Sot u mbajt protesta e pestë në Tiranë me thirrje kundër ndërtimit të resortit luksoz në Zvërnec. Edhe ditën e sotme, dukej se pjesëmarrësit dëshironin të ruanin imunitetin e protestës ndaj partive politike, e veçanërisht ndaj atyre të vogla e të reja, që përpiqen të kapitalizojnë situatën në mbështetje elektorale.

Një ndër pankartat e shpalosura në tubim, ishte pikërisht thirrja që Arlind Qori i “Lëvizjes Bashkë”, Agron Shehaj i “Partisë Mundësia”, dhe Adriatik Lapaj i “Shqipëria Bëhet”, të qëndronin larg protestës, duke i quajtuar ata paterica të pushtetit të kryeministrit Edi Rama.

Deputeti i PS-së, Ardit Bido, i ftuar në emisionin “Të Paekspozuarit”, në MCN TV, duke folur për protestat ndaj ndërtimit në Zvërnec, u shpreh se në lojë janë interesa të huaja. Ai përmendi rastin e Greqisë duke u shprehur se është interes i tyre i pastër për të bërë luftë hibride.

“Kjo protestë nisi nga disa skena banditeske që ndodhën në Zvërnec. Kemi reaguar bashkë me kolegë të PS, duke hequr nga puna drejtorin e policisë, policinë private, telin me gjemba në pronë publike.

Ky sentiment do të krijonte revoltë.

Unë jam me banorët e Zvërnecit të gjithë kanë një pretendime të drejtë pronësi që po e heton SPAK dhe ato 195 milionë euro të shkojnë te pronari real. Kjo historia e flamingos duhet sqaruar se atje ka patur aeroporti civil që në vitet ’20.

Kemi edhe këtu një faktor që bëhet pis dhe një tezë dhe e faktoj se kemi të bëjmë me disa interesa të huaja në lojë.

Ne kemi deri nga Korzufi deri afër Ulqinit resorte turistike që prodhojnë qindra milionë euro. Këtu nuk kemi. Këto po planfikikohet një restort turistik dhe ato 4 miliardë euro që thuhen.

Interesi i pastër grek i pasqyruar në reagimin e shtetit grek të opozitës dhe shumicës greke, në hapjen e mbi 1000 IP-ve, që në mënyrë artificiale pompojnë ambientalizmin këtu, të cilët janë luftë hibride, që na u bë lëvizja e flamingos nga njerëz që nuk kanë vajtur një ditë aty.

Kjo shfrytëzohet se do t’ia marrim ato turistë Greqisë.”- tha Bido.

Rasti i publikuar këtë të enjte, më 4 qershor, në emisionin “Stop” lidhet me një gabim administrativ në Zyrën e Gjendjes Civile të fshatit Ruzhdie, i cili i ka shkaktuar probleme të shumta familjes Kamberaj.

Saimir Kamberaj, i cili jeton dhe punon në Greqi, denoncon një pasaktësi të rëndë në dokumentacionin e bashkëshortes së tij, Dorina Kamberaj.

Sipas denoncimit, në vitet 2017 dhe 2019, gjatë përpunimit të të dhënave në sistemin e gjendjes civile, shtetësia e Dorina Kamberajt është regjistruar gabimisht si afgane, në vend, që të figurojë shqiptare.

Ky gabim ka sjellë vështirësi në procedurat administrative të familjes, veçanërisht për dokumentacionin e djalit të tyre.

Gazetarja kontaktoi Zyrën e Gjendjes Civile, që tashmë funksionon në Patos pas transferimit nga fshati Ruzhdie. Përgjegjësja e zyrës, Afërdita Beqiraj, pranoi, se bëhej fjalë për një gabim njerëzor të ndodhur gjatë hedhjes së të dhënave në sistem.

Sipas saj, në vend të shtetësisë “Albania”, ishte regjistruar gabimisht “Afghanistan”, duke krijuar pasaktësinë në certifikatat e gjendjes civile.

“Ne do bëjmë verifikimin në regjistrin themeltar, të verifikojmë njëherë shtetësinë reale”, u shpreh Beqiraj.

Pas verifikimeve dhe procedurave të nevojshme, Afërdita Beqiraj aplikoi për korrigjimin e të dhënave pranë institucioneve kompetente në Fier.

Me ndërhyrjen e emisionit “Stop” dhe bashkëpunimin mes Zyrës së Gjendjes Civile në Patos, problemi u zgjidh brenda një kohe të shkurtër.

Në përfundim, familja Kamberaj u pajis me certifikatën e korrigjuar, ku shtetësia e Dorina Kamberajt figuron si shqiptare.

Qytetari Saimir Kamberaj:

-Përshëndetje! Jam Saimir Kamberaj nga Fieri. Ndodhem në Greqi, kam problem, duhet të nxjerr çertifikatë martesore. Kam 4 muaj, që kam bërë kërkesë dhe nuk më kthen njeri përgjigjie, sepse çertifikata e vjetër shkruan shtetësinë Afganistan.

-Të nuses sime, të Dorinës.

-Dorina Kamberaj.

-Në Patos.

-Atë nuk e di unë!

-Eh, nuk e di. Bën vaki.

-Atë do doja dhe unë, po nuk e di.

-Çertifikata ka dalë në Ruzhdie. Tani ajo ka ikur nga Ruzhdia, nuk ekziston më.

-E bëra pashaportën, por dje nxorra çertifikatën personale të Dorinës dhe familjare. Ajo familjarja, pse më thotë mua “Shqipëri”. Nuk e di! Unë do vija vetë, po duhet të bëj një operacion këto ditë edhe do vija vetë. Unë nuk e di tashi, nëqoftëse do bëni ju gjë, nëqoftëse s’do bëni, mua do të më keni muaji tjetër, më keni aty!

-E kam bërë atë bisedë. (qesh)

-As e di nga bie, thotë.

-Jo, jo nuk besoj! Nuk besoj, se neve kemi 22 vite këtu në Greqi.

-Shkruan në 2017 çertifikata, që ua kam dërguar.

-Po ka qenë moj! Ka qenë me mua.

-Çfarë kërkoj? Unë dua, të arrij, t’i mbyll dokumentet djalit. Këtu më kërkojnë çertifikatën martesore. Nuk e kam atë. Edhe sot, po të nxjerr çertifikatë personale të Dorinës, del në “Shqipëri”.

-Kam 4 muaj, që s’ka dalë.

-Kam bërë kërkesë dhe nuk është kthyer përgjigjie.

-Jo, shumë faleminderit, por duhet të marrim çertifikatën!

-Shumë, shumë faleminderit!

Gjatë orëve të mesnatës së të mërkurës në kryeqytet, në zonën e Bllokut gjatë kontrolleve të ushtruara nga Policia e Shtetit, është ndaluar dhe shoqëruar në komisariat i riu Skerdi Sina, i cili po qarkullonte me një automjet të blinduar.

Pas verifikimeve të kryera nga efektivët, Sina është proceduar në gjendje të lirë. Sipas burimeve, në automjet udhëtonin edhe dy persona të tjerë, një djalë dhe një vajzë, të cilët janë larguar nga mjeti në momentin e ndërhyrjes së policisë.

Uniformat blu vijojnë punën për identifikimin dhe gjetjen e tyre për hetime të mëtejshme, ndërkohë që është sekuestruar automjeti me të cilin po lëviznin të rinjtë.

29-vjeçari Skerdi Sina është i njohur për uniformat blu, ai ka rënë në prangat e policisë në korrik të vitit të shkuar pasi ishte shpallur në kërkim për ngjarjen e Astirit lidhur me incidentin me një vajzë të re të cilën e kishin kyçur në apartament pas një feste të me lëndë narkotike dhe alkool.

Sina u arrestua në 2025 në zonën e “Vasil Shantos”, forcat “Shqiponja” i bënë shenjë ndalimi një automjeti”, pasi kishin dyshime të arsyeshme se dy personat “Audi Q8” mund të ishin të armatosur.

Ky i fundit ishte pasagjer dhe shoqërohej dhe nga një person tjetër gjatë përpjekjes për t’i shpëtuar policisë, automjeti i tyre u përfshi në tre aksidente dhe iu gjend një armë.

Një ngjarje e rëndë tronditi sot zonën e Lozhanit në Maliq, ku efektivi i forcave “Shqiponja”, Enea Mekolli, 34 vjeç, ndërroi jetë në krye të detyrës pasi u qëllua për vdekje nga i shumëkërkuari Violant Braçellari. Kolegu i tij, Edison Adri, mbeti i plagosur.

Gazetarja Glidona Daci, në një lidhje të drejtpërdrejtë për “Opinion”, bëri me dije se ishte çobani që Braçellari kishte punësuar në stanin ku fshihej prej 10 vitesh për t’u kujdesur për bagëtitë, ai që kishte dhënë indicien në polici për vendndodhjen e 43-vjeçarit, i dënuar me 10 vite burg për kultivim dhe trafikim të narkotikëve.

“Violand Braçellari, 43 vjeç, ndodhej i fshehur në Lozhan të Maliqit. Ai jetonte prej 10 vitesh atje dhe kishte një çoban, të cilin e paguante për t’u kujdesur për bagëtitë. Çobani i ka kërkuar 43-vjeçarit 2 ditë leje për të shkuar te familja dhe mes tyre ka pasur një konflikt. Çobani ka arritur të largohet dhe ka shkuar për të bërë denoncimin në Policinë e Maliqit për dhunën e ushtruar ndaj tij nga personi që e kishte marrë në punë.

Në verifikimet që ka bërë policia në sistem, ka rezultuar se Violand Braçellari ishte në kërkim prej 10 vitesh, i dënuar me 10 vite burg për kultivim të narkotikëve dhe trafikimin e tyre. Është ngritur menjëherë grupi i punës dhe janë angazhuar 40 efektivë. Në drejtim të operacionit ka qenë vetë drejtori i Policisë Vendore të Korçës, dy nëndrejtorë, dy shefa komisariatesh, si dhe struktura të Shqiponjave dhe të Rendit. Efektivët kanë shkuar në zonë dhe kanë bërë rrethimin, duke ecur për disa orë në këmbë për shkak të terrenit të thyer. Ata kanë kërkuar që ai të dorëzohej.

Kur ka parë se ishte i rrethuar nga strukturat e rendit, ai ka hapur zjarr në drejtim të tyre, duke qëlluar me kallashnikov. Dy prej plumbave kanë prekur një 34-vjeçar, të cilit i shkaktuan vdekjen. Po ashtu, një efektiv tjetër, Edison Adri, ka mbetur i plagosur nga një plumb në pjesën e nofullës”, tha gazetarja.

Gazetarja Daci sqaroi gjithashtu se autori, Violant Braçellari, ka qenë pjesë e Forcave të Armatosura të Shqipërisë vetëm për tre ditë gjatë vitit 2004 dhe më pas është larguar, çështje për të cilën ka pasur edhe një procedim penal.

“Është folur gjatë ditës së sotme se 43-vjeçari ka qenë pjesë e forcave komando. Në vitin 2004, Braçellari ka qenë pjesë e Forcave të Armatosura për pak ditë dhe më pas është larguar. Për këtë çështje ka pasur edhe procedim penal”, shtoi gazetarja.

Përveç bagëtive, në stan Baçellari merrej edhe me kultivimin e fruta-perimeve në sera. Deri më tani, nga policia nuk ka pasur asnjë informacion se autori merrej me veprimtari të tjera të paligjshme, sqaroi Daci.

Efektivi i plagosur, 36 vjeç, ka marrë plagë në pjesën e nofullës dhe ndodhet në Spitalin e Traumës. Në të njëjtin spital po merr trajtim mjekësor edhe autori, i cili, nga kundërpërgjigjja me armë zjarri e policisë, ka mbetur i plagosur në pjesën e barkut.

Sondazhisti Eduart Zaloshnja, i ftuar në Real Story, zbuloi përgjigjen e sondazhit sa i takon ndërtimit të resortit turistik në Zvërnec. Mbi 1900 të anketuar, janë pyetur nëse duhet të vazhdojë ndërtimi i resortit turistik në Vlorë.

55 për qind e shqiptarëve kanë pohuar se resorti turistik në Zvërnec duhet të ndërtohet.

Mbi 39 për qind shprehen skeptik për ndërtimin e projektit të shumëfolur ditët e fundit, ndërsa të dyjzuarit janë në masën afro 6 për qind.

Qytetarët janë mbledhur në ditën e pestë radhazi para Kryeministrisë, ku për më shumë se tre orë protestuan kundër projektit në Zvërnec.

Me flamuj dhe pankarta në duar, ata e nisën grumbullimin e tyre në sheshin “Skënderbej” dhe shkuan drejt Kryeministrisë.

“Reagim paqësor. Mirëpresim të gjithë ata që janë braktisur nga PS dhe PD”, dëgjohet të thuhet nga protestuesit gjatë grumbullimit të tyre.

“Pas 5 ditësh protestash të pandërprera në Tiranë dhe duke parë vendosshmërinë e Sovranit për të përmbushur kërkesat tona, ju njoftojmë se kjo nismë mbështetet nga një grup me integritet. Gra dhe burra dinjitozë, të vendosur për të çuar deri në fund kërkesat e sovranit, do të dimë të marrim në kohë të duhur vendimet e duhura. Kjo nismë lindi si përgjigje ndaj një rreziku të madh ku ndodhet vendi ynë. Deklaroj se protesta është organizuar dhe udhëhiqet nga qytetarë të lirë, të bashkuar rreth një kauzë ta drejtë kombëtare për të ardhmen e Shqipërisë. Paraqesim kërkesat që burojnë nga vullneti i lirë i mijëra qytetarëve që janë bashkuar në mbrojtje të lirisë dhe interesit kombëtar.
Kërkesa të qarta dhe të panegociueshme:
* Dorëheqjen e qeverisë;
* Shfuqizimin e statusit dhe të kuadrit ligjor që lidhet me investitorët strategjikë;
* Shfuqizimin e Paketës së Maleve;
* Anulimin e ndryshimeve në Ligjin për Zonat e Mbrojtura;
* Anulimin e ndryshimeve në Ligjin për Trashëgiminë Kulturore”, u shpreh një nga protestuesit në podium përpara Kryeministrisë.

Një i dënuar 47-vjeçar është gjetur i pajetë këtë të enjte në ambientet e Qendra Spitalore e Burgjeve, ku po trajtohej për probleme të shëndetit mendor.

Sipas njoftimit zyrtar, shtetasi Fatmir Qoku ishte dënuar me 25 vite burgim me vendim të formës së prerë të vitit 2007 për veprën penale “Vrasje në rrethana të tjera cilësuese”.

Autoritetet bëjnë me dije se i dënuari vuante nga Skizofrenia dhe ndiqej vazhdimisht nga shërbimet shëndetësore të sistemit penitenciar.

Gjatë viteve 2022–2026 ai ishte shtruar disa herë në Spitalin e Burgjeve, ndërsa shtrimi i fundit ishte kryer më 28 maj 2026.

Sipas të dhënave paraprake, rreth orës 16:50 ai është konstatuar pa shenja jete në ambientet e tualetit të dhomës së akomodimit. Dyshimet e para flasin për vetëvarje me një mjet përdorimi vetjak.

Menjëherë pas konstatimit, personeli i sigurisë dhe ai shëndetësor kanë ndërhyrë, por verifikimet paraprake kanë treguar se vdekja kishte ndodhur menjëherë.

Sipas informacionit zyrtar, vetëm pak minuta para ngjarjes, rreth orës 16:20, 47-vjeçari ishte vizituar nga personeli mjekësor, ndërsa gjatë intervalit deri në momentin e konstatimit ishin kryer kontrollet dhe monitorimet e parashikuara nga procedurat e sigurisë.

Agjencia e Mbikëqyrjes së Ekzekutimit të Vendimeve Penale, në bashkëpunim me organin e prokurorisë, ka nisur veprimet hetimore për të sqaruar plotësisht rrethanat e ngjarjes.

Ndërkohë, Drejtoria e Përgjithshme e Burgjeve shprehu ngushëllimet për familjarët e të ndjerit dhe garantoi bashkëpunim të plotë me institucionet përgjegjëse për zbardhjen e rastit.

47-vjeçari i cili u gjet i pajetë në ambientet e Qendrës Spitalore të Burgjeve dhe për të cilin dyshohet se ka kryer vetëvrasje, ishte duke vuajtur dënimin për një nga krimet që tronditi opinionin publik në Elbasan në vitin 2006.

Sipas të dhënave në atë kohë Fatmir Qoku, 27 vjeç, së bashku me bashkëpunëtorin e tij, Musa Cani, 19 vjeç në atë periudhë, u shpallën fajtorë për vrasjen e 21-vjeçares Manushaqe Xeka.

Ngjarja ndodhi më 22 qershor 2006, ndërsa trupi i të resë u gjet i pajetë në zonën e Kodrat e Krastës. Sipas hetimeve dhe vendimit gjyqësor, autorët kishin synuar ta trafikonin të renë për prostitucion, por ajo kishte kundërshtuar dhe kishte bërë rezistencë.

Përballë refuzimit të saj, dy të rinjtë ushtruan dhunë ekstreme, duke i shkaktuar vdekjen me goditje të shumta me mjete të forta. Krimi u konsiderua veçanërisht i rëndë për shkak të mënyrës brutale të ekzekutimit.

Për këtë ngjarje, Qoku u dënua me 25 vite burgim për veprën penale të vrasjes në rrethana cilësuese dhe vuante dënimin prej vitit 2007.

Nga protesta e qytetarëve që po mbahet në Bulevardin “Dëshmorët e Kombit”, u prezantuan pesë kërkesa drejtuar kryeministrit Edi Rama, të cilat sipas organizatorëve janë të panegociueshme dhe janë hartuar nga lëvizja qytetare.

“Pas pesë ditësh protestash të pandërprera në Tiranë dhe duke parë vendosmërinë e sovranit për të përmbushur kërkesat tona, ju njoftojmë se kjo nismë mbështetet nga një grup me integritet. Gra dhe burra dinjitozë, të vendosur për t’i çuar deri në fund kërkesat e sovranit, do të dimë të marrim në kohën e duhur vendimet e duhura.

Kjo nismë lindi si përgjigje ndaj një rreziku të madh në të cilin ndodhet vendi ynë. Deklaroj se protesta është organizuar dhe udhëhiqet nga qytetarë të lirë, të bashkuar rreth një kauze të drejtë kombëtare për të ardhmen e Shqipërisë.

Paraqesim kërkesat që burojnë nga vullneti i lirë i mijëra qytetarëve që janë bashkuar në mbrojtje të lirisë dhe interesit kombëtar:

Dorëheqjen e qeverisë.

Shfuqizimin e statusit dhe kuadrit ligjor që lidhet me investitorët strategjikë.

Shfuqizimin e Paketës së Maleve.

Anulimin e ndryshimeve në ligjin për zonat e mbrojtura.

Anulimin e ndryshimeve në ligjin për trashëgiminë kulturore shqiptare”, tha protestuesi.

Në sallën e Kuvendit u shkëmbyen replika të forta mes deputetit socialist Erion Braçe dhe ministrit të Bujqësisë Andis Salla, lidhur me cilësinë e plehut Ure (përqindja e azotit në të cilin, doli e ndryshme në 2 analiza të zhvilluara).

Gjatë fjalës së tij, Braçe tha se shteti e ka humbur seriozitetin, teksa shtoi se origjina e Uresë në Shqipëri është nga Turkmenistani, ndërkohë që duhet të ishte nga vendet e BE-së.

Braçe shtoi gjithashtu se Ministria e Bujqësisë duhet t’u vijë në ndihmë fermerëve dhe jo t’ua bëjë atyre punën më të vështirë.

“Gjatë gjithë javës që shkoi, çështja që ka shqetësuar pafund bujqësinë, ka qenë çështja e Uresë që është në treg. Natyrisht një shoqatë që merret me konsumatorin, më kanë shkruar, më kanë çuar video që tregojnë përmbajtjen e Uresë. Është investuar edhe laboratori shtetëror që ka nxjerrë një analizë dhe tregon produktin e kompanisë Agroblend, ku përqindja e Azotit është vetëm 34.3%. Dje lexova një komunikatë shtypi të AKU-së, që ka gjetur Ure të kësaj kompanie me një përbërje tjetër azoti. Ndërkohë që më lejoni t’ju them se unë kam monstra të asaj Ureje që ka vajtur në laboratorin e Fushë-Krujës. Dhe natyrisht do i çoj në laborator të tjerë. Sepse shteti e ka humbur seriozitetin. Kompania menjëherë pas publikimit, ka bërë një operacion të tërheqjes së Uresë nga tregu. Mund ta di si ky laborator nxjerr 2 rezultate të ndryshme të këtij produkti? Dhe e dyta origjina e këtij produkti është Turkmenistani. Të tillë tregtarë kontrollojnë edhe mediat”, tha Braçe.

I ashpër ka qenë reagimi i ministrit të Bujqësisë, Andis Salla, i cili akuzoi Braçen se ka ngritur disa herë alerte të rreme në Kuvend, duke keqinformuar sipas tij fermerët.

Më tej gjatë fjalës së tij, Salla paraqiti edhe disa analiza, që sipas tij vërtetonin se plehu Ure në Shqipëri është sipas standardeve.

“Më vjen mirë që e ngrite edhe njëherë shqetësimin për fermerët në raport me Urenë e përdorur në treg. Dua t’ju siguroj ju dhe të gjithë fermerëve që ne nuk mbrojmë asnjë palë interesi apo subjekt. Por duke bërë analizat e duhura dhe duke iu përmbajtur ligjit ne informojmë të gjithë fermerët për atë çfarë ata duan që ne t’i garantojmë. Dua të të them disa fjalë. Ne jemi duke bërë më së miri atë që duhet të sigurojë fermerin në këtë drejtim. Dua të analizoj pak këtë procedurë që ju sapo thatë. Po ju citoj atë raport që ne kemi marrë, për këtë shqetësim që ju ngritët. Kemi analizat. Ne nuk mund të keqinformojmë të gjithë fermerët dhe të ngremë alerte të tilla, që ju të dilni këtu në Parlament dhe të ngrini zërin për një produkt që ne akoma nuk na kishin dalë analizat dhe ju donit përgjigje pa dalë një analizë shtetërore. Mos keqinformoni dhe krijoni alerte për fermerët. Më vjen shumë keq që e bëni. Është e disata herë që e bëni këtë gjë dhe nuk është mirë që ju bëni të tilla skena dhe keqinformoni fermerët për raste që nuk është e nevojshme”, tha ministri Salla.
Braçe e mori sërish fjalën, ku teksa i kërkoi ministrit që të tërhiqte pas ‘historinë e përsëritur të alerteve false’, tha se Salla është i vetmi ministër që sipas tij mbledh pronarët e fabrikave për të bërë deklarata kundër deputetëve.

Më tej Braçe tha se serioziteti i institucionit që Salla drejton është një problem shumë i madh. Sipas Braçes, Salla është i vetmi ministër që nuk e pranon se sistemi i TVSH-së që Shqipëria ka, ka groposur blegtorinë.

“Atë historinë e përsëritur të alerteve false merre mbrapsht. Duhet ta marrësh mbrapsht. Sepse në njërën nga rastet fola për kafshët shoqëruese që nuk i mbulon ministria jote. Hiqe njërin nga rastet. Rastin tjetër e ke të provuar. Ti je i vetmi ministër që nuk e pranon se sistemi i TVSH-së që ne kemi ka groposur blegtorinë. Madje ti je i vetmi ministër bujqësie që mbledh ata të fabrikave për të bërë deklarata kundër deputetëve. E treta gjë që doja të thoja, po mirë mo ministër si mund të thuash që ka rënë shi në atë rastin atje. Po shi ka rënë vetëm dje more ministër. Me ça laget në magazinë, apo i ka hedhur ujë ai. Serioziteti i këtyre institucioneve që ju drejtoni, është një problem shumë i madh. Është i njëjti laborator që brenda 3 ditëve jep rezultate të ndryshme”, vijoi më tej Braçe.

Sandra Cvetkoviq, REL

Ndërsa Lista Serbe i cilëson si “referendum” zgjedhjet e parakohshme parlamentare të 7 qershorit në Kosovë, Zyra për Kosovën në Qeverinë e Serbisë është angazhuar në terren për t‘i bindur serbët e zhvendosur që të votojnë për këtë parti, të cilën e mbështet edhe Beogradi zyrtar.

E vetmja rivale e Listës Serbe në zgjedhje është Partia për Liri, Drejtësi dhe Mbijetesë e Nenad Rashiqit, e cila, më 4 qershor, publikoi në rrjetet sociale një përmbledhje videosh nga protestat e studentëve antiqeveritarë në Serbi, me mesazhin: “Unë nuk dorëzohem dhe prandaj qëndroj”.

Muajin e kaluar, këta studentë kanë publikuar një memorandum, në të cilin thuhet se Kosova është “pjesë përbërëse e Serbisë”, duke nxitur reagime në publikun që i mbështet.

Në të njëjtin postim të partisë së Rashqit përmenden edhe marrëveshjet që presidenti i Serbisë, Aleksandar Vuçiq, ka arritur në kuadër të dialogut për normalizimin e marrëdhënieve me Kosovën, dhe sugjerohet se mbyllja e institucioneve të Serbisë në Kosovë ka ardhur si pasojë e tyre.

Zoran Saviq, nga organizata joqeveritare “Aktiv” në Mitrovicë të Veriut, vlerëson se këto mesazhe tregojnë se partitë nuk kanë ide të reja dhe se nuk u ofrojnë qytetarëve një vizion për dalje nga “situata shumë e vështirë në të cilën ndodhet sot komuniteti serb”.

“Shqetësues është sidomos fakti që kjo fushatë zhvillohet në kohën kur serbët në Kosovë, sipas mendimit tim, gjenden në pozitën më të rëndë institucionale që nga viti 1999”, thotë ai për Radion Evropa e Lirë.

Analisti politik nga Prishtina, Artan Muhaxhiri, vlerëson se qasja e Serbisë është “ndërhyrje në procesin zgjedhor” dhe se “është shumë e dëmshme për jetën demokratike të serbëve në Kosovë”.

“Sjell çekuilibër në garën politike dhe demotivon iniciativa të reja që do të ishin të dobishme për zgjerimin dhe përmirësimin e përfaqësimit të tyre politik”, thotë ai për Radion Evropa e Lirë.

Këto janë zgjedhjet e treta parlamentare në Kosovë në më pak se një vit e gjysmë, ndërsa Bashkimi Evropian bën thirrje për një proces zgjedhor të lirë dhe transparent, “pa ndërhyrje apo manipulim nga jashtë”.

Nga Partia për Liri, Drejtësi dhe Mbijetesë thonë se ka ardhur koha që komuniteti serb “ta marrë jetën në duart e veta” dhe të vendosë vetë.

Rashiq, në fakt, shihet si bashkëpunëtor i kryeministrit në detyrë të Kosovës, Albin Kurti, në qeverinë e të cilit ka shërbyer si ministër në dy mandate.

Kështu, nuk mungojnë as akuzat e ndërsjella për “serbët e Vuçiqit” apo “serbët e Kurtit”.

Nga Lista Serbe, përveç narrativit se Rashiq “e ka shitur besimin për një darkë”, vijnë edhe mesazhe se vota për Listën Serbe është “jo” për Kurtin.

Saviq vlerëson se pluralizmi politik brenda komunitetit serb është reduktuar në minimum dhe se pjesëtarët e këtij komuniteti kanë ndjesinë se në zgjedhjet e së dielës zgjedhin mes politikës së Aleksandar Vuçiqit dhe asaj të Albin Kurtit.

“Në bazë të gjendjes në të cilën është sot komuniteti serb, është vështirë të thuhet se politikat që janë bërë në vitet e fundit nga Beogradi dhe Prishtina, kanë sjellë rezultate që kanë përmirësuar ndjeshëm cilësinë e jetesës, sigurinë apo pozitën politike të serbëve në Kosovë”, thotë ai.

Sipas tij, në fushatën zgjedhore, në vend të programeve konkrete, planeve të qarta dhe zgjidhjeve për problemet e grumbulluara, dominojnë “akuzat e ndërsjella, përplasjet politike dhe rritja e tensioneve”.

Në fillim të qershorit, presidenti i Serbisë, Aleksandar Vuçiq, bëri thirrje që të gjithë serbët e Kosovës të votojnë për Listën Serbe – gjë që ndodh para çdo procesi zgjedhor në Kosovë ku merr pjesë kjo parti.

Fushatën për Listën Serbe në Serbi e udhëheq kryesisht Zyra për Kosovën, e drejtuar nga Petar Petkoviq.

Gjatë një vizite në qytetin e Kralevës më 2 qershor, ai u tha serbëve të zhvendosur nga Kosova se vota për Listën Serbe është “votë për mbijetesën dhe qëndrimin e popullit serb në Kosovë e Metohi”.

Sipas tij, të gjithë ata që kanë dokumente të Kosovës dhe mund të ushtrojnë të drejtën e votës, duhet të votojnë për opsionin politik që mbështetet nga Beogradi, sepse është “shtylla kryesore e mbrojtjes së interesave kombëtare serbe në Kosovë e Metohi”.

Më herët, Komisariati për Refugjatë i Serbisë u bëri thirrje personave të zhvendosur që të ushtrojnë të drejtën e votës në zgjedhjet në Kosovë dhe t’i drejtohen atij për më shumë informacione.

Në mesazhin e publikuar në Instagram thuhet se “çdo votë është e rëndësishme për mbijetesën dhe të ardhmen e popullit tonë në Kosovë e Metohi”.

Sipas Muhaxhirit, Lista Serbe është “instrument i drejtpërdrejtë politik i Aleksandar Vuçiqit” dhe nuk është e papritur që shteti i Serbisë i jep sërish mbështetje vetëm këtij subjekti politik.

Ai vlerëson se kjo është një mënyrë “për të ruajtur pushtetin në jetën politike të serbëve të Kosovës”.

Koalicioni i organizatave joqeveritare që monitorojnë zgjedhjet, “Demokracia në Veprim”, vlerësoi më 2 qershor se oferta programore e subjekteve politike gjatë fushatës zgjedhore është “riciklim i ofertave të mëparshme, i paketuar në formën e premtimeve të reja”.

Violeta Haxholli, nga ky koalicion, e veçoi si shqetësuese “konkurrencën e pabarabartë”, për shkak të, siç tha, përdorimit të resurseve publike para fillimit zyrtar të fushatës.

Ajo shtoi se gjatë fushatës janë vërejtur raste të përdorimit të fëmijëve në tubime, gjuhë urrejtjeje në rrjetet sociale nga mbështetësit e partive politike, si dhe gjuhë fyese dhe diskriminuese nga vetë subjektet politike.

Muhaxhiri vlerëson se fushata ka treguar qartë se partitë politike nuk kanë qenë të përgatitura. Sipas tij, në vend të zgjidhjeve të reja dhe ndërtimit të platformave për zhvillim të qëndrueshëm ekonomik dhe shoqëror, dominojnë përplasjet personale dhe argumentet pseudopatriotike.

Si risi të vetme, ai sheh pjesëmarrjen e ish-presidentes Vjosa Osmani në listën e Lidhjes Demokratike të Kosovës.

Presidenti i Këshillit Evropian, Antonio Costa, gjatë qëndrimit në Prishtinë më 3 qershor, u bëri thirrje liderëve politikë që integrimet evropiane t’i vendosin si prioritet.

Ai tha se Kosovës i duhen institucione të forta dhe funksionale, që mund të zbatojnë reforma dhe të përmbushin obligimet që dalin nga dialogu Kosovë-Serbi.

Por, Muhaxhiri vë në pah se dialogu me Serbinë është “diskredituar shumë herë gjatë qeverisjes së Kurtit” dhe se në disa raste është paraqitur si “tradhti shtetërore”.

Për këtë arsye, kjo temë nuk përmendet fare në fushatën zgjedhore.

“Për shkak të këtij konteksti shumë negativ, edhe partitë opozitare aktuale – të cilat më herët kur kanë qenë në pushtet, kanë qenë konstruktive në dialog – tani janë shumë të rezervuara dhe e shmangin plotësisht këtë çështje, nga frika e humbjes së votave”, thotë ai.

Kosova dhe Serbia zhvillojnë dialog për normalizimin e marrëdhënieve që nga viti 2011, ndërsa zyrtarët e BE-së kanë theksuar disa herë se zbatimi i plotë i marrëveshjeve të arritura është kusht thelbësor për përparimin e të dyja vendeve në rrugën drejt integrimeve evropiane.

Efektivi i Policisë së Shtetit, Enea Mekolli, i cili humbi jetën në krye të detyrës gjatë operacionit policor në fshatin Bode ne Maliq, do të prehet në varrezat e fshatit të tij të lindjes.

Megjithëse statusi i “Dëshmorit të Atdheut” parashikon varrimin në Varrezat e Dëshmorëve, familja ka kërkuar që ceremonia e varrimit të zhvillohet në vendlindjen e tij. Sipas familjarëve, kjo kërkesë lidhet me faktin se ata kanë humbur më herët edhe një djalë tjetër nga nje sëmndje e rëndë (leuçemi), gjithashtu efektiv policie.

Dëshira e familjes është që dy vëllezërit të prehen pranë njëri-tjetrit.

Homazhet në nderim të Enea Mekollit do të zhvillohen të premten në orën 10⁰⁰ deri 12:⁰⁰ në Pallatin e Kultures Pogradec, ndërsa ceremonia e varrimit do të mbahet në orën 14:00 në fshatin e tij të lindjes Blace.

Kryeministri Edi Rama do të vizitojë këtë të premte Vlorën, aty ku do të zhvillohet një organizim për 35-vjetorin e Partisë Socialiste.

Drejtuesi politik i qarkut të Vlorës, Bledi Çuçi ka shpërndarë mesazhin ku njofton orën dhe vendin ku do të organizohet takimi.

“35 vjet Partia Socialiste e Shqipërisë. Shihemi në Vlorë në Sheshin e Flamurit, të premten ora 18:30”, shkruan Çuçi.

Ndërkohë, Rama këtë të enjte ndodhej në Mal të Zi, aty ku pa nga afër një projekt që sipas tij është nuk e pranuan në Shqipëri.

Deputetja demokrate, Ina Zhupa debatoi në seancën e sotme me kryetarin e grupit parlamentar, Taulant Balla për për protestat që po zhvillohen kundër projektit të Zvërnecit.

Sipas Zhupës kreu i grupit të PS ka bërë një poster në greqisht në llogarinë e tij në Facebook duke krijuar dezinformim dhe duke i vendosur sipas saj ngjyra nacionaliste një beteje që është vetëm e shqiptarëve.

“Shikoj një postim në Facebook të Taulant Ballës, i cili ka bërë vetë një poster në greqisht dhe e ka nxjerrë aty sikur është posteri i protestës. Keni prodhuar vetë që në fillim gjëra fake, duke bërë deziformim, për të ngjyrosur me ngjyra nacionaliste një betejë që është vetëm shqiptare dhe e drejtë. Nacionalizmi është streha e fundit e maskarenjve. Por në këtë rast ju jeni duke bërë dezinformim. Nxorët 2 deputetë nëpër studio që shpikën autobusa grekë me targa…. Shqiptarët e ngritur për dinjitet, duhet të kuptoni se Shqipëria u takon atyre. Ju takon atyre protestuesve që e duan zhvillimin shumë më shumë se një qeveri hajdute. Duhet të kuptoni se Shqipëria u takon atyre protestuesve që e duan zhvillimin shumë më shumë sesa një qeveri hajdute, që 4 miliardë euro i ka vetëm abuzime te AKSHI. Investimet e huaja janë shumë të rëndësishme, por kur janë në harmoni me standardet e BE-së. Sot nuk do protestohet vetëm në Tiranë, por në të gjithë Shqipërinë. Pse nuk nxirrni edhe mediat italiane, amerikane e gjermane që i kanë bërë jehonë protestës. Ajo që na paraqiti sot kryeministri, ishte një Zvërnec i ndotur. Një qeveri që e qeveris Vlorën 20 vite në pushtet lokal dhe 14 vite pushtet qëndror, thoshte ‘shiko sa të ndotura i kemi ne zonat e mbrojtura’. Por ky është turpi juaj, nuk është arsye që ta betonizosh pse është e pisët. S’kam dëgjuar që meqë nuk kanë bërë mirë punët e tyre kryetarët e bashkive dhe i kanë lënë zonat e mbrojtura si një thes i madh plehrash, hajde t’i ndërtojmë. Nuk ka investimi serioz tela me gjemba, banditë me uniformë dhe tërheqje zvarrë”, tha Ina Zhupa.

Pas deklaratës së Zhupës, Balla e quajti atë gënjeshtare dhe i tha se postimi që ai kishte publikuar në llogarinë e tij ishte e marrë nga një faqe greke.

Më tej ai tha se PD nuk duhet të ndërhyjë në protestën qytetare sepse sipas tij protestuesit thonë ‘Saliu është hajdut’ dhe se kur ata organizojnë protestë, mbledhin vetëm 40 vetë.

“Ti je një gënjeshtare, sepse the që këtë foto e kam publikuar unë. Sepse duhet të kërkosh falje që the e kam bërë unë këtë, ndërkohë unë ta publikova që është publikuar dje nga një faqe greqisht. Dole këtu dhe the që e kam prodhuar unë me IA dhe unë të them e kam marrë në këtë faqe dhe jam i gatshëm të përballet me ty edhe në Gjykatë. Ti je një gënjeshtare që s’të skuqet fytyra kur gënjen. Dëgjo këtu tani. Që ju e bëni piruetën në kuptimin e ndryshimit të qëndrimit, padyshim. Tani kam një pyetje, protestuesit thonë që ‘Sali Berisha është hajdut’, çfarë mendimi keni ju për të? Aaa këtu e paskan gabim. Që Sali Berisha është hajdut, kjo s’ka dyshim se ka edhe çështje penale për këtë punë. Lërini të protestojnë çunat e gocat, s’kanë nevojë për ju ata. Kur dilni ju në protestë, 40 vetë bashkë me rojet jeni”, tha kryetari i grupit parlamentar të PS.

Zëvendës-kryeministrja Albana Koçiu ka sjellë shembuj nga resortet turistike të ndërtuara në Turqi, duke theksuar se investimi në Zvërnec sjell vetëm zhvillimin e vendit.

Përmes një postimi në rrjetet sociale, ku ka publikuar edhe pamje nga resortet në Turqi, Koçiu tha se ky model i zhvillimit të turizmit, përmes resorteve luksoze turistike, është i përhapur në të gjithë Mesdheun.

Teksa u kërkoi shqiptarëve që të heqin dorë nga mentaliteti që i sheh investimet e huaja si pushtim, Koçiu tha se disa njerëz brenda dhe jashtë kufijve kërkojnë që turizmi shqiptar të mos zhvillohet.

Reagimi i Koçiut:

Shpesh vizitojmë vendet fqinje dhe habitemi me cilësinë e shërbimit, fuqinë e industrisë së turizmit dhe transformimin ekonomik të tyre përmes turizmit. Turqia është njëri prej këtyre shembujve më domethënës. Ky model është sot i pranishëm në çdo vend të Mesdheut: në Mal të Zi, Kroaci apo Greqi, e në çdo vend tjetër që e ka turizmin motorin e zhvillimit ekonomik.

Disa, brenda e jashtë kufijve, kërkojnë që Shqipëria ta braktisë këtë garë pikërisht në momentin kur kemi mundësinë reale të konkurrojmë denjësisht dhe, pse jo, ta fitojmë atë.

Është një paradoks i trishtueshëm që vazhdimisht kërkojmë standarde në turizëm dhe përfitime ekonomike prej tij, por njëkohësisht mbajmë fort një mentalitet që e sheh investimin e huaj si pushtim.

Zhvillimi i qëndrueshëm nuk është një akt abuzimi me territorin, as mungesë standardesh apo shkatërrim i ekosistemit, siç rëndom tentohet të paraqitet në debatin tonë publik, e siç fatkeqësisht ka ndodhur gjatë këtyre viteve të tranzicionit. Përkundrazi, zhvillimi i vërtetë është aftësia për të harmonizuar natyrën me infrastrukturën moderne, për të gjeneruar mirëqenie pa kompromentuar të ardhmen. Është aftësia për të transformuar potencialin e fjetur në motorë të fuqishëm ekonomikë që i shërbejnë çdo shqiptari.

Investimi prej 4 miliardë € në Zvërnec nuk është një projekt i mbyllur apo i izoluar, por një mundësi që do të krijojë vende pune, do të rrisë ekonominë, do të përmirësojë standardet e turizmit dhe do të stimulojë investime të tjera zinxhir në të gjithë vendin. Ky është efekti shumëfishues për të cilin Shqipëria ka nevojë, në mënyrë që të dalë nga cikli i turizmit kaotik, pa strategji dhe pa plan.

Ndaj, kjo nuk është gara e një qeverie, as e një partie apo e një grupi investitorësh. Kjo është gara e Shqipërisë drejt kurorëzimit si kampione e padiskutueshme e turizmit në Mesdhe. Mbi të gjitha, kjo është një garë për të ardhmen e fëmijëve dhe brezave që do të vijnë.

Për të pestën ditë radhazi vijoi në Tiranë protesta e mijëra qytetarëve kundër ndërtimeve në Zvërnec dhe Nartë.

Edhe sot u mblodhën shumë qytetarë që marshuan drejt Kryeministrisë dhe mbajtën fjalime në podiumin e improvizuar.

Një prej aktivistëve u shpreh me vendosmëri se protestuesit nuk do bëjnë negociata me Ramën.

Aktivisti: Ju lutem shumë, kini kujdes. Kanë hequr gardhin atje në Zvërnec, ju kanë ngritur kurth shqiptarëve, dhe po hu thonë shqiptarëve; shkoni protestoni atje, që t’i shantazhojnë më pas.

Qeveria është në Tironë, mblidhuni të gjithë në Tironë ta bllokojmë komplet Tironën. Mos bini pre e kurtheve. Nëse do shohim që ka persona që do bllokojnë autostradën asnjë person nuk do shkojnë në Vlorë të bëjë negociata me këtë plehrë. Poshtë komunizmi.

Amaneti i dytë, ka disa persona që vijnë këtu dhe flasin si qytetarët dhe i venë logo partie videove. Kujdes. Kujdes! Se shqiptari e vret tradhtari. Rama, Berisha tradhtarët e kombit.

Konflikti me Shtetet e Bashkuara të Amerikës dhe bllokada e Ngushticës së Hormuzit nga Amerika, po thellon dëmin ekonomik për Iranin dhe bëhet fjalë për rënien e eksporteve të naftës, një prej hallkave më të forta ekonomike për vendin.

Nga rreth 2 milionë fuçi eksporti në ditë përpara vendosjes së bllokadës amerikane, shitja e naftës në tregun ndërkombëtar ka rënë në 300 fuçi. Si pasojë rezervat janë rritur. Nga rreth 147 milionë fuçi naftë bruto që aktualisht ndodhen të bllokuara në det, rreth 67 milionë fuçi mbeten të bllokuara në Gjirin Persik dhe në Gjirin e Omanit, përpara vijës së bllokadës.

Ndërkohë, sasitë që ndodhen tashmë përtej bllokadës kanë ardhur duke u zvogëluar vazhdimisht, pasi ngarkesat vazhdojnë të shkarkohen në Kinë, nga 127 milionë fuçi në momentin e vendosjes së bllokadës, në 80 milionë fuçi aktualisht.

Kompania e specializuar në lëndët e para energjetike Kelper, thotë se “Nëse bllokada vazhdon edhe për dy muaj të tjerë, Irani nuk do të ketë më naftë për t’i shitur Kinës”. Kjo situatë nuk favorizon as SHBA-të, për shkak të uljes së rezervave të naftës, ndërkohë që dhe presioni i aleatëve rajonalë, mund të çojë në “zbutje” të bllokadës.

Por ka edhe një surprizë pozitive për Evropën. Çmimet e naftës janë rritur (+50% që nga fundi i shkurtit, kur nisi konflikti), por problemet e frikësuara të furnizimit, veçanërisht për karburantin e avionëve, për të cilin Evropa varej rreth 50% nga Lindja e Mesme nuk janë materializuar.

Kontinenti i Vjetër ka kompensuar pjesën më të madhe të mungesës së karburantit për avionë nga Lindja e Mesme, e barabartë me rreth 400 mijë fuçi në ditë, falë rritjes së eksporteve amerikane (+140 mijë fuçi në ditë), furnizimeve nga kompania nigeriane Dangote (+40 mijë fuçi në ditë) dhe rritjes së prodhimit të rafinerive (+210 mijë fuçi në ditë).

“Skenari më i mundshëm”, vlerëson Kpler, “është një marrëveshje e kufizuar, në të cilën Irani mbështet rihapjen graduale të Ngushticës së Hormuzit në këmbim të heqjes së bllokadës detare amerikane dhe të disa lehtësimeve ekonomike të synuara, më shumë sesa një marrëveshje e gjerë bërthamore ose heqje të plotë të sanksioneve.

Komiteti për Marrëdhëniet me Jashtë i Senatit të Shteteve të Bashkuara ka miratuar me votim 19-3 emërimin e Eric Wendt si Ambasador i Jashtëzakonshëm dhe Fuqiplotë i SHBA-ve në Republikën e Shqipërisë. Kështu mëson Albanian Post përmes një komunikimi zyrtar me zyrën e shtypit të Komitetit.

Emërimi i Wendt u mbështet nga shumica e anëtarëve të komisionit, përfshirë senatorë nga të dyja partitë kryesore, në një votim që e çon kandidaturën një hap më afër konfirmimit final në Senat.

Sipas të dhënave të votimit, pro kandidaturës votuan 19 senatorë, ndërsa 3 votuan kundër. Mes votave pro ishin senatorë të njohur si Risch, Ricketts, McCormick, Daines, Hagerty, Barrasso, Lee, Paul, Cruz, Scott, Cornyn, Shaheen, Coons, Murphy, Kaine, Duckworth dhe Rosen, mes të tjerëve.

Pas këtij miratimi në komision, kandidatura pritet të kalojë për votim në seancë plenare të Senatit, ku do të vendoset përfundimisht konfirmimi i tij si ambasador i ri i SHBA-ve në Tiranë.

Nëse konfirmohet – duket çështje formaliteti tashmë – Wendt do të marrë drejtimin e Ambasadës amerikane në një periudhë me rëndësi për marrëdhëniet SHBA-Shqipëri, veçanërisht në fushat e sigurisë, investimeve dhe bashkëpunimit euroatlantik.

Qytetarët e Durrësit u mblodhën sërish në sheshin qendror të qytetit për t’iu bashkuar protestës kundra zhvillimit të projektit në Zvërnec.

Pas himnit të flamurit qytetarët mbajten një minute heshtje për humbjen e jetës së efektivit në qytetin e Korçës dhe disa prej tyre vendosën lule në mënyrë simbolike pranë bashkisë.

Protesta vazhdon me fjalën e qytetarëve ku iu bashkuan dhe banorët e prekur nga zhvillimi i projektit të TID-it të cilën ngritën dhe shqetësimin e tyre.

Nuk munguan në shesh as mbështetës nga partitë e vogla opozitare si Partia Mundësia, Lëvizja Bashkë dhe mbeshtetës të Partisë Demokratike.

Ata treguan për mikrofonin e Report Tv se dalja në protestë nuk vjen vetëm prej zhvillimit të projektit por edhe për mënyrat arbitrare të trajtimit të protestueseve në Zvërnec dhe gjithashtu çështje të tjera kombëtare.

Protesta pati prani nga qytetare te thjeshte dhe nuk pati figura politike te pranishme

Nga Adriatik Doçi

Teoritë konspirative janë të shumta. Thonë se era e protestave të ditëve të fundit fryn nga Athina, se ka dorë Soros, por ndoshta edhe linja anti-Soros, se organizohen nga vetë Edi Rama, se ka gisht Veliaj, se pas fshihen komunistë dhe marksistë, mjedisorë, grupime pro dhe kundra LGBT, linja antisemite; thonë se pas mund të fshihet Albin Kurti, Arlind Qori, Lulzim Basha, ndoshta qarqet ruse, qarqet serbe, lobe majtiste, segmente brenda PS etj.

Mund të jenë të gjithë bashkë. Mund të mos jetë asnjëra prej tyre. E qartë është se vektori i protestave masive dhe të veshura me spontanitet nuk është më projekti në Zvërnec, investimi i parë serioz, më i madhin në historinë e vendit, gjeopilitik dhe bashkim financiar, që do të vizatojë fytyrën turistike të Shqipërisë, i pangjashëm me çdo investim elitar dhe përfaqësues në Greqi dhe Malin e Zi. Kjo është sa e rëndësishme dhe pozitive aq edhe mençur.

Protestat e ditëve të fundit, me gjasë drejt përshkallëzimit, po konturojnë për herë të parë një opozitë reale, të vendosur dhe qytetare përtej opozitës false zyrtare me në krye Sali Berishë dhe Familjen e tij, një pseudoopozitë e shitur, e degraduar, super e pasur, mbetje komuniste, balliste dhe e ish Sigurimit të Shtetit, me dosje, anti-kombëtare dhe që pastron paratë u merr si haraç oligarkëve, përfitues të parave dhe pasurive publike falë pushtetit të Edi Ramës.

Nga ana tjetër, opozita e reale (në kontrast me opozitën false) që relflektojnë protestat e ditëve të fundit është një mundësi, horizont dhe shans për reflektim nga Edi Rama dhe pushtetin e tij të pamatë, me simptoma serioze arrogance, korrupsioni dhe keqadministrimi të pasurive publike, duke nisur që nga mishmashi me pronat, zhvillimin kaotik të bregdetit, rrugët e lëna rrugëve, kapjen e shëndetësisë nga një oligark që pastron para nga Holanda në Londër, zbrazjen e fshatrave dhe qyteteve, mungesën e sigurisë ushqimore, kompleksimin në raport me drejtësinë etj.