Aktorja Jennifer Aniston ka bërë një nga referencat e rralla publike për ish-bashkëshortin e saj, Brad Pitt, gjatë një bisede me mikeshën dhe kolegen e saj nga seriali "Friends", Lisa Kudrow.
Gjatë intervistës për “Actors on Actors”, Aniston dhe Kudrow kujtuan momentet më të mira nga seriali.
Biseda u ndal te episodet e 'Ditës së Falënderimeve', kur Kudrow përmendi episodin ku Brad Pitt ishte mysafir dhe e cilësoi atë si 'shumë qesharak'.
Aniston u pajtua me këtë vlerësim dhe kujtoi me humor yjet e shumtë që kishin marrë pjesë në serial, përfshirë Brad Pitt, Bruce Willis, Julia Roberts, Isabella Rossellini dhe Sean Penn.
Ajo tha se gjithmonë i kishte habitur fakti që edhe yjet më të mëdhenj të Hollywood-it ndiheshin nervozë para paraqitjeve në “Friends”.
Brad u shfaq në sezonin e tetë të serialit, duke luajtur personazhin e Will Colbert, një ish-shok shkolle i Ross dhe Monicas, i cili urrente Rachel Green, personazhin e interpretuar nga Aniston.
Jennifer Aniston dhe Brad Pitt nisën lidhjen e tyre në vitin 1998, u fejuan në vitin 1999 dhe u martuan në vitin 2000.
Ndërsa turizmi po njeh rritje të vazhdueshme në mbarë Evropën dhe po shndërrohet në një nga shtyllat kryesore të ekonomive të shumë shteteve, gjithnjë e më shumë po shfaqen edhe tensione sociale mes këtij sektori dhe komuniteteve lokale. Problemet lidhen kryesisht me qasjen në banesa, rritjen e çmimeve të qirave dhe kostove të përgjithshme të jetesës në qytetet më të vizituara.
Në shumë destinacione turistike, sidomos në qytetet historike dhe bregdetare, rritja e kërkesës për akomodime afatshkurtra ka bërë që një pjesë e madhe e banesave të shndërrohen në apartamente turistike. Kjo ka sjellë zvogëlim të ofertës për banorët vendas dhe, si pasojë, rritje të ndjeshme të çmimeve të qirave. Për shumë familje, veçanërisht të rinjtë dhe shtresat me të ardhura mesatare ose të ulëta, kjo po e bën gjithnjë e më të vështirë përballueshmërinë e jetesës në qytetet e tyre, transmeton Telegrafi.
Ndërkohë, edhe kostot e shërbimeve dhe produkteve bazë në zonat turistike po rriten, të nxitura nga kërkesa e lartë sezonale dhe orientimi i ekonomisë lokale drejt vizitorëve të huaj. Kjo situatë ka nxitur pakënaqësi në rritje te banorët, të cilët shpesh ndihen të margjinalizuar në qytetet ku jetojnë, ndërsa përfitimet ekonomike të turizmit nuk shpërndahen në mënyrë të barabartë.
Si rezultat, në disa vende evropiane po vërehen edhe reagime publike dhe protesta kundër “turizmit të tepruar”, me thirrje për rregullim më të rreptë të tregut të qirave afatshkurtra dhe politika që mbrojnë banorët lokalë, shkruan euronews.
Në këtë kontekst, shtrohet gjithnjë e më shpesh pyetja: cilat vende dhe qytete po përballen më fort me këtë reagim dhe si po e balancojnë ato zhvillimin ekonomik nga turizmi me nevojat e banorëve të tyre?
Spanja, Italia dhe Franca janë tre vendet evropiane ku reagimi kundër turizmit masiv është më i theksuar, sipas një studimi të ri të publikuar nga platforma e argëtimit digjital JB.com.
Të dhënat zyrtare tregojnë një prirje të qartë rritjeje të vazhdueshme të fluksit turistik, gjë që ndihmon në shpjegimin e pakënaqësisë në rritje të komuniteteve lokale.
Në Spanjë, për shembull, vetëm në katër muajt e parë të vitit 2026, numri i turistëve është rritur me 3.4 për qind krahasuar me të njëjtën periudhë të vitit të kaluar. Ky trend pritet të forcohet edhe më tej, pasi sipas Ministrisë së Turizmit, vendi parashikohet të regjistrojë një rritje prej 7.1 për qind të pasagjerëve në fluturimet ndërkombëtare hyrëse gjatë qershorit të këtij viti.
Kjo rritje e shpejtë e numrit të vizitorëve, ndonëse përbën një shtysë të rëndësishme për ekonominë dhe punësimin, po ushtron gjithashtu presion të madh mbi infrastrukturën urbane, tregun e banesave dhe kostot e jetesës në qytetet kryesore turistike. Si pasojë, në disa rajone po shtohen zërat kritikë ndaj turizmit masiv, me thirrje për politika më të balancuara që synojnë të ruajnë ekuilibrin mes zhvillimit ekonomik dhe cilësisë së jetës së banorëve lokalë.
Italia dhe Franca gjithashtu pritet të shënojnë rritje të ndjeshme të fluksit turistik gjatë muajit qershor, përkatësisht me 12 për qind dhe 2.6 për qind krahasuar me të njëjtën periudhë të vitit 2025, sipas një njoftimi për shtyp të publikuar nga Ministria e Turizmit e Spanjës.
Këto shifra tregojnë se, pavarësisht debateve dhe pakënaqësive të shfaqura në disa qytete evropiane, kërkesa për udhëtime në destinacionet më të njohura të kontinentit mbetet në rritje të vazhdueshme. Kjo rritje, megjithatë, vazhdon të ushqejë diskutimet për menaxhimin e turizmit dhe ndikimin e tij në jetën e përditshme të banorëve lokalë, veçanërisht në zonat ku numri i vizitorëve tejkalon ndjeshëm kapacitetin e infrastrukturës urbane.
Në të kundërt, Qipro dhe Shqipëria renditen ndër vendet më mikpritëse ndaj vizitorëve në Evropë, sipas të njëjtit raport të JB.com. Në këto vende nuk janë dokumentuar protesta të organizuara kundër turizmit, ndërsa niveli i presionit rregullator ndaj udhëtarëve dhe sektorit turistik mbetet relativisht i ulët. Kjo i bën ato destinacione më të qeta në aspektin e debatit publik rreth turizmit masiv, pavarësisht rritjes së vazhdueshme të interesit të vizitorëve ndërkombëtarë.
Studimi i JB.com ka analizuar një sërë faktorësh për të arritur në këto përfundime, duke përfshirë intensitetin e protestave kundër turizmit, vëmendjen mediatike ndaj tyre, nivelin e taksave turistike, si dhe raportin mes numrit të vizitorëve dhe popullsisë rezidente në 30 vende të ndryshme në mbarë botën.
Cilat qytete kanë parë më shumë protesta kundër turizmit?
Spanja, e cila renditet në vendin e parë ndër 30 vendet e analizuara në studim, është gjithashtu shteti ku është regjistruar numri më i madh i protestave kundër turizmit masiv. Sipas të dhënave, këto reagime janë shtrirë në më shumë se 40 qytete në mbarë vendin, duke nisur nga Barcelona deri në Ishujt Kanarie, dy nga destinacionet më të frekuentuara turistike në Evropë.
Rajoni i Katalonjës, ku ndodhet Barcelona, mbetet një nga zonat më të ngarkuara nga fluksi i vizitorëve ndërkombëtarë. Vetëm në vitin 2025, ky rajon ka pritur rreth 20.1 milionë turistë, një rritje prej 0.6 për qind krahasuar me vitin 2024. Pas Katalonjës, si destinacione të tjera kryesore turistike në Spanjë renditen Ishujt Balearikë dhe Ishujt Kanarie, të cilët gjithashtu përballen me presion të lartë sezonal nga turizmi masiv.
Pakënaqësia e banorëve është shfaqur edhe në forma të dukshme proteste në terren. Në qershor të vitit të kaluar, qindra protestues marshuan në qendër të Barcelonës, duke mbajtur pankarta me mesazhin “Turizmi po e vret Barcelonën”. Në disa raste, tensionet u shoqëruan edhe me veprime simbolike, ku protestuesit spërkatën turistët me pistoleta uji në zonat më të frekuentuara të qytetit, si një mënyrë për të tërhequr vëmendjen ndaj ndikimit që, sipas tyre, turizmi masiv po ka në jetën e përditshme të banorëve lokalë dhe në identitetin urban të qytetit.
Edhe Italia është përballur me një valë protestash të ngjashme në disa nga qytetet e saj më të vizituara, përfshirë Venecian, Romën, Firencen, Napolin dhe Milanon. Në këto zona, pakënaqësia e banorëve është lidhur kryesisht me ndikimin e turizmit masiv në tregun e banesave dhe në cilësinë e jetesës urbane.
Në disa raste, aktivistë lokalë kanë shkuar edhe më tej, duke sabotuar kutitë e çelësave të përdorura për qiratë afatshkurtra. Këto veprime simbolike synojnë të denoncojnë mungesën e banesave të përballueshme për banorët rezidentë, të cilët gjithnjë e më shumë po përballen me çmime të larta dhe zhvendosje nga qendrat historike të qyteteve.
Si pjesë e përpjekjeve për të frenuar turizmin e tepruar, Venecia ka rikthyer një masë të veçantë rregullatore, duke vendosur ditë specifike gjatë fundjavave në muajt prill, maj, qershor dhe korrik, kur vizitorët ditorë detyrohen të paguajnë një tarifë hyrjeje.
Kjo masë synon të menaxhojë më mirë fluksin e madh të turistëve në periudhat më të ngarkuara dhe të lehtësojë presionin mbi infrastrukturën e qytetit.
Ndërkohë, edhe Franca ka regjistruar protesta në disa prej qyteteve të saj kryesore, përfshirë Marsejën, Nicën dhe Parisin. Përveç protestave urbane, është rritur edhe aktivizmi kundër anijeve turistike, veçanërisht në zonat bregdetare, ku ndikimi i tyre mjedisor dhe social është bërë një çështje gjithnjë e më e debatueshme. Këto zhvillime tregojnë një rezistencë në rritje të komuniteteve lokale si në destinacionet kontinentale, ashtu edhe në ato bregdetare, ndaj presionit të turizmit masiv. /Telegrafi/
E mërkura e ardhshme është dita e fundit për kandidatët që synojnë pozitën e kryeprokurorit të shtetit. Megjithatë KPK-ja nuk ka treguar nëse deri tash ka aplikuar ndonjë kandidat, derisa folën shkurt për padinë që u bëri Blerim Isufaj, aktualisht kryeprokuror i Prokurorisë Speciale.
Kanë mbetur edhe pak ditë derisa konkursi për kryeprokuror të shtetit të përmbyllet.
Megjithatë Këshilli Prokurorial i Kosovës, nuk ka treguar se sa persona kanë aplikuar deri tash për këtë pozitë, duke thënë se kjo do të bëhet pas përmylljes së afatit të konkursit.
Derisa nga ky institucion folën për padinë që Blerim Isufaj, i përzgjedhur më 2022 për këtë pozitë, bëri ndaj KPK-së, për këtë konkurs.
“Lidhur me pyetjen tuaj për numrin e aplikuesve në konkursin për Kryeprokuror të Shtetit, ju njoftojmë se procesi i pranimit të aplikacioneve është ende në zhvillim e sipër dhe afati për aplikim mbetet i hapur deri më 10 qershor 2026. Për këtë arsye, Këshilli Prokurorial i Kosovës nuk publikon të dhëna lidhur me numrin e aplikuesve deri në përfundimin e afatit të konkursit dhe verifikimin administrativ të aplikacioneve të pranuara. Sa i përket padisë së paraqitur nga z. Blerim Isufaj në gjykatë, Këshilli Prokurorial i Kosovës e respekton të drejtën e secilit person për t’iu drejtuar organeve kompetente gjyqësore për mbrojtjen e të drejtave dhe interesave të tij juridike.
Duke pasur parasysh se çështja është në procedurë gjyqësore, KPK-ja nuk komenton rastet që janë objekt shqyrtimi nga gjykatat dhe do të veprojë në përputhje me vendimet e institucioneve kompetente. Konkursi për Kryeprokuror të Shtetit është shpallur në përputhje me legjislacionin në fuqi dhe procedurat e parapara për këtë proces.”
Nga Gjykata Admininistrative nuk kanë kthyer përgjigje sa i përket kësaj padie, por avokati i Isufajt, Artan Çerkini ka thënë për Dukagjinin se ende nuk kanë pranuar asnjë përgjigje për këtë.
Liridon Salihu, hulumtues në GLPS thotë se Gjykata duhet të vendos sa më shpejt që është e mundur duke pas parasysh natyrën e rastit.
“Bazuar në afatet që përmban rregullorja vlerësojmë që gjysma e korrikut ose fundi i korrikut mund të dalë me një kandidat nga ana e KPK-së për kryeprokuror të shtetit, por varet edhe nga procedurat që do e përcjellin këtë proces, sic e dini tashmë është atakuar në gjykatë shpallja e këtij konkursi, pritet ndonjë vendim nga ana e gjykatës, dhe varësisht prej asaj mund të dallojë edhe koha kur mund të kemi kryeprokurorin e ri të shtetit”, ka thënë Salihi.
Ndërkohë që Vullnet Bugaqku thotë se ky proces duhet të përmbyllur me transparencë dhe integritet të plotë.
“Nuk e shoh që ka me pas ndonjë ndërlidhje eksplicite qoftë në propozimin e kandidatura apo përzgjedhjes së kandidaturave nën ndikimin politik sepse pres që përbërja e re e KPK-së të mos i bëjë gabimet që i kanë bërë përbërja e vjetër dhe pres që të zhvillojë një procedurë tejet transparente dhe në mënyrë meritore”, ka thënë Bugaqku.
Këshilli Prokurorial i Kosovës, vendosi të hapë konkurs të ri për kryeprokurorin e shtetit, 4 vjet pas atij që nxori të parin Blerim Isufajn, por që nuk u dekretua na presidentja. /Tv Dukagjini
Florentino Pérez ka rritur edhe më shumë pritshmëritë te tifozët e Real Madridit, duke konfirmuar tri emra konkretë dhe duke paralajmëruar një transferim gjigant që, sipas tij, do të ishte më i shtrenjti në historinë e klubit.
Presidenti i Real Madridit, që po kërkon edhe një mandat në krye të klubit në zgjedhjet e së dielës, ka bërë premtime të mëdha në emisionin Horizont.
“Mund t’ju tregoj për tre transferime: Mourinho, Konaté dhe Dumfries. Por do të ketë edhe më shumë. Të martën, do t’i bëj një ofertë të rëndësishme një ekipi të nivelit të lartë të Ligës së Kampionëve për një lojtar të shkëlqyer. Do të ishte shuma më e madhe e transferimit që Real Madridi ka paguar ndonjëherë. Të paktën 150 milionë”, ka deklaruar Pérez.
🚨🚨 Florentino Pérez: "The fans will find out NEXT WEEK what superstar player I'm going to make an offer for.
Presidenti madrilen shtoi se afrimi i madh do të jetë i një profili “Galaktik”, duke e krahasuar me emra legjendarë të historisë së Realit.
“Kur nënshkruajmë me dikë, e bëjmë për të krijuar emocione. Figo, Zidane, Ronaldo, Cristiano, Kaká. Lojtari do të jetë i atij kalibri dhe nuk është nga Premier League. Një Galaktik i vërtetë”, u shpreh Pérez.
Ai po ashtu i hodhi poshtë spekulimet se bëhet fjalë për Michael Olise, duke sqaruar se, edhe pse e vlerëson, nuk është objektivi që ka në mendje, ndërsa përmendi edhe disa emra të tjerë vetëm për t’i përjashtuar.
“Lidhur me Olisen: Ai është një lojtar i shkëlqyer, por nuk është emri që po mendoj. Ai nuk është as Doku apo Haaland. Nga mesfusha”, shtoi Pérez, duke lënë të kuptohet se “bomba” e paralajmëruar vjen reparti ku ka nevojë më shumë klubi .
Në fund, Pérez përsëriti edhe mesazhin e tij në prag të zgjedhjeve, duke theksuar rolin e tij në mbrojtjen e interesave të klubit.
“Askush nuk do ta mbrojë Real Madridin më mirë se unë”, deklaroi ai.
Tashmë mbetet të shihet nëse oferta e paralajmëruar për “një ekip të nivelit të lartë të Ligës së Kampionëve” do të konkretizohet dhe cili do të jetë emri i “Galaktikut” që pritet ta tronditë tregun. /Telegrafi/
Modelja dhe ylli televiziv britanik, Katie Price, raportohet se po përpiqet të sigurojë lirimin e bashkëshortit të saj, Lee Andrews, i cili ndodhet në burg në Dubai.
Sipas raportimeve, Andrews duhet të paguajë mbi 100 mijë euro për t'u liruar nga paraburgimi.
Ai aktualisht po mbahet në burgun Al Awir në Dubai për një çështje civile private dhe jo për akuzat për spiunazh që kishte pretenduar fillimisht.
Foto: Instagram
Price udhëtoi drejt Dubait këtë javë për t'u takuar me bashkëshortin e saj dhe thuhet se ka vizituar disa herë burgun në përpjekje për të përfunduar dokumentacionin e nevojshëm për lirimin e tij.
Burime pranë saj kanë deklaruar se, pavarësisht gjithçkaje që ka ndodhur, ajo dëshiron ta ndihmojë dhe të marrë përgjigje për situatën në të cilën ai është përfshirë.
Ndërkohë, Andrews besohet se i ka garantuar Katie se do të sigurojë vetë shumën e nevojshme dhe se ajo nuk do të ketë nevojë të kontribuojë financiarisht.
Mediat britanike raportojnë gjithashtu se Andrews kishte kaluar rreth tre muaj në të njëjtin burg edhe vitin e kaluar, pasi dyshohej për mashtrim financiar lidhur me një kredi hipotekare prej rreth 230 mijë eurosh, e cila pretendohet se ishte marrë duke përdorur nënshkrimin e falsifikuar të një ish-partnereje.
Katie Price
Marrëdhënia mes çiftit ka qenë në qendër të vëmendjes që nga fillimi i këtij viti, kur ata bënë publike romancën e tyre dhe u martuan vetëm pak kohë pasi ishin njohur. /Telegrafi/
Kur Cristiano Ronaldo u largua nga futbolli evropian për t’u transferuar në Arabinë Saudite, shumë e konsideruan atë hap si sinjal se karriera e tij në kombëtare do të ftohej, me idenë se kampionati saudit nuk ishte në nivelin e kërkuar për futbollin elitar.
Mirëpo, me kalimin e kohës, Saudi Pro League jo vetëm që u mbush me yje si Neymar, Benzema, Milinkovic-Savic e Cancelo, por nisi të shihet gjithnjë e më shumë si një skenë ku lojtarët mund të jenë ende relevantë edhe për ekipet e tyre kombëtare.
Edhe pse Ronaldo deklaroi se “liga saudite është shumë më e mirë se ligat portugeze dhe franceze… në Francë gjithçka sillet rreth PSG-së”, kjo u prit me skepticizëm në Evropë.
Për një kohë, futbolli në Lindjen e Mesme u trajtua si një nivel dytësor krahasuar me pesë ligat e mëdha evropiane, duke u krijuar bindja se lojtarët që shkonin atje do ta humbnin shansin për t’u thirrur në kombëtare.
Nuk “mbyll” domosdoshmërisht derën e kombëtares
MARCA shkruan se realiteti i viteve të fundit e ka rrëzuar këtë perceptim. Në Evropë u përhap ideja se futbollistët që transferohen në Arabinë Saudite e mbyllin kapitullin me kombëtaren, por koha ka treguar se kjo nuk është bërë normë.
Si shembull përmendet deklarata e Ronald Koemanit, i cili në vitin 2024 tha se “libri i tij me ekipin kombëtar është mbyllur” për Steven Bergwijn pas kalimit të tij te Al-Ittihad.
Megjithatë, thirrjet e fundit në kombëtare për lojtarë që luajnë në SPL tregojnë se trajnerët po i vlerësojnë edhe këta futbollistë, nëse janë në formë dhe kanë rol të rëndësishëm në ekipet e tyre.
Ivan Toney dhe debatet në Angli
Rasti më i diskutuar së fundmi është ai i Ivan Toney. Sulmuesi i Al-Ahli u përfshi në skuadrën e Thomas Tuchel për Kupën e Botës 2026, duke shkaktuar debat në Angli, sidomos për faktin se u preferua ndaj disa opsioneve vendase.
“Përfshirja e tij ishte gjithashtu një surprizë për ne. Ai ka një prani të natyrshme në zonë dhe është një finalizues i natyrshëm".
"Ai është i mirë në goditjet standarde. Dhe të mos harrojmë, ai është një specialist i penalltive i klasit botëror”, deklaroi Tuchel pas shpalljes së listës.
🦁Thomas Tuchel on Ivan Toney: "It was also a surprise to us (his inclusion). I had fantastic feedback from his coach, who was my player. He still collects fantastic numbers. He has qualities for when we are chasing a goal. He can take attention off other strikers. He has a… pic.twitter.com/7OSOAmSHVt — Craig Hope (@CraigHope_DM) May 22, 2026
Shembuj nga Brazili e Spanja - Franca dhe Portugalia, fenomeni merr formë
MARCA përmend edhe raste të tjera: Roger Ibáñez është ftuar nga Carlo Ancelotti për Brazilin, ndonëse deri tani kishte pasur një minutazh të kufizuar me kombëtaren.
Në Spanjë, debati u përqendrua te Aymeric Laporte (për periudhën e tij në Arabinë Saudite), ndërsa trajneri Luis de la Fuente ishte i prerë.
“Të luash në Arabinë Saudite nuk është përcaktuese. Unë preferoj një ekip që luan 90 minuta në Arabinë Saudite sesa një që luan 15 ose 20 minuta në Ligën Premier”, kishte thënë ai në vitin 2024.
Në Francë, N’Golo Kanté u rikthye dhe u përdor rregullisht edhe gjatë kohës te Al-Ittihad, ndërsa për Botërorin 2026 është përmendur edhe Theo Hernández, aktualisht pjesë e Al-Hilal.
Sipas shkrimit, fenomeni mori formë sidomos në Portugali, ku vazhdoi besimi te Cristiano Ronaldo edhe pas kalimit të tij në Arabinë Saudite.
Për më tepër, emra si João Félix (Al-Nassr), Rúben Neves dhe João Cancelo (Al-Hilal) vazhdojnë të jenë lojtarë të rëndësishëm për Roberto Martínez dhe pritet të jenë pjesë e Botërorit në SHBA, Kanada dhe Meksikë.
Lista e plotë e lojtarëve nga futbolli saudit në Botërorin 2026
Sipas listës së përmendur, në Botërorin 2026 do të ketë një numër të konsiderueshëm futbollistësh që luajnë në Arabinë Saudite dhe do të përfaqësojnë kombëtaret e tyre: Bregu i Fildishtë – Franck Kessié (Al Ahli); Franca – Theo Hernandez (Al Hilal); Brazili – Roger Ibáñez (Al Ahli) dhe Fabinho (Al Ittihad); Curaçao – Jurien Gaari (Abha Club); Portugalia – Rúben Neves (Al Hilal), João Félix (Al Nassr) dhe Cristiano Ronaldo (Al Nassr); Anglia – Ivan Toney (Al Ahli); Panama – Orlando Mosquera (Al Fayha); Maroku – Yassine Bono (Al Hilal); Senegali – Édouard Mendy (Al Ahli), Kalidou Koulibaly (Al Hilal) dhe Sadio Mané (Al Nassr); Egjipti – Nabil Dunga (Al Najma); Algjeria – Riyad Mahrez (Al Ahli) dhe Houssem Aouar (Al Ittihad); Iraku – Ali Jasim (Al Najma); Meksika – Julián Quiñones (Al Qadisiyah); Turqia – Merih Demiral (Al Ahli); Tunizia – Aymen Dahmen (Al Hazem); Uruguai – Darwin Núñez (Al Hilal); Jordania – Ali Al-Azaizeh (Al Shabab); Gana – Cristopher Bonsu Baah (Al Kadisiyah).
Në fund, mesazhi i përgjithshëm i shkrimit është i qartë: futbolli saudit po shndërrohet gjithnjë e më shumë në një “vitrinë” të rëndësishme, ku lojtarët mund të ruajnë statusin e tyre ndërkombëtar dhe të jenë pjesë e skenës më të madhe, Kupës së Botës. /Telegrafi/
Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, e ka anuluar shkuarjen në Mal të Zi për shkak të problemeve shëndetësore.
Ajo do të duhej të merrte pjesë në Samitin BE–Ballkani Perëndimor në Tivat, si dhe në Dialogun për politikën rinore në Budva, shkruan vijesti.me.
Sipas një bashkëpunëtori të saj të afërt, Kalas është sëmurë dhe nuk ka mundur të udhëtojë sot, shkruan vijesti.me.
Ai tha se ajo “pendohet që po e humb samitin”, se po punon nga shtëpia dhe pritet të kthehet në zyrë brenda pak ditësh.
Kalas kishte planifikuar gjithashtu të takohej me të rinj nga i gjithë rajoni dhe Evropa në Budva, si dhe të hapte Forumin e Rinisë së Ballkanit Perëndimor së bashku me kryeministrin e Malit të Zi, Milojko Spajiq.
Në mbrëmje ishte paraparë një darkë pune në Kotor, e organizuar nga presidenti i Malit të Zi, Jakov Milatoviq.
Ditën e dytë të vizitës, ajo duhej të merrte pjesë në Samitin BE–Ballkani Perëndimor në Tivat.
Samiti BE–Ballkani Perëndimor do të mbahet nesër në Tivat dhe është i organizuar nga presidenti Milatoviq. /Telegrafi/
Kandidati për Kryeministër Lumir Abdixhiku ka postuar fotografi nga tubimi në Podujevë. Ai këtë tubim e ka quajtur tërmet politik.
‘’Tërmet politik në Llap! Kryengritja e djathtë! Ju faleminderit! Në Podujevë garojmë me kandidatin Ekrem Hyseni me numër 19, kandidaten Arjeta Salihu Abazi me numër 29, kandidatin Zaim Thaçi me numër 92 dhe kandidaten Alisa Jetullahu me numër 99’, ka shkruar Abdixhiku.
Aktorja e Hollywoodit, Sharon Stone, kujtoi sulmin fizik që përjetoi 10 vjet më parë.
Gjatë një paraqitjeje në podcast-in "The Person Who Believed in Me", të drejtuar nga korrespondenti i CBS David Begnaud, Stone foli për sulmin.
"Nuk e di sa shumë mund të them për këtë, por më goditën nga pas. Nuk e dija vërtet çfarë më ndodhi. Isha pa ndjenja në dysheme. Nuk e di si arrita atje", tha ajo.
Sharon Stone
Pas kësaj, Stone shkoi te mjeku për probleme me pjesën e pasme të qafës dhe shpatullave.
"Shkova në klinikë sepse kisha shumë probleme me pjesën e pasme të qafës dhe shpatullave, të cilat më dhembnin shumë. Ata donin të më bënin një lloj injeksioni dhe më bënë të gjitha rrezet X të gjoksit, qafës dhe shpatullave. Mjeku më tha më pas se gjoksi im ishte thyer plotësisht. Ai tha se ishte e qartë se isha sulmuar dhe se ajo që më ndodhi ishte një akt kriminal", tha ajo.
Stone nuk donte t'i përgjigjej pyetjes se kush e sulmoi.
"Nuk do ta them publikisht, por ne e raportuam dhe bëmë gjithçka. Pata mundësinë të paraqes një raport dhe duke qenë se kanë kaluar 10 vjet dhe unë jam një figurë publike, vendosa të mos e bëj. Jam mjaft e sigurt se e di kush ma bëri këtë", tha ajo.
Barcelona do të ketë një numër të madh futbollistësh të përfaqësuar në Kupën e Botës 2026, me lojtarët e skuadrës katalanase që do të mbrojnë ngjyrat e kombëtareve të tyre në turneun më prestigjioz të futbollit.
Mes tyre, pesë futbollistë pritet të përjetojnë për herë të parë emocionet e një Kampionati Botëror.
Në krye të listës është talenti spanjoll Lamine Yamal, i cili do të debutojë me Spanjën në Kupën e Botës.
Sulmuesi i ri konsiderohet një nga armët kryesore të “La Roja” dhe pritet të ketë një rol vendimtar në ambiciet e kombëtares spanjolle për të synuar trofeun.
Po ashtu, portieri Joan Garcia do të marrë pjesë për herë të parë në një Botëror, ndërsa mbrojtësi i talentuar Pau Cubarsi do të synojë të sigurojë një vend në formacionin titullar të Spanjës.
Debutim në Kupën e Botës do të ketë edhe përforcimi më i ri i Barcelonës, Anthony Gordon, i cili do të përfaqësojë Anglinë në turneun që zhvillohet këtë verë.
Ndërkohë, talenti i akademisë katalanase, Hamza Abdelkarim, do të shkruajë historinë personale duke marrë pjesë për herë të parë në një Kampionat Botëror me kombëtaren e Egjiptit.
Kupa e Botës 2026 pritet të jetë një skenë e rëndësishme për këta futbollistë të rinj, të cilët do të kenë mundësinë të dëshmojnë cilësitë e tyre në nivelin më të lartë të futbollit ndërkombëtar. /Telegrafi/
Një përleshje fizike midis dy shtetasve turq ndodhi dje në Qendrën e Pritjes së Azilkërkuesve në fshatin Vizbegovë të Shkupit, njoftoi policia.
“Më 03.06.2026 në orën 13:30, Shërbimi i Sigurisë Publike Shkup ka marrë një njoftim se në fshatin Vizbegovë, në Qendrën e Pranimit për Azilkërkues, pas një grindjeje paraprake, është prishur rendi dhe qetësia publike me një përleshje fizike midis J.B. (27) dhe A.S. (26), të dy nga Turqia. Pas dokumentimit të plotë të rastit, do të ngrihet një kallëzim përkatës”, thuhet në buletinin e policisë.
Këngëtari i njohur shqiptar, Sinan Vllasaliu, ka pësuar një aksident me motor.
Prive Klan Kosova ka mësuar se artisti ka pësuar lëndime në këmbë.
Ai aktualisht ndodhet në spital, ku i është nënshtruar një ndërhyrjeje kirurgjikale.
Foto: Instagram
Fatkeqësisht aksidenti ndodhi vetëm pak ditë pasi u zbulua se këngëtari ishte përzgjedhur të këndonte në dasmën e yllit botëror, Dua Lipa e cila do të zhvillohet në Itali.
Nuk ka informacione të tjera lidhur me gjendjen e tij dhe nuk dihet nëse i njëjti do të mund të rikuperohet për të marrë pjesë në ceremoninë e martesës së Lipës.
Ministri izraelit i Financave, Bezalel Smotrich, ka bërë deklarata të forta lidhur me politikën e vendbanimeve në Bregun Perëndimor, duke u bërë thirrje qytetarëve izraelitë të zhvendosen atje për të jetuar.
“I them popullit të Izraelit: ejani të jetoni në Bregun Perëndimor. Ka shumë arsye për të jetuar në Bregun Perëndimor”, deklaroi ai.
Sipas tij, nxitja për vendbanime të reja synon të rrisë numrin e kolonëve izraelitë në këtë territor.
Smotrich shprehu gjithashtu shpresën se kjo politikë do të ndihmojë në sjelljen e “një milion kolonëve” në Bregun Perëndimor dhe, siç u shpreh ai, “të shuhet ideja e një shteti palestinez”.
Deklaratat e tij pritet të nxisin reagime të forta ndërkombëtare, pasi çështja e vendbanimeve izraelite në territoret e pushtuara konsiderohet një nga temat më të ndjeshme dhe më të diskutueshme në konfliktin izraelito-palestinez.
Ndryshe, shumë shtete të botës tashmë kanë njohur krijimin e shtetit palestinez. /Telegrafi/
Hasi ka dhënë kontribut të veçantë në luftën për çlirimin e Kosovës nga Serbia. Çdo shtëpi hasjane kishte hapur dyert për të strehuar e ndihmuar djemtë e vajzat e Kosovës që i kishin kthyer pushkën armikut shekullor. Në ditët më të vështira që po kalonte Kosova në ’98-’99, hasjanët nga Shqipëria e Kosova u bënë bashkë për të ndihmuar njëri-tjetrin. 27 vjet pas, Hasi i bashkuar kujton 43 dëshmorët e kombit, 14 prej të cilëve ishin nga Hasi i Shqipërisë.
Në fund të viteve ’90, kufiri që ndante Hasin e Kosovës me atë të Shqipërisë u shndërrua në portën e triumfit të lirisë, për të ndihmuar vëllezërit e një kombi. Nga Hasi i Shqipërisë, që dikur ndahej me një kufi të hekurt, u rreshtuan në luftë shumë djem e vajza. Afërdita, nga Shqipëria, nusja e Besmir Bratit, motra e Naim Qemës, ruan të pacenuar kujtimin për burrin dhe të vëllanë, që i ranë në fushën e nderit në të njëjtën ditë.
“Që ditën që ka fillu lufta e Kosovës, shumë, të gjithë pa përjashtim iu bashkangjitën UÇK-së. Shumë keqardhje, e ndjeshim sikur lufta është si për ju në Kosovë, si për ne në Shqipëri”, tha Afërdita Brati, bashkëshortja e dëshmorit Besmir Brati.
Bashkëshortja e Gaspër Karaqit e kishte ndjerë vdekjen e bashkëshortit.
“E kam parandjerë, të mërkurën në mbrëmje e kam parandjerë, të enjten ka shku në shkollë, dhe prej atij momenti nuk kam qenë e qetë. Dy ditë pas është gjet i vdekur, shumë vështirë, shumë”, tha Bora Karaqi, bashkëshortja e dëshmorit Gazpër Karaqi.
“Gëzohem se e shoh të lirë, e shoh lirinë, pavarësinë e shoh, shoh se po shkon gjithçka përpara, por pengu jonë, na mungojnë si burri dhe vëllai, sepse i kam rrit tre fëmijë jetimë, një nënë 25 vjeçe”, tha Afërdita Brati, bashkëshortja e dëshmorit Besmir Brati.
Pas 27 vjetësh, kur Hasi tashmë ishte bashkuar, kufijtë mes shtetit shqiptar kishin rënë, por Porta e Lirisë, me emrat e 43 bijve hasjanë, do të qëndrojë këtu krenare, që t’u tregojë brezave se liria nuk erdhi lehtë.
“Hasi e ka vendos me një kryesi shumë të sinqertë që me këtë datë 4 qershor të respektohen të gjithë dëshmorët e Hasit njëjtë, ta kemi një datë dhe të vendosim një lule të përbashkët të gjithë njëjtë”, tha Xhevdet Thaçi, kryetar i OVL-së në Has.
Dëshmorët i nderuan bashkë familjarë të dëshmorëve, si dhe organizata të dala nga lufta, ndërsa familjet e dëshmorëve nga Shqipëria morën nga një kujtim nga ky përvjetor, një flamur kombëtar dhe mirënjohje pa fund.
Kur bëhet fjalë për talentin më të madh të brezit të ri, edhe vetë Lionel Messi nuk ka asnjë dyshim.
I pyetur gjatë një eventi promovues të Kupës së Botës se kush është futbollisti më i mirë i gjeneratës së re, argjentinasi u përgjigj shkurt: “Lamine. Pa asnjë dyshim. Për mua, ai është më i miri”.
Vetëm pak ditë më vonë, gjatë një interviste për CBS, Lamine Yamal u pyet nëse Spanja do ta fitojë Kupën e Botës 2026. Me një buzëqeshje të qetë, ai u përgjigj me një fjalë të vetme: “Po”.
Në moshën vetëm 18-vjeçare, ylli i Barcelonës ka arritur gjëra që shumica e futbollistëve vetëm mund t’i ëndërrojnë. Ai ka luajtur në gjysmëfinale të Ligës së Kampionëve, ka fituar Kampionatin Evropian me Spanjën dhe tashmë mban fanellën me numrin 10 te Barcelona, numër që për gati 15 vite ishte simbol i Lionel Messit.
Megjithatë, ajo që e bën Yamalin të veçantë nuk është vetëm talenti i tij i jashtëzakonshëm, por qetësia me të cilën përballet me presionin dhe pritshmëritë e mëdha.
Krahasimet me Messin janë të pashmangshme
Ngjashmëritë mes Yamalit dhe Messit janë të dukshme, të dy janë mëngjarashë, zotërojnë driblime të jashtëzakonshme dhe një inteligjencë futbollistike që i bën veprimet më të vështira të duken të thjeshta.
Madje, statistikat tregojnë se Yamal ka pasur një ndikim më të madh në moshë të re sesa Messi. Në moshën 18-vjeçare, ai numëron tashmë 151 ndeshje me Barcelonën. Kur Messi festoi ditëlindjen e tij të 19-të në vitin 2006, kishte zhvilluar vetëm 41 paraqitje me ekipin e parë.
Legjenda braziliane Ronaldinho, i cili luajti përkrah Messit në fillimet e tij te Barcelona, beson se është radha e Yamalit për të shkruar histori.
“Messi dhe unë bëmë histori. Tani është radha e Lamine Yamalit. Ajo që ka treguar në këtë moshë është e jashtëzakonshme”, deklaroi Ronaldinho.
Ish-mbrojtësi i Manchester Unitedit, Rio Ferdinand, shkoi edhe më larg.
“Po, ai është më i mirë se Messi dhe Cristiano Ronaldo në të njëjtën moshë. Potenciali i tij mund të jetë edhe më i lartë. Askush nuk ka bërë atë që po bën ai në moshën 17-vjeçare”, tha Ferdinand.
“Nuk dua të jem Messi”
Pavarësisht krahasimeve të vazhdueshme, Yamal është i vendosur të ndërtojë identitetin e tij.
“Messi është futbollisti më i madh në histori. Ai është një legjendë dhe nuk mendoj se jam i denjë të krahasohem me të”, ka deklaruar talenti spanjoll.
“Nuk dua të jem Messi. Dua të ndjek rrugën time”.
E njëjta filozofi vlen edhe për Cristiano Ronaldon.
“Nuk është mirë të krahasohesh me askënd. Cristiano arriti gjithçka duke qenë vetvetja. Edhe unë dua të njihem për atë që jam, Lamine Yamal”.
Ndryshe nga shumë talente të mëdha që janë konsumuar nga pritshmëritë, Yamal duket se nuk ndikohet aspak nga zhurma përreth tij.
“Unë nuk mendoj për Topin e Artë. Dua të kënaqem duke luajtur dhe të fitoj me Barcelonën dhe kombëtaren”.
“Presioni nuk ekziston. Është vetëm një justifikim. Nëse mendon të argëtohesh dhe të shijosh futbollin, nuk ka presion”, thotë ai.
Ish-trajneri i tij në akademinë e Barcelonës, Inocente Diaz, madje guxoi të bëjë një parashikim të madh.
“Ai është edhe më i mirë se Messi në këtë moshë. Brenda gjashtë vitesh do ta fitojë Topin e Artë.”
Frymëzimi i pazakontë: Luka Modric
Një detaj interesant që zbulon shumë për mënyrën se si mendon Yamal është idhulli i tij në fëmijëri.
Ndërsa shumica do të prisnin emra si Arjen Robben apo Franck Ribery, Yamal ka pranuar se studionte me vëmendje lojën e Luka Modricit.
“Më pëlqente mënyra se si Modric pasonte me pjesën e jashtme të këmbës. Më dukej më interesante se driblimi, sepse lidhet më shumë me mendjen dhe vizionin e lojës”, ka treguar ai.
Kjo shpjegon pse, pavarësisht se luan si anësor, ai po shndërrohet gradualisht në një organizator loje, duke u afruar gjithnjë e më shumë me qendrën e fushës.
Trajnerët që kanë punuar me të besojnë se në të ardhmen Yamal mund të luajë edhe si “9 i rremë”, një rol që dikur e bëri legjendar Lionel Messin.
Spanja e ndërton ëndrrën e Botërorit rreth tij
Kupa e Botës 2026 po afron dhe Spanja konsiderohet një nga favoritët kryesorë për trofeun.
Në qendër të projektit qëndron pikërisht Lamine Yamal, futbollisti që ende nuk i ka mbushur 19 vjet.
Ai e ka bërë të qartë objektivin e tij:
“Gjithmonë e kam imagjinuar veten duke luajtur në Kupën e Botës dhe duke parë nënën time në tribunë. Shpresoj ta fitoj atë”.
Duke parë ritmin e zhvillimit të tij, shumëkush beson se futbolli mund të jetë duke parë lindjen e një epoke të re. /Telegrafi/
Këngëtarja me famë botërore, Dua Lipa dhe aktori Callum Turner, po numërojnë orët drejt festës së madhe të martesës së tyre në Sicili, vetëm pak ditë pasi kurorëzuan ligjërisht dashurinë në Londër.
Çifti, i cili u martua në një ceremoni private më 31 maj, është parë duke shijuar momente qetësie në ballkonin e hotelit luksoz Villa Igiea në Palermo, ku do të qëndrojnë edhe shumë prej të ftuarve të tyre gjatë fundjavës.
Sipas raportimeve, Dua do të veshë një fustan të dizajnuar nga Donatella Versace për ceremoninë, ndërsa organizimi i gjithë dasmës pritet të kushtojë rreth 1.75 milionë euro.
Foto: Daily Mail
Vetëm suita luksoze ku po qëndron çifti kushton rreth 7 mijë euro në natë.
Avioni privat i çiftit mbërriti në Sicili të mërkurën në mbrëmje, ndërsa gjatë ditëve në vijim pritet të mbërrijnë rreth 300 të ftuar, mes tyre emra të njohur të industrisë së muzikës dhe showbiz-it ndërkombëtar.
Foto: Daily Mail
Festa do të zgjasë tri ditë dhe janë organizuar në disa prej vendeve më prestigjioze të Palermos dhe Bagherias.
Një pritje kokteji do të mbahet në Galleria d'Arte Moderna Palermo, për të cilën çifti ka paguar rreth 10 mijë euro për mbylljen e përkohshme të hapësirës për publikun.
Foto: Daily Mail
Një tjetër event do të zhvillohet në Villa Valguarnera, një vilë historike e shekullit të 17-të, e njohur edhe nga seriali "The White Lotus".
Raportohet se vetëm marrja me qira e kësaj prone ka kushtuar rreth 100 mijë euro.
Foto: Daily Mail
Masat e sigurisë janë jashtëzakonisht të larta.
Mbi 50 truproja janë angazhuar nga Londra dhe Roma, janë vendosur zona ku ndalohet fluturimi i dronëve dhe të gjithë punonjësit e përfshirë në organizim kanë nënshkruar marrëveshje konfidencialiteti.
Foto: Daily Mail
Kjo konsiderohet nga mediat britanike si një nga dasmat më të mëdha të vitit në botën e showbiz-it dhe kanë kthyer Palermon në qendrën e vëmendjes ndërkombëtare, me autoritetet lokale që e shohin këtë ngjarje si një promovim të rëndësishëm turistik për Sicilinë. /Telegrafi/
Kandidati për deputet nga Partia Demokratike e Kosovës (PDK), Xhavit Haliti, së bashku me zyrtarë dhe mbështetës të partisë, kanë vazhduar aktivitetet e fushatës zgjedhore në Prizren.
Gjatë takimeve me qytetarët, përfaqësuesit e PDK-së kanë theksuar rëndësinë e mobilizimit për zgjedhjet e 7 qershorit, duke shprehur bindjen se partia do të shënojë një tjetër fitore në këtë komunë.
“Në Prizrenin e fitoreve të PDK-së, të fortë, të bashkuar dhe me motiv të madh për fitoren e radhës më 7 qershor”, ka deklaruar ai gjatë aktivitetit elektoral.
Fushata në Prizren është pjesë e angazhimeve të PDK-së në mbarë vendin, ndërsa partia po intensifikon takimet me qytetarët në prag të përfundimit të fushatës zgjedhore.
Pjesëmarrja e bashkëkryetarit të VLEN-it, Izet Mexhiti, në sesionin e Komitetit të Përbashkët Konsultativ në Bruksel, pranë Komitetit Evropian të Rajoneve, e rikthen në vëmendje rolin e komunave në procesin e integrimit evropian, thonë nga partia VLEN.
"Nga Brukseli, bashkëkryetari i VLEN-it, Izet Mexhiti, në cilësinë e kryetarit të Komunës së Çairit dhe nënkryetarit të BNJVL-së, përcolli mesazhin se komunat duhet të jenë pjesë aktive e rrugës drejt Bashkimit Evropian. Ato janë hallkë e rëndësishme në zbatimin e reformave dhe në afrimin e standardeve evropiane te qytetarët. Për VLEN-in, kjo është pjesë e qasjes sonë politike", thonë nga partia në pushtet.
Sipas VLEN-it, rruga evropiane e vendit nuk mund të ndahet nga pushteti lokal, nga komunat dhe nga shërbimet që qytetari i merr aty ku jeton.
"Komunat janë adresa më e afërt e qytetarit. Aty kërkohet shërbim, përgjegjësi dhe zgjidhje konkrete. Kjo është edhe arsyeja pse decentralizimi është pjesë e rëndësishme e programit politik të VLEN-it. Sa më shumë fuqi dhe përgjegjësi të ketë pushteti lokal, aq më shpejt dhe më mirë mund t’u përgjigjet nevojave të qytetarëve. VLEN do të vazhdojë të angazhohet për komuna të forta, decentralizim funksional dhe standarde evropiane që qytetari t’i ndjejë në jetën e përditshme", thuhet në njoftimin e VLEN-it.
Me qindra qytetarë janë mbledhur në Prishtinë – Dega 3, për të pritur kandidaten për presidente nga LDK Vjosa Osmani, në një tubim të mbajtur në lagjen Bregu i Diellit.
Në tubim Lidhja Demokratike e Kosovës (LDK) prezantoi edhe zotimet e saj për projekte konkrete në kryeqytet.
LDK-ja premtoi projekte që e transformojnë Kosovën dhe për zotimet konkrete që prekin jetën e secilit: më shumë zhvillim, më shumë dinjitet, më shumë mundësi për familjet, të rinjtë e bizneset.
LDK tha se këto investime synojnë modernizimin e kryeqytetit dhe krijimin e hapësirave të reja për zhvillim urban, kulturë dhe inovacion.
Presidenti ukrainas, Volodymyr Zelensky i dërgoi një letër të hapur homologut rus, Vladimir Putinit, në të cilën i bëri një ftesë personale për një takim ballë për ballë me qëllim përfundimin e luftës.
Letra u publikua një ditë pasi Ukraina kreu një sulm të madh ndaj Shën Petersburgut, duke goditur një depo të madhe nafte dhe objektiva ushtarake në të njëjtën ditë kur Putini po priste liderë botërorë në forumin e tij kryesor ekonomik.
Në letër, Zelensky paraqet argumentet pse Putini duhet t’i japë fund konfliktit dhe vendos kushtet për rifillimin e negociatave.
“Kjo luftë është zgjedhja juaj personale”
“Pothuajse gjysmën e 26 viteve tuaja në pushtet në Rusi e keni kaluar në luftë kundër Ukrainës”, shkruan Zelensky dhe shtoi se “çfarëdo që të thoni për NATO-n, gjeopolitikën apo gjuhën ruse, kjo luftë është zgjedhja juaj personale – një luftë pa arsye të vërtetë. Historia do ta kujtojë kështu”.
Ai kujton dështimin e Rusisë për të pushtuar Kievin në vitin 2022, ndikimin e sanksioneve ndërkombëtare mbi ekonominë ruse, humbjet e mëdha njerëzore dhe pakënaqësinë në rritje të qytetarëve rusë ndërsa lufta vazhdon, transmeton Telegrafi.
“Luftës suaj nuk po i shihet fundi”
“Popullit rus nuk i pëlqejnë dronët dhe raketat tona. Nuk i pëlqejnë mungesat e karburantit dhe rritja e vazhdueshme e çmimeve. Nuk i pëlqejnë kufizimet e përhershme. Nuk u pëlqen synimi juaj për një valë të re mobilizimi për të zgjeruar luftën në Ukrainë ose kundër ndonjë vendi tjetër fqinj. Nuk u pëlqen që luftës suaj nuk po i shihet fundi”, shkruan presidenti ukrainas.
Propozimi për takim dhe negociata
Zelensky e ftoi Putinin në një takim në një vend neutral për të rënë dakord mbi kushtet e një marrëveshjeje paqeje.
“Ukraina ofron fundin e kësaj lufte. Duhet ta bëjmë këtë në mënyrë të drejtë, me dinjitet dhe me garanci që një luftë e re nuk do të shpërthejë. Propozoj që të takohemi”, shkroi ai.
Ai kërkoi që presidenti rus të caktojë një datë të qartë për takimin dhe theksoi se edhe Shtetet e Bashkuara dhe Evropa duhet të kenë rol në proces.
“Do të detyroheni të luftoni për mbijetesën tuaj”
“Duhet të përcaktojmë se çfarë e ardhme pret brezat e ardhshëm të ukrainasve dhe rusëve”, i shkruan Zelensky homologut të tij rus.
“Nëse nuk e kuptoni vetë se ka ardhur koha për t’i dhënë fund kësaj lufte, Ukraina do të vazhdojë të luftojë për mbijetesën e saj. Ne do të kemi mbështetje. Por edhe ju do të duhet të luftoni shumë më tepër për mbijetesën tuaj – jo për mbijetesën e Rusisë, por për tuajën personale”, tha lideri ukrainas.
Letra e plotë e Volodymyr Zelenskyt drejtuar Vladimir Putinit
Kur erdhët në pushtet më shumë se 26 vjet më parë, shumë njerëz në Ukrainë ju shikonin me miratim. Kështu ishte atëherë, por kjo tashmë i përket së kaluarës.
Sot, shumica dërrmuese e ukrainasve e shohin me miratim faktin që dronët tanë me rreze të gjatë veprimi “vizituan” hapjen e forumit tuaj në Shën Petersburg, duke fluturuar mbi 1.000 kilometra. Siç e dini mirë, kjo distancë nuk përfaqëson kufirin e aftësive tona.
Gjatë këtyre 26 viteve, sundimi juaj e ka ndryshuar plotësisht natyrën e marrëdhënieve mes Ukrainës dhe Rusisë. Nga diskutimet për tregtinë dhe çështje të tjera civile, popujt tanë kanë kaluar në biseda që pothuajse ekskluzivisht kanë të bëjnë me sulme dhe humbje.
Pothuajse gjysmën e 26 viteve tuaja në pushtet e keni kaluar në luftë kundër Ukrainës.
Çfarëdo që të thoni për NATO-n, gjeopolitikën apo gjuhën ruse, kjo luftë është zgjedhja juaj personale – një luftë pa arsye të vërtetë. Historia do ta kujtojë në këtë mënyrë.
Këto vite mund të kishin qenë krejtësisht ndryshe.
Pasojat e luftës për Rusinë
Shpesh dëgjojmë se kjo luftë ju përshtatet. Natyrisht, jo kur bëhet fjalë për sigurinë e rezidencës suaj në Valdaj apo paradat në Moskë. Jeta juaj është e çmuar për ju.
Por tani të gjithë e shohim se edhe për rusët kjo realitet po bëhet gjithnjë e më i pakëndshëm – fakti që lufta po sjell pasoja gjithnjë e më të rënda për vetë Rusinë.
Nuk u pëlqejnë dronët dhe raketat tona. Nuk u pëlqejnë mungesat e karburantit dhe rritja e vazhdueshme e çmimeve. Nuk u pëlqejnë kufizimet e përhershme. Nuk u pëlqen synimi juaj për të nisur një valë të re mobilizimi me qëllim zgjerimin e luftës në Ukrainë ose kundër vendeve të tjera fqinje të Rusisë. Nuk u pëlqen që luftës suaj nuk po i shihet fundi.
Po, ende mund t’i detyroni rusët të jetojnë në këtë mënyrë. Por burimet tuaja po pakësohen ndjeshëm. Nuk do të keni para dhe kapital politik të mjaftueshëm për të blerë besnikërinë e rusëve siç keni bërë gjatë 26 viteve të fundit. Dhe ne do të bëjmë gjithçka që bota të ndihmojë në afrimin e atij momenti.
Siç ju pëlqen të thoni vetë: “Le t’i shohim shifrat”.
Dje mora një raport mbi humbjet e ushtrisë suaj në fushëbetejën e Ukrainës gjatë muajit maj. Numri i ushtarëve rusë të vrarë dhe të plagosur rëndë përsëri e ka tejkaluar shifrën prej 30.000. Këtë nivel humbjesh po e shkaktojmë muaj pas muaji dhe për secilin rast kemi dëshmi me video – këto nuk janë fjalë boshe.
Ne e dimë se 63 për qind e humbjeve tuaja në front përbëhen nga të vrarë, ndërsa vetëm 37 për qind janë të plagosur. Në shekullin XXI asnjë ushtri nuk mund ta përballojë një raport të tillë. Dhe përqindja e të vrarëve do të vazhdojë të rritet.
Nuk është se ne në Ukrainë shqetësohemi për fatin e ushtarëve rusë pas gjithçkaje që lufta juaj i ka sjellë vendit tonë. Por mua më interesojnë ukrainasit. Ne po humbim njerëzit tanë dhe çdo humbje është e dhimbshme për ne. Edhe kur raporti i humbjeve ukrainase dhe ruse është një me pesë ose një me gjashtë, kjo mbetet jashtëzakonisht e rëndësishme.
Është gjithashtu e rëndësishme që ju, çdo disa muaj, vazhdoni të shtyni afatet tuaja për pushtimin e rajoneve tona – veçanërisht rajonit të Donetskut. Nuk do ta pushtoni as këtë vit.
Por ne në Ukrainë nuk duam një luftë të përhershme. E dimë shumë mirë se jeta pa luftë është pafundësisht më e mirë. Dhe duam ta arrijmë këtë. Jam i bindur se edhe shumica e rusëve do ta mirëprisnin këtë – dhe ju e dini këtë.
Qëndrueshmëria e Ukrainës dhe izolimi i Rusisë
Shumë njerëz nuk besonin se Ukraina do të mund të qëndronte kaq gjatë. Ju nuk besonit. Nuk besonin as ata që ju këshillonin. Ky ishte një gabim.
Ju nuk prisnit një rezistencë të tillë të Ukrainës dhe nuk parashikuat që gjërat do të shkonin kaq larg. Megjithatë, ja ku jemi – në vitin e pestë të kësaj lufte të gjithanshme.
Mos kini frikë të zgjidhni rrugën e daljes nga kjo luftë. Kjo është gjëja kryesore që kërkohet nga ju sot.
Ukraina e ka ruajtur pavarësinë e saj. Dhe do ta ruajë. Pavarësisht të gjitha parashikimeve të kundërta.
Ne kemi bashkuar shumë njerëz në mbarë botën që të qëndrojnë përkrah Ukrainës dhe kundër jush. Kemi gjetur armët dhe financimin që na nevojiteshin. Ne marrim mbështetje. Ju merrni sanksione. Dhe kjo do të vazhdojë derisa të arrihet drejtësia për Ukrainën.
Nuk do të lejojmë të kenë sukses ata që përpiqen t’ju bindin se sanksionet ndaj Rusisë do të zbuten ndjeshëm dhe mbështetja për Ukrainën do të zvogëlohet pa ndonjë ndryshim thelbësor nga ana juaj.
Ukraina i ka përballuar dimrat e ashpër ndërsa ju përpiqeshit të shkatërronit sistemin tonë energjetik. Ne qëndruam të fortë – edhe në errësirë, qëndrueshmëria e ukrainasve mbeti e paprekur.
Ne e kemi sjellë luftën në territorin tuaj, diçka me të cilën nuk do të mund të përballeshit pa ndihmën e Koresë së Veriut. Ju jeni sundimtari i parë rus që i është drejtuar Phenianit për ndihmë. Sot jeni plotësisht i varur nga Kina – gjithashtu për herë të parë në historinë e Rusisë.
Ju besuat se ukrainasit nuk do të kishin forcë të mbroheshin. Megjithatë, sot njerëzit tanë po ndihmojnë partnerët tanë në Lindjen e Mesme dhe në Gjirin Persik për të ndërtuar mbrojtjen e tyre.
Shpresonit për trazira të brendshme në Ukrainë. Në vend të kësaj, formacionet tuaja ushtarake u rebeluan kundër jush.
Propozimi për negociata të drejtpërdrejta
Ne kemi informacione se po shqyrtoni plane për ta vazhduar luftën edhe në vitet 2027 dhe 2028. Ne gjithashtu e dimë se shpresoni që raketat balistike të arrijnë atë që gjithçka tjetër nuk ka arritur.
Mjaft më me luftën.
Ukraina propozon t’i jepet fund asaj. Kjo duhet të bëhet me drejtësi, dinjitet dhe me garanci që lufta të mos shpërthejë sërish.
Ukraina propozon që kjo luftë të përfundojë përmes një bisede të drejtpërdrejtë mes nesh – jush dhe meje.
Propozoj një takim
Të gjithë i kanë dëgjuar përfaqësuesit tuaj të thonë me buzëqeshje se unë mund të vij në Moskë. Por pas këtyre 26 viteve, një udhëheqës ukrainas nuk ka çfarë të kërkojë në kryeqytetin tuaj, ashtu siç një udhëheqës rus nuk ka çfarë të kërkojë në Kiev.
Ekzistojnë vende që tradicionalisht kanë pritur liderë për të zgjidhur çështje lufte dhe paqeje. Zvicra, Turqia dhe vendet e botës arabe janë të gatshme dhe të afta ta organizojnë një takim të tillë.
Janë liderët ata që zgjidhin çështjet kyçe. Kështu ka qenë gjithmonë dhe kështu do të jetë gjithmonë.
Propozoj të caktohet një datë e qartë për një takim të tillë.
Korniza për arritjen e paqes
Besojmë se Evropa duhet të jetë pjesë e këtij procesi – ata që kanë vërtet kapacitet të ndikojnë në situatë.
Po ashtu besojmë se Shtetet e Bashkuara duhet të jenë pjesë e procesit. Kjo mund të ndihmojë në krijimin e një arkitekture të re sigurie për pjesën tonë të botës.
Ne kemi përjetuar shumë marrëveshje me Rusinë, përfshirë marrëveshjet e Minskut, të cilat përfundimisht dështuan. Prandaj duhet të gjejmë përgjigje të drejtpërdrejta për çështjet e mbetura dhe jo të fshihemi pas formulave, grupeve teknike të punës apo humbjes së pafundme të kohës.
Vija aktuale e frontit është pika nga e cila duhet të fillojë diplomacia.
Ukraina është e gatshme për një armëpushim të plotë gjatë negociatave.
Ukraina është gjithashtu e gatshme për shkëmbimin e të gjithë të burgosurve të luftës sipas parimit “të gjithë për të gjithë”, gjë që mund të jetë një hyrje e mirë drejt përfundimit të luftës.
Duhet të ndërmerren hapa seriozë për kthimin e civilëve dhe fëmijëve të dërguar larg gjatë luftës.
Duhet të përcaktojmë se çfarë e ardhmeje i pret brezat e ardhshëm të ukrainasve dhe rusëve.
Zgjedhja është e juaja
Nëse personalisht nuk arrini në përfundimin se ka ardhur koha për t’i dhënë fund kësaj lufte, Ukraina do të vazhdojë të luftojë për mbijetesën e saj. Ne do të kemi mbështetjen e atyre që qëndrojnë me ne.
Por edhe ju do të duhet të luftoni shumë më fort për mbijetesën tuaj – jo për mbijetesën e Rusisë, por për tuajën personale.
Kjo nuk është kërcënim nga ana ime apo nga ana e Ukrainës. Është një fakt i historisë ruse që ju e njihni mirë: kur Rusia lodhet, vijnë ndryshimet.
Ne mund të punojmë për atë lodhje. Ju mund ta ndalni luftën tuaj.
Lavdi e përjetshme për të gjithë ata që humbën jetën në këtë luftë.
Login
