuara janë pjesë e koleksionit të jashtëzakonshëm të Muzeu Kombëtar i Artit Mesjetar, i cili administron një nga fondet më të mëdha të ikonografisë bizantine dhe pasbizantine në botë, me mijëra ikona dhe objekte të trashëgimisë kulturore shqiptare.

Kjo ekspozitë synon të afrojë publikun evropian me një trashëgimi artistike ende pak të njohur jashtë vendit dhe të forcojë më tej urat kulturore mes Shqipërisë dhe Francës.

Kryeministri britanik, Keir Starmer, ka paralajmëruar se Rusia mund të jetë në gjendje të ndërmarrë një sulm ndaj NATO-s që në vitin 2030, duke theksuar nevojën që vendet aleate të forcojnë aftësitë e tyre mbrojtëse për t’u përballur me kërcënimet e ardhshme.

Gjatë një vizite në një kompani të industrisë së mbrojtjes, Starmer deklaroi se vlerësimet e inteligjencës britanike, si dhe ato të vendeve të tjera anëtare të NATO-s, tregojnë se ekziston mundësia që Moska të jetë e gatshme për një përballje ushtarake me aleancën brenda pak vitesh.

“Sipas vlerësimit tonë të inteligjencës, si dhe atij të vendeve të tjera të NATO-s, mund të ketë një sulm rus ndaj NATO-s që në vitin 2030”, u shpreh kreu i qeverisë britanike.

Starmer paralajmëroi se situata globale e sigurisë po bëhet gjithnjë e më e paqëndrueshme, duke e cilësuar periudhën aktuale si një nga më të rrezikshmet në dekadat e fundit.

“Nuk është ekzagjerim të thuhet se po jetojmë në kohën më të rrezikshme dhe të pasigurt të jetës sonë”, tha ai, duke shtuar se është përgjegjësi e qeverisë së tij të sigurojë që vendi të jetë i përgatitur për çdo skenar.

Nga ishujt magjepsës të Greqisë deri te brigjet e egra të Atlantikut, qershori është një nga periudhat më të mira, për të shijuar pushimet pranë detit, shkruan Flavia Cantini në një artikull të botuar në median italiane “Si Viaggia”.

Temperaturat janë tipike verore, deti fillon të ngrohet dhe plazhet mbeten ende larg fluksit të madh të turistëve që karakterizon korrikun dhe gushtin.

Kjo e bën qershorin një nga periudhat më të mira për të shijuar bregdetin, me më shumë qetësi, çmime më të favorshme dhe një atmosferë më relaksuese.

Ekspertët e udhëtimit kanë përzgjedhur gjashtë destinacionet më tërheqëse për pushime buzë detit në qershor.

Saranda, perla me ujëra bruz e Rivierës Shqiptare

Vitet e fundit, Saranda është shndërruar në një nga destinacionet më të kërkuara bregdetare në Ballkan.

E njohur për detin e kristaltë, ngjyrat mahnitëse bruz dhe çmimet ende konkurruese krahasuar me shumë destinacione mesdhetare, Saranda ofron një kombinim ideal mes natyrës dhe atmosferës turistike.

Qershori është koha perfekte për ta vizituar. Plazhet janë të gjalla, por jo të mbipopulluara, ndërsa qyteti ruan një ritëm të qetë dhe relaksues.

Ujërat e pastra dhe transparente krijojnë peizazhe, që në ditët më të bukura, të kujtojnë destinacionet tropikale.

Nga Saranda mund të eksploroni lehtësisht disa prej plazheve më spektakolare të bregdetit shqiptar.

Ksamili mahnit me ujërat e tij të kthjellëta dhe ngjyrat që ngjasojnë me Karaibet, ndërsa Plazhi i Pulebardhës ofron një atmosferë më të egër, me guralecë të bardhë dhe det të kristaltë.

Përtej plazheve, Saranda tërheq vizitorët edhe me shëtitoren buzë detit, restorantet me produkte të freskëta deti, baret elegante dhe jetën e gjallë pas perëndimit të diellit.

Destinacionet ideale për pushime në qershor

* Saranda – Një nga surprizat më të bukura të Mesdheut, me detin bruz dhe atmosferën relaksuese.

* Amorgos – Ishulli grek me plazhe të virgjëra, ujëra të thella blu dhe peizazhe autentike mesdhetare.

* Kepi i Gjelbër (Cape Verde) – Destinacion ideal për ata që kërkojnë diell dhe plazhe gjatë gjithë vitit

* Menorca – Ishulli më i qetë i Balearëve, i njohur për gjiret e fshehura dhe natyrën e paprekur.

* Riviera Franceze – Elegancë, plazhe të bukura dhe qytete plot hijeshi në jug të Francës.

* Dugi Otok – Ishulli kroat i famshëm për plazhet me pamje tropikale dhe ujërat e kristalta.

Qershori mbetet një nga muajt më të favorshëm për t’i zbuluar këto destinacione, kur moti është ideal, deti ju fton për not dhe peizazhet mund të shijohen pa rrëmujën e pikut të sezonit veror.

Teksa qytetarët pritet të mbajnë një protestë kundër resortit në Zvërnec, banori Minella Balliu tha për mikrofonin e Report Tv se prona është blerë nga gjyshi i tij në vitin 1932 dhe sipas tij ekziston edhe dokumenti i blerjes dhe transkripti.

“Kjo pronë është e blerë nga gjyshi im në 1932, ndërsa ekziston dokumenti i pronës dhe transkripti. Ndërsa në 1946 më është sekesutruar 220 ha nga shteti komunist. Pas viteve ’90 ma ka njohur Gjykata e Vlorës. Toka ime është këtu (brenda territorit që këtu e deri tek kodra)” shpjegon ai për gazetarin Armand Xhelili.

Banori shton se këtë pronë Artur Shehu e ka marrë me dokumente të falsifikuara. Ai nënvizon se pronën Shehut ia ka njohur gjyqtari Alaudin Malaj, ish-kreu i Apelit në Tiranë në vitin 2019.

“Këtë pronë e ka marrë Artur Shehu me dokumente të falsifikuara. Nga diskutimi që bëmë me Kryeministrin ia kam ngritur shqetësimin dhe i kam thënë se nuk duhet bërë asgjë pasi jam në process gjyqësor. Arturi Shehut pronën ia ka njohur gjyqtari Alaudin Malaj, ish-kreu i Apelit në Tiranë në vitin 2019. Gjykata e Lartë e hodhi poshtë vendimin e Alaudin Malajt dhe çështja nisi nga fillimi në Gjykatën e Vlorës”, shtoi Minella Balliu.

Teksa mbante një kapele si ajo që mbante Donald Trump në zgjedhjet presidenciale, Balliu tha se ata janë pro investimit.

“E mbaj vet a do vijnë të investojnë amerikanët këtu unë jam pro investimit, se nuk do rrimë me kasolle në mal”, përfundoi ai.

Një 54-vjeçar i shpallur në kërkim ndërkombëtar për “Trafikim të lëndëve narkotike” dhe “Kanosje” është arrestuar në Kurbin.

Gjin Nikollaj, banues në Laç është dënuar nga autoritetet gjyqësore italiane me 7 vjet e 2 muaj burg.

Vijon puna për ekstradimin e tij drejt vendit fqinj.

“Si rezultat i informacionit të siguruar mbi vendndodhjen e një shtetasi të shpallur në kërkim ndërkombëtar, menjëherë u organizua dhe u finalizua nga Drejtoria e Forcës së Posaçme Operacionale operacioni i koduar “Operacionalja 95”.

Gjatë operacionit, shërbimet e DFPO-së kapën në Kurbin shtetasin Gjin Nikollaj, 54 vjeç, banues në Laç.
Ky shtetas ishte shpallur në kërkim ndërkombëtar nga Interpol Roma, pasi autoritetet gjyqësore italiane e kanë dënuar me 7 vjet e 2 muaj burgim për veprat penale “Trafikimi i lëndëve narkotike” dhe “Kanosja”.

Vijojnë procedurat për ekstradimin e këtij shtetasi në Itali”, njoftoi sot policia.

Një tjetër protestë kundër investimit në Zvërnec ka nisur në Vlorë dhe që i paraprin asaj të orës 18.00 në kryeqytet. Mbrëmë për më shumë se 3 orë para godinës së qeverisë, qytetarët në ditën e 6-të të protestës, artikuluan sërish thirrjet për anulimin e projektit dhe dorëheqje të kryeministrit.

Mesazhe edhe kundër klasës politike shqiptare, duke i kujtuar Berishës ‘Gërdecin’ dhe ‘21 janarin’.

Protestë pati edhe në 6 qytete, të cilën protestuesit synojnë ta shtrijnë përtej kufijve duke i bërë thirrje diasporës të bëhet pjesë e rezistencës së tyre.

Irani ka lëshuar raketa balistike drejt bazave ushtarake amerikane në Kuvajt dhe Bahrejn, pasi Shtetet e Bashkuara sulmuan dy stacione radarike bregdetare iraniane.

Deri më tani nuk ka raportime për viktima. Sipas Komandës Qendrore të Ushtrisë Amerikane (CENTCOM), gjashtë nga shtatë raketat e lëshuara janë interceptuar, ndërsa e shtata nuk arriti objektivin e saj.

Sipas agjencisë shtetërore iraniane të lajmeve IRNA, objektivat e sulmit ishin baza ajrore Ali Al Salem në Kuvajt dhe Flota e Pestë e Marinës Amerikane në Bahrein.

Megjithatë, CENTCOM mohoi pretendimet se selia e Flotës së Pestë kishte pësuar dëme, raporton skynews.Garda Revolucionare Islamike e Iranit (IRGC) deklaroi se sulmet ishin një kundërpërgjigje ndaj goditjeve amerikane të kryera më herët.

Nga ana tjetër, ushtria amerikane njoftoi se kishte sulmuar objektet radarike në ishujt Goruk dhe Qeshm, si dhe kishte rrëzuar katër dronë iranianë që, sipas saj, përbënin një “kërcënim të menjëhershëm” për anijet që lundronin në Ngushticën e Hormuzit.

Në deklaratën e saj, Garda Revolucionare pretendoi se katër cisterna nafte ishin vënë në shënjestër pasi po përpiqeshin të kalonin ngushticën pa leje.

IRGC paralajmëroi Shtetet e Bashkuara se çdo “provokim” i mëtejshëm mund të çojë në mbylljen e plotë të Ngushticës së Hormuzit, një prej korridoreve më të rëndësishme detare në botë për transportin e naftës, ku trafiku tashmë është reduktuar ndjeshëm krahasuar me periudhën para luftës.

Kujtojmë se SHBA-ja dhe Irani teorikisht ndodhen nën një armëpushim, ndërsa përpjekjet për ta zgjatur atë dhe për të arritur një marrëveshje të qëndrueshme paqeje janë ende në vazhdim.