Presidenti i FIFA-s, Gianni Infantino, ka reaguar pas polemikave të krijuara rreth vendimit që i lejoi sulmuesit Folarin Balogun të luajë me Shtetet e Bashkuara në ndeshjen ndaj Belgjikës në fazën e 1/8 së finales të Kupës së Botës.

Çështja mori përmasa të mëdha pasi media të ndryshme raportuan se edhe presidenti i SHBA-së, Donald Trump, kishte ndërhyrë përmes një telefonate lidhur me rastin e Balogun.

Përmes një deklarate zyrtare, Infantino theksoi se organet disiplinore të FIFA-s veprojnë në mënyrë të pavarur dhe se asnjë ndërhyrje e jashtme nuk ndikon në vendimet e tyre.

Deklarata e plotë e Gianni Infantinos:

“Kam parë komentet e publikut lidhur me vendimin e Komisionit të Pavarur Disiplinor të FIFA-s për çështjen e Folarin Balogun dhe dëshiroj të ritheksoj një parim themelor të qeverisjes së FIFA-s.

Organet gjyqësore të FIFA-s janë të pavarura. Ato funksionojnë në mënyrë autonome, zbatojnë Kodin Disiplinor të FIFA-s dhe marrin vendime bazuar në rregulloret në fuqi dhe faktet konkrete që kanë përpara.

Pavarësia e tyre është thelbësore për besueshmërinë dhe integritetin e futbollit dhe kjo duhet të respektohet gjithmonë.

Po, unë diskutoj rregullisht çështje që lidhen me Kupën e Botës FIFA me Presidentin e Shteteve të Bashkuara dhe, për këtë rast, mora një telefonatë nga Presidenti Donald Trump, ashtu siç marr telefonata nga krerë shtetesh, zyrtarë qeveritarë, përfaqësues të futbollit dhe drejtues biznesesh nga e gjithë bota për shumë tema të ndryshme.

Gjatë bisedës sonë, i shpjegova se ekzistonte një proces ligjor në zhvillim, i cili i përkiste organeve të pavarura gjyqësore të FIFA-s dhe se çështja do të shqyrtohej në kohën e duhur nga institucionet kompetente.

Kështu funksionon sistemi i FIFA-s dhe ky është një parim që do ta respektoj gjithmonë. Vendimet e Komisionit Disiplinor të FIFA-s i lexoj vetëm pasi ato publikohen. Ndonjëherë më befasojnë. Ndonjëherë jam dakord me to dhe ndonjëherë jo.

Megjithatë, ajo që bëj gjithmonë është t’i respektoj këto vendime dhe autonominë e organeve që i marrin ato. Nëse personalisht na pëlqen apo jo një vendim, kjo është krejtësisht e parëndësishme.

Respektimi i institucioneve të pavarura dhe i sundimit të ligjit është ajo që mbron integritetin e garave tona dhe garanton besueshmërinë e FIFA-s në çdo moment.”

Grupi militant palestinez Hamas njoftoi të hënën se ka shpërbërë administratën e tij në Gaza dhe se po përgatitet t’ia dorëzojë drejtimin një komiteti teknik të mbështetur nga Kombet e Bashkuara, si pjesë e marrëveshjes së armëpushimit të ndërmjetësuar nga Shtetet e Bashkuara.

Hamasi nuk sqaroi nëse planifikon të ndërmarrë hapin e rëndësishëm të çarmatimit ose t’ia kalojë përgjegjësinë për sigurinë një force ndërkombëtare. Megjithatë, grupi tha se ky vendim tregon angazhimin e tij për rindërtimin e Gazës pas viteve të luftës, raporton AP.

Në një konferencë për media të hënën, Ismail Al-Thawabta, drejtori i Përgjithshëm i Zyrës për Media të administruar nga Hamasi, tha se stafi teknik dhe profesional do të vazhdojë punën në institucionet publike, për të siguruar funksionimin e përditshëm të Gazës.

Bordi i Paqes, i krijuar nga administrata Trump për të monitoruar zbatimin e planit, tha se e ka marrë parasysh vendimin e Hamasit. Megjithatë, ai theksoi se vlerësimi përfundimtar do të bazohet te veprimet konkrete dhe jo te premtimet, me qëllim që të plotësohen nevojat urgjente të banorëve të Gazës.

Aktori i njohur amerikan George Clooney do të marrë çmimin prestigjioz “Luani i Artë” për Arritje Jetësore në edicionin e ardhshëm të Festivalit Ndërkombëtar të Filmit në Venecia, si vlerësim për kontributin e tij të jashtëzakonshëm në botën e kinemasë.

Marrëdhënia e Clooney-t me festivalin daton prej vitit 1998, kur ai mori pjesë për herë të parë me filmin “Out of Sight”. Që atëherë, ai është bërë një nga figurat më të njohura të ekranit të madh, si aktor, regjisor dhe producent.

Drejtori artistik i festivalit, Alberto Barbera, e cilësoi Clooney-n si një artist me ndikim të jashtëzakonshëm në kinemanë moderne, duke vlerësuar karrierën e tij shumëdimensionale dhe rolin që ka luajtur në zhvillimin e filmit bashkëkohor.

Vetë aktori e priti me humor lajmin e këtij vlerësimi.

“Kam përjetuar shumë momente të paharrueshme në Venecia. Ky është festivali im i preferuar dhe marrja e ‘Luanit të Artë’ është një nder i madh. Ndoshta kjo do të thotë edhe se jam plakur, por e pranoj me kënaqësi,” u shpreh Clooney.

Ceremonia e ndarjes së çmimit do të zhvillohet gjatë Festivalit të Filmit në Venecia, i cili këtë vit do të mbahet nga 2 deri më 12 shtator./mxh

Shtëpia e njohur franceze e modës Chanel ka zgjeruar portofolin e saj duke blerë Charvet, markën ikonike të specializuar në prodhimin e këmishave, kravatave dhe pizhamave të personalizuara. Vlera e marrëveshjes nuk është bërë publike.

Drejtuesit e Chanel e kanë cilësuar Charvet si një nga emrat më prestigjiozë të modës franceze. Presidenti i sektorit të modës në Chanel, Bruno Pavlovsky, tha se kjo blerje bashkon dy marka me identitete të forta, duke theksuar se kufijtë tradicionalë mes modës për gra dhe asaj për burra po bëhen gjithnjë e më pak të theksuar.

“Chanel ka qenë historikisht e lidhur me modën për gratë, por gjithnjë e më shumë burra zgjedhin produktet tona. Nga ana tjetër, shumë gra i drejtohen Charvet për të porositur këmisha. Dyert janë të hapura për të gjithë,” u shpreh ai.

Sipas Pavlovsky, marrëveshja mund të sinjalizojë edhe një fazë të re për modën luksoze mashkullore. Megjithëse Chanel nuk ka aktualisht një linjë të dedikuar për veshje burrash dhe nuk planifikon ta krijojë një të tillë në të ardhmen e afërt, kompania ka forcuar praninë e saj në këtë segment përmes bashkëpunimeve me figura të njohura si ASAP Rocky dhe Pedro Pascal, ambasadorë të markës.

Me këtë lëvizje strategjike, Chanel synon të ruajë dhe zhvillojë trashëgiminë e një prej emrave më të vjetër të mjeshtërisë franceze në prodhimin e këmishave, duke zgjeruar njëkohësisht ndikimin e saj në tregun e luksit./mxh

Gjermania do të rrisë ndjeshëm shpenzimet për mbrojtjen në vitin 2027, duke ndarë 109.7 miliardë euro për ushtrinë, një rritje prej gati një të tretës krahasuar me vitin actual.

Sipas projektbuxhetit të qeverisë federale, i miratuar nga kabineti, për vitin 2027 parashikohen shpenzime totale prej 555.4 miliardë eurosh, nga 524.5 miliardë euro këtë vit.

Sipas transmetuesit publik ZDF, një pjesë e madhe e fondeve të reja do të destinohet për forcat e armatosura dhe projektet e reja të prokurimit.

Burime qeveritare thanë se plani synon përmbushjen e angazhimeve të NATO-s për shpenzimet në mbrojtje dhe forcimin e kapaciteteve ushtarake, ndërsa SHBA-ja përgatitet të reduktojnë praninë ushtarake në Evropë.

Buxheti bazë për mbrojtjen do të rritet në 109.7 miliardë euro vitin e ardhshëm, nga 82.7 miliardë euro në vitin 2026. Shpenzimet për mbrojtjen parashikohet të vazhdojnë të rriten ndjeshëm, duke arritur në 183.7 miliardë euro deri në vitin 2030.

Projektbuxheti gjithashtu parashikon 11.6 miliardë euro ndihmë ushtarake për Ukrainën në vitin 2027, ndërsa mbështetja vjetore do të ulet në 8.5 miliardë euro në vitet pasuese.

Për të financuar këtë rritje të shpenzimeve, qeveria e koalicionit e kancelarit Friedrich Merz planifikon të marrë hua të konsiderueshme të reja. Vetëm buxheti bazë federal do të përfshijë 118.7 miliardë euro borxh të ri vitin e ardhshëm.

Projektbuxheti duhet ende të miratohet nga parlamenti./mxh

Qindra variante gjenetike të lidhura me rrezikun për zhvillimin e skizofrenisë janë zbuluar falë një qasjeje novatore, të përdorur nga një konsorcium ndërkombëtar i udhëhequr nga Lieber Institute for Brain Development dhe Università degli Studi di Bari Aldo Moro, në bashkëpunim me më shumë se 60 spitale psikiatrike në mbarë botën.

Metoda e përdorur u përqendrua te mënyra se si gjenet ndikojnë njëri-tjetrin edhe nga distanca, për të kuptuar më mirë se si disa rrjete variantesh gjenetike “bashkëpunojnë” në përcaktimin e rrezikut për skizofreninë.

Kjo qasje më e gjerë bëri të mundur identifikimin e 641 gjeneve të panjohura më parë, të lidhura me këtë çrregullim mendor.

Në studimin, të botuar në revistën Nature Genetics (i disponueshëm edhe si parapublikim në bioRxiv), u analizuan të dhënat gjenetike të 102.000 personave, si dhe mostra indi nga gjashtë rajone të ndryshme të trurit të qindra dhuruesve.

Prej kohësh dihet se skizofrenia ka një komponent të fortë gjenetik: të kesh familjarë me histori të kësaj sëmundjeje përbën një faktor rreziku, pasi zakonisht ajo prek disa anëtarë të së njëjtës familje në breza të ndryshëm.

Zakonisht, për të gjetur gjenet e lidhura me një sëmundje, studiuesit analizojnë rajonet e gjenomit që ndodhen pranë gjeneve tashmë të njohura. Këtë herë, megjithatë, ata përdorën metoda të reja kompjuterike që nxjerrin në pah marrëdhëniet rregullatore afatgjata midis gjeneve – mekanizma përmes të cilëve sekuenca të ADN-së, edhe pse larg njëra-tjetrës, kontrollojnë shprehjen e gjeneve të tjera “objektiv”.

Mund t’i imagjinoni këto marrëdhënie “në distancë” si miqësitë në rrjetet sociale: njerëz që nuk jetojnë pranë njëri-tjetrit, por megjithatë ndikojnë te njëri-tjetri.

Rrjete të fshehura, më në fund të zbuluara
Kjo qasje bëri të mundur identifikimin e qindra gjeneve të lidhura me skizofreninë që përndryshe nuk do të ishin zbuluar kurrë, si edhe të rrugëve biologjike që në të ardhmen mund të bëhen objektiv i trajtimeve klinike.

Shumë prej varianteve gjenetike lidhen, për shembull, me: sinjalizimin e glutamatit, një neurotransmetues ngacmues thelbësor për funksionimin e trurit;
komunikimin ndërmjet qelizave të trurit;
proceset imunitare;
mekanizmat e zhvillimit të trurit.

Shumica e studimeve gjenetike janë kufizuar duke kërkuar dritën vetëm poshtë shtyllës së ndriçimit, duke u përqendruar te gjenet që ndodhen pranë varianteve të ADN-së të lidhura me sëmundjen.

Duke integruar rrjetet e bashkë-shprehjes së gjeneve, ne në thelb ndezëm dritat në të gjithë lagjen, duke zbuluar se si variante gjenetike të largëta bashkërendohen për të ndërtuar bazën gjenetike të skizofrenisë.

Studiuesit theksojnë se rëndësia e këtij studimi qëndron edhe në faktin se ai tregon se skizofrenia nuk varet vetëm nga veprimi i gjeneve të veçanta, por edhe nga ndërveprimet midis rrjeteve të gjeneve.

Kuptimi i këtyre rrjeteve dhe mënyrës se si ato funksionojnë mund të sjellë, në të ardhmen, përfitime konkrete për pacientët dhe për personat që kujdesen për ta, duke hapur rrugën për trajtime më të sakta dhe më të personalizuara./mxh

Një nga incidentet më të rënda në historinë e burgjeve të Sri Lankës ka tronditur vendin, pasi të paktën 26 persona humbën jetën dhe mbi 100 të tjerë mbetën të plagosur gjatë përleshjeve të dhunshme në burgun e Negombos, rreth 35 kilometra në veri të kryeqytetit Colombo.

Ngjarja, e cila nisi të dielën dhe u përshkallëzua gjatë së hënës, konsiderohet si revolta më e rëndë në burgjet e vendit në vitet e fundit.

Sipas autoriteteve, përplasjet filluan fillimisht mes të burgosurve që vuajnë dënime afatgjata dhe personave të ndaluar përkohësisht. Ditën e diel u raportuan dy viktimat e para, ndërsa situata u përkeqësua ndjeshëm të hënën, kur shpërtheu një valë e re dhune që la të vrarë edhe gjashtë punonjës të shërbimit të burgjeve. Numri i përgjithshëm i viktimave arriti në 26, ndërsa dhjetëra të plagosur u transportuan me urgjencë drejt spitaleve.

TË LIDHURA
Arratiset bosi i drogës, vriten dy oficerë policie në Francë
Gjendje e jashtëzakonshme në Ekuador: Vriten 5 policë, disa të tjerë merren peng
Vriten dy policë në Francë, arratiset i burgosuri që po transportonin me furgon
Zëdhënësi i Departamentit të Burgjeve, Chamika Gajanayake, deklaroi se përleshja shpërtheu në momentin kur të burgosurve po u shërbehej mëngjesi. Ai bëri të ditur se incidenti dyshohet të jetë i lidhur me aktivitetet e trafikut të drogës brenda burgut, megjithatë nuk dha detaje të tjera, duke theksuar se është hapur një hetim zyrtar për të zbardhur plotësisht rrethanat e ngjarjes.

Pamjet e transmetuara nga mediat lokale treguan një prani të madhe të forcave të policisë jashtë burgut, ndërsa autobusë transportonin të plagosurit drejt qendrave shëndetësore. Disa prej tyre shiheshin të shtrirë në dyshemenë e mjeteve të transportit, duke marrë ndihmën e parë gjatë rrugës.

Drejtoresha e spitalit të Negombos, Pushpa Gamlath, konfirmoi se institucioni kishte pranuar 23 trupa të pajetë, ndërsa mbi 100 të plagosur, mes tyre të burgosur dhe gardianë, morën trajtim mjekësor. Ajo sqaroi se shumë prej tyre kishin plagë nga armët e zjarrit, prerje të rënda dhe mavijosje serioze, ndërsa 18 pacientë në gjendje kritike u transferuan në Spitalin Kombëtar të Colombo-s për trajtim më të specializuar.

Ndërkohë, tensioni u përhap edhe në burgun ngjitur për gratë, ku një grup të burgosurash u ngjitën mbi çatinë e objektit dhe kërkuan lirimin e tyre, duke shtuar shqetësimet për përhapjen e trazirave. Për të monitoruar situatën dhe për të parandaluar përshkallëzimin e mëtejshëm, Forcat Ajrore të Sri Lankës angazhuan një helikopter dhe disa dronë që patrulluan zonën e burgut.

Zëdhënësi i ushtrisë Uaruna Gamage, deklaroi se ushtria ishte vendosur në gatishmëri pas kërkesës së policisë për mbështetje, por sqaroi se në atë moment forcat ushtarake nuk kishin ndërhyrë drejtpërdrejt në operacion.

Ministri i Drejtësisë, Harshana Nanayakkara, e cilësoi ngjarjen si një tragjedi që nuk duhej të kishte ndodhur kurrë. Ai theksoi se, pavarësisht nëse viktimat ishin të burgosur apo persona të lidhur me botën e krimit, shteti ka detyrimin të garantojë sigurinë dhe jetën e çdo personi që ndodhet në institucionet korrektuese.

Qeveria e Sri Lankës ka njoftuar ngritjen e një komisioni hetimor prej tre anëtarësh, të kryesuar nga një ish-gjyqtar i Gjykatës Supreme. Ky komision do të hetojë shkaqet e revoltës, përgjegjësitë institucionale dhe masat që duhet të ndërmerren për të parandaluar ngjarje të ngjashme në të ardhmen. Autoritetet pritet të publikojnë rezultatet e hetimit pas përfundimit të mbledhjes së provave dhe marrjes në pyetje të dëshmitarëve./mxh

UEFA ka kritikuar publikisht vendimin e FIFA-s për të pezulluar zbatimin e dënimit me një ndeshje ndaj Folarin Balogun.

Shtëpia e futbollit evropian e cilësoi këtë masë si një precedent të rrezikshëm që mund të dëmtojë integritetin e garës. Sipas UEFA-s, pezullimi pas një kartoni të kuq është një rregull i qartë dhe nuk mund të ndryshohet gjatë zhvillimit të një turneu.

Në deklaratën zyrtare theksohet se ky dënim nuk është çështje interpretimi dhe nuk kërkon vendim shtesë për të hyrë në fuqi. UEFA argumenton se lojtarë të tjerë në situata të ngjashme kanë vuajtur normalisht pezullimet e tyre.

Gjithashtu, institucioni paralajmëron se rasti Balogun mund të krijojë kërkesa për trajtim të njëjtë në episode të tjera gjatë Kupës së Botës. Sipas UEFA-s, zbatimi i njëjtë i rregullave është baza e një gare të drejtë dhe transparente.

REAGIMI I UEFA-s:

Vendimi i djeshëm për të pezulluar për një periudhë prove prej një viti zbatimin e pezullimit automatik me një ndeshje pas kartonit të kuq të dhënë për Folarin Balogun kaloi një vijë të kuqe.

Futbolli, si çdo sport tjetër, mbështetet te rregullat, të cilat janë baza e një gare të drejtë, të ndershme dhe transparente. Ndonjëherë rregullat janë të hapura për interpretim. Në këtë rast, jo.

Pezullimi automatik minimal me një ndeshje pas një kartoni të kuq nuk është një opsion diskrecional dhe nuk kërkon vendimin e një organi kompetent për të hyrë në fuqi. Është një parim i përfshirë në rregullore, që nuk mund t’i nënshtrohet përjashtimeve, aq më pak në mes të një turneu ku disa lojtarë të tjerë kanë qenë në të njëjtën situatë dhe e kanë vuajtur rregullisht pezullimin.

Kur siguria e zbatimit të rregullave nuk garantohet më nga vetë kujdestarët e tyre, integriteti i lojës vihet në pikëpyetje dhe besueshmëria e një gare dëmtohet.

Po ashtu, ky vendim krijon një precedent në turneun aktual, ku situata të ngjashme tani do të kërkojnë trajtim të barabartë, në dëm të vetë garës.

Futbolli është sporti më i dashur në botë sepse është një lojë e bukur dhe gëzon besimin e njerëzve sepse luhet kudo sipas të njëjtave rregulla./mxh

Sekretari i përgjithshëm i Kombeve të Bashkuara, Antonio Guterres paralajmëroi të se Inteligjenca Artificiale po zhvillohet më shpejt nga sa mund të përballojë kushdo, duke kërkuar nevojën për rregulla të harmonizuara globalisht për të zvogëluar rreziqet e mundshme veçanërisht për fëmijët.

“Një teknologji që mund të riformësojë ekonomitë, të transformojë botën e punës, të ndikojë në zgjedhje dhe të ndryshojë ekuilibrin e sigurisë po zbatohet më shpejt se kushdo – përfshirë njerëzit që e ndërtojnë atë”, tha Guterres në dialogun e parë global në nivel qeveritar mbi Al në Gjenevë.

“Inovacioni ka nevojë për parmakë mbrojtës… Nëse Al do të jetë e fuqishme, ajo duhet të qeveriset” shtoi ai.

Qëllimi i Dialogut Global dy-ditorë të OKB-së mbi Qeverisjen e Al në Gjenevë nuk është të krijojë një traktat, por të diskutojë se si të vendosen rregulla për të zbutur dëmet e mundshme të Al, si dhe për të përfituar nga mundësitë e saj.

Degatët do të shqyrtojnë një raport nga një panel shkencor i pavarur prej 40 ekspertësh, i mbështetur nga OKB-ja, të cilët do të paraqesin gjetjet e tyre nga vlerësimi i parë shkencor global dhe i pavarur i Al.

Një raport më gjithëpërfshirës është planifikuar vitin e ardhshëm, së bashku me një takim të dytë global në New York. /ET

Një tërmet tronditi Venezuelën më 24 qershor, duke shkaktuar dëme tepër të mëdha në vend e numër të lartë viktimash.

Media prestigjoze BBC ka sjellë historinë e veçantë të 12-vjeçares Fabiana Blanco, e cila arriti të nxirrej e gjallë, edhe pse kishte qëndruar 32 orë nën rrënojat e pallatit të saj, që u shemb nga lëkundjet e forta sizmike. Vajza arriti të mbijetonte falë një shisheje me ketchup dhe pak djathi të grirë që gjeti mes rrënojave, ndërsa shpresa dhe besimi nuk e braktisën asnjë moment.

Nëna e saj, Karina Blanco, ishte duke u përgatitur të niste një orë stërvitjeje, kur ndjeu lëkundjet e forta sizmike. Sapo kuptoi fuqinë e tërmetit, ajo u nis me shpejtësi drejt banesës ku ndodhej e vetme vajza e saj. Kur mbërriti në vendngjarje, pallati dhjetëkatësh ku jetonin ishte shembur pothuajse tërësisht. E tronditur, Karina nisi të kërkonte vajzën mes rrënojave, duke besuar fillimisht se ajo kishte humbur jetën.

Në momentin e tërmetit, Fabiana ndodhej në apartament. Ajo tregoi se fillimisht pa sendet të lëkundeshin dhe muret të çaheshin, ndërsa pak sekonda më vonë ndërtesa u shemb. Vajza mbeti e shtrirë nën një masë të madhe betoni dhe materialesh ndërtimi, me hapësirë shumë të kufizuar për të lëvizur. Edhe pse ishte e frikësuar dhe mendoi se nuk do të shpëtonte, ajo ruajti qetësinë dhe priti mjekët e ambulancat.

Pas disa orësh, një infermiere e bllokuar në të njëjtën ndërtesë dëgjoi zërin e Fabianës dhe e inkurajoi të mos humbiste shpresën. Kur infermierja u shpëtua rreth mesnatës, ajo njoftoi ekipet e kërkim-shpëtimit se një vajzë ishte ende gjallë nën rrënoja. Ky lajm i dha shpresë nënës së Fabianës, e cila deri atëherë ishte përgatitur për më të keqen.

Ndërkohë, nën rrënoja, Fabiana gjeti telefonin e saj celular, por rrjeti telefonik nuk funksiononte. Ajo vendosi të regjistronte një video, duke shpresuar se dikush do ta gjente më vonë. Në video, vajza tregonte se ndodhej e bllokuar në apartament, pa energji elektrike dhe pa mundësi komunikimi, ndërsa kërkonte ndihmë për veten dhe fqinjët e tjerë.

Gjatë orëve të gjata kur ishte e bllokuar, Fabiana arriti të lëvizte disa copa rrënojash për të çliruar njërën këmbë, pasi qëndrimi në atë mënyrë i shkaktonte dhimbje. Pikërisht në ato momente ajo gjeti një shishe ketchup dhe pak djathë të grirë, të cilat i konsumoi në sasi të vogla për të mbajtur energjinë dhe për të mos humbur ndjenjat. Ajo tregoi se këto ishin të vetmet ushqime që kishte në dispozicion gjatë gjithë kohës që qëndroi e bllokuar.

Përpjekjet për shpëtimin e saj vazhduan gjatë gjithë ditës. Disa ekipe zjarrfikësish nuk arritën ta lokalizonin, ndërsa një vullnetar i quajtur Viktor vazhdoi të kërkonte pa u dorëzuar. Ai dëgjoi zërin e Fabianës dhe njoftoi menjëherë familjen dhe ekipet e shpëtimit, duke rikthyer shpresën se vajza mund të nxirrej e gjallë.

Në mbrëmje mbërritën ekipe të specializuara të shpëtimit nga Karakasi. Banorët e zonës ndihmuan duke ndriçuar vendin me fenerë, motoçikleta dhe automjete, ndërsa ekipet punuan pa ndërprerje për të hapur një tunel drejt vendit ku ndodhej vajza. Pas shumë orësh pune të kujdesshme, ata arritën të hapnin një vrimë të vogël nga ku panë Fabianën të buzëqeshte. Pamjet e këtij momenti u shpërndanë në rrjetet sociale dhe u kthyen në simbol të shpresës mes tragjedisë.

Rreth orës 02:00 të mëngjesit, 32 orë pas tërmetit, shpëtimtarët arritën ta nxirrnin Fabianën nga rrënojat. Ajo doli në këmbë me ndihmën e tyre dhe përqafoi nënën e saj, e cila e kishte kërkuar pa pushim gjatë gjithë kësaj kohe. Vajza pësoi vetëm një frakturë në këmbën e majtë dhe disa gërvishtje e mavijosje, ndërsa mjekët konfirmuan se gjendja e saj ishte e mirë.

Sipas Karina Blancos, nga rreth 50 banorët që jetonin në pallatin e tyre vetëm tre persona u nxorën të gjallë. Bilanci i përgjithshëm i tërmeteve në mbarë Venezuelën ishte tragjik, me mbi 3.300 viktima të konfirmuara dhe mijëra persona të tjerë të zhdukur, ndërsa ekipet e kërkim-shpëtimit vazhduan operacionet për ditë të tëra.

Sot Fabiana jeton përkohësisht në shtëpinë e gjyshes së saj. Ajo pranon se ende përjeton frikë kur shtrihet me shpinë, pasi kujton orët e kaluara nën rrënoja. Për nënën e saj, fakti që vajza mbijetoi konsiderohet mrekullia më e madhe mes një prej fatkeqësive më të rënda që ka përjetuar Venezuela në dekadat e fundit./mxh

Miliarderi amerikan i naftës J. Paul Getty u bë një nga figurat më të pasura dhe më të njohura të shekullit XX, pasi në vitin 1966 u rendit si, njeriu më i pasur në botë, sipas BBC.

Getty e nisi pasurinë e tij nga industria e naftës. Ai fitoi milionin e parë kur ishte vetëm 24 vjeç, kur në tokën e tij në Oklahoma u zbulua naftë.

Më pas, ai ndërtoi një perandori të madhe biznesi, që u vlerësua në miliarda dollarë dhe e shndërroi në një nga figurat më të fuqishme të industrisë së energjisë.

Në vitin 1960, ai organizoi një festë të madhe në rezidencën e tij historike “Sutton Place” në Surrey të Anglisë, ku morën pjesë mbi 2 000 të ftuar nga elita shoqërore, aristokracia dhe bota e biznesit.

Festa u bë lajm edhe për një incident kur një fotograf u hodh në pishinë nga sigurimi i rezidencës.

Getty jetoi për vite të tëra në këtë rezidencë të fortifikuar, nga ku drejtonte biznesin e tij global.

Shtëpia ishte e pajisur me sisteme sigurie në çdo dhomë, ndërsa në gjithë pronën ishin vendosur tabela “Ndalohet hyrja” dhe roje të armatosura.

Ai kishte edhe qen roje dhe madje një luan i quajtur Nero.

Getty hyri në “Librin e Rekordeve Guinness” si njeriu më i pasur në botë në vitin 1966.

Deri në vdekjen e tij, pasuria e tij vlerësohej rreth 4 miliardë dollarë (rreth 23,5 miliardë dollarë sot), dhe ai fitonte më shumë çdo ditë sesa një njeri mesatar që fiton gjatë gjithë jetës.

Një nga thëniet e tij për suksesin ishte: “Zgjohu herët, puno fort dhe gjej naftë.”

Në një seri artikujsh për revistën “Playboy”, që më vonë u botuan si libër me titull “Si të bëheni të pasur”, Getty theksonte “rëndësinë e të pasurit një këndvështrim të pavarur dhe të mos ndikohesh nga ajo që thonë të tjerët”.

Pavarësisht pasurisë së jashtëzakonshme, ai ishte i njohur për kursimin ekstrem.

Për të shmangur faturat e larta të telefonit, vendosi telefona me pagesë në shtëpi për mysafirët.

Madje, sipas dëshmive, priste orët me çmime më të ulëta në restorante, për të kursyer.

Në vitin 1973, familja e tij u trondit nga rrëmbimi i nipit në Itali.

Rrëmbyesit kërkuan 16 milionë dollarë shpërblim, por Getty fillimisht refuzoi të paguante, duke deklaruar se kishte shumë nipër dhe nuk mund të dorëzohej ndaj kërkesave të tilla.

Më pas, ai pagoi vetëm një pjesë e shumës dhe nipi u lirua pas disa muajsh robërie.

Getty u bë i famshëm edhe për deklaratat e tij të sinqerta mbi pasurinë.

Ai shpesh thoshte se nuk e dinte saktësisht pse kishte pasur kaq shumë sukses dhe se ai vetë nuk ndihej më i aftë se të tjerët.

Sipas tij, suksesi ishte rezultat i shumë faktorëve dhe jo i një “sekreti të vetëm”.

Në intervista, ai pranoi se përgjegjësitë e mëdha financiare nuk sillnin domosdoshmërisht lumturi, duke theksuar se shpesh ndjihej më i qetë në momente të thjeshta, larg biznesit, pavarësisht se kontrollonte një nga perandoritë më të mëdha të naftës në botë.

J. Paul Getty vdiq në vitin 1976 në moshën 83-vjeçare./mxh

Franca fitoi 1-0 ndaj Paraguait në ndeshjen e 1/8-ave të Kupës së Botës 2026, me Kylian Mbappé që shënoi golin e vetëm nga penalltia në minutën e 70-të. Ky ishte goli i shtatë i sulmuesit në turne, duke e vendosur atë përpara Lionel Messit në garën për Këpucën e Artë, edhe për shkak të dy […]

Mbrojtësi i Anglisë, Jarell Quansah, u përjashtua me karton të kuq në minutën e 54-të për një ndërhyrje të lartë ndaj Jesus Gallardo gjatë fitores 3-2 kundër Meksikës në Botërorin 2026. Federata Angleze e Futbollit po shqyrton mundësinë e apelimit ndaj këtij vendimi; raporton bbc se ky hap lidhet me shqetësimet për mënyrën si po […]

Një karton i kuq ndaj sulmuesit amerikan Folarin Balogun, pas një prekjeje të sikletshme të kyçit të djathtë të Tarik Muharemović gjatë fitore 2-0 në raundin e 32, çoi në pezullimin automatik një ndeshje të lojtarit. Pas ndeshjes, presidenti amerikan Donald Trump telefonoi kreun e FIFA-s, Gianni Infantino, dhe organizata shpalli më pas heqjen e […]

Klodiana Spahiu, nënkryetare e Kuvendit, deklaroi se ka forca të errëta në protestë “që kërkojnë që me simbolin e vdekjes të përçajnë shqiptarët”. “Në 16 vite në politikë kam arritur të kuptoj që ka momente kur dalin forca të errëta, ato që shkatërrojnë pronën e përbashkët, ato që qëllojnë me gurë mbi forcat e policisë, […]

Eksperti i ekonomisë Fatos Çoçoli paralajmëroi në Off the Record me Andrea Dangllin në A2 CNN se protesta dhe mënyra se si ajo është pasqyruar në mediat ndërkombëtare mund të kenë pasoja për ekonominë dhe klimën e investimeve. Sipas tij gjuajtja me vezë edhe pse nuk është dhunë e mirëfilltë, por një formë guerile që, […]

Pedagogia Mirela Karabina ka deklaruar në emisionin “3D” të Alban Dudushit në RTSH1 se futja e simboleve provokuese si arkivoli në protestë nuk përfaqësojnë protestën qytetare paqësore. Karabina u shpreh se forca të caktuara po tentojnë t’i ndryshojnë imazhin protestës duke futur simbole të tjera, por protesta e vërtetë ka arritur ta “fshijë” këtë gjë. […]

Pasi transferoi Gonçalo Ramos për një shifër mbi 70 milionë euro, transferimi më i shtrenjtë në historinë e klubit, Milan është vënë pas Mario Gila, qendërmbrojtësit spanjoll të Lazios. Oferta e parë e kuqezinjve drejt kryqytetasve është 25 milionë euro, ndërsa Lazio pretendon 30 milionë euro. Arsyeja pse bardhekaltrit janë të vendosur për këtë shifër, […]

Kryetari i Qytetit të Shkupit, Orce Gjorgjievski, sonte paralajmëroi se së shpejti do të ketë një procedurë tenderimi për servisimin e plotë të teleferikut Vodno. Ai edhe një herë theksoi se deri në fund të sezonit, teleferiku nuk do të vihet në funksion. “Së shpejti do të shpallet një procedurë tenderimi, në të cilën do […]