Një 61-vjeçar ka humbur jetën të martën në fshatin Pozheran të Vitisë, pasi dyshohet se ka rrëshqitur aksidentalisht në ballkonin e shtëpisë së tij si pasojë e kushteve të vështira atmosferike.

Lajmin e ka konfirmuar zëdhënësi i Policisë Rajonale të Gjilanit, Valon Osmani.

Sipas tij, rasti ka ndodhur rreth orës 16:30, kur një burrë, i lindur në vitin 1965, dyshohet se ka rrëshqitur në dyshemenë e ballkonit të shtëpisë së tij, duke pësuar lëndime në kokë.

"I njëjti me autoambulancë është dërguar në Qendrën Emergjente të Spitalit të Përgjithshëm në Gjilan, ku sipas mjekut kujdestar është konstatuar se është pa shenja jete", ka deklaruar Osmani.

Ai bëri të ditur se njësitet relevante policore kanë dalë në vendin e ngjarjes, në koordinim me Prokurorin e Shtetit, dhe janë duke ndërmarrë të gjitha veprimet hetimore për të sqaruar rrethanat e rastit.

Me urdhër të Prokurorit të Shtetit, trupi i pajetë është dërguar në Institutin e Mjekësisë Ligjore në Prishtinë për obduksion.

Ndërkohë, si pasojë e motit të lig, edhe dy persona të tjerë nga fshati Pozheran kanë pësuar lëndime të lehta trupore pasi dyert hyrëse të oborrit të tyre janë rrëzuar nga kushtet atmosferike.

Sipas Policisë, ata kanë marrë trajtim mjekësor në Qendrën Emergjente të Spitalit të Përgjithshëm në Gjilan dhe më pas janë liruar për në shtëpi.

Drejtoria Rajonale e Policisë në Gjilan u ka bërë apel qytetarëve që gjatë motit të paqëndrueshëm të tregojnë kujdes të shtuar, të shmangin lëvizjet e panevojshme në zonat e rrezikuara dhe të respektojnë udhëzimet e institucioneve përgjegjëse.

Ish-kryetari i PDK-së, Enver Hoxhaj, ka bërë të ditur se ka vizituar në Hagë ish-presidentin Hashim Thaçi dhe ish-kryetarin e PDK-së, Kadri Veseli, duke thënë se i ka gjetur të fortë dhe me besim në të vërtetën.

Përmes një postimi në Facebook, Hoxhaj u shpreh se, ndonëse pritja ka qenë e gjatë, fundi i saj po afrohet.

“Ka pritje që zgjasin shumë. Ka ditë që numërohen një nga një. Por ka edhe momente kur e ndjen se fundi i kësaj padrejtësie po afrohet”, ka shkruar Hoxhaj.

Ai bëri të ditur se gjatë vizitës i ka takuar Hashim Thaçin dhe Kadri Veselin.

“Sot i vizitova miqtë e mi, Hashim Thaçin dhe Kadri Veselin në Hagë. I gjeta të fortë, me dinjitet dhe me besim të palëkundur në të vërtetën”, ka theksuar ai.

Hoxhaj ka shtuar se shtatori po afrohet, duke iu referuar muajit kur pritet shpallja e aktgjykimit në rastin e ish-krerëve të UÇK-së.

“Shtatori është gjithnjë e më afër. Bashkë me ta, e presim ditën kur do të kthehen në Kosovë, aty ku e kanë vendin”, ka përfunduar Hoxhaj.

Inspektorati Qendror i Punës ka ndaluar punimet në 16 vendpunishte në komunat Pejë, Prishtinë, Ferizaj, Lipjan dhe Fushë Kosovë, pas konstatimit të shkeljeve të rënda të legjislacionit për sigurinë dhe shëndetin në punë.

Sipas njoftimit të Inspektoratit, kontrollet janë zhvilluar në kuadër të inspektimeve të rregullta për mbikëqyrjen e zbatimit të legjislacionit të punës dhe masave të sigurisë në vendin e punës.

Gjatë inspektimeve janë evidentuar parregullsi që, sipas autoriteteve, paraqisnin rrezik serioz për jetën dhe shëndetin e punëtorëve.

Për këtë arsye, Inspektorati Qendror i Punës ka urdhëruar ndërprerjen e menjëhershme të punimeve në të gjitha 16 vendpunishtet, derisa të eliminohen të gjitha shkeljet e konstatuara dhe të krijohen kushte të sigurta për zhvillimin e punës.

Sipas njoftimit, rifillimi i punimeve do të lejohet vetëm pasi inspektorët të verifikojnë se janë përmbushur të gjitha kërkesat ligjore dhe standardet e sigurisë në punë.

Inspektorati Qendror i Punës ka bërë të ditur se do të vazhdojë kontrollet intensive në të gjithë territorin e Kosovës, duke theksuar se nuk do të tolerojë asnjë shkelje që rrezikon jetën dhe shëndetin e punëtorëve./Telegrafi.

Asociacioni i Komunave të Kosovës (AKK) ka kërkuar nga institucionet qendrore që të kompensojnë menjëherë dëmet e shkaktuara nga vërshimet dhe të krijojnë një Fond Emergjent për Komunat, duke theksuar se qytetarët kanë nevojë për mbështetje konkrete dhe jo për vizita simbolike.

Përmes një reagimi publik, Bordi i AKK-së shprehu shqetësimin e thellë për dëmet e shkaktuara nga vërshimet e fundit në disa komuna të vendit.

Sipas AKK-së, është e papranueshme që një pjesë e madhe e dëmeve nga vërshimet e vitit 2023 dhe ato të janarit 2026 ende nuk janë kompensuar.

“Qytetarët nuk kanë nevojë për vizita dhe fotografi, por për mbështetje konkrete dhe kompensim të drejtë e të shpejtë”, thuhet në reagim.

AKK thekson se komunat kanë përfunduar vlerësimin e dëmeve dhe kanë përmbushur obligimet e tyre, ndërsa tani, sipas saj, përgjegjësia bie mbi institucionet qendrore për të vepruar pa vonesa.

Bordi i Asociacionit ka përsëritur tri kërkesa kryesore:

kompensimin e menjëhershëm të dëmeve nga vërshimet e vitit 2023 dhe të janarit 2026;

ndarjen e fondeve urgjente për komunat e prekura nga vërshimet e fundit;

themelimin e Fondit Emergjent për Komunat, si mekanizëm i përhershëm për reagim të shpejtë ndaj fatkeqësive natyrore.

Në fund të reagimit, AKK ka bërë thirrje për veprime konkrete nga institucionet, duke theksuar se qytetarët nuk kompensohen me fotografi, por me vendime dhe mbështetje reale./Telegrafi.

Ish-kryeministri i Kosovës dhe ish-kryetari i Aleancës për Ardhmërinë e Kosovës (AAK), Ramush Haradinaj, ka kërkuar reagim të shpejtë institucional pas stuhisë dhe reshjeve të rrëmbyeshme që përfshinë disa zona të vendit.

Përmes një reagimi publik, Haradinaj i bëri thirrje Qeverisë në detyrë që, në bashkëpunim me komunat, të angazhohet menjëherë në terren për të vlerësuar situatën dhe për t'u ofruar mbështetje qytetarëve të prekur.

“Situata e krijuar pas stuhisë dhe të reshurave të rrëmbyeshme në Kosovë kërkon reagim të shpejtë institucional. Ftoj Qeverinë në detyrë që, në bashkëpunim me komunat, të dalë në terren, të evidentojë dëmet e shkaktuara dhe të ndërmarrë veprimet e nevojshme për t’u dalë në ndihmë qytetarëve”, ka shkruar Haradinaj.

Ai nuk dha detaje të tjera, por theksoi nevojën për koordinim institucional dhe veprim të menjëhershëm për përballimin e pasojave të motit të lig.

Reshjet e dendura të shiut, breshëri dhe erërat e forta kanë shkaktuar dëme materiale në disa komuna të Kosovës, ndërsa autoritetet po vazhdojnë vlerësimin e situatës në terren.

Ministri i Bujqësisë, Armend Muja, ka paralajmëruar zgjerimin e mbështetjes për vendosjen e rrjetave mbrojtëse kundër breshrit, skemën e sigurimeve bujqësore dhe krijimin e një Qendre të Paralajmërimit të Hershëm për Fermerët, pas dëmeve të shkaktuara nga moti në Komunën e Istogut.

Gjatë vizitës te fermerët e prekur në këtë komunë, ai tha se dikasteri qe e drejton po e shqyrton ngritjen e një sistemi që do t'u ofrojë fermerëve paralajmërime meteorologjike në kohë reale, në mënyrë që ata të marrin masa mbrojtëse para goditjes së fenomeneve ekstreme të motit.

Muja tha se zgjerimi I mbështetjes për rrjetat kundër breshrit është një investim për mbrojtjen e kulturave bujqësore, ndërsa synohet edhe pilotimi i skemës së sigurimeve bujqësore, si hapi i parë drejt krijimit të një sistemi kombëtar të sigurimeve në këtë sektor.

"Ndryshimet klimatike kërkojnë një qasje të re. Synimi ynë është të ndërtojmë një bujqësi më të qëndrueshme përmes investimeve në parandalim, sigurime bujqësore, infrastrukturë mbrojtëse, sisteme të paralajmërimit të hershëm dhe këshillim profesional. Sistemi ynë i mbështetjes po përshtatet vazhdimisht për t'iu përgjigjur sfidave që sjell klima dhe për të mbrojtur fermerët e Kosovës", deklaroi ministri Muja, sipas një njoftimi të zyrës së tij, transmeton KosovaPress.

Sipas tij, Instituti Bujqësor i Kosovës dhe Shërbimi Këshillimor Bujqësor do të angazhohen në terren për të ofruar këshilla profesionale për fermerët e dëmtuar mbi masat agroteknike që duhet të ndërmerren pas breshrit, me synim rikuperimin sa më të mirë të prodhimit.

Muja bëri të ditur gjithashtu se javën e ardhshme do të hapet Skema e Granteve 2026, e cila do të mbështesë investimet në sera dhe fidanë për rimbjellje, duke u mundësuar fermerëve të rikthejnë kapacitetet prodhuese dhe të investojnë në siç u tha, “sisteme më rezistente ndaj ndryshimeve klimatike”.

Gjatë vizitës në Istog, ministri u njoh nga afër me dëmet e shkaktuara nga breshri në kulturat bujqësore dhe theksoi se hapi i parë institucional është vlerësimi profesional i dëmeve nga Komisioni Komunal për Vlerësimin e Dëmeve, duke përshëndetur faktin që ky komision tashmë është themeluar nga Komuna e Istogut. /Kosovapress/

Ai nënvizoi se ndryshimet klimatike po rrisin frekuencën dhe intensitetin e fenomeneve ekstreme të motit, teksa premtoi se politikat e Ministrisë do të fokusohen gjithnjë e më shumë në parandalim, përshtatje dhe menaxhim të rrezikut, krahas adresimit të pasojave.

Ata janë gjithmonë në krye të detyrës, e në mbrotje të qytetarëve.

Mirëpo, shumë zyrtarë të Policisë së Kosovës vazhdojnë të mos kenë pajisjet mbrojtëse në rast të rrezikimit të jetës gjatë kryerjes së detyrës

Siç mëson Radio Dukagjini 1654 zyrtarë policorë të gjeneratës së fundit ende nuk janë pajisur me jelekët anti-plumb.

Kryetari i Sindikatës së Policisë së Kosovës, Avdi Hoti, ka theksuar se katër gjeneratat e fundit të Policisë së Kosovës për shkak të tenderit nuk janë të pajisur me jelekët anti-plumb

“Është shumë me rëndësi se edhe anti-plumbët sikurse të gjitha pajisjet tjera të uniformës edhe anti-plumbi është pjesë e pajisjeve zyrtare dhe duhet çdo zyrtar policor ta ketë atë gjatë detyrës zyrtare”, ka thënë ai.

Ndërsa, për ekspertin e sigurisë, Hysen Gecaj, mungesa e jelekëve anti-plumb shkakton problem në zbatimin e detyrave

“Për shkak të natyrës specifike të detyrave që ka Policia e Kosovës, secili individ në Policinë e Kosovës, mungesa e jelekëve anti-plmb është një mungesë që në fakt shkakon problem në zbatimin e detyrave, për shkak se jeta e policëve vihet në rrezik. Tani kjo përgjigjja që për shkak të tenderëve paskan mbetur katër gjenerata pa jelekët anti-plumb, duket pak deklaratë qesharake”, ka thënë Gecaj.

Moti i lig, i shoqëruar me rrebeshe shiu dhe erëra të forta, ka shkaktuar dëme edhe në komunën e Skenderajt.

Si pasojë e erërave të fuqishme, është dëmtuar minarja e Xhamisë në fshatin Plluzhinë. Në fotografitë e publikuara shihet se një pjesë e minares ka pësuar dëmtime nga kushtet e rënda atmosferike.

Reshjet e dendura dhe erërat e forta kanë përfshirë pasditen e së martës disa rajone të Kosovës, duke shkaktuar dëme materiale në disa komuna.

Deri më tani nuk ka raportime për persona të lënduar, ndërsa autoritetet ende nuk kanë publikuar një bilanc të plotë të dëmeve të shkaktuara nga moti i keq.

Institucionet u kanë bërë thirrje qytetarëve që të tregojnë kujdes të shtuar gjatë lëvizjes, pasi moti i paqëndrueshëm pritet të vazhdojë edhe në orët në vijim.

Bashkimi Evropian ka shprehur shqetësim lidhur me dekretin e ushtrueses së detyrës së presidentes së Kosovës për shkarkimin e prokurorëve serbë, si dhe vendimin e Këshillit Prokurorial të Kosovës për të mos pranuar tërheqjen e dorëheqjeve të tyre.

Në një komunikatë për media, zëdhënësja e BE-së ka vlerësuar se këto veprime "duken të papajtueshme me ligjin, procesin e rregullt ligjor dhe kërkesat e përgjithshme të sundimit të ligjit në Kosovë".

BE-ja ka mirëpritur vendimin e gjyqtarëve, prokurorëve dhe stafit mbështetës nga radhët e komunitetit serb për të tërhequr dorëheqjet e tyre, duke rikujtuar se vazhdimisht ka kërkuar nga institucionet e Kosovës që të mundësojnë riintegrimin e personelit gjyqësor serb.

Sipas Brukselit, riintegrimi duhet të bëhet në përputhje me ligjet e Kosovës dhe marrëveshjet e arritura në kuadër të dialogut të ndërmjetësuar nga Bashkimi Evropian.

"BE-ja u bën thirrje të gjitha institucioneve përkatëse që të përmbahen nga veprimet që synojnë pengimin e riintegrimit të personelit gjyqësor serb të Kosovës", thuhet në komunikatë.

Bashkimi Evropian ka theksuar se, bazuar në Kushtetutën e Kosovës, vendi është një shoqëri shumetnike e ndërtuar mbi parimin e sundimit të ligjit, ndërsa sistemi i drejtësisë duhet të reflektojë diversitetin etnik të shoqërisë.

Reshjet e dendura të shiut dhe breshërit, të shoqëruara me erëra të forta, kanë shkaktuar dëme edhe në zonën e Brezovicës.

Si pasojë e motit të paqëndrueshëm, një lis është rrëzuar mbi dy vetura, duke shkaktuar dëme materiale.

Pamjet nga vendi i ngjarjes janë dërguar nga lexuesit, ku shihet momenti pas rënies së pemës mbi automjete.

Sipas informacioneve të deritanishme, nuk raportohet për persona të lënduar.

Moti i lig ka shkaktuar probleme edhe në disa zona të tjera të Kosovës, ndërsa qytetarët janë këshilluar të kenë kujdes gjatë lëvizjeve, veçanërisht në zonat e prekura nga erërat e forta.

Telegrafi ka kontaktuar Policinë e Kosovës për të marrë konfirmim zyrtar lidhur me rastin, por deri në publikimin e këtij lajmi nuk ka pranuar përgjigje.

Lisi rrëzohet mbi dy vetura në Brezovicë, shkaktohen dëme materiale nga moti i lig telegrafi.com

Erëra të forta kanë përfshirë edhe qytetin e Prizrenit gjatë ditës së sotme, duke shkaktuar shqetësim te qytetarët dhe duke ndikuar në lëvizjen në disa zona.

Kushtet e paqëndrueshme atmosferike kanë prekur disa pjesë të Kosovës, ndërsa për sot janë paralajmëruar stuhi të mundshme me erëra të fuqishme dhe breshër në disa rajone të vendit.

Qytetarëve u është bërë thirrje që të kenë kujdes, veçanërisht gjatë qëndrimit në ambiente të hapura, pranë pemëve, objekteve të pasigurta apo elementeve që mund të dëmtohen nga era.

Deri tani nuk janë raportuar dëme të konfirmuara në Prizren si pasojë e erërave të forta.

Institucionet kanë rekomanduar që qytetarët të ndjekin njoftimet zyrtare dhe të shmangin aktivitetet që mund të paraqesin rrezik gjatë kohës së motit të lig.

Aleanca ka prezantuar logon e saj të re, vetëm një ditë pas mbajtjes së mbledhjes së Këshillit të Përgjithshëm, në të cilën u zgjodh Kryesia e re e partisë.

Në mbledhjen e mbajtur të hënën, Këshilli i Përgjithshëm miratoi përbërjen e re të Kryesisë, duke përmbyllur procesin e riorganizimit të brendshëm të subjektit politik.

Përveç zgjedhjes së Kryesisë, u funksionalizuan edhe organet e tjera drejtuese të Aleancës, ndërsa delegatët votuan edhe për miratimin e logos së re të partisë.

Sipas Aleancës, ndryshimet e miratuara janë pjesë e procesit të reformimit dhe organizimit të strukturave të saj, me synim forcimin e funksionimit të brendshëm dhe përgatitjen për aktivitetet e ardhshme politike.

Stuhia e fortë që ka përfshirë pasditen e së hënës komunën e Suharekës ka shkaktuar dëme materiale në qytet dhe në disa fshatra përreth.

Lajmin e ka bërë të ditur kryetari i Komunës së Suharekës, Bali Muharremaj, i cili përmes një reagimi u bëri thirrje qytetarëve të tregojnë kujdes.

“Nga stuhia e fortë ka disa dëmtime në qytetin e Suharekës dhe fshatra me rrethinë. Apelojmë për kujdes”, ka shkruar Muharremaj.

Ai nuk ka dhënë detaje mbi shkallën e dëmeve apo nëse ka persona të lënduar.

Ndërkohë, autoritetet lokale pritet të dalin në terren për të vlerësuar situatën dhe dëmet e shkaktuara nga moti i ligë.

Autoritetet e Kosovës kanë nisur këtë të martë aksionin për rrënimin e 11 vilave të ndërtuara ilegalisht në pronën e Ndërmarrjes Publike Hidroekonomike “Ibër-Lepenc”, në zonën e Liqenit të Ujmanit, në komunën e Zubin Potokut.

Aksioni, i cili po zhvillohet nga Inspektorati i Ministrisë së Mjedisit, Planifikimit Hapësinor dhe Infrastrukturës me mbështetjen e Policisë së Kosovës, ka kaluar pa incidente.

Shefi i Planifikimit në kuadër të Operativës Rajonale të Policisë në Mitrovicë të Veriut, Erduan Baliqi, tha se policia ka qenë në terren vetëm për të garantuar sigurinë gjatë zbatimit të vendimit.

“Ajo çfarë mund të deklarojmë është se nga orët e mëngjesit kemi asistuar për ‘Ibër-Lepencin’. Këtu jemi për shkaqe sigurie, ndërsa ‘Ibër-Lepenci’ është duke i kryer punët e veta. Deri më tani nuk kemi pasur ndonjë incident ose ndonjë problem. Rrënimi i vilave pothuajse ka përfunduar dhe nuk është paraqitur nevoja për të intervenuar”, tha Baliqi.

Sipas burimeve të KosovaPress-it, në mesin e objekteve të rrënuara janë edhe dy vila që i përkasin kryesuesit të Kuvendit Komunal të Mitrovicës së Veriut, Ivan Zaporozhac, dhe vëllait të tij.

Kryeshefi ekzekutiv i “Ibër-Lepencit”, Faruk Mujka, konfirmoi se objektet ishin ndërtuar pa leje në pronën e ndërmarrjes dhe se pronarët ishin njoftuar paraprakisht për lirimin e tyre.

“Ne po e kthejmë pronën tonë. Po rrënohen 11 shtëpitë e ndërtuara ilegalisht në pronën e ndërmarrjes”, tha Mujka.

Ai bëri të ditur se më 3 korrik pronarëve u ishte kërkuar t’i largonin sendet dhe ta lironin pronën deri më 17 korrik. Pas skadimit të këtij afati, autoritetet nisën zbatimin e vendimit për rrënim.

Sipas Mujkës, përveç një objekti, të gjitha vilat e tjera janë ndërtuar gjatë viteve 2019 dhe 2020.

Gjatë aksionit, disa prej pronarëve janë lejuar të largojnë gjësendet personale nga objektet, pa penguar zhvillimin e operacionit.

Ndërkohë, Zyra për Kosovën në Qeverinë e Serbisë e ka dënuar aksionin, duke e cilësuar atë si të paligjshëm dhe duke pretenduar se rrënimi është kryer pa vendim gjyqësor dhe në dëm të serbëve lokalë.

Liqeni i Ujmanit konsiderohet një nga asetet strategjike të Kosovës, pasi furnizon me ujë të pijshëm një pjesë të madhe të vendit, shërben për prodhimin e energjisë elektrike dhe për ujitjen e sipërfaqeve bujqësore.

Një fëmijë është transferuar për trajtim në Qendrën Emergjente të Qendrës Klinike Universitare të Kosovës si pasojë e lëndimeve që ka marrë në aksidentin që ka ndodhur në Shushicë të Istogut sot rreth orës 16:00.

Drejtori i Klinikës Emergjente, Naser Syla, tha se pacienti ka pësuar politraumë të rëndë.

“Fëmija është pranuar në gjendje të rëndë, me politraumë si pasojë e aksidentit në komunikacion. Janë kryer të gjitha ekzaminimet e nevojshme dhe aktualisht pacienti ndodhet nën observim në Qendrën Emergjente. Pas përfundimit të vlerësimit dhe stabilizimit të gjendjes, trajtimi do të vazhdojë në Klinikën e Mjekimit Intensiv”- ka deklaruar Syla për Kallxo.

Syla tha se gjendja e tij është e rëndë por stabile për momentin.

Spitali i Përgjithshëm në Pejë ka dhënë detaje lidhur me aksidentin e trafikut që ndodhi pasditen e sotme në Istog.

Sipas njoftimit, rreth orës 16:00 është pranuar një paciente pa shenja jete.

“Pacientja kishte pësuar politraumë dhe, përkundër procedurave të ndërmarra, është konstatuar pa shenja jete”- thuhet në njoftim.

Ndërsa thuhet se rreth 30 minuta më vonë, në Emergjencë janë pranuar edhe katër të lënduar nga i njëjti aksident.

“Një fëmijë, me lëndime të rënda, është transferuar në Qendrën Klinike Universitare të Kosovës (QKUK), i intubuar dhe nën përcjelljen e ekipit të Anestezionit. Sipas mjekëve, ai ka pësuar politraumë, hemorragji intrakraniale dhe frakturë të femurit”- thuhet tutje në njoftim.

Ndërkohë, një paciente është hospitalizuar në Repartin e Ortopedisë me frakturë të femurit, ndërsa dy persona të tjerë, pasi kanë marrë trajtimin e nevojshëm mjekësor dhe janë konstatuar me lëndime të lehta trupore, janë liruar për trajtim ambulantor.

Ministri në detyrë i Bujqësisë, Armend Muja, ka reaguar pas dëmeve të shkaktuara nga stuhia e shiut dhe breshrit në komunën e Istogut, duke paralajmëruar vizitë në zonat e prekura.

Përmes një njoftimi, Muja bëri të ditur se të martën do të vizitojë fermerët e prekur në Istog, ndërsa, sipas nevojës, do të shkojë edhe në komuna të tjera që janë goditur nga moti i ligë.

“Nesër do të vizitoj fermerët e prekur nga breshëri në Komunën e Istogut dhe, sipas nevojës, edhe në komuna të tjera të prekura”, ka shkruar Muja.

Ai tha se qëllimi i vizitës është të vlerësojë nga afër situatën në terren, të dëgjojë shqetësimet e fermerëve dhe të koordinojë hapat e mëtejmë me autoritetet lokale.

“Qëllimi i vizitës është të shoh nga afër gjendjen në terren, të dëgjoj shqetësimet e fermerëve dhe të koordinojmë hapat e mëtejmë me autoritetet lokale”, ka theksuar ministri në detyrë.

Komuna e Istogut u përfshi të hënën nga reshje të dendura shiu dhe breshëri, të cilat shkaktuan dëme të mëdha në kulturat bujqësore dhe ekonomitë familjare.

Autoritetet komunale kanë bërë të ditur se komisionet për vlerësimin e dëmeve do ta nisin punën nga dita e martë.

Reshjet e dendura të shiut, të shoqëruara me breshër, kanë goditur këtë të hënë komunën e Istogut, duke shkaktuar dëme të mëdha në sektorin e bujqësisë.

Kryetari i Komunës së Istogut, Ilir Ferati, ka deklaruar se dëmet janë të përmasave katastrofale, pasi janë prekur pothuajse të gjitha kulturat bujqësore në një pjesë të madhe të territorit të komunës.

“Dëmet janë katastrofale në bujqësi. Të gjitha kulturat, për të cilat bujqit kanë punuar prej muajsh, janë dëmtuar. Në shumicën e fshatrave ka pasur dëme, nga Istogu deri në kufi me Pejën. Në Kovragë, që është njëri prej fshatrave me më së shumti tokë pjellore e punueshme, kulturat janë shkatërruar pothuajse tërësisht, ndërsa dëme ka edhe në ekonomitë familjare”, tha Ferati për KALLXO.

Ai bëri të ditur se ekipet e Drejtorisë së Bujqësisë dhe Drejtorisë për Mbrojtje dhe Shpëtim kanë dalë në terren për të evidentuar situatën.

Ferati njoftoi se komisionet komunale për vlerësimin e dëmeve do ta nisin punën të martën, më 21 korrik.

“Komisionet do të mblidhen nesër në orën 10:00. Fillimisht do të kemi një takim, e më pas do të dalin në terren për të vlerësuar dëmet në bujqësi dhe në ekonomitë familjare. Besoj se deri në fund të javës do të kemi një vlerësim të plotë, të cilin do ta procedojmë në Kuvendin Komunal dhe më pas në Ministrinë e Bujqësisë, për t’u trajtuar edhe nga Komisioni Nacional. Shpresojmë që fermerët të kompensohen për të paktën një pjesë të dëmeve”, u shpreh ai.

Sipas Institutit Hidrometeorologjik të Kosovës, edhe gjatë pasdites së sotme janë parashikuar reshje lokale shiu, të shoqëruara me shkarkime rrufesh në disa zona të vendit.

Kryetari i Aleancës, Ardian Gjini, ka njoftuar se Këshilli i Përgjithshëm i Aleancës, i dalë pas zgjedhjeve të brendshme, ka miratuar përbërjen e re të Kryesisë dhe ka funksionalizuar organet kryesore të partisë.

Përmes një postimi pas përfundimit të mbledhjes së Këshillit të Përgjithshëm, Gjini bëri të ditur se, përveç votimit të Kryesisë, janë themeluar dhe funksionalizuar edhe Këshilli i Kryetarëve të Degëve, Këshilli i Nderit, Kolegjiumi i Ekspertëve të Aleancës, Kolegjiumi i Anëtarëve të Kuvendeve Komunale dhe Kolegjiumi i Drejtorëve të Aleancës.

Sipas Gjinit, ky proces përbën një hap të rëndësishëm në forcimin e strukturave organizative të partisë dhe në përgatitjen për sfidat politike që e presin Aleancën.

“Aleanca mbetet e vendosur të vazhdojë angazhimin e saj për një Kosovë më të zhvilluar, më të sigurt dhe më të fuqishme, duke u mbështetur në vlerat, përvojën dhe përkushtimin e njerëzve tanë”, ka theksuar ai.

Gjini ka vlerësuar se përbërja e re e Kryesisë ndërthur përvojën me energjinë e re, me synimin për të udhëhequr me përgjegjësi proceset politike dhe organizative të Aleancës.

Në fund, kryetari i Aleancës uroi të gjithë të zgjedhurit për detyrat e reja, duke u dëshiruar suksese në përgjegjësitë që do të mbajnë.

Deputetja e zgjedhur e Lidhjes Demokratike të Kosovës (LDK), Hykmete Bajrami, ka reaguar pas dëmeve të shkaktuara nga reshjet e dendura të breshrit në komunën e Istogut dhe në zona të tjera të vendit, duke kërkuar veprim urgjent nga institucionet.

Përmes një postimi në Facebook, Bajrami i bëri thirrje qeverisë në detyrë që të mbajë një mbledhje urgjente dhe të ndajë mjete buxhetore për kompensimin e dëmeve të pësuara nga fermerët.

Ajo theksoi se mbështetja e bujqve është përgjegjësi e shtetit dhe jo çështje që duhet t’u lihet në dorë rrethanave.

“Kjo është detyrë e shtetit. LDK kërkon krijimin e një skeme të sigurimeve bujqësore, që fermerët të mos mbeten çdo vit në mëshirën e fatit. Sot nuk duhen arsyetime, duhen veprime konkrete. Fermerët nuk duhet të lihen vetë, sepse pa ta nuk ka as bujqësi, as siguri ushqimore”, ka shkruar Bajrami.

Reshjet e breshrit, të shoqëruara me mot të ligë, kanë shkaktuar dëme të konsiderueshme në kulturat bujqësore në disa komuna të Kosovës, veçanërisht në rajonin e Istogut./Telegrafi.

Erërat e forta që kanë përfshirë Prishtinën të hënën, kanë shkaktuar rrëzimin e një lisi në qendër të kryeqytetit.

Nga pamjet e siguruara shihet se pema është rrëzuar si pasojë e erërave të fuqishme, duke bllokuar pjesërisht zonën ku ka rënë.

Menjëherë pas incidentit, në vendin e ngjarjes kanë dalë njësitet e Policisë së Kosovës dhe ekipet e zjarrfikësve, të cilët kanë siguruar perimetrin dhe kanë nisur largimin e lisit të rrëzuar.

Sipas informacioneve të para, nuk raportohet për persona të lënduar, ndërsa autoritetet po punojnë për normalizimin e situatës dhe largimin e plotë të pengesës nga rruga.

Ndërkaq, erëra të forta janë raportuar edhe në disa komuna t tjera, por ende nuk ka informacione për të lënduar apo dëme materiale.