BRUKSEL/NIKOZi, 8 qershor /ATSH-DPA/ – Bashkimi Evropian ka disbursuar edhe 2,8 miliardë euro mbështetje buxhetore për Ukrainën, ndërsa blloku po përgatit masa të reja për të shtuar ndihmën ndaj Kievit.

Komisionerja e BE-së për Zgjerimin, Marta Kos, deklaroi se “shpejtësia dhe përkushtimi i Ukrainës në zbatimin e reformave domethënëse e kanë merituar këtë pagesë”. Fondet janë pjesë e një programi prej 50 miliardë eurosh, i krijuar për të mbështetur buxhetin shtetëror të Ukrainës teksa vendi vazhdon reformat dhe mbrohet nga agresioni rus.

Kjo është pagesa e shtatë që Ukraina merr në kuadër të kësaj skeme financimi. Ndërkohë, po shënohet përparim edhe në disa mekanizma të tjerë mbështetës të BE-së, të cilët më parë ishin bllokuar nga ish-kryeministri hungarez Viktor Orbán.

Shefja e diplomacisë së BE-së, Kaja Kallas, tha gjatë një takimi të ministrave të Mbrojtjes në Nikozo se Ukraina mund të presë këtë muaj një disbursim prej 5.9 miliardë eurosh nga një mekanizëm i ri huaje me vlerë 90 miliardë euro, i destinuar për mbështetjen e ushtrisë dhe financave të saj.

Ministrat e BE-së kanë nisur gjithashtu diskutimet për përdorimin e 6,6 miliardë eurove nga një fond i veçantë armësh. Sipas Kallas, fondet mund të përdoren për të rimbursuar pjesërisht vendet anëtare për dërgesat e mëparshme të armëve, për blerje të përbashkëta të reja ushtarake dhe për mbështetjen e misionit evropian të trajnimit ushtarak në Ukrainë.

Po ashtu, ministrat e Jashtëm të BE-së pritet të vendosin javën e ardhshme sanksione ndaj më shumë se 80 individëve dhe entiteteve për mbështetjen e tyre ndaj Rusisë. Masat synojnë sektorin ushtarako-industrial rus, shkelësit e të drejtave të njeriut dhe propagandistët pro-Kremlinit. /Ad.Ab./

The post BRUKSEL – BE forcon mbështetjen për Ukrainën me disbursime dhe fonde të reja appeared first on Agjencia Telegrafike Shqiptare.

TEHERAN, 8 qersshor /ATSH-DPA/- Irani njoftoi sot ndërprerjen e sulmeve ndaj Izraelit, pasi, sipas autoriteteve iraniane, kishte dhënë një “përgjigje të dhimbshme” ndaj sulmeve izraelite në Liban.

Deklarata u transmetua nga radioja shtetërore iraniane dhe erdhi pas një shkëmbimi të ashpër sulmesh midis dy vendeve gjatë natës dhe mëngjesit të sotëm, në përshkallëzimin më serioz që nga hyrja në fuqi e armëpushimit të luftës SHBA-Izrael kundër Iranit në prill.

Irani lëshoi raketa drejt Izraelit mbrëmë, duke e cilësuar veprimin si përgjigje ndaj sulmeve izraelite në kryeqytetin libanez, Beirut. Si kundërpërgjigje, Izraeli goditi objektiva në të gjithë territorin iranian në orët e para të së hënës, ndërsa sulmet iraniane vazhduan.

Përshkallëzimi i ri përbën një goditje për përpjekjet e presidentit amerikan Donald Trump për t’i dhënë fund konfliktit. Trump u bëri thirrje të dyja palëve të ndalin menjëherë sulmet, ndërsa raportimet tregojnë se ai i kishte kërkuar kryeministrit izraelit Benjamin Netanyahu të shmangte hakmarrjen pas goditjeve iraniane.

Vetëm pak orë më vonë, udhëheqja ushtarake iraniane njoftoi papritur përfundimin e operacioneve. Në deklaratë thuhej se Republika Islamike kishte dhënë një “përgjigje të dhimbshme” në mbështetje të Libanit dhe se, në këto rrethana, operacionet e forcave të armatosura po pezulloheshin.

Megjithatë, mbetet e paqartë nëse ky njoftim do të sjellë një ulje të qëndrueshme të tensioneve në rajon, pasi situata midis Iran dhe Israel vazhdon të mbetet e brishtë dhe e paparashikueshme. /Ad.Ab./

The post TEHERAN – Irani shpall fundin e sulmeve ndaj Izraelit pas përshkallëzimit të ri të konfliktit appeared first on Agjencia Telegrafike Shqiptare.

BRUKSEL, 8 qershor /ATSH-DPA/ – Zyrtarët më të lartë të Bashkimit Evropian kanë përgëzuar kryeministrin e Armenisë, Nikol Pashinyan, i cili siguroi fitoren në zgjedhjet parlamentare të vendit.

“Armenia mund të mbështetet te ne”, deklaroi presidentja e Komisionit Evropian, Ursula von der Leyen. “Brukseli e vlerëson partneritetin me një Armeni demokratike që po afrohet gjithnjë e më shumë me Evropën”, theksoi ajo.

Marrëdhëniet me Rusin[ ishin tema kryesore e fushatës zgjedhore. Në muajt e fundit, tensionet mes Moskës dhe Jerevanit janë rritur ndjeshëm për shkak të përpjekjeve të Armenisë për të forcuar lidhjet me  Bashkimin Evropian.

Shefja e diplomacisë së BE-së, Kaja Kallas, tha se rezultatet paraprake tregojnë se qytetarët armenë, pavarësisht presionit të madh nga Rusia, kanë zgjedhur një të ardhme evropiane.

Ndërkohë, presidenti i European Council, Antonio Costa, vlerësoi se votuesit armenë kanë mbështetur një të ardhme të bazuar në paqe, stabilitet dhe bashkëpunim më të ngushtë me fqinjët dhe komunitetin ndërkombëtar.

“BE-ja dhe Armenia po ndërtojnë lidhje më të forta mes qytetarëve të tyre dhe po krijojnë mundësi të reja në sektorët e energjisë, tregtisë dhe digjitalizimit”, shtoi Costa.

The post BRUKSEL – BE përshëndet fitoren e Pashinyanit në zgjedhjet parlamentare në Armeni appeared first on Agjencia Telegrafike Shqiptare.

UASHINGTON, 8 qershor /ATSH – DPA/ – Presidenti amerikan Donald Trump, u bëri thirrje Izraelit dhe Iranit që të ndalojnë menjëherë sulmet e ndërsjella, pas përshkallëzimit të ri të tensioneve në Lindjen e Mesme.

Në një mesazh të publikuar sot në rrjetin e tij social, Trump deklaroi se “Izraeli dhe Irani duhet të ndalojnë menjëherë të shtënat”, duke kërkuar uljen e tensioneve mes dy rivalëve rajonalë.

Thirrja e presidentit amerikan vjen pasi Irani ndërmori një sulm me raketa ndaj Izraelit të dje në mbrëmje, ndërsa Izraeli reagoi me kundërsulme sot në mëngjes, duke rritur frikën për një përshkallëzim më të gjerë të konfliktit.

Në një intervistë për gazetën “Financial Times, Trump theksoi se është ai që drejton politikën amerikane në krizën e Lindjes së Mesme dhe jo kryeministri izraelit Benjamin Netanyahu. “Unë i marr të gjitha vendimet. Ai nuk i merr vendimet”, citohet të ketë thënë Trump.

Sipas raportimeve të transmetuesit amerikan Fox News, Trump i ka kërkuar Netanyahut të shmangë hakmarrjen e mëtejshme ndaj Iranit, ndërsa paralelisht ka nxitur Teheranin të rikthehet në tryezën e negociatave për të arritur një marrëveshje.

Presidenti amerikan u shpreh optimist se një marrëveshje midis SHBA-së dhe Iranit mund të arrihet pavarësisht tensioneve të fundit. Ai shtoi se sulmet e reja nuk do ta pengojnë procesin diplomatik dhe se Netanyahu, sipas tij, “nuk do të kishte zgjidhje tjetër” veçse të pranonte një marrëveshje të negociuar nga Uashingtoni me Teheranin. /Ad.Ab./

The post SHBA – Trump kërkon ndalimin e menjëhershëm të sulmeve mes Izraelit dhe Iranit appeared first on Agjencia Telegrafike Shqiptare.

NJU JORK, 8 qershor /ATSH/ – Ceremonia e 79-të e çmimeve Tony, e zhvilluar në Nju Jork, shpërbleu disa nga prodhimet më të suksesshme të sezonit në Broadwa, sipas AP.

Më poshtë vijojnë fituesit

• Muzikali më i mirë: “Schmigadoon”
• Drama më e mirë: “Liberation”

Çmimet për interpretimin në dramë

• Aktorja më e mirë në rol kryesor: Lesley Manville për shfaqjen “Oedipus”
• Aktori më i mirë në rol kryesor: John Lithgow për shfaqjen “Giant”

Ringjalljet më të mira

• Ringjallja më e mirë e një muzikali: “Ragtime”
• Ringjallja më e mirë e një drame: “Arthur Miller’s Death of a Salesman”

Çmimet për interpretimin në muzikal

• Aktorja më e mirë në rol kryesor: Caissie Levy
• Aktori më i mirë në rol kryesor: Joshua Henry

Rolet dytësore

• Aktori më i mirë dytësor në dramë: Alden Ehrenreich
• Aktorja më e mirë dytësore në dramë: Laurie Metcalf
• Aktorja më e mirë dytësore në muzikal: Shoshana Bean
• Aktori më i mirë dytësor në muzikal: Ali Louis Bourzgui

Regjia dhe krijimi artistik

• Regjia më e mirë e një muzikali: Zhailon Levingston dhe Bill Rauch për “Cats”: The Jellicle Ball
• Regjia më e mirë e një drame: Joe Mantello
• Muzika dhe tekstet origjinale më të mira: Schmigadoon!, krijuar nga Cinco Paul
• Libri më i mirë i një muzikali: Cinco Paul për “Schmigadoon”
• Koreografia më e mirë: Omari Wiles dhe Arturo Lyons për “Cats, The Jellicle Ball”.

“Schmigadoon!” ishte fituesi më i madh i mbrëmjes në kategoritë kryesore të muzikaleve, ndërsa “Arthur Miller’s Death of a Salesman” dhe “Ragtime” dominuan kategoritë e ringjalljeve /Ad.Ab./

The post KINEMA – Fituesit kryesorë të çmimeve “Tony 2026” appeared first on Agjencia Telegrafike Shqiptare.

PHENIAN, 8 qershor /ATSH-AFP/- Presidenti kinez, Xi Jinping, mbërriti sot në Korenë e Veriut për një vizitë zyrtare të rrallë, duke riafirmuar marrëdhëniet e ngushta mes dy vendeve në një periudhë tensionesh të larta ndërkombëtare.

Në mbërritjen e tij në Phenian, Xi u prit nga lideri koreanoverior Kim Jong Un dhe bashkëshortja e tij Ri Sol-ju, ndërsa ceremonia u shoqërua me nderime ushtarake, flamuj të të dy vendeve dhe pankarta që lavdëronin miqësinë tradicionale kino-verikoreane.

Vizita është e para e Xi Jinping në Korenë e Veriut që nga viti 2019 dhe zhvillohet pasi ai priti në Pekin presidentin amerikan Donald Trump dhe presidentin rus Vladimir Putin. Kina mbetet partneri më i madh tregtar dhe mbështetësi kryesor ekonomik i Koresë së Veriut, e cila prej vitesh përballet me sanksione ndërkombëtare për shkak të programeve të saj bërthamore dhe raketore.

Në një artikull të botuar në gazetën zyrtare verikoreane “Rodong Sinmun”, Xi theksoi se miqësia mes Kinës dhe Koresë së Veriut është “e pathyeshme”, pavarësisht ndryshimeve në situatën ndërkombëtare. Ai u zotua për thellimin e bashkëpunimit dhe koordinimit mes dy vendeve, duke nënvizuar rëndësinë strategjike të marrëdhënieve dypalëshe për stabilitetin rajonal.

Vizita vjen në një kohë kur bisedimet për programin bërthamor të Koresë së Veriut me Shtetet e Bashkuara  të Amerikës mbeten të bllokuara. Edhe pse Uashingtoni dhe Pekini kanë deklaruar se mbështesin denuklearizimin e Gadishullit Korean, zyrtarë verikoreanë kanë përsëritur se programi bërthamor i vendit nuk është i negociueshëm. Motra e presidnetit Kim Jong Un deklaroi së fundmi se armët bërthamore përbëjnë “një vijë pa kthim” për Phenianin.

Analistët vlerësojnë se Kina po i kushton më shumë rëndësi ruajtjes së stabilitetit në kufijtë e saj sesa ushtrimit të presionit ndaj Koresë së Veriut për heqjen dorë nga arsenali bërthamor. Sipas tyre, Pekini e konsideron Phenianin një shtet tampon të rëndësishëm përballë pranisë ushtarake amerikane në rajon dhe dëshiron të ruajë ndikimin e tij në vend, veçanërisht në një kohë kur marrëdhëniet mes Koresë së Veriut dhe Rusisë janë forcuar ndjeshëm.

Gjatë vizitës pritet që Xi Jinping dhe Kim Jong Un të diskutojnë për bashkëpunimin ekonomik, zhvillimet e sigurisë rajonale dhe koordinimin diplomatik. Ekspertët nuk presin përparime të rëndësishme në çështjen bërthamore, por e shohin takimin si një sinjal të qartë se Pekini dhe Pheniani synojnë të forcojnë partneritetin e tyre strategjik në kushtet e një mjedisi ndërkombëtar gjithnjë e më të ndërlikuar. /Ad.Ab./

The post KORE E VERIUT- Xi në Phenian për bisedime me Kim Jong Un mbi bashkëpunimin dhe sigurinë në rajon appeared first on Agjencia Telegrafike Shqiptare.

MANILA, 8 qershor /ATSH-DPA/ – Një tërmet me fuqi 7,8  ballë të shkallës Rihter  goditi sot  në mëngjes ishullin Mindanao në jug të Filipineve, duke shkaktuar të paktën 20 viktima dhe mbi 120 të plagosur.

Lëkundjet e forta nxitën paralajmërime për cunami në disa vende të rajonit, të cilat u hoqën disa orë më vonë pasi rreziku u vlerësua si i kufizuar.

Sipas Institutit filipinas të Vullkanologjisë dhe Sizmologjisë (Phivolcs), tërmeti ndodhi në orën 07:37 sipas kohës lokale, me epiqendër në jugperëndim të qytetit Maasim, në provincën Sarangani. Fillimisht, Qendra e Paralajmërimit për Cunami në Paqësor dhe Shërbimi Gjeologjik i SHBA-ve (USGS) e vlerësuan magnitudën në 8.2, por më pas e korrigjuan në 7.8.ë

Menjëherë pas goditjes, autoritetet filipinase lëshuan paralajmërim për cunami, duke paralajmëruar për valë deri në 3 metra në disa zona bregdetare. Banorëve të zonave pranë detit iu kërkua të largoheshin drejt vendeve më të sigurta. Paralajmërime të ngjashme u shpallën edhe në pjesë të Indonezisë dhe përgjatë disa segmenteve të bregdetit të Paqësorit në Japoni.

Nga viktimat e raportuara deri tani, shtatë humbën jetën në qytetin General Santos, një nga zonat më të prekura nga tërmeti. Tre persona u vranë në qytetin Glan të provincës Sarangani, dy të tjerë në Tupi të provincës South Cotabato dhe tre në provincën Davao Occidental. Autoritetet theksuan se bilanci mund të ndryshojë pasi operacionet e kërkim-shpëtimit vazhdojnë.

Zyrtarët e mbrojtjes civile njoftuan se ekipet e emergjencës po punojnë për të nxjerrë persona që dyshohet se kanë mbetur të bllokuar në ndërtesa të dëmtuara, përfshirë një shkollë. Vlerësimi i dëmeve materiale dhe numri i saktë i viktimave janë ende në proces.

Pamjet e publikuara në rrjetet sociale treguan ndërtesa të shembura ose pjesërisht të dëmtuara në rajonin e Mindanaos. Shërbimet e energjisë elektrike dhe telekomunikacionit u ndërprenë në disa zona, ndërsa autoritetet pezulluan mësimin në shkolla dhe aktivitetin në një pjesë të zyrave publike e private.

Presidenti filipinas, Ferdinand Marcos Jr., urdhëroi menjëherë marrjen e masave emergjente dhe u bëri thirrje qytetarëve të ndjekin udhëzimet e autoriteteve. Ndërkohë, paralajmërimet për cunami u hoqën pasi valët e regjistruara arritën deri në 1.4 metra në Filipine dhe mbetën të kufizuara edhe në Indonezi. Rajoni i Mindanaos ndodhet në të ashtuquajturin “Unaza e Zjarrit” e Paqësorit, një nga zonat më aktive sizmike dhe vullkanike në botë. /Ad.Ab./

The post FILIPINE- Të paktën 20 të vdekur dhe mbi 120 të plagosur pas një tërmeti në jug të vendit appeared first on Agjencia Telegrafike Shqiptare.

LONDËR, 8 qershor/ATSH-AFP/-  Presidenti ukrainas Volodymyr Zelensky zhvilloi  në mesnatë bisedime urgjente në Londër me kryeministrin britanik Keir Starmer, presidentin francez Emmanuel Macron dhe kancelarin gjerman Friedrich Merz, pas sulmeve të reja ruse me raketa hipersonike ndaj Ukrainës.

Liderët diskutuan nevojën urgjente për forcimin e mbrojtjes ajrore të Ukrainës dhe rritjen e kapaciteteve për goditje në thellësi të territorit rus.

Takimi u zhvillua vetëm disa orë pasi një sulm me dron dëmtoi një objekt të ruajtjes së karburantit bërthamor të përdorur pranë centralit b[rthamor të Çernobitl.

Katër liderët dënuan sulmet masive ruse me raketa dhe dronë dhe i kërkuan presidentit rus Vladimir Putin të pranojë një armëpushim të menjëhershëm dhe të plotë si pikënisje për negociatat e paqes.

Sipas zyrës së kryeministrit britanik, u diskutua zgjerimi i prodhimit të raketave interceptuese, si dhe zhvillimi i përbashkët i sistemeve kundër raketave balistike dhe armëve me rreze të gjatë veprimi. Liderët synojnë të sigurojnë mbështetje shtesë për Ukrainën në samitin e ardhshëm të G7 dhe të nxisin sanksione të reja ekonomike kundër Rusisë, si dhe më shumë ndihmë ushtarake në samitin e NATO-s në korrik.

Takimi erdhi në një moment kur Ukraina po intensifikon sulmet e saj ndaj objektivave strategjikë rusë. Dronët ukrainas kanë goditur depo karburanti, porte ushtarake dhe infrastruktura të tjera në Shën Peterburg dhe në Krime, duke shkaktuar probleme logjistike dhe mungesa karburanti në disa zona të kontrolluara nga Rusia.

Presidenti Zelensky deklaroi se Ukraina nuk do të dorëzohet dhe se do të vazhdojë t’u përgjigjet sulmeve ruse. Ai theksoi se mbështetja për mbrojtjen ajrore është jetike jo vetëm për Ukrainën, por edhe për sigurinë e gjithë Evropës. Gjithashtu, ai vlerësoi ndihmën e aleatëve perëndimorë për forcimin e mbrojtjes së vendit.

Ndërkohë, Zelensky e cilësoi si “jashtëzakonisht të neveritshëm” sulmin ndaj objektit pranë Çernobilit, duke theksuar se nuk pati rritje të niveleve të rrezatimit. Ai akuzoi Rusinë për rritje të vazhdueshme të agresivitetit, ndërsa luftimet vazhdojnë në disa rajone të Ukrainës, përfshirë Zaporizhian dhe Dnipropetrovsk Oblast, ku sulmet ruse shkaktuan viktima civile. /Ad.Ab./

The post BM – Zelensky takon aleatët kryesorë evropianë në Londër mes përshkallëzimit të luftës appeared first on Agjencia Telegrafike Shqiptare.

ROMË, 6 qershor /ATSH/ – Programi Botëror i Ushqimit dhe Organizata e Kombeve të Bashkuara për Ushqimin dhe Bujqësinë paralajmërojnë se uria po përkeqësohet në disa nga rajonet më të prekura të botës, ndërsa konfliktet, krizat ekonomike dhe kushtet ekstreme klimatike vazhdojnë të rëndojnë situatën, sipas AP.

Sipas raportit të tyre më të fundit, zonat me rrezikun më të lartë përfshijnë pjesë të Sudan, Palestinës, Sudanin e Jugut, Haitin dhe Mali, ku miliona njerëz përballen me mungesa të rënda ushqimore.

Në Sudan, luftimet e vazhdueshme kanë shkaktuar zhvendosje masive të popullsisë dhe vështirësi të mëdha në shpërndarjen e ndihmave humanitare.

Agjencitë e OKB-së paralajmërojnë se situata mund të përkeqësohet edhe më tej në muajt e ardhshëm.

Raporti thekson gjithashtu se konfliktet në Lindjen e Mesme, përfshirë pasojat e luftës në Gaza, kanë rritur ndjeshëm pasigurinë ushqimore dhe varësinë nga ndihmat ndërkombëtare.

Ndërkohë, vende si Afganistani dhe Somalia vazhdojnë të përballen me kombinimin e varfërisë së thellë, thatësirave dhe mungesës së financimeve humanitare, duke vënë në rrezik miliona banorë.

OKB-ja u bën thirrje donatorëve ndërkombëtarë të rrisin urgjentisht mbështetjen financiare për programet e ndihmës, duke paralajmëruar se pa veprim të shpejtë, numri i njerëzve të përballur me uri akute mund të rritet ndjeshëm gjatë këtij viti. /Ad.Ab./

The post ROMË – OKB: Uria po përkeqësohet në pikat më të nxehta të botës appeared first on Agjencia Telegrafike Shqiptare.

NORMANDI, 6 qershor /ATSH- DPA/ -Sekretari amerikan i Shtetit, Pete Hegseth i bëri thirrje vendeve evropiane të marrin masa më të forta kundër emigracionit të paligjshëm, gjatë ceremonive për 82-vjetorin e zbarkimit aleat në Normandi, duke e krahasuar situatën aktuale me një “pushtim” të brigjeve evropiane.

Duke folur në varrezat ushtarake amerikane në Colleville-sur-Mer, sekretari i Mbrojtjes deklaroi se sot “plazhe të ndryshme europiane po sulmohen nga ideologji të rrezikshme”, duke iu referuar mbërritjes së emigrantëve me anije në vende si Spanja, Italia, Greqia dhe Bullgaria.

Hegseth pyeti se kur kryeqytetet europiane do të veprojnë ndaj asaj që ai e quajti “pushtim”, duke përsëritur argumentet e administratës së presidentit Donald Trump se emigracioni masiv përbën kërcënim për qytetërimin evropian.

Ai u kërkoi gjithashtu aleatëve evropianë të shtojnë kontributin e tyre në mbrojtje, duke theksuar se siguria dhe paqja mund të garantohen vetëm përmes forcës ushtarake dhe bashkëpunimit të ngushtë transatlantik.

“Amerika do të udhëheqë, por aleatët tanë duhet të jenë krah për krah me ne kur ka rëndësi”, tha Hegseth, duke nënvizuar se aleancat duhet të bazohen në veprime konkrete dhe sakrifica të përbashkëta, jo vetëm në deklarata politike.

Zbarkimi në  Normandi më 6 qershor 1944 ishte operacioni më i madh amfib në histori.

Mbi 132 mijë ushtarë aleatë nga SHBA-ja, Britania, Kanadaja dhe vende të tjera zbarkuan në brigjet franceze, duke i hapur rrugën çlirimit të Evropës Perëndimore nga Gjermania naziste. /Ad Ab./

The post NORMANDI – Hegseth u kërkon vendeve evropiane më shumë vendosmëri ndaj emigracionit appeared first on Agjencia Telegrafike Shqiptare.

UASHINGTON, 6 qershor /ATSH/ – Administrata e presidentit amerikan Donald Trump po shqyrton mundësinë e reduktimit të numrit të trupave amerikane të dislokuara në Evropë, si pjesë e një përpjekjeje për të ulur kostot dhe për të rishikuar angazhimet ushtarake të SHBA-së jashtë vendit, sipas AP.

Sipas zyrtarëve amerikanë, Pentagoni po analizon opsione të ndryshme që mund të përfshijnë tërheqjen ose zhvendosjen e mijëra ushtarëve nga disa vende evropiane.

Qëllimi është të sigurohet një përdorim më efikas i burimeve financiare dhe ushtarake.

Aktualisht, Shtetet e Bashkuara kanë dhjetëra mijëra trupa në Evropë, të vendosura kryesisht pas nisjes së luftës në Ukrainë në vitin 2022, me synimin për të forcuar mbrojtjen e aleatëve të NATO-s dhe për të frenuar kërcënimet e mundshme nga Rusia.

Mbështetësit e reduktimit tē trupave  argumentojnë se Evropa duhet të marrë një barrë më të madhe për mbrojtjen e saj, ndërsa SHBA-ja duhet të përqendrojë më shumë burime në sfida të tjera globale, përfshirë rajonin e Indo-Paqësorit.

Nga ana tjetër, kritikët paralajmërojnë se një tërheqje e konsiderueshme e forcave amerikane mund të dobësojë aftësinë parandaluese të NATO-s dhe të dërgojë sinjale të gabuara në një periudhë tensionesh të larta gjeopolitike.

Vendimi përfundimtar ende nuk është marrë, por debati pasqyron diskutimet më të gjera mbi rolin e SHBA-së në sigurinë evropiane dhe ndarjen e përgjegjësive mes aleatëve të NATO-s. /Ad.Ab./

The post UASHINGTON- SHBA shqyrton uljen e pranisë ushtarake në Evropë appeared first on Agjencia Telegrafike Shqiptare.

KAJRO, 6 qershor /ATSH-DPA/ –  Bahreini dhe Kuvajti kanë shtuar kritikat ndaj Iranit, pasi e akuzuan Republikën Islamike për lëshimin e raketave dhe dronëve drejt territoreve të tyre. Të dy vendet e Gjirit thanë se kanë arritur të interceptojnë disa prej mjeteve ajrore pa pilot.

Ministria e Jashtme e Kuvajtit i cilësoi sulmet iraniane si “të përsëritura dhe të neveritshme”, duke deklaruar se ato nuk mund të justifikohen apo pranohen në asnjë rrethanë. Sipas saj, këto veprime përbëjnë një agresion të hapur që rrezikon jetën e qytetarëve dhe cenon sigurinë e stabilitetin rajonal.

Edhe autoritetet e Bahreinit akuzuan Iranin për vazhdimin e një “kursi sistematik armiqësor”, duke pretenduar se raketat dhe dronët kishin në shënjestër objektiva civile. Ministria e Jashtme e Bahreinit i bëri thirrje Teheranit të ndalojë sulmet dhe të zgjedhë rrugën e paqes, duke i cilësuar veprimet e tij si shkelje flagrante të sovranitetit të Bahreinit dhe Kuvajtit.

Bahreini theksoi se mbetet i përkushtuar ndaj paqes dhe stabilitetit në rajon, por paralajmëroi se mbrojtja e sovranitetit, sigurisë dhe qytetarëve të tij është një “vijë e kuqe” për të cilën nuk do të bëjë kompromis.

Forcat e armatosura të Bahreinit njoftuan se sistemet e mbrojtjes ajrore kanë rrëzuar tre raketa dhe një numër të pacaktuar dronësh. Ndërkohë, ushtria kuvajtiane raportoi se ka neutralizuar sulme të tjera me raketa dhe dronë, ndërsa trafiku ajror në vend rifilloi pas mbylljes së përkohshme të hapësirës ajrore.

Komanda Qendrore e SHBA-së (CENTCOM) deklaroi se ka interceptuar gjashtë raketa balistike iraniane të drejtuara ndaj Kuvajtit dhe Bahreinit, ndërsa një raketë e shtatë nuk arriti objektivin.

Garda Revolucionare Iraniane (IRGC) tha se sulmet ndaj bazave amerikane në rajon ishin një kundërpërgjigje ndaj goditjeve të kryera më herët nga Shtetet e Bashkuara.

Që prej nisjes së fushatës ushtarake amerikano-izraelite kundër Iranit në fund të shkurtit, Teherani ka ndërmarrë disa sulme ndaj shteteve të Gjirit që strehojnë baza ushtarake amerikane. /Ad.Ab./

The post FOKUS- Bahreini dhe Kuvajti ashpërsojnë akuzat ndaj Iranit pas sulmeve me raketa dhe dronë appeared first on Agjencia Telegrafike Shqiptare.

LONDËR, 6 qershor /ATSH/ – Një valë e re influencuesish të shëndetit, përfshirë Dave Asprey, po e promovojnë nikotinën si një substancë me përfitime të mëdha për trurin dhe jetëgjatësinë, sipas Reuters.

Ata pretendojnë se nikotina mund të përmirësojë funksionin njohës, madje edhe të ndihmojë në kthimin mbrapsht të sëmundjeve si Alzheimeri.

Në rrjetet sociale, nikotina po paraqitet si një produkt “natyral”, duke u krahasuar me produkte të tjera alternative që shpesh kundërshtojnë mjekësinë tradicionale.

Figura publike si Jillian Michaels dhe Tucker Carlson kanë ndikuar në përhapjen e këtyre ideve.

Michaels ka deklaruar se përdor doza të ulëta nikotine për përqendrim dhe për mbrojtje të mundshme ndaj sëmundjeve neurodegjenerative, ndërsa Carlson i ka quajtur produktet me nikotinë si mjete që rrisin produktivitetin dhe energjinë. Këto deklarata kanë ndihmuar që nikotina të shihet nga disa si një suplement i dobishëm.

Megjithatë, ekspertët e shëndetit paralajmërojnë se këto pretendime janë të ekzagjeruara.

Studiues si Jeremiah Mock theksojnë se nikotina është një substancë aktive biologjikisht dhe mund të jetë e dëmshme. Ajo rrit tensionin e gjakut, ndikon në sistemin kardiovaskular dhe krijon varësi të fortë.

Paraqitja e saj si e padëmshme ose “shëruese” nuk përputhet me provat shkencore.

Disa influencues mbështeten në studime shkencore, si ato të Paul Newhouse, të cilat tregojnë se nikotina mund të përmirësojë përqendrimin në disa raste të veçanta, si tek personat me dëmtime të lehta njohëse.

Por edhe vetë studiuesit theksojnë se këto efekte janë të kufizuara dhe nuk justifikojnë pretendimet për parandalim apo trajtim të Alzheimerit ose Parkinsonit.

Ekspertë të tjerë si Jonathan Foulds dhe Adam Leventhal shpjegojnë se efekti i nikotinës është i përkohshëm. Ajo mund të rrisë vigjilencën në situata monotone, por nuk të bën më inteligjent apo më krijues. Me kalimin e kohës, trupi krijon tolerancë dhe rreziku i varësisë rritet. /Ad.Ab./

The post MJEKËSI – Nikotina promovohet si ndihmë për trurin, ekspertët paralajmërojnë për rreziqet appeared first on Agjencia Telegrafike Shqiptare.

PARIS, 6 qershor /ATSH-AFP/  – Ish-Zonja e Parë e Francës, Bernadette Chirak, ndërroi sot jete në moshën 93 vjeç

Presidenti francez Emmanuel Macron i bëri homazh sot  vejushës së ish-presidentit Jacques Chirac përmes një mesazhi në rrjetin social X.

“Një zonjë bujare na la. Kombi ndan dhimbjen me familjen e saj, të afërmit dhe të gjithë ata që e deshën”, shkroi Macron.

Bernadette Chirac gëzonte popullaritet të madh në Francë dhe ishte një këshilltare e rëndësishme e bashkëshortit të saj gjatë gjithë karrierës së tij të gjatë politike.

“Ajo është gruaja e jetës sime; së bashku kemi arritur kaq shumë”, kishte shkruar Jacques Chirac në kujtimet e tij.

Ai u nda nga jeta në vitin 2019, në moshën 86-vjeçare.

Bernadette Chirac mbetet deri më sot e vetmja Zonjë e Parë franceze që ka mbajtur edhe vetë një post politik.

Nga viti 1979 deri në vitin 2015 ajo ishte anëtare e këshillit të përgjithshëm të departamentit të Corrèze.

Çifti u njoh gjatë studimeve në “Sciences Po’,  një nga institucionet më prestigjioze të arsimit të lartë në Francë, dhe u martuan në vitin 1956. /Ad.Ab./

The post FRANCÊ – Bernadette Chirac, figura e njohur e politikës shuhet në moshën 93-vjeçare appeared first on Agjencia Telegrafike Shqiptare.

LONDËR, 6 qershor /ATSH/ – Shkencëtarët po studiojnë një grup shumë të rrallë njerëzish të quajtur “elite controllers” (kontrollues elitarë), organizmi i të cilëve arrin të mbajë nën kontroll virusin HIV pa pasur nevojë për trajtim. Një nga rastet më të njohura ishte ai i Loreen Willenberg, e cila rezultoi pozitive me HIV në vitin 1992, por jetoi për më shumë se tre dekada pa marrë ilaçe antiretrovirale dhe pa zhvilluar AIDS, sipas BBC!

Edhe pse HIV zakonisht sulmon sistemin imunitar dhe dobëson gradualisht aftësinë e organizmit për t’u mbrojtur nga infeksionet, te kontrolluesit elitarë ndodh diçka e pazakontë. Sistemi i tyre imunitar arrin të shtypë virusin në nivele aq të ulëta sa ai bëhet pothuajse i pazbulueshëm.

Kjo ndodh vetëm te rreth 0,5% e personave të infektuar me HIV.

Rasti i Willenbergut u bë edhe më i jashtëzakonshëm kur ajo u diagnostikua me kancer në stad të avancuar në vitin 2022. Trajtimet kundër kancerit dobësuan sistemin e saj imunitar, gjë që teorikisht do të duhej t’i jepte mundësi HIV-it të rikthehej.

Megjithatë, studiuesit nuk arritën të gjenin shenja të virusit në miliarda qeliza të analizuara.

Sipas Xu Yu, profesoreshë në “Ragon Institute”, analizat e detajuara nuk zbuluan asnjë virus aktiv në organizmin e Willenbergut.

Kjo ka bërë që shumë shkencëtarë të besojnë se ajo mund të ketë arritur një lloj shërimi natyror nga HIV-i, diçka që deri para pak vitesh konsiderohej pothuajse e pamundur.

Një rast i ngjashëm është edhe ai i të ashtuquajturës Esperanza patient në Argjentinë, e cila gjithashtu mendohet se mund të jetë çliruar natyrshëm nga virusi.

Këto raste po u japin studiuesve shpresë se mekanizmat mbrojtës të këtyre individëve mund të përdoren për të zhvilluar terapi të reja ose madje një kurë për HIV-in.

Normalisht, HIV-i fut materialin e tij gjenetik në ADN-në e qelizave dhe krijon rezervuarë të fshehur në organizëm, gjë që e bën shumë të vështirë eliminimin e plotë të virusit.

Megjithatë, studimi i kontrolluesve elitarë po tregon se në rrethana shumë të rralla sistemi imunitar mund të arrijë ta neutralizojë ose ta eliminojë virusin. /Ad.Ab./

The post MJEKËSI – Shkencëtarët zbulojnë të dhëna të reja për një kurë të mundshme të HIV-it appeared first on Agjencia Telegrafike Shqiptare.

RIGA, 6 qershor /ATSH-DPA/ –  Ukraina do të përfitojë mbështetje të re financiare nga partnerët perëndimorë për të siguruar që bizneset e vendit të vazhdojnë të kenë qasje në financim gjatë luftës së vazhdueshme kundër forcave pushtuese ruse.

Në kuadër të të ashtuquajturit “Kuadër i Investimeve për Ukrainën”,  Banka Evropiane për Rindërtim dhe Zhvilllim dhe Rindërtim  (BERZH) dhe Bashkimi Evropian do të ofrojnë garanci shtesë me vlerë totale prej 200 milionë eurosh.

Gjithashtu do të vihen në dispozicion 105 milionë euro grante dhe 10 milionë euro ndihmë teknike, njoftuan të dy institucionet në kuadër te takimit vjetor të BERZH-it në Riga.

Përveç kësaj, është nisur edhe një program i ri për mbështetjen e sektorit privat ukrainas.

Në total, bashkëfinancimi pritet të mundësojë dhënien e kredive të reja me vlerë rreth 2 miliardë euro në Ukrainë përmes institucioneve financiare partnere të BERZH-it. /Ad.Ab./

The post RIGA – Ukraina merr 200 milionë euro ndihmë financiare nga BERZH dhe BE-ja appeared first on Agjencia Telegrafike Shqiptare.

UASHINGTON, 5 qershor /ATSH/ – Shtetet e Bashkuara të Amerikë su kanë kërkuar aleatëve evropianë të NATO-s dhe Kanadasë që të rrisin me shpejtësi numrin e avionëve me pilot, dronëve dhe anijeve luftarake që vënë në dispozicion të aleancës, ndërsa Uashingtoni po redukton gradualisht kontributin e tij në këto fusha, sipas Reuters.

Deklarata u bë nga gjenerali i Forcave Ajrore amerikane Alexus Grynkewich, komandanti më i lartë ushtarak i NATO-s në Evropë, pas një vendimi të administratës së presidentit Donald Trump për të zvogëluar kapacitetet ushtarake amerikane të disponueshme për aleancën në rast krize.

Presidenti Trump ka deklaruar vazhdimisht se vendet evropiane duhet të marrin përgjegjësinë kryesore për mbrojtjen konvencionale të kontinentit dhe të mos varen në masë të madhe nga SHBA-ja.

Muajin e kaluar, Uashingtoni njoftoi aleatët për uljen e kontributit në të ashtuquajturin “Modeli i Forcave të NATO-s”, një strukturë që përfshin forca të gatshme për t’u aktivizuar gjatë krizave ose konflikteve.

Sipas burimeve ushtarake, reduktimet amerikane do të prekin një gamë të gjerë kapacitetesh, përfshirë avionët furnizues me karburant në ajër, avionët luftarakë, dronët dhe anijet e marinës.

Grynkewich tha se avionët me pilot, dronët dhe mjetet detare janë fusha ku vendet evropiane dhe Kanadaja mund të mbushin boshllëkun që po krijohet nga reduktimi i pranisë amerikane.

“Ka pasur një varësi jo të shëndetshme të Modelit të Forcave të NATO-s nga forcat amerikane. Presidenti Trump dhe sekretari i Mbrojtjes, Pete Hegseth, e kanë bërë të qartë se kjo duhet të ndryshojë,” deklaroi ai.

Megjithatë, NATO këmbëngul se këto ndryshime nuk pritet të krijojnë boshllëqe në mbrojtjen e aleancës.

Zëdhënësi i komandës ushtarake të NATO-s, koloneli amerikan Martin O’Donnell, tha se aleatët tashmë kanë ose do të kenë së shpejti kapacitete të mjaftueshme për të zëvendësuar asetet amerikane.

Sipas planeve aktuale, numri i avionëve luftarakë amerikanë “F-15 Eagle” dhe “F-15E Strike Eagle” të disponueshëm për NATO-n do të ulet me rreth një të tretën, në 99 njësi, ndërsa numri i dronëve të zbulimit dhe vëzhgimit “MQ-9 Reaper” dhe “MQ-4” do të përgjysmohet në 12.
Burime ushtarake paralajmërojnë se reduktimi i numrit të dronëve “MQ-9” mund të ndikojë ndjeshëm në aftësitë e mbikëqyrjes dhe zbulimit të NATO-s, një element kyç për sigurinë e aleancës. /Ad.Ab./

The post UASHINGTON – SHBA i kërkon Evropës dhe Kanadasë të rrisin forcat ajrore dhe detare në NATO appeared first on Agjencia Telegrafike Shqiptare.

BERLIN, 5 qershor /ATSH-DPA/- Kancelari gjerman, Friedrich Merz, njoftoi sot se Gjermania do të kandidojë sërish për një vend jo të përhershëm në Këshillin e Sigurimit të Kombeve të Bashkuara  për mandatin 2035-2036, vetëm dy ditë pasi Berlini dështoi të sigurojë një vend në votimin më të fundit.

Kancelari Merz e bëri njoftimin në kuadër të samitit BE-Ballkani Perëndimor të mbajtur në Tivat.

Në votimin e zhvilluar të mërkurën në Asamblenë e Përgjithshme të Kombeve të Bashkuara në Nju Jork, Gjermania u mund qartë nga Austria dhe Portugalia në raundin e parë për vendet jo të përhershme të Këshillit të Sigurimit për dy vitet e ardhshme.

Gjermania mori vetëm 104 vota, ndërsa për t’u zgjedhur nevojiteshin të paktën 127 vota, që përfaqësojnë dy të tretat e 193 shteteve anëtare të OKB-së. Portugalia siguroi 134 vota, ndërsa Austria 131.

Gjermania ka qenë gjashtë herë anëtare jo e përhershme e Këshillit të Sigurimit, herën e fundit gjatë periudhës 2019-2020. Kjo ishte hera e parë që Berlini dështoi në një përpjekje për të siguruar një vend në organin më të rëndësishëm të sigurisë së OKB-së.

Ministri i Jashtëm gjerman, Johann Wadephul, ka urdhëruar një analizë të detajuar për të përcaktuar arsyet e këtij dështimi. /Ad.Ab./

The post BERLIN – Merz: Gjermania synon një vend në Këshillin e Sigurimit për mandatin 2035-2036 appeared first on Agjencia Telegrafike Shqiptare.

LUKSEMBURG, 5 qershor /ATSH/ – Gjermania ka kundërshtuar kërkesën e Komisionit Evropian për t’i dhënë fund kontrolleve në kufijtë e saj të brendshëm, duke argumentuar se ato mbeten të nevojshme për luftën kundër migracionit të paligjshëm dhe rrjeteve të trafikimit të njerëzve, sipas “Euronews”.

Ministri i Brendshëm i Gjermanisë, Alexander Dobrindt, deklaroi në Luksemburg se kontrollet kufitare po japin rezultate konkrete. “Numri i madh i kthimeve mbrapsht, ulja e migracionit të paligjshëm dhe goditja e grupeve të kontrabandës tregojnë se këto kontrolle janë efektive”, tha ai.

Komisioni Evropian u ka kërkuar Austrisë, Danimarkës, Francës, Gjermanisë, Italisë, Holandës, Sllovenisë, Suedisë dhe Norvegjisë që gradualisht të heqin kontrollet në kufijtë e brendshëm, duke argumentuar se reformat e fundit të politikës së migracionit e bëjnë këtë masë të panevojshme.

Megjithatë, Berlini këmbëngul se situata kërkon ende masa të forta sigurie. Dobrindt kërkoi gjithashtu forcimin e mbrojtjes së kufijve të jashtëm të BE-së, duke theksuar se “ndryshimi i kursit ndaj migracionit po funksionon si në Gjermani ashtu edhe në nivel evropian”.

Nga ana tjetër, Komisioneri Evropian për Çështjet e Brendshme dhe Migracionin, Magnus Brunner, tha se numri i migrantëve po bie, kufijtë e jashtëm po mbrohen më mirë dhe është koha që kontrollet e brendshme të fillojnë të hiqen gradualisht.

Debati vjen vetëm pak ditë pasi vendet e BE-së dhe Parlamenti Evropian ranë dakord për një rregullore të re që synon përshpejtimin e deportimit të migrantëve pa të drejtë qëndrimi në Evropë. Ligji i ri parashikon edhe mundësinë e ngritjes së qendrave të deportimit jashtë territorit të BE-së, një nga ndryshimet më të forta në politikën evropiane të migracionit në dekadat e fundit.

Sipas të dhënave zyrtare, aktualisht vetëm rreth 29% e migrantëve që marrin urdhër largimi largohen realisht nga Bashkimi Evropian. /Ad.Ab./

The post LUKSEMBURG – Gjermania refuzon kërkesën e BE-së për heqjen e kontrolleve të brendshme kufitare appeared first on Agjencia Telegrafike Shqiptare.

TIVAT, 5 qershor /ATSH/ – Shqipëria mori sinjale pozitive nga samiti i zhvilluar në Tivat të Malit të Zi. Ndërsa Parisi dhe Berlini mbështesin një proces të anëtarësimit gradual, drejtuesit e Bashkimit Europian vlerësojnë se Shqipëria po ecën në drejtimin e duhur drejt anëtarësimit në BE.

Presidentja Ursula von der Leyen deklaroi se objektivat e Bashkimit Europian janë të qarta: Mali i Zi pritet të bëhet anëtar në vitin 2028 dhe Shqipëria të jetë vendi i radhës që do ta ndjekë.

“Ky samit tregon se Ballkani Perëndimor po afrohet me Bashkimin Europian. Diskutuam se si ta bëjmë këtë moment edhe më të fortë. Ky është një vendim strategjik, i bazuar në bashkëpunim dhe besim. Besojmë se Mali i Zi mund të bëhet vendi i 28-të anëtar në vitin 2028. Shpresojmë që Shqipëria ta ndjekë shpejt dhe që i gjithë rajoni të ecë në të njëjtin drejtim. Çdo propozim që përmirëson procesin e zgjerimit është i mirëpritur”, theksoi Von der Leyen.

Edhe presidenti i Këshilli Europian, António Costa, vlerësoi progresin e Shqipërisë, duke theksuar se vendi ka hyrë në fazën përfundimtare të negociatave.

“Ky është një samit i suksesshëm. Gjatë vizitës sime në rajon pashë nga afër progresin e vendeve aspirante. Tani po numërojmë mbrapsht për anëtarësimin e Malit të Zi si vendi i 28-të i Bashkimit Europian”, tha Costa.

“Javën e kaluar zhvilluam konferencën e radhës ndërqeveritare për fazën finale të negociatave. Ka nisur mbyllja e tre kapitujve për Shqipërinë. Po shqyrtojmë ide të reja për të përshpejtuar procesin dhe për të rritur motivimin e vendeve kandidate”, përfundoi ai. /Ad.Ab./

The post TIVAT – BE: Shqipëria anëtarësohet pas Malit të Zi, rruga e duhur për integrim appeared first on Agjencia Telegrafike Shqiptare.