Barcelona ka nisur lëvizjet e para strategjike të afatit kalimtar të verës me synimin e qartë për të ristrukturuar krahun e majtë, me kërkesë të drejtpërdrejtë të Hansi Flick, duke e vënë në shënjestër profilin e Marc Cucurellës.

Në zyrat e klubit katalanas po qarkullojnë disa dosje të hapura dhe drejtoria sportive e udhëhequr nga Deco e pranon se kjo pozitë pritet të pësojë një transformim të plotë.

Ndërsa klubi po negocion marrëveshje të ndërlikuara me Al-Hilal për ta blerë përfundimisht Joao Cancelon, stafi i ri teknik synon ta përforcojë skuadrën edhe me mbrojtësin e Chelseat, një operacion i rëndësishëm që do ta ndryshonte ndjeshëm konfigurimin mbrojtës të ekipit për garat e ardhshme të rëndësishme.

Transferimi i mundshëm i Cucurellës te ekipi katalanas varet drejtpërdrejt nga zgjidhja e së ardhmes profesionale të Alejandro Balde.

“Karta e fshehur” e Barcelonës: Ylli brazilian mund të jetë transferimi befasues për mbrojtjen

Mbrojtësi i dalë nga La Masia nuk ka arritur ta ofrojë nivelin sportiv të pritur gjatë sezonit të fundit dhe departamenti teknik është i hapur të shqyrtojë oferta tërheqëse, me qëllim rritjen e të ardhurave në “Camp Nou”.

Pavarësisht reputacionit shumë të mirë ndërkombëtar të 20-vjeçarit dhe një vlere të vlerësuar në treg rreth 55 milionë euro, lojtari ka shprehur dëshirë të fortë të qëndrojë në Spanjë, çka ka mbajtur pezull bisedimet joformale me klubin londinez.

Bordi i Chelseat ka miratuar largimin e mbrojtësit të majtë, pasi skuadra angleze nuk arriti të sigurojë kualifikimin për garat kontinentale të sezonit të ardhshëm.

Drejtuesit e klubit anglez synojnë të rikuperojnë një pjesë të investimit të madh fillestar, që thuhet se ka kaluar 60 milionë euro, duke e vendosur çmimin aktual në një interval mes 45 dhe 55 milionë eurosh, përmes një shume fikse dhe bonusesh të ndryshueshme.

Megjithatë, Barcelona nuk është e vetme në garë për këtë transferim, pasi edhe Atletico Madridi po e ndjek nga afër situatën për ta përfshirë në projektin e vet./Telegrafi/

Kandidati për president të Real Madridit, Enrique Riquelme, ka zbuluar planin e tij ambicioz për të sjellë Jurgen Kloppin në stolin e klubit madrilen në rast se fiton zgjedhjet.

Riquelme ka bërë të ditur se, nëse anëtarët e klubit i japin besimin e tyre, ai do të nisë menjëherë bisedimet për ta bindur trajnerin gjerman të marrë drejtimin e “Los Blancos”, pavarësisht faktit se Klopp ka deklaruar publikisht se nuk planifikon të rikthehet në pankinë në të ardhmen e afërt.

Sipas tij, projekti i Real Madridit është unik dhe mund të përfaqësojë një sfidë të veçantë edhe për një trajner të kalibrit të Kloppit.

“Ne e dimë se Jurgen Klopp ka deklaruar publikisht se nuk ka ndërmend të rikthehet në pankinë në afat të shkurtër dhe se ka refuzuar oferta të shumta. Pikërisht për këtë arsye ne besojmë se sfida te Real Madridi është ndryshe. Sepse ka klube të mëdha, por ekziston vetëm një Real Madrid. Ekziston vetëm një institucion i aftë të bashkojë traditën dhe të ardhmen, vlerat dhe ambicien, pasionin dhe përsosmërinë”.

“Prandaj, nëse anëtarët më japin besimin e tyre këtë të diel, të hënën e ardhshme, më 8 qershor, Raul Gonzalez do të kontaktojë Kloppin për t’ia prezantuar personalisht projektin tonë sportiv dhe dëshirën tonë që ai të udhëheqë një epokë të re të Real Madridit nga bankina”.

Ky vendim i ekipit sportiv përputhet me ndjenjën e mijëra anëtarëve dhe madrilenëve me të cilët kam pasur mundësinë të bisedoj gjatë dy javëve të fundit”, deklaroi Riquelme.

Publikohen shifrat – kjo është paga marramendëse e Konates te Real Madridi

Klopp aktualisht mban një rol drejtues në strukturën sportive të Red Bullit, pasi u largua nga Liverpooli në fund të sezonit 2023/24. Megjithatë, emri i tij vazhdon të lidhet me klubet më të mëdha evropiane sa herë që hapet një debat për trajnerët e elitës.

Mbetet të shihet nëse një projekt i ri në ‘Santiago Bernabeu’ do të jetë i mjaftueshëm për ta bindur gjermanin të rikthehet në pankinë dhe të nisë një kapitull të ri në karrierën e tij./Telegrafi/

Mbrojtësi i Kombëtares së Kosovës, Lumbardh Dellova, mund të jetë pranë një hapi të rëndësishëm në karrierën e tij, pasi emri i tij po lidhet me një transferim të mundshëm në kampionatin ukrainas.

Sipas raportimeve të mediumit bullgar “Gol.bg”, interesim konkret për 27-vjeçarin ka shfaqur Dinamo Kiev, një nga klubet më të mëdha dhe më të suksesshme në Ukrainë. Bëhet e ditur se drejtuesit e klubit ukrainas janë të gatshëm të investojnë rreth 950 mijë euro për të siguruar shërbimet e qendërmbrojtësit kosovar.

Dinamo po synon të forcojë repartin defensiv para nisjes së sezonit të ri dhe Dellova konsiderohet si një profil që mund të sjellë stabilitet dhe cilësi në prapavijë.

Paraqitjet e tij të mira gjatë periudhës së fundit me CSKA Sofian duket se kanë tërhequr vëmendjen e skautëve të klubit ukrainas.

Aktualisht, Dellova është pjesë e gjigantit bullgar, ku u transferua në vitin 2024 nga Ballkani. Në atë kohë, marrëveshja mes dy klubeve ishte realizuar për një shumë prej rreth 350 mijë eurosh.

Mbrojtësi kosovar ka kontratë me CSKA Sofian deri në verën e vitit 2027, gjë që i jep klubit bullgar një pozicion të favorshëm në negociata në rast se Dinamo Kiev vendos të konkretizojë interesimin me një ofertë zyrtare.

Kujtojmë se Dellova së fundmi u largua nga grumbullimi i Kosovës për shkak të një lëndimi, por kjo nuk duket se ka zbehur interesimin e klubeve që po monitorojnë situatën e tij./Telegrafi/

Pas fitimit të titullit të dytë radhazi në Ligën e Kampionëve, PSG ka nisur të planifikojë të ardhmen, me disa largime të mundshme që pritet ta përcaktojnë aktivitetin e klubit në afatin kalimtar të verës.

Edhe pse kampionët e Francës nuk parashikojnë një “revolucion” të madh në skuadër, priten vendime të rëndësishme për të ardhmen e disa lojtarëve të ekipit të parë.

Ndër largimet më të mundshme përmenden Kang-in Lee dhe Goncalo Ramos. Të dy janë nën kontratë deri në vitin 2028, por PSG nuk ka hapur bisedime për rinovim dhe, sipas raportimeve, do të ishte e gatshme të dëgjojë oferta të përshtatshme këtë verë.

Situata e Ibrahim Mbaye është më pak e qartë. Sulmuesi 18-vjeçar la përshtypje me Senegalin në Kupën e Kombeve të Afrikës, por në pjesën e dytë të sezonit pati vështirësi të gjejë minuta të rregullta nën drejtimin e Luis Enrique.

Disa klube thuhet se po e monitorojnë situatën e Mbaye, ndonëse PSG vazhdon ta konsiderojë atë si një nga talentët më premtues të akademisë.

Në anën tjetër, klubi po punon për të siguruar të ardhmen afatgjatë të sulmuesve kyç. Bradley Barcola aktualisht është në negociata për zgjatje kontrate, me PSG-në që synon të zmbrapsë interesimin e klubeve rivale europiane. Bisedime të ngjashme po zhvillohen edhe me Ousmane Dembele.

Në mesfushë, paqartësi ka rreth Senny Mayulu, i cili ka vetëm edhe një vit kontratë. Diskutimet për rinovim po vazhdojnë, por ende nuk është arritur marrëveshje.

PSG përjashton shitjen e dy yjeve pas interesimit të Real Madridit

Në mbrojtje, PSG po e vëzhgon situatën e Marquinhos. Kapiteni brazilian dëshiron të qëndrojë në Paris, por në rast largimi, klubi pritet të dalë në treg për një qendërmbrojtës zëvendësues.

Po ashtu, PSG raportohet se po kërkon edhe një mbrojtës të gjithanshëm, i aftë të luajë si mbrojtës i majtë ashtu edhe në qendër të mbrojtjes, zhvillim që ngre pikëpyetje mbi të ardhmen e Lucas Hernandez, pasi minutazhi i tij ka rënë.

Në portë, Lucas Chevalier përballet me një tjetër sezon të pasigurt. Ish-portieri i Lille vazhdon të jetë pas Matvey Safonov në hierarki dhe mund ta rishqyrtojë situatën e tij, pas mungesës në përgatitjet e Francës për Kupën e Botës./Telegrafi/

FIFA ka anuluar biletat e Kupës së Botës që u ishin lëshuar rreth 60 tifozëve, pasi këta të fundit i kishin përfituar gabimisht falas për shkak të një problemi teknik në faqen zyrtare të shitjes.

Sipas organit qeverisës të futbollit, biletat ishin “ndarë pa pagesë për shkak të një problemi të mëparshëm me pagesën gjatë procesit të arkëtimit”. FIFA tha se “shpreh keqardhje për gabimin dhe çdo shqetësim të shkaktuar”, duke theksuar se tifozët e prekur nuk e kanë humbur rezervimin, por janë ftuar që të paguajnë shumën e saktë për t’i mbajtur biletat.

Rasti vjen si episodi më i fundit në një program të biletave të Kupës së Botës që prej kohësh ka qenë i diskutueshëm. Prokurorët e përgjithshëm të Nju Jorkut dhe Nju Xhersit po e hetojnë procesin për shkelje të mundshme të ligjeve të mbrojtjes së konsumatorit, duke rritur edhe më shumë presionin mbi FIFA-n në prag të nisjes së turneut.

FIFA u ka bërë të ditur blerësve përmes një emaili se biletat me çmim të gabuar ishin shpërndarë përmes faqes zyrtare të Kupës së Botës më 21 maj. Kjo datë erdhi më shumë se tre muaj pasi presidenti i FIFA-s, Gianni Infantino, kishte deklaruar se të gjitha 104 ndeshjet e Botërorit ishin shitur.

Megjithatë, FIFA vazhdon ende të shesë bileta për ndeshjet e Kampionatit Botëror, i cili hapet të enjten e ardhshme në Mexico City.

Ende nuk dihet nëse çmimet për ndeshjet me më pak interes do të ulen, sipas modelit të rritjes dinamike të çmimeve që FIFA ka përdorur dhe që është kritikuar nga tifozët.

“Eksperti” nga Telegrafi rikthehet për Botërorin 2026 - parashiko rezultatet dhe fito shpërblime

Në të njëjtën kohë, FIFA po operon edhe platformën e saj zyrtare të rishitjes, ku merr 15% komision si nga blerësi ashtu edhe nga shitësi, me arsyetimin se synon të luftojë tregun e ndërmjetësve dhe shitësve të palicencuar.

Megjithatë, platforma të tjera të tregtimit si SeatGeek vazhdonin të shfaqnin disponueshmëri të gjerë biletash për shumë ndeshje.

Biletat e Kupës së Botës 2026 janë raportuar si më të shtrenjtat në historinë e turneut. FIFA e ka justifikuar këtë politikë çmimesh me nevojën për të gjeneruar të ardhura të larta, duke theksuar se fitimet do të shkojnë drejt financimit të projekteve dhe zhvillimit të futbollit në rang global, përmes federatave anëtare./Telegrafi/

Manchester United thuhet se ka marrë një vendim përfundimtar sa i përket të ardhmes së Marcus Rashford.

Rashford ndodhet te Barcelona në formë huazimi për një sezon, marrëveshje që skadon më 30 qershor.

28-vjeçari shënoi 14 gola dhe dha 10 asistime në të gjitha garat për skuadrën e Hansi Flick, duke i ndihmuar katalanasit të fitojnë titullin e La Ligës.

Paraqitjet e tij i siguruan edhe rikthimin në përfaqësuesen e Anglisë, ndërsa Rashford është pjesë e grupit prej 26 lojtarësh të përzgjedhur nga Thomas Tuchel për Kupën e Botës.

Megjithatë, sipas mediumit spanjoll Sport, situata është pak më e ndërlikuar.

Ata pretendojnë se Barcelona nuk e ka “përjashtuar plotësisht” mundësinë për ta transferuar përfundimisht Rashford, por kjo varet nga shitjet e lojtarëve dhe nga fakti nëse klubi arrin të afrojë ose jo një sulmues të ri.

Barcelona është lidhur shumë me një lëvizje për yllin e Atlético Madridit, Julian Álvarez, por kritikat publike të Atleticos për mënyrën si Barça e ka menaxhuar interesimin e saj duket se nuk e kanë ndihmuar kauzën e kampionëve të La Ligës.

Pse Barcelona e transferoi Anthony Gordon para Marcus Rashfordit?

Megjithatë, shtohet se një rikthim i Rashford te Manchester United në këtë fazë “duket i pamundur”.

Sa i përket Manchester United, i njëjti burim raporton se klubi është “i hapur të negociojë një zgjidhje tjetër, më të favorshme për Barçën”, e cila do të parashihte që gjigantët spanjollë të paguajnë një tarifë më të ulët se opsioni i blerjes prej 30 milionë eurosh.

United thuhej se kishte qenë i prerë se do ta shiste Rashford vetëm për shumën e klauzolës së blerjes, por tani ka pranuar se Rashford “absolutisht e ka prioritet të qëndrojë në 'Camp Nou' dhe është plotësisht i mbyllur ndaj propozimeve të tjera”./Telegrafi/

Gjermania mund të ketë marrë një goditje të rëndë në prag të Kupës së Botës, pasi talenti i vlerësuar i Bayern Munich, Lennart Karl, pësoi një lëndim gjatë stërvitjes të premten.

Trajneri Julian Nagelsmann konfirmoi se 18-vjeçari u dërgua në spital për vlerësime të mëtejshme, ndërsa shkalla e lëndimit mbetet ende e panjohur.

“Nuk duket mirë. Ai shkoi në spital dhe do t’i nënshtrohet ekzaminimeve. Duhet të presim diagnozën dhe të shohim nëse mund të luajë në Kupën e Botës apo nëse duhet të thërrasim një zëvendësues”, u shpreh Nagelsmann për gazetarët.

Lëndimi vjen në momentin më të keq të mundshëm për Karlin, i cili shpresonte ta kurorëzonte një sezon shpërthyes me një vend në fushatën e Gjermanisë në Botëror.

Adoleshenti pati një sezon debutues të jashtëzakonshëm me Bayern Munich, duke shënuar nëntë gola dhe dhënë shtatë asistime në 39 paraqitje me ekipin e parë në të gjitha garat.

Paraqitjet e tij e vendosën si një nga talentet më të ndritshme të futbollit gjerman dhe i siguruan një vend në planet e Nagelsmannit për turneun.

Tani Gjermania do të presë me ankth rezultatet e skanimeve, teksa përgatitet për miqësoren e fundit para Kupës së Botës ndaj Shteteve të Bashkuara, në “Soldier Field” të Chicagos, më 6 qershor.

Kampionët e botës katër herë më pas do ta nisin aventurën në Grupin E, me ndeshjen hapëse ndaj Curaçaos në Houston më 14 qershor, përpara se të përballen me Bregun e Fildishtë më 20 qershor në Toronto dhe Ekuadorin më 25 qershor./Telegrafi/

Kombëtarja e Kosovës në futboll për femra nuk ka arritur të marrë rezultat pozitiv në përballjen vendimtare me Kroacinë, duke u mposhtur minimalisht me rezultat 1-0 në stadiumin “Fadil Vokrri”.

Takimi u vendos herët, kur mysafiret gjetën rrugën e golit pas një goditjeje nga këndi, situatë nga e cila Karla Kurkutovic përfitoi për t’i dhënë epërsinë Kroacisë.

Ky gol rezultoi vendimtar deri në fund të ndeshjes, pavarësisht përpjekjeve të Kosovës për t’u rikthyer në lojë.

Humbja ka bërë që ‘Dardanet’ ta lëshojnë kreun e Grupit C2, megjithëse diferenca me Kroacinë mbetet minimale.

Të dyja skuadrat kanë nga 12 pikë, por përfaqësuesja kroate gëzon avantazh falë goldallimit më të mirë.

Megjithatë, gara për një vend në fazën e ‘play-off’-it është larg përfundimit. Kosova e ka ende fatin në duart e veta dhe në xhiron e fundit do të përballet me Gjibraltarin, një kundërshtar ndaj të cilit synon të arkëtojë pikët e plota.

Një fitore në atë takim do t'i mbante futbollistet kosovare në pozicion shumë të favorshëm për të siguruar një vend në ‘play-off’-in e Kupës së Botës 2027.

Në të njëjtën kohë, shpresat për vendin e parë nuk janë shuar ende, pasi Kroacia duhet të kalojë pengesën e Bullgarisë në ndeshjen e saj të fundit./Telegrafi/

Arsenali raportohet se po i bashkohet garës për të nënshkruar me sulmuesin e Real Sociedadit, Ander Barrenetxea, sipas Sportsboom.

Thuhet se Arsenali dhe Tottenhami po e monitorojnë nga afër progresin e 24-vjeçarit, me lojtarin spanjoll të krahut që ka impresionuar te skuadra baske gjatë sezoneve të fundit.

Barrenetxea ka një klauzolë lirimi prej 75 milionë eurosh në kontratën e tij aktuale, çka pasqyron rëndësinë që ka për Real Sociedadin.

Megjithatë, besohet se Arsenali po e shqyrton mundësinë të hapë bisedimet me një ofertë fillestare rreth 30 milionë euro, dukshëm më e ulët se klauzola, me synimin për të testuar gatishmërinë e Sociedadit për të negociuar.

“Topçinjtë” synojnë të dalin përpara rivalëve të tyre të Londrës së Veriut në betejën për firmën e anësorit, teksa vazhdojnë të forcojnë opsionet në repartin ofensiv.

Klubi londinez beson se Barrenetxea përshtatet në mënyrë ideale me projektin afatgjatë, falë lojës së tij efektive në krahë dhe disiplinës taktike që po rritet.

Real Madridi ka pasur kontakte me mbrojtësin e Arsenalit

Stili i lojës së Barrenetxeas konsiderohet i përshtatur për Ligën Premier: vrapimet që e shtrijnë mbrojtjen në anë, aftësia në driblim dhe efikasiteti në fazën përfundimtare e vendosin atë në profilin modern të një anësori.

Përmirësimi i tij në disiplinën taktike e bën një opsion të besueshëm jo vetëm në sulm, por edhe për kontributin në fazën defansive./Telegrafi/

Prishtina ka zyrtarizuar të premten emërimin e Orges Shehit në postin e trajnerit të ekipit të parë.

Lajmi është bërë i ditur nga klubi kryeqytetas përmes një videoje të publikuar në rrjetet sociale, ku është konfirmuar ardhja e teknikut shqiptar në stolin bardhekaltër.

Shehi do ta zëvendësojë Alban Dragushën, i cili ndërpreu bashkëpunimin me Prishtinën me marrëveshje të dyanshme pas përfundimit të sezonit.

Trajneri 48-vjeçar vjen në Kosovë pas aventurës së tij të fundit te Tirana, skuadër të cilën e drejtoi për rreth pesë muaj.

Ai nuk është i panjohur për futbollin kosovar, pasi më parë ka qenë trajner i Ballkanit, ku qëndroi nga dhjetori i vitit 2024 deri në nëntor të vitit 2025.

Gjatë karrierës së tij si trajner, Shehi ka drejtuar gjithashtu disa prej klubeve më të njohura në Shqipëri, përfshirë Kukësin, Skënderbeun dhe Partizanin e Tiranës, duke krijuar një profil të konsoliduar në futbollin shqiptar.

Me emërimin e Shehit, Prishtina synon të nisë një kapitull të ri dhe të rikthehet në garën për trofetë në futbollin kosovar, duke besuar se përvoja e trajnerit shqiptar do t’i ndihmojë bardhekaltërit në realizimin e objektivave të sezonit të ardhshëm./Telegrafi/

Natan është kthyer në një opsion shumë serioz në afatin kalimtar për Barcelonën, në rast se klubi blaugrana aktivizon kërkimin për një mbrojtës qendre.

Mbrojtësi brazilian i Real Betisit i është ofruar ekipit katalanas dhe qëndrimi i tij duket i qartë: ai do të largohej vetëm për të bërë një hap të tillë në karrierë.

Barcelona prej javësh po studion alternativa për të përforcuar boshtin e mbrojtjes, duke kërkuar profile me këmbën e majtë, lojtarë fizikë dhe të aftë për të nisur aksionet nga prapavija.

Në këtë kontekst ka dalë në pah Natan, një qendërmbrojtës 25-vjeçar që është zhvilluar nën drejtimin e Manuel Pellegrinit.

Braziliani fillimisht erdhi te Betisi në huazim nga Napoli, ndërsa më pas Real Betis e finalizoi blerjen e tij për 9 milionë euro.

Ky investim ka rezultuar i suksesshëm: Natan është shndërruar në titullar të rregullt te verdiblancos dhe në një nga mbrojtësit më të besueshëm të skuadrës.

Paraqitjet e tij kanë qenë vendimtare që Real Betis të rrisë nivelin e konkurrueshmërisë dhe të sigurojë kualifikimin në Ligën e Kampionëve.

Atletico Madridi e ‘bllokon’ Alvarezin mes tentative të Barcelonës për ta transferuar

Pikërisht për këtë arsye, në “Benito Villamarín” nuk e konsiderojnë të lehtë një largim. Çmimi fillestar do të ishte rreth 30 milionë euro, plus 5 milionë të tjera në formë bonusesh.

Real Betis ka kontratë afatgjatë me Natanin dhe nuk ka nevojë ta shesë me çdo kusht, kjo është arma e tyre kryesore në negociata.

Qendërmbrojtësi ka edhe katër vite kontratë dhe progresi i tij ka tërhequr interes nga tregje të ndryshme, sidomos për shkak të profilit të tij fizik./Telegrafi/

Bayern Munich po shqyrton një lëvizje befasuese për të nënshkruar me sulmuesin e Liverpoolit, Rio Ngumoha.

Kampionët e Gjermanisë kanë vlerësuar disa kandidatë për ta forcuar repartin ofensiv, ndërsa Ngumoha është objektivi kryesor për krahun e majtë.

Ngumoha, 17 vjeç, është në dijeni të interesimit të fortë dhe synimeve të Bayernit, të shtyra si nga trajneri Vincent Kompany ashtu edhe nga bordi drejtues, megjithëse klubi gjerman ende nuk ka kontaktuar Liverpoolin.

Nga ana e tyre, drejtuesit në “Anfield” insistojnë se Ngumoha nuk është në shitje dhe se plani i klubit është t’i rrisë opsionet në atë zonë të fushës, jo t’i dobësojë ato.

Ngumoha nënshkroi kontratën e tij të parë profesionale në shtator, e cila e mban të lidhur me Liverpoolin deri në qershor të vitit 2028.

Shpërthimi i tij ishte një nga arsyet kryesore pse Liverpooli nuk afroi një zëvendësues të drejtpërdrejtë kur Luis Diaz u transferua te Bayern verën e kaluar.

Në ndeshjen ndaj Fulhamit, Rio Ngumoha tregoi se çfarë mund të sjellë në të ardhmen, ndërsa Mohamed Salah rikujtoi se sa e vështirë do të jetë të zëvendësohet.

Ngumoha zhvilloi 29 paraqitje në të gjitha garat gjatë sezonit 2025/26, duke kontribuar me dy gola dhe një asist.

Talenti i Leipzigut reagon ndaj interesimit të Bayernit, PSG-së dhe Liverpoolit

Reprezentuesi i grupmoshave të Anglisë aktualisht po stërvitet me ekipin e parë në Florida në prag të Botërorit, megjithatë nuk do të jetë pjesë e skuadrës për turneun.

Prioriteti i Liverpoolit në afatin e ardhshëm kalimtar janë sulmuesit e krahut, ku një kandidat kryesor raportohet të jetë talenti i RB Leipzig, Yan Diomande, ndërsa po shqyrtohen edhe alternativa të tjera.

Nga këndvështrimi i Bayernit, interesimi ka logjikë. Sulmi i tyre është ndër më të mirët në Europë, por përbëhet edhe nga elementë në moshë. Harry Kane dhe Serge Gnabry janë të dy në të 30-at, Gnabry ka vetëm edhe një vit kontratë, ndërsa Diaz së shpejti mbush 29 vjeç./Telegrafi/

E ardhmja e Julian Alvarez është shndërruar në një nga çështjet kryesore të afatit kalimtar veror, teksa interesimi i Barcelonës po has në rezistencë të fortë nga Atlético Madridi.

Sipas Cadena SER, situata aktualisht është “plotësisht e ngrirë” dhe nuk pritet shumë lëvizje në afat të shkurtër, pavarësisht spekulimeve të vazhdueshme për një kalim të mundshëm në Camp Nou.

Raportohet se Barcelona po punon për një marrëveshje dhe se Alvarez e vlerëson projektin e blaugranave. Megjithatë, ai nuk pritet të ushtrojë presion për t’u larguar nga Atletico Madridi, gjë që e forcon pozicionin negociues të klubit.

Atletico mbetet e bindur se Alvarez do të qëndrojë edhe pas verës. Presidenti i klubit, Enrique Cerezo, dhe drejtori sportiv Gil Marín po e ndërtojnë skuadrën e sezonit të ardhshëm me të si sulmuesin qendror kryesor.

Sipas raportimeve, Atletico nuk ka ndërmend të negociojë shitjen e Alvarez te Barcelona në rrethanat aktuale, veçanërisht për shkak të marrëdhënieve të tendosura mes klubeve pas shkëmbimeve të fundit publike.

Edhe pse Arsenal është përmendur si një destinacion i mundshëm, besohet se Alvarez nuk është i interesuar për një kalim në Londër, çka ia kufizon më tej opsionet.

Pesë lojtarë të Barcelonës gati për të luajtur për herë të parë në Botëror

Aktualisht, ndërmjetësuesit mendojnë se skenari më i mundshëm është që Alvarez të mbetet te Atletico Madridi, pa pritur ndonjë zhvillim të madh, përveç nëse njëra palë ndryshon ndjeshëm qëndrimin.

Përtej rastit Alvarez, Atletico po zhvillon edhe strategjinë e saj më të gjerë për verën. Përforcimi i pozitës së mbrojtësit të majtë është prioritet, me Marc Cucurellën e Chelseat të identifikuar si objektiv kryesor, megjithëse vlerësimi i tij e komplikon negocimin.

Në mesfushë, klubi vazhdon ta monitorojë situatën e Bernardo Silvës dhe mbetet optimist për një transferim të mundshëm, pavarësisht konkurrencës nga Barcelona./Telegrafi/

Me nisjen e Kampionatit Botëror të Futbollit 2026, Telegrafi.com po rikthen një nga lojërat më atraktive për adhuruesit e futbollit - platformën “Eksperti”, ku çdo ndeshje bëhet edhe më emocionuese përmes parashikimeve, pikëve dhe shpërblimeve reale.

Kampionati Botëror 2026, i cili do të zhvillohet në SHBA, Kanada dhe Meksikë, vjen me format të zgjeruar dhe me vëmendje të madhe globale, ndërsa për publikun shqiptar Telegrafi sjell një mënyrë shtesë për ta përjetuar garën: duke testuar njohuritë, intuitën dhe saktësinë në parashikimin e rezultateve.

Parashikimet e sakta, sjellin fituesit e garës. Pjesëmarrësit mund të regjistrohen FALAS dhe kanë mundësi reale për shpërblime atraktive.

Gjatë gjithë kampionatit, lojtarët e “Expert” do të garojnë për t’u ngjitur në renditje, ndërsa më të mirët në fund të Botërorit 2026 do të shpërblehen me çmime kryesore si iPhone 17 Pro Max, trotinet elektrik Segway dhe PlayStation 5.

Përveç shpërblimeve kryesore, platforma "Eksperti" do të sjellë edhe shpërblime javore për pjesëmarrësit me performancën më të mirë gjatë javës, duke e bërë garën edhe më dinamike nga ndeshja në ndeshje.

Si bëhet regjistrimi?

Për t’u bërë pjesë e lojës, procesi është shumë i thjeshtë. Përdoruesit duhet të regjistrohen në platformën "Eksperti" përmes emailit dhe të krijojnë emrin e tyre të përdoruesit.

Pas regjistrimit, ata mund të hyjnë në platformë, të zgjedhin ndeshjet e Kampionatit Botëror 2026 dhe të vendosin parashikimet e tyre për rezultatet.

Parashikimet mund të ndryshohen deri në momentin kur nis ndeshja, ndërsa pas fillimit ato mbyllen automatikisht.

Si funksionon sistemi i pikëve?

Platforma “Eksperti” ka një sistem të qartë pikësh.

Nëse pjesëmarrësi e parashikon saktë fituesin dhe rezultatin e plotë të ndeshjes, fiton 10 pikë.

Nëse e parashikon saktë fituesin dhe diferencën e golave, fiton 6 pikë.

Nëse e parashikon vetëm fituesin e ndeshjes, fiton 2 pikë.

Pas përfundimit të çdo ndeshjeje, rezultati regjistrohet në sistem dhe pikët e pjesëmarrësve përditësohen automatikisht.

Si përcaktohet renditja?

Renditja në platformën “Eksperti” formohet në bazë të pikëve të grumbulluara nga pjesëmarrësit gjatë Kampionatit Botëror.

Sa më të sakta të jenë parashikimet, aq më shumë pikë fiton përdoruesi dhe aq më lart ngjitet në renditje. Rezultatet përditësohen pas përfundimit të ndeshjeve, duke u dhënë pjesëmarrësve mundësinë të ndjekin në kohë ecurinë e tyre në garë.

Me “Experti” nga Telegrafi.com, gara nuk ndalet vetëm te emocionet e ndeshjeve, çdo ndeshje e Botërorit 2026 merr një dimension tjetër.

Regjistrohu në eksperti.telegrafi.com, bëhu pjesë e garës dhe dëshmo se sa mirë e njeh futbollin.

Përzgjedhësi i Argjentinës, Lionel Scaloni, ka folur hapur për rëndësinë e Lionel Messit brenda përfaqësueses, duke zbuluar edhe sa ndikim ka kapiteni në vendimet kyçe.

Scaloni pranoi se roli i Messit shkon përtej fushës, pasi sulmuesi është rregullisht i përfshirë në diskutime që lidhen me zgjedhjet taktike dhe përbërjen e skuadrës.

“Askush nuk e pëlqen të zëvendësohet, përfshirë Messin. Unë nuk marr asnjë vendim pa folur me Messin. Nuk ka kuptim të them se unë jam ai që e komandon gjithçka”, deklaroi Scaloni.

Scaloni shpjegoi se ai dhe Messi komunikojnë vazhdimisht për të qenë në një linjë sa i përket mënyrës se si menaxhohet ekipi.

“Ne gjithmonë diskutojmë çdo hap me të. I kërkoj mendimin, e pyes si ndihet dhe përpiqemi të gjejmë një dakordim”, shtoi ai.

Scaloni theksoi gjithashtu rëndësinë e Messit edhe në fushë, duke nënvizuar se edhe kur nuk është në formën më të mirë fizike, ai mbetet vendimtar.

“Mendoj se kështu duhet të jetë, sepse edhe kur përballet me vështirësi në fushë, ai na jep vlerë të jashtëzakonshme. Është më mirë ta kesh në fushë, sepse ai mund të krijojë dhe të gjenerojë shumë raste”, tha Scaloni.

Messi vazhdon të ketë një rol qendror te Argjentina, teksa ekipi po përgatitet për garat e ardhshme ndërkombëtare./Telegrafi/

Presidenti i Fenerbahces, Sadettin Saran, është dënuar me burgim prej dy vjet e gjashtë muajsh pas një gjykimi lidhur me akuzat për baste të paligjshme.

Vendimi dramatik i gjykatës vjen në një moment kritik për gjigantët e Stambollit, vetëm pak ditë para Mbledhjes së Jashtëzakonshme Zgjedhore të Asamblesë së Përgjithshme të klubit, që do të mbahet këtë fundjavë.

Një gjykatë në Stamboll e ka dënuar presidentin e Fenerbahçes, Saran, dhe vëllain e tij, Alan Kenan, me dy vjet e gjashtë muaj burg. Dyshja, e cila nuk ishte e pranishme në seancën gjyqësore në Gjykatën Penale të Shkallës së Parë, u gjobit gjithashtu edhe me gjoba gjyqësore individuale rreth 10 mijë euro.

Prokuroria e kishte ndjekur çështjen mbi bazën e një aktakuze sipas së cilës gjatë një ndeshjeje futbolli, të transmetuar përmes një grupi mediatik në pronësi të Saranit, ishin shfaqur reklama të lojërave të fatit të paligjshme.

Përfaqësuesi ligjor i Federatës Turke të Futbollit kërkoi dënim, ndërsa avokatët mbrojtës kërkuan shpalljen e pafajësisë. Pas shpalljes së vendimit, këshilltari ligjor i Saranit, Serdar Yigit, reagoi me një deklaratë.

“Në kuadër të vendimit të shpallur sot, ne e mirëpresim vendimin e dhënë për klientët tanë që janë drejtues në Saran Group dhe që janë shpallur të pafajshëm”.

“Vendimi i dhënë ndaj z. Sadettin Saran dhe z. Kenan Saran ende nuk është i formës së prerë dhe do të vlerësohet nga gjykatat më të larta pasi të ushtrohen mjetet juridike të ankimit”, thuhet në deklaratë./Telegrafi/

Një delegacion i përbërë nga drejtues të Federatës së Futbollit Shqiptar në Gjermani dhe të Unionit Shqiptar të Futbollit në Zvicër është pritur në takim nga Ministri i Sportit, Blerim Gashani.

Gjatë takimit, kryetari i Federatës së Futbollit Shqiptar në Gjermani, Afrim Osmanaj, prezantoi aktivitetet dhe angazhimin e federatës në bashkimin e klubeve shqiptare që veprojnë në të gjithë Gjermaninë.

Ai theksoi se federata përfaqëson mbi 40 klube shqiptare nga qytete të ndryshme të Gjermanisë dhe se

“Futbolli nuk është vetëm garë sportive për ne. Ai është një mjet i rëndësishëm për ruajtjen e identitetit kombëtar, gjuhës shqipe, kulturës sonë dhe lidhjeve ndërmjet brezave të rinj”, u shpreh Osmanaj.

Sipas tij, një nga arritjet më të rëndësishme është fakti që të rinjtë shqiptarë, përmes aktiviteteve sportive, njihen me njëri-tjetrin, krijojnë miqësi, komunikojnë në gjuhën shqipe dhe forcojnë lidhjet e tyre me Kosovën dhe kombin shqiptar.

Osmanaj bëri të ditur se misioni i federatës është bashkimi dhe fuqizimi i klubeve shqiptare, si dhe mbështetja e tyre për të avancuar në nivelet më të larta të futbollit gjerman.

Një vëmendje e veçantë iu kushtua edhe turneut tradicional të klubeve shqiptare në Gjermani, i cili këtë vit do të mbahet më 27 dhe 28 qershor në Frankfurt. Në këtë aktivitet pritet të marrin pjesë mbi 30 klube shqiptare nga mbarë Gjermania.

“Ky aktivitet është shumë më tepër se një garë sportive. Ai është një festë e bashkimit, miqësisë dhe identitetit tonë kombëtar”, tha Osmanaj, duke shtuar se përmes turneut synohet forcimi i bashkëpunimit ndërmjet klubeve, krijimi i mundësive të reja për të rinjtë dhe promovimi i vlerave sportive e kulturore të shqiptarëve në diasporë.

Nga ana e tij, Enver Muzliukaj, anëtar i Komitetit Ekzekutiv të FFK-së, theksoi rëndësinë e mbështetjes institucionale për aktivitetet sportive të diasporës. Ai potencoi se pret përkrahje edhe nga Ministria e Diasporës, në mënyrë që federatat dhe organizatat sportive shqiptare në diasporë ta kenë më të lehtë zhvillimin e aktiviteteve të tyre.

Ministri i Sporteve Blerim Gashani premtoi angazhim maksimal dhe po ashtu u dakordua që te vazhdohet me kontaktet edhe në Ministrinë e Jashtme përkatësisht departamentin e diasporës!

Gjatë takimit u diskutua edhe për mundësitë e thellimit të bashkëpunimit ndërmjet institucioneve të Kosovës dhe organizatave sportive shqiptare në diasporë, me fokus të veçantë te të rinjtë dhe ruajtja e lidhjeve të tyre me atdheun.

Në fund të takimit, drejtuesit e federatave shqiptare ftuan ministrin Gashani që të marrë pjesë në turneun e sivjetmë në Frankfurt, duke theksuar se prania e tij do të ishte një nder i veçantë për organizatorët dhe pjesëmarrësit.

Në takim morën pjesë edhe Mustafë Bellaina, nënkryetar i Federatës së Futbollit Shqiptar në Gjermani, Feti Demolli, kryetar i Unionit Shqiptar të Futbollit në Zvicër, si dhe Reshit Morina, nënkryetar, dhe Musli Saiti, sekretar i këtij unioni./Telegrafi/

Brahim Diaz mund të ndërrojë skuadër këtë verë. Reprezentuesi i Marokut është shumë pranë largimit nga Real Madridi dhe gjithçka tregon se destinacioni i tij do të jetë Manchester City.

Pas një sezoni me pak mundësi si titullar në Madrid, sulmuesi i ri po kërkon një ekip ku të ketë më shumë rol dhe vazhdimësi, sipas zërave më të fundit rreth Real Madridit.

Klubi anglez është shndërruar në kandidatin kryesor për të marrë lojtarin andaluzian.

Enzo Maresca, trajneri i ri i Man Cityt, e ka kërkuar shprehimisht transferimin e tij dhe është i vendosur ta bëjë Brahimin një pjesë kyçe të projektit të tij. Transferimi mund të mbyllet rreth 60 milionë euro, një shumë e përballueshme për një lojtar të ri me potencial.

Maresca ka besim të plotë te Diaz. Italiani, i cili pritet ta pasojë Pep Guardiolën te Manchester City, po kërkon lojtarë që përshtaten me stilin e tij ofensiv dhe që sjellin kreativitet e dinamizëm në sulm.

Trajneri e sheh sulmuesin andaluzian si një profil i aftë të luajë në të dy krahët ose si mesfushor ofensiv.

Publikohen shifrat – kjo është paga marramendëse e Konates te Real Madridi

Kjo shkathtësi e bën atë një lojtar ideal për rotacion dhe përshtatje në situata të ndryshme taktike. Maresca i ka kërkuar drejtuesve të Cityt që ta përshpejtojnë operacionin.

Manchester City beson se Diaz mund të jetë blerja e parë e madhe e epokës së re.

Ardhja e tij do të vazhdonte politikën e afrimit të talenteve të reja, duke siguruar një lojtar me përvojë evropiane me kosto relativisht të ulët./Telegrafi/

Paga e Ibrahima Konate te Real Madridi ka dalë në dritë, teksa francezi po përgatitet të firmosë si lojtar i lirë.

Kontrata e Konates me Liverpoolin skadon më 30 qershor, pasi ai nuk arriti të binte dakord për kushte të reja në “Anfield”, pavarësisht se ishte i përfshirë në negociata për një periudhë të gjatë.

Fundjavën e kaluar, krahas konfirmimit të shkarkimit të Arne Slot, Liverpooli njoftoi se Konate do të largohej si transferim i lirë.

Në vijim, El Desmarque ka publikuar detaje mbi atë se sa pritet të përfitojë ish-mbrojtësi i Leipzigut në “Santiago Bernabeu”.

Sipas raportimit, marrëveshja e tij deri në vitin 2030 do t’i sigurojë Konates 24 milionë euro bruto në sezon, që përkthehet në rreth 460 mijë euro në javë para tatimeve.

Kjo do të thotë se kontrata e tij katërvjeçare vlerësohet afërsisht 97 milionë euro, nëse ai qëndron deri në fund të saj.

Përveç kësaj, duke qenë se Konate po i bashkohet Real Madridit si lojtar i lirë, ai pritet të përfitojë edhe rreth 19 milionë euro si bonus nënshkrimi.

Raportohet gjithashtu se Konate ka refuzuar një ofertë shumë të madhe nga Arabia Saudite për të firmosur me Realin dhe tani është pranë një page që nuk do të kishte qenë e mundur te Liverpooli, ku thuhej se ai përfitonte afërsisht 176 mijë euro./Telegrafi/

Në episodin më të ri të podcastit “Arena e Yjeve”, i ftuar ishte ish-sulmuesi i njohur kosovar Kastriot Rexha, i cili ndau me publikun rrugëtimin e tij të gjatë në futboll, sukseset me klubet ku ka luajtur dhe sfidat që ka hasur gjatë karrierës. Ky episod realizohet me mbështetjen e sponsorit zyrtar Exfis.

Gjatë bisedës, Rexha kujtoi fillimet e tij në futboll te Hysi, klub ku hodhi hapat e parë në nivel profesional dhe ku përjetoi edhe suksesin e madh të shpalljes kampion. Ai foli për atmosferën brenda skuadrës dhe faktorët që e bënë atë ekip një nga më të suksesshmit e kohës.

Ish-futbollisti kosovar u ndal edhe te aventura e tij në Shqipëri me Vllazninë e Shkodrës, duke treguar për procesin e përshtatjes në një kampionat të ri, ndeshjet më të rëndësishme dhe golat që i kanë mbetur më shumë në kujtesë. Ai shpjegoi gjithashtu se si kjo eksperiencë ndikoi në zhvillimin e tij si futbollist dhe si person.

Në pjesën tjetër të diskutimit, Rexha foli për periudhat e tij te Prishtina, Drita, Feronikeli dhe klubet e tjera ku ka lënë gjurmë.

Një pjesë e veçantë e bisedës iu kushtua titujve kampionë të fituar me Dritën dhe Feronikelin, ku Rexha analizoi dallimet mes këtyre sukseseve dhe vështirësitë që kanë shoqëruar secilin rrugëtim drejt trofeut.

Në fund, Kastriot Rexha foli për krenarinë që ndjen kur sheh rrugëtimin e tij nga Hysi deri te Drenica, duke reflektuar mbi golat, trofetë dhe respektin e fituar ndër vite në futbollin kosovar.

Episodin e plotë me Kastriot Rexhën mund ta ndiqni në kanalin zyrtar të Telegrafit në YouTube./Telegrafi/

- YouTube www.youtube.com